Kunanmantapacha preparakushasun
1. ¿Imatan ruwasunman Jesuspa Wañusqanta Yuyarinapaq tiempo chayamuqtin?
1 Sapa watanmi Jesuspa Wañusqanta Yuyarinapaq tiempo chayamuqtin huk sumaq llank’ayta aparinchis Diosta hatunchanapaq (Sal. 109:30). Ancha sumaq kacharichiyta qowasqanchismanta agradecido kasqanchista rikuchinapaqmi, marzo killapi astawan predicayninchista yapananchis. Chaymi kunanmantapacha preparakushananchis (Pro. 21:5).
2. ¿Imaynatan sientekurqanku 2011 watapi 30 horasllawan precursor auxiliar kanapaq willakamuqtin? ¿Imaynatan qanpas sientekurqanki?
2 Precursorado auxiliar. Anchatan qayna wata kusikurqanchis pisi horallawan precursor auxiliar kanapaq willakamuqtin. Chaymi huk iñiqmasinchis nirqan: “Escuelallapiraq kasqayraykun mana precursor regular kayta atinichu. Abril killapin ichaqa 30 horasta ruwanapaq precursor auxiliarta hap’isaq ichaqa 50 horas ruway yuyaywan”, nispa. Ch’isiyaqta llank’aq iñiqmasinchispas nillantaqmi: “¡30 horasllataqa atisaqmi!” nispa. 30 horasllawan precursor auxiliar kanapaq willakamuqtinmi, 80 más watayoq iñiqmasinchis precursora regular kasqanta yuyarispa nirqan: “Anchatapunin munarqani hukmanta precursora kayta, Jehová Diosqa yachanmi precursora kasqay watakunapi ancha kusikusqayta”, nispa. Chay killapin askha iñiqmasinchiskuna manaña precursor auxiliar kayta atirqankuchu chaypas, anchata yanapakurqanku.
3. ¿Imaraykun marzo, abril, mayo killakunapi precursor auxiliarta hap’inanchis?
3 Marzo killaqa allinmi kanqa precursor auxiliarta hap’inapaq, hukmantan akllakusunchis 30 otaq 50 horasta hunt’anapaq. Hinaspapas marzo killa, sábado 17 p’unchaymantapachan llapa runakunata invitamunanchis Jesuspa Wañusqanta Yuyarinapaq huñunakuyman, chayqa aparikunqa 5 abril p’unchaypin. Ancha allinpunin kanman marzo killapi precursor auxiliarta hap’iqkuna abril, mayo killakunapipas 50 horas hunt’anankuqa.
4. ¿Imatan ruwanayki predicayniykita astawan yapanaykipaq? ¿Imakunatan chaymanta chaskinki?
4 Familiantin Dios Yupaychana Ch’isipin qhawariwaqchis imaynatas Jesuspa Wañusqanta Yuyarinapaq tiempopi predicayniykichista yapawaqchis chayta (Pro. 15:22). Jehová Diosmanta mañakuy kallpachakusqaykita bendecinanpaq (1 Juan 3:22). Hinaspapas astawan predicayniykita yapaqtiykin Jehová Diosta astawan hatunchanki kusisqataqmi kankipas (2 Cor. 9:6).