Bibliamanta yachachisqaykikunata yanapay Reinomanta allin willakuykunata predicanankupaq
1 Mateo 28:19, 20 textopi leesqanchis hina, Jesusmi qatikuqninkunata kamachiran llapa runakunata yachachinankupaq, chhaynapi chay runakuna Jesuspa yachachisqan kanankupaq, chay discipulokunapas huk runakunata yachachishanallanku karan. Chay ruwaymi rikuchinan karan tukukuy tiempopiña allin willakuykuna willasqa kasqanta, kunanmi chay tiempopi kawsashanchis (Mat. 24:14).
2 Wawanchiskunata otaq huk runakunata Bibliamanta yachachispaqa manan yachachiyllachu yachachinanchis, yanapanallanchistaqmi huk runakunata yachachinankupaqpas, chhaynapi paykunapas huk runakunata yanapanqaku Jesuspa yachachisqan kanankupaq (Luc. 6:40).
3 Yanapay predicanankupaq: Bibliamanta yachachisqanchiskunataqa kallpachanan hukkunawan yachasqankumanta rimanankupaq. Willanataqmi sumaq experienciakunata wayqe panakunaq predicasqankumanta. Wawakunatapas wiñarisqanman hina yachachina allinta predicanankupaq (Sal. 148:12, 13). Rimasqaykiwan ruwasqaykiwan ima rikuchiy predicacionta ancha allinpaq qhawarisqaykita (1 Tim. 1:12).
4 Jehová Diosqa chanin kamachikuyninkunaman hina kawsaqkunallatan kamachin. Mosoq publicadorqa manapaschá unayña bautizasqa cristiano hinachu allinta predicanqa, ichaqa allinta entiendenan Bibliapi qallariy yachachikuykunata chayman hinataq kawsananpas (qhawariy Organizados nisqa librota 79-82 paginakunata). ‘Hatun Babiloniamanta’ t’aqakunan politicapipas manaña chhaqrukunanchu sapa kutillataq congregacionpi huñunakuykunamanpas rishanan (Apo. 18:2, 4; Juan 17:16; Heb. 10:24, 25).
5 Bibliamanta yachachisqayki mayqellanpas hunt’ashanña predicananpaq chayqa, willay congregacionpi superintendente presidenteman. Paymi iskay ancianokunata kamachinqa qanwan Biblia yachachisqaykiwan ima rimanankupaq paykunañan qhawarinqaku sichus congregacionwan predicayta atinmanña chayta. Chaymantaqa qanñan yachachisqaykiwan kuska predicaq lloqsispa yachachinki allinta predicananpaq.