¿Allinchu kanman sapallaykipaq huk territoriota mañakuy?
1. ¿Iman sapallaykipaq territorio?
1 Sichus iñiq t’aqaykipi askha territoriokuna kan chayqa, qosunkikumanmi huk territoriota predicanaykipaq yaqapas wasiykiq qayllankunallapi. Chaytan nikun sapallaykipaq territorio nispa. Sapallaykipaq territorioyoq kay allinpuni kasqanmantan Organizados libropin 103 paginapi willan: “Tiempota mana usuchispan predicaytaqa aparinanchis, huk iñiqmasikunatapas invitasunmansi ñoqanchiswan kuska predicananpaq”, nispa.
2. ¿Imaynatan iñiq t’aqapi predicanapaq yanapawasunman sapallanchispaq qowasqanchis territorio?
2 Iñiq t’aqawan predicayniykita ama qonqaychu. Sichus llank’anaykiq qayllanpi kaq territoriota qosunkiku chayqa, atiwaqmi chawpi p’unchayta otaq llank’anaykimanta lloqsispa predicayta. Chaymantapas invitawaqmi huk iñiqmasita kuska predicanaykichispaq. Wasiykiq qayllallanpi qosunkiku chayqa, atiwaqmi tardenkunapi familiaykiwan predicayta. Sichus predicacionpaq huñunakuyman mana rinkichu chayqa, Jehová Diosmanta mañakuy manaraq predicayta qallarishaspa (Filip. 4:6). Hinaspapas manan sapallanchispaq territorio qowasqallanchispichu predicananchis, aswanpas kallpachakunanchismi iñiq t’aqanchiswan predicanapaq, astawanqa semana tukuytan gropunchispi yanapakusunman chaypiqa askha iñiqmasikunan lloqsinku.
3. ¿Ima allinkunan kanman sapallayki predicaqtiyki?
3 Alliniykipaq kanqa. Sapallakipaq territorio kaqtinqa maypipas munasqayki horapin predicayta atiwaq. Chaymantapas astawanmi tiempoyki kanqa predicanaykipaq. Chaykunan yanapasunki precursor auxiliarpaq otaq regularpaq horakunata hunt’anaykipaq. Chaymantapas sapa kutilla kaq territoriollapi predicaspan Bibliamanta yachay munaqkunata tarinki, ratollataq visitayta atinki estudiota qallarinaykipaq. Manaraq hukkuna chay territoriota mañakushaqtinkuqa iskay kinsa kutitaraqchá mayninqa predicarqanki. Chaymi wakinkunaqa ninkun kaqllapi predicaspaqa chaypi tiyaqkunawan astawan reqsinakusqankuta. ¿Yanapasunkimanchu mañakusqayki territorio familiaykiwan kuska astawan predicacionpi yanapakunaykipaq? (2 Tim. 4:5.)