Hatun huñunakuyninchisqa kallpachawasunmi

1. ¿Imaynapin allinninchispaq kanman hatun huñunakuy?

¹ Kay millay pachapiqa askha runakunan espiritualpi yarqasqa ch’akisqa kashanku, Jehová Diosmi ichaqa llapa serviqninkunaman askha espiritual mikhuyta unuta ima qoshan (Isa. 58:11). Chaytan chaskikusun hatun huñunakuypi. Chay huñunakuy asuykamushanñataq chayqa, preparakunanchismi iñiypi hukkuna-hukkunawan kallpachanakunanchispaq. ¿Imaynatan ruwasunman? (Pro. 21:5.)

2. ¿Imakunatan kunanmantapacha ruwananchis chay huñunakuyman rinapaq?

² Kunanmantapacha allichakushay chay p’unchaykunapi kashanaykipaq yaqapaschá llank’anaykimanta permisota mañakunayki kanqa. ¿Yachankiñachu hayk’a tiempopi chayanaykita chaymantapas tiyanakunata tarinaykipaq manaraq chay huñunakuy qallarishaqtin? Manan munasunmanchu mayqen yachachikuytapas pierdekuytaqa (Isa. 65:13, 14). ¿Yachankiñachu maypi alojakuyta imaynata chayanaykitapas?

3. ¿Iman yanapawasun hatun huñunakuy sapankanchispaq familianchispaqwan allin kananpaq?

³ ¿Iman yanapasunki tukuy yuyaywan uyarinaykipaq? Chaypaqqa allintan samamunayki, discurso qoqta qhawanayki, Bibliamanta textokunata maskhanayki, pisillapitaq qelqanayki. Chaymantapas allinmi kanman familiantin kuska tiyanaykichis, chhaynapin tayta-mamakuna wawankuta yanapanqaku uyarinankupaq (Pro. 29:15). Yaqapaschá tutapi familiantin rimawaqchis ima yachasqaykichismanta. Hatun huñunakuy allinniykichispaq kananpaqqa Familiantin Diosta Yupaychana Ch’isipin t’aqwiriwaqchis chay yachachikuykunamanta.

4. ¿Imatan ruwasunman huk iñiqmasinchiskuna kallpachasqa kanankupaq?

⁴ ¿Imaynatan hukkunata yanapasunman? Munanchismi llapallanku allin kallpachasqa kanankuta. Chhaynaqa sichus iñiq t’aqapi kan kurak iñiqmasinchiskuna otaq ima sasachakuypi tarikuqkunapas chayqa, ¿yanapasunmanchu paykunata? (1 Juan 3:17, 18.) Chaykuna ruwakunanpaqqa umallikunan, astawanqa sapanka grupopi umallikuna qhawarinanku chay iñiqmasikuna yanapayta chaskinankupaq.

5. ¿Imaynatan rakisun invitacionkunata? (Qhawariy 5 paginapi recuadrota.)

⁵ Qayna watakuna hina, kinsa semana ñawpaqta manaraq hatun huñunakuy qallarishaqtin yanapakusun invitacionkuna rakiypi. Sapanka iñiq t’aqan kallpachakunan llapa territorionkupi invitacionkunata rakispa tukunankupaq. Yaqapaschá familiayki manaraq chay invitacionkunata tukurqankuchu, chhayna kaqtinqa apaychis maypi tarikuspaykichispas invitashanallaykichispaq. Askhapuni kanman chayqa huñunakuy localman apaychis, chayman chayaspan t’aqaykuspaykichis mayqen acomodadormanpas qowaqchis. Chay huñunakuypiñan willakunqa imaynatas invitashallasunman chayta. Ichaqa yuyariy hukllatapas waqaychanaykita chaymantan rimakunqa domingo p’unchayta.

6. ¿Imaynatan rikuchisunman respetoyoq kasqanchista?

⁶ Respetoyoq kasqanchisqa hukkunatan kallpachan. Kay tiempopin askha runakuna “kikinkuta munakuqkuna” kanku, chaymi mana hukkunapiqa yuyaykunkuchu ichaqa, ¡may allinmi Diospa llaqtanpi kayqa, paykunan ichaqa allin respetoyoq kanku! (2 Tim. 3:2.) ¿Imaynatan rikuchisunman respetoyoq kasqanchista? Tutamantanta 8 horata hina localpa punkunta kichaqtinkun ordenpi mana tanqanakuspa haykunanchis, tiyanakunatapas wasinchispi kaqkunapaq ñoqanchiswan kuska viajaqkunapaq otaq estudiantenchiskunallapaqmi hap’inanchis. Chaymantapas huñunakuyta qallarichiq umalli tiyaykunanchispaq nimunqa chayqa, kasukunanchismi hinallataq celularninchista programanachis ama hukkunata distraenanpaq. Chaymantapas manan parlananchischu, mensajekunatapas manan apachishananchischu, manan mikhunanchischu nitaq yanqata purikachananchischu.

