Astawan yachay munaqkunaman kutishallasun
1. ¿Imaraykun cheqaq kaq muhuta qarpananchis?
1 Pipas muhuta tarpuspaqa, qarpananmi sumaqta saphichakunanpaq. Chhaynallatataqmi ruwana runakunaq sonqonpi cheqaq kaq muhuta tarpuspapas (1 Cor. 3:6). Chaymi hukmanta kutinanchis, hinaspa Diospa Siminwan sumaqta qarpananchis. Chhaynapin saphichakuspa wiñanqa sumaqtataq rurunqapas.
2. ¿Imatan ruwana runakuna astawan yachayta munanankupaq?
2 Hukpi kutichinaykipaq tapuyta ruway. Preparakuspaqa imakunatas runakuna astawan yachayta munanku chaypin yuyaykunanchis, chayman hinataq hukpi kutinanchispaq huk tapuyta ruwasun chaymanta rimashanallanchispaq. Hukkunaqa Imatapunin libromantan huk tapuyta ruwanku chhaynapin Bibliamanta estudiayta qallarinku.
3. ¿Imakunatan anotananchis huk runa astawan yachayta munaqtin?
3 Yachay munaqkunata anotay. Huk runawan chayllaraq rimaspaqa sutinta, maypi tiyasqanta, ima p’unchaypi ima horapi rimasqanchista anotananchis, imamanta rimarqanchis, ima qelqata saqerqanchis chaytawan. Anotallasunmantaqmi ima religionmansi rishan, familiayoqchus, imas llakichishan otaq imamantas astawan yachay munasqantapas. Chaykuna anotasqanchismi yanapawasun hukpi kutispa allin preparasqa kananchispaq. Ichaqa manan qonqananchischu ima p’unchaypaq qhepasqanchista imatas tapurqanchis chaytapas.
4. ¿Imaraykun mana pisipaspa kutishanallanchis astawan yachay munaq runakunaman?
4 Ama pisipaspa kutishallay. Satanasqa tukuy atisqantan ruwanqa ‘sonqonkuman chayaq simita qechunanpaq’ (Mar. 4:14, 15). Chayrayku sichus astawan yachay munaq runata wasinpi mana tarinkichu chayqa ama pisipaychu. Yaqapaschá huk cartata qelqawaq paypi interesakusqaykita rikuchinaykipaq. Chaytan huk precursora ruwarqan, payqa huk warmiwanmi wasi punkullapi estudiota qallarirqan, chaymantan ichaqa manaña tarirqanñachu, chaymi huk cartata apachirqan. Chay qhepamanña tupaqtinkun chay warmiqa nirqan: “Chay ruwasqaykin sonqoyman chayarqowan”, nispa. Arí, sichus tarpusqanchis muhuta sumaqta qarpasun chayqa, ch’ikchimuqtan rikusun wiñaspankutaq rurunqaku “wakin kinsa chunkata, wakintaq soqta chunkata, wakintaq pachakta” (Mar. 4:20).