“Runakunata huñumuy”
1. ¿Imaynapi tupan Israel llaqtaq huñunakusqan kay tiempopi hatun huñunakuyninchiskunawan?
1 Egipto llaqtamanta lloqsimusqanku qhepamanmi Jehová Diosqa Moisesta kamachirqan Israel llaqtata Sinaí orqopi huñunanpaq, chaypi Diospa Siminta uyarispa Dios manchakuyta yachanankupaq, wawankumanpas Diospa Siminta yachachinankupaq (Deut. 4:10-13). Chay huñunakuytaqa manachá hayk’aqpas qonqarqankuchu, iñiyninkupipas allin kallpachasqachá karqanku. Kay hamuq killakunapin Jehová Diospa llaqtanqa hatun huñunakuypi, askha nacionkunamanta hatun huñunakuypipas huñukullasuntaq Diospa Siminta uyarinanchispaq. ¿Imatan ruwasunman chaypi kanapaq?
2. ¿Imakunatan ruwananchis hatun huñunakuyman rinanchispaq?
2 Preparakunanchismi. Jehová Diosmi Israel runakunata kamachirqan Sinaí orqopi huñunakuypaq preparakunankupaq (Éx. 19:10, 11). Kaqllatataqmi ñoqanchispas hatun huñunakuyman rinanchispaq preparakunanchis. Wakinqa llank’anankumantan permisota mañakunanku. Yaqapaschá Nehemías hina tarikunki. Paymi rey Artajerjespaq llank’arqan, ichaqa Jerusalén llaqtaq perqankunata sayarichiypi yanapakuyta munarqan, yacharqanmi ichaqa rey permiso mana qonanta. Chaymi Diosmanta mañakurqan, mana manchakuspataq reyman sut’ita willarqan imachus munasqanta. Reyqa qorqanmi permisota, yanaparqantaqmi perqa sayarichinanpaq cosaskunata qospa (Neh. 2:1-9). Jefeykimanta permisota mañakusqaykimantapas, ¿yachankichu hayk’aq viajanaykita maypi alojakunaykitapas? Umalliqkunaqa yanapanqakun necesitaqkunata. Kallpachakuy hatun huñunakuyman temprano chayanaykipaq tukuy yuyaywan uyarinaykipaqpas (Heb. 2:1).
3. ¿Imakunata ruwaspan sonqonchista preparasunman hatun huñunakuypaq?
3 Chaymantapas sonqonchistan preparananchis uyarinanchispaq yachananchispaqpas (Esd. 7:10). Imaynachus hatun huñunakuy aparikunanpaq programatan Internetpi jw.org nisqapi churakamunqa, churakullanqataq llapa discursokunaq titulonta, Bibliamanta huk otaq iskay textokunatapas sapanka discursomanta. Allinmi kanman manaraq chay huñunakuyman rishaspa Familiantin Diosta Yupaychana Ch’isipi chaykunata estudiayqa. Wakinqa Internetpi progamatan impriminku hinaspa chay hojakunapi qelqanku hatun huñunakuypi yachamusqankuta.
4. ¿Imaynatan tayta-mamakuna wawankuta yanapankuman?
4 Wawaykichista yachachiychis. Sinaí orqopi huñukusqankun Israel runakunata yanaparqan wawankuta Diosmanta yachachinankupaq (Deut. 4:10). Hatun huñunakuyninchispas yanapawasunmi kaqllata ruwananchispaq. Tayta-mamakunaqa wawankuwanmi tiyananku, yanapanankutaqmi tukuy yuyaywan uyarinankupaq. Hinaspapas sapa p’unchay huñunakuy tukuyta wawankuwan parlankuman yachasqankumanta otaq Familiantin Diosta yupaychana ch’isipi.
5. ¿Imaynatan yanapawasun hatun huñunakuyman risqanchis?
5 Sinaí orqopi huñunakusqankun Israel runakunata yanaparqan Diospa llaqtan kasqankuta astawan valoranankupaq (Deut. 4:7, 8). Hatun huñunakuyninchispas kaqllatataqmi yanapawasun. Chay huñukusqanchis p’unchaykunapin Satanaspa millay pachanmanta t’aqasqa kasun. Hinaspapas iñiyninchispin kallpachasqa kasun, iñiqmasinchiskunawantaq kallpachanakusunpas (Is. 35:7-9). Jehová Diospa hatun p’unchayninqa sispaykamushanñan, chaymi amapuni chay huñunakuyninchisman faltakusunchu hukkuna-hukkunawan kallpachanakunanchispaq (Heb. 10:24, 25).