Yachanapaq uyarisun
1. ¿Imaraykun sasa hatun huñunakuykunapi makilla uyarikuy?
1 Ñan qallarinqaña 2013 watapaq hatun huñunakuyninchis. Chaymi tukuy atisqankuta ruwashanku espiritual mikhuyta ruwanankupaq pachantinpi runakunaq iñiyninta kallpachanapaq. Chhaynaqa, ¿ñachu allichakushankiña chay p’unchaykunapi kanaykipaq? Hatun huñunakuykunapiqa mayninpi sasa makilla uyarikuyqa. ¿Imarayku? Hatun huñunakuypi discursokuna aswan askha huk huñunakuymantaqa, chaymi sasa rikch’asqalla kay. Yaqapaschá karuta viajasqanchismanta sayk’usqa kashanchis otaq ima ruwaykunapas sayk’uchiwasunman. Chayqa, ¿iman yanapawasun makilla uyarinapaq? (Deut. 31:12.)
2. ¿Imaynatan sonqoykita preparawaq hatun huñunakuypaq?
2 Manaraq hatun huñunakuy chayamushaqtin. Internetpi www.pr2711.com/quz nisqapi hatun huñunakuypaq programata tarinki, discursoq titulonkunata, huk otaq iskay textokunatapas. Sichus Internetman haykunki chayqa chay willakuykunata tarinki, chaykunan yanapasunki hatun huñunakuypaq sonqoykita preparanaykipaq (Esd. 7:10). Yaqapaschá Familiantin Diosta Yupaychana Ch’isipi chaykunamanta rimariwaqchis.
3. ¿Iman yanapasunki makilla uyarikunaykipaq?
3 Hatun huñunakuy p’unchaypi. Manaraq huñunakuy qallarishaqtin bañoman ri shawaqña. Ama distraekunaykipaq celularniykita apagawaq mana pipas wakyamunasuykipaq nitaq mensajekunata apachimunasuykipaqpas. Mana apaganayki kaqtintaq hukkunata mana distraenaykipaq programanayki. Sichus pipas tableta electrónica nisqata hap’inqa chayqa hukkunata mana distraenanpaq hinallan utilizanan. Chaymantapas ama mikhuychu nitaq imatapas ukyaychu huñunakuy qallariqtinqa (Ecl. 3:1). Aswanpas discurso qoqta makilla qhaway, Bibliamanta textota leemuqtintaq Bibliaykipi qatipanayki; allin kaq willakuykunatataq qelqawaq.
4. ¿Imaynatan tayta-mamakuna wawankuta yanapankuman uyarinankupaq yachanankupaqpas?
4 Munallaykutaq wawakuna uyarikunankuta yachanankutapas. Proverbios 29:15 texton nin: “Ima munasqanta ruwananpaq hinallata qhawasqa wawan ichaqa mamanta p’enqachin”, nispa. Chayraykun tayta-mamakuna wawankuwan kuska tiyananku, chhaynapin paykuna allinta uyarinqaku manañan rimashanqakuchu nitaq celularpi mensajekunata apachishanqakuchu yanqa qasi purishanqakupaschu. Aswan huch’uy wawakunatapas yachachillankumantaq makilla uyarinankupaq manaña llapantachu entiendenqaku chaypas.
5. ¿Imaraykun allin kanman yachasqanchismanta t’aqwiriy? ¿Imaynatan chayta ruwasunman?
5 Hatun huñunakuy qhepaman. Ama sinchi tutakamaqa rikch’aychu aswanpas allinta samanaykipaq yuyaykuy. Hinaspapas pisillapi familiaykiwan kuska imachus yachasqaykichista t’aqwiriychis. Sichus amigoykikunawan pencionman mikhuq rinkichis chayqa, huk otaq iskay yachachikuymanta rimawaqchis chaypaq qelqasqaykimanta yanapachikuwaq. Chay qhepamanña Familiantin Diosta Yupaychana Ch’isipin t’aqwiriwaqchis kawsayniykichispi ruwayman churanaykichispaq. Chaymantapas sapa semana mosoq qelqakunamanta huk chikanta t’aqwiriwaqchis.
6. ¿Imapaqmi hatun huñunakuyman rinchis?
6 Sichus fiestaman rinki manataq servisqa mikhunata mikhuwaqchu chayqa yanqapaqmi kanman chayman risqayki. Chay hinallataqmi hatun huñunakuypi espiritual mikhuywanpas. Chayraykun tukuy atisqaykita kallpachakunayki chaypi kanaykipaq, makilla uyarinaykipaq yachasqaykitataq ruwayman churanaykipaq.