Agosto killapin ancha sumaq llank’ayta aparisun

1. ¿Ima llank’aytan agosto killapi aparikunqa?

¹ ¡Kay wataqa huk hatun watan! Hanaq pachapi Diospa Gobiernon kamachikuyta qallarisqanmantapachan 100 wataña hunt’akun. Chaymi Diosta hatunchanapaq hina, kay agosto killapi huk tratadota pachantinpi rakikunqa. Chay tratadoq sutinmi: ¿Maypin ima tapukusqanchistapas yachasunman? nisqa. Chay tratadowanmi runakunata yanapasun ima tapukusqankutapas Bibliapi maskhanankupaq, Internetpi jw.org nisqa direccionta maskhanankupaq ima.

2. ¿Imaynatan yanapakusunman agosto killapi?

² Ancha kusisqa Diosta hatunchasun. Agosto killapiqa llapallanchismi invitasqa kashanchis predicacionpi astawan yanapakunanchispaq, chaymi munaqkunaqa 30 horallata predicaspa precursor auxiliar kankuman. Chay killapiqa phisqa viernes, phisqa sábado, phisqa domingo p’unchaykunan kanqa. Chaymi estudiaqkunapas llank’aqkunapas precursor auxiliar kankuman. Wakin Biblia estudiaqkuna otaq wawakunapas ñapaschá publicador kanankupaq hinaña kashanku. Chhayna kaqtinqa kunanmantapachan parlariwaqchisña umallikunaq llank’ayninpi yanapaq umalliwan. ¡May kusikuychá kanman chay sumaq llank’ay aparikusqanpi predicayta qallariqtinkuqa! Wakin precursor regular iñiqmasikunapas agosto killapiqa samarinkuñan predicananku horasta hunt’asqankurayku. Ichaqa paykunapas kallpachakunkumanmi chay killapi astawan yanapakunankupaq. Familiakunapas qhawarishanankuñan “ancha kusisqa” predicay llank’aypi yanapakunankupaq (Esd. 3:11; Prov. 15:22).

3. ¿Imakunata aypanapaqmi kallpachakusunchis?

³ Ñawpaqkunapiqa ñan chay hina llank’ayta aparirqanchisña. Ichaqa agosto killapin astawanqa munasunman mana hayk’aq predicakusqanta hina predicakunanta. Chaypaqmi kallpachakunanchis kanqa aswan askha horata predicanapaq, predicaqkuna, precursor auxiliar nisqakunapas astawan yapakunanpaq. Chayrayku Jehová Diosta valekusun kay llank’ayninchispi yanapawananchispaq (Mat. 24:14).