¿Pikunan Jehová Diospa munayninta ruwashanku?
Chay mosoq folletowan estudiantekunata yanapasun Jehová Diospa llaqtanta reqsinankupaq
1. ¿Imapaqmi chay mosoq folletota ruwamurqanku?
1 Chayllaraqmi chaskirqanchis ¿Pikunan Jehová Diospa munayninta ruwashanku? folletota, ¿ñachu chay folletowan yachachishankiña? Estudiantekunata yanapanapaqmi ruwakamurqan: 1) Jehová Diospa llaqtanta reqsinankupaq, 2) imakuna ruwasqankuta yachanankupaq, 3) imayna llank’asqankuta yachanankupaqpas. Chay folletoq yachachikuyninqa huk paginallapin rikhurin, chaymi phisqa otaq chunka minutollapi estudiakunqa sapa estudio tukuyta.
2. Chay folleto imayna ruwasqa kasqanta willay
2 ¿Imayna ruwasqan kashan? Chay folletoqa kinsa t’aqapi kashan Diospa llaqtanpi imakuna ruwasqankuta willanapaq, ñawpaq parrafopi rikusqanchis hina. 28 yachachikuypa titulokunaqa tapuypin kashan, yana letrapitaq kutichiynin kashan. Chay folletopiqa 50 más nacionkunamanta fotokuna kashan willashantaqmi maypi horqokusqantapas, chaypin rikukun pachantinpi predicakusqanta. Chaymantapas sapanka paginapin rikhurin “Astawan yachanaykipaq” nisqa recuadro, chaypin willashan imakunatawanmi estudiantekuna ruwankuman chayta.
3. ¿Imaynatan chay folletota t’aqwirinanchis estudiantekunawan?
3 ¿Imaynatan yanapachikusunman? Sapanka yachachikuypa titulonpi kaq tapuyta ruway, parrafokunata leesqaykichis qhepamantaq yana letrapi kaqta allinta sut’inchanayki. Tukunaykipaqtaq paginaq uranpi tapukuyta ruway. Chaymantapas pisi-pisimanta leewaqchis otaq llapantapas. Hinaspapas textokunata akllay leenaykipaq, hinallataq manan qonqanaykichu fotokunata qhawachiyta, “Astawan yachanaykipaq” nisqa recuadrotapas. Ichaqa allinmi kanman qallariymantapacha estudiay, yaqapaschá mayninpi ñawparinaykichis kanqa mayqen temamantapas astawan yachanaykichispaq. Sichus hatun huñunakuy asuykamushanña chayqa 11 paginapi kaq yachachikuytan estudiawaqchis.
4. ¿Imaraykun chay mosoq folleto kusichiwanchis?
4 Estudiokunata qospaqa askha runakunatan yanapanchis Jehová Diosta reqsinankupaq. Chaymantapas Diospa llaqtan imayna kasqanta reqsinankupaq yanapanchis (Prov. 6:20). Anchatan kusikunchis chay mosoq folletoq lloqsimusqanmanta, estudiantekunata yanapanapaq hina ruwasqa kasqanmantapas.