7. ¿Imaynatan hukkuna-hukkunawan kallpachanakusunman?

⁷ Hukkuna-hukkunawan kallpachanakusun. Khayna huñunakuykunan yanapawanchis astawan hukkuna-hukkunawan hukllachakunanchispaq (Sal. 133:1-3). Arí, kallpachakuy huk iñiq t’aqakunamanta iñiqmasikunata reqsinaykipaq (2 Cor. 6:13). Yaqapaschá sapa p’unchay huk iñiqmasita otaq huk familiata reqsiwaq. Chaypaq chawpi p’unchayta pencionkunaman rinaykimanta otaq hawapi mikhuna rantinaykimantaqa pisillata mikhunata apakuy paykunawan kuska kanaykipaq. Chhaynapin allin bendicionkunata chaskinki allin amigokunatataq tarinki.

8. ¿Imaraykun ñoqallanchismanta ofrecekunanchis hatun huñunakuypi, imakunapin yanapakuwaq?

⁸ May allinmi Diospa llaqtanpi iñiqmasinchiskunawan llank’ayqa. Yaqapaschá ofrecekuwaq ima ruwaypipas yanapakunaykipaq otaq iñiq t’aqaykiq limpieza ruwasqanpi yanapakuwaq (Sal. 110:3, NM). Sichus mana ima asignacionniykipas kanchu chayqa qayllaykuwaqmi Departamento de Servicio Voluntario nisqaman. Askha yanapakuq kaqtinqa ima llank’anapas facilllatan kusikuywantaq ruwakun.

9. ¿Imaraykun qhawarikunanchis imayna comportakusqanchista p’achakusqanchistapas?

⁹ Allin comportakusqanchisqa hukkunatan yanapan. Manan hatun huñunakuykunallapichu allinta comportakunanchis hawapipas chhaynallataqmi kana. Imayna comportakusqanchista rikuspan runakuna reparanqaku hukniray kasqanchista (1 Ped. 2:12). Huñunakuypi, alojamientopi otaq pencionkunapiña kaspapas p’achakusqanchis allichakusqanchispas Jehová Diostan hatunchanan (1 Tim. 2:9, 10). Qhasqonchispi solapanchista apaqtinchisqa runakunan yachanqaku Jehová Diospa testigonkuna kasqanchista, chhaynapin huñunakuymanta rimapayasunman predicasunmanpas.

10. ¿Imakunan rikuchin allin comportakusqanchista?

¹⁰ ¿Imaynatan qhawarichikunanchis hatun huñunakuykunapi? Huñunakuy aparikusqan localmanta encargadon huk periodicoman nirqan: “Chaypi kaq runakunaqa allin respetoyoqmi kanku. Chaymi anchata kusichiwan sapa wata huñunakusqanku”, nispa. Qayna watan huk runa billeteranta chinkachikurqan Testigokuna alojakusqanku hotelpi. Kaqta chay billeteranta entregapuqtinkutaq hotelpa dueñon chay runata nirqan: “May allinpunin Testigokuna kay qayllallapi huñukusqankuqa chaymi kay hotelpi alojakurqanku, mana kaypichu kankuman karqan chayqa manan tariwaqchu karqan billeteraykita”, nispa.

11. Ñataq hatun huñunakuyninchis qayllaykamushanña chayqa, ¿imatan ruwananchis, imanaqtin?

¹¹ Kay watapi hatun huñunakuyqa ñan asuykamushanña. Chay huñunakuy kallpachawananchispaqmi askha tiempo llank’akurqan espiritual mikhuyta ruwaypi. Kallpachakuy chay p’unchaykunapi chay mikhuyta chaskinaykipaq. Chaymantapas hukkunata kallpachay respetoyoq kaspa, hukkunawan parlarispa allin comportakusqaykiwanpas. Chhaynapin llapallanchis qayna wata hatun huñunakuyman riq runa hina sientekusun, paymi nirqan: “Manan hayk’aqpas chaypi hinaqa ancha kusisqa sientekurqanichu”, nispa.

[4 paginapi willakuy]

Qayna watakuna hina, kinsa semana ñawpaqta manaraq hatun huñunakuy qallarishaqtin yanapakusun invitacionkuna rakiypi

[6 paginapi willakuy]

Huñunakuypi, alojamientopi otaq pencionkunapiña kaspapas p’achakusqanchis allichakusqanchispas Jehová Diostan hatunchanan

[6, 7 paginakunapi recuadro]

Hatun huñunakuypaq yuyarichiykuna

◼ Horario. Hatun huñunakuyqa iskaynin p’unchaypas tempranotan qallarinqa. Punkukunan kichakunqa pusaq horas tutamantanta. Musicata uyarinapaq willakuqtinqa llapanchismi tiyananchis, chhaynapi huñunakuyninchis sumaqta qallarinanpaq.

◼ Estacionamiento. Estacionamiento nisqatawan alquilakunqa chayqa, manan cobrakunqachu. Chayasqankuman hinan carrokunataqa estacionakunqa. “Discapacitados” nisqakunapaq t’aqasqa campo kan chayqa, manan chaypiqa estacionakunachu. Estacionamientoqa manapaschá hatunchu kanqa, chaymi allin kanman huk carrollapi askha rinkuman chayqa.

◼ Tiyanakuna. Tiyanataqa hap’isunman ñoqanchiswan kuska carropi riqkunapaq, wasinchispi tiyaqkunapaq, estudiantenchiskunallapaqwanmi (1 Cor. 13:5).

◼ Qoqawa. Chawpi p’unchay hawapi mikhunata rantishanamantaqa qoqawatan apakunanchis. Ichaqa, manan q’epitaraqchu apana aswanpas asientoq pachanpi cabenanpaq hinallan kanan nitaq vidrio cosaskunatapas apanachu.

◼ Donacionkuna. Hatun huñunakuymanta agradecekusqanchistaqa donacionninchista churaspan rikuchisunman, chaytan qosunman Huñunakuna Wasipi otaq hatun huñunakuypipas.

◼ Accidentekuna, qonqaylla imapas kaqtin. Qonqaylla pipas onqoqtinqa acomodadormanmi willana, paymi Primeros Auxilios nisqaman willanqa, hinan paykunaña yanapanqaku imayna tarikusqanman hina.

◼ Imayna zapatowan rinamanta. Zapatonchisqa allinta purinapaq hinan kanan, chhaynapin mana ima accidentepas kanqachu.

◼ Grabación. Grabanapaq aparatokunata apaspaqa manan chaywan hukkunata distraenachu, nitaq localpa corrientenman sonidoq corrientenmanpas enchufanachu.

◼ Coches para bebés, sillakuna. Huñunakuna wasimanqa manan apanachu tanqakachana cochekunata, nitaq ima sillatapas. Ichaqa apawaqchismi wawakunapaq sillakunata tiyana pataman churanapaq kaqtinqa.

◼ Sírvase visitar hojakuna. Allinmi kanman hukta otaq iskay Sírvase visitar (S-43) hojata apay, pimanpas predicaqtinchis astawan yachayta munaqtinqa chaypi anotanapaq. Chay hojata hunt’aspaqa iñiq t’aqapi secretariomanmi qonanchis huñunakuymanta kutispa (qhaway 2005 watamanta febrero killa Reinopaq Servicionchispi 6 paginata).

◼ Alojamiento. Pitapas alojayta munanki chayqa, secretario umalliwan rimay alojanapaq formulariota hunt’anaykipaq. Huk llaqtapi hatun huñunakuyman rinaykipaq alojamientota necesitanki chayqa, secretarioman willay, huk formulariota hunt’aspataq chayta qoy pay apachinanpaq. Ama huñunakuypaq pisillaña kashaqtinchu chaytaqa hunt’ay, mana chayqa alojamiento nisqapi llank’aqkunan sasachakuypi rikukunkuman (1 Cor. 14:40). Pipas wawakunantin alojakuspaqa respetanankun alojaqpa wasinta, manan imantapas llaminankuchu, malogranankuchu, nitaq ch’inlla maymanpas haykunankuchu. Alojamientoqa huñunakuy p’unchaykunallapaqmi. Manan allinchu kanman mayta rinapaqpas, ima ruwanapaqpas alojakusqayki wasipi askha p’unchay qhepakuyqa.

◼ Servicio voluntario. Hatun huñunakuyman rispaqa astawanraqmi kusikusunman sichus allinta aparikunanpaq imachus necesitakusqanpi yanapasunman chayqa (Hech. 20:35). Yanapayta munanchis chayqa Departamento de Servicio Voluntario nisqamanmi rinanchis. 16 watankumanta urayman kaq wawakunapas yanapankumanmi tayta-mamankuq qhawasqan, otaq paykunaq encargasqanku cristianoq qhawasqan.

[5 paginapi recuadro]

¿Imaynatan rakisun invitacionkunata?

Llapa predicasqanchis territoriota tukunapaqmi pisillapi rimananchis. Yaqapaschá khaynata nisunman: “Imaynalla. Pachantinpin kay invitacionta rakishayku. Kayqa qanpaqmi. Kay invitacionpin astawan yachanaykipaq willakushan”, nispa. Chay invitacionqa runakuna interesakunankupaq hinan kashan, chayrayku qoy qhawanankupaq. Tukukuy semanapi invitacionkuna rakiypi yanapakunki chayqa, qowallaqtaqmi revistakunatapas.