2 Petero

1 SIMONA Petero, e tavini, e e aposetolo oki, na Iesu Mesia, i te aronga i rauka katoa ia ratou taua akarongo meitaki mei ia matou nei, i te tuatua-tika a to tatou Atua a te Ora ko Iesu Mesia ra:

2 Kia akamaataia mai te aroa ua e te au ia kotou i te kite i te Atua, e to tatou Atu ia Iesu ra.

3 Na te mana Atua nona i oronga mai i te au mea katoa ia tatou, i te tau, i te ora, e te akono i te Atua, no te kite iaia ko tei kapiki mai ia tatou no te kakā e te maroiroi:

4 Ko tei oronga mai ia tatou i te meitaki maata rava i tuatuaia maira, kia rauka ia kotou te tu Atua i te reira, i te rere ke anga atu i te kino e vai i teianei ