Allin yuyaywan predicasun
1. ¿Imanaqtinmi allin yuyaywan predicananchis?
1 Kay tiempopi Diospa kamachinkunaqa ‘kay q’ewisqa waqllisqa miray ukhupin’ predicashanku, ‘atoqkunaq kasqanpi ovejakuna hinan’ kanku (Mat. 10:16; Fili. 2:15). Lliw runakuna phiñasqa kasqankuraykun runamasinku contra hatarinku, chaymi rikuchin runakuna ‘aswan-aswanraq mana chanin-kayman chayasqankuta’ (2 Tim. 3:13). Chhaynaqa, ¿Bibliapi ima yuyaychaykunan yanapawasun allin yuyaywan predicanapaq? (Mat. 10:16.)
2. ¿Ima kaqtinmi huk cheqasmanta ripuna hinaspa huk ladopiñataq predicana?
2 Allinta reparaspa ruwasun. Biblian nin: “Yuyayniyoqqa mana allin kaqtan reparan hinaspan pakakun”, nispa (Pro. 22:3). Chaymi makilla kashananchis. Huk huch’uy llaqtaqa thakmi ichaqa qonqayllan ch’aqway hatarinman. Yaqapaschá askha guardiakuna hamunkuman otaq askha runa callepi huñukunman. Otaq huk wasimasinchis niwasunman ripunanchispaq chayqa usqhayllan ripunanchis manan imachus sucedesqanta yachayta munaspaqa qhepakunanchischu aswanmi huk ladoman rispa predicashanallanchis (Pro. 17:14; Juan 8:59; 1 Tes. 4:11).
3. ¿Imaynata predicaspan Eclesiastés 4:9 textota kasukusunman?
3 Ama sapallanchisqa risunchu. Biblian nin: “Aswan allinmi iskay runa huk runallamantaqa”, nispa (Ecl. 4:9). Yaqapaschá mana imapas pasawarqanchisraqchu sapallanchis predicaqtinchis, ichaqa cuidakunanchismi. Wakin llaqtakunapiqa thakmi kashan, wakinpin ichaqa mana, chaymi wasin-wasinta sapallanchis predicayqa mana allinchu kanman, astawanqa ch’isinkunapi. Tiempowanmi yachanchis makilla kaq iñiqmasiwan predicayqa ancha allinpuni kasqanta (Ecl. 4:10, 12). Llapanchismi predicacionpiqa qhawarinakunanchis ripunanchis kaqtinpas willananchismi mayqen iñiqmasimanpas.
4. ¿Imatan llapanchispas ruwananchis?
4 Iñiq t’aqapi umallikunaqa llapallanchistan ‘michishawanchis’ paykunan qowasun allin yuyaychaykunata imayna llaqtapi tiyasqanchisman hina (Heb. 13:17). Sichus huch’uyaykukuq, yanapakuq kasun chayqa, anchatan Jehová Diosqa bendecinqa kallpachakusqanchista (Miq. 6:8; 1 Cor. 10:12). Kallpachakushallasun tiyasqanchis llaqtapi predicananchispaq, ichaqa allin yuyaywanpuni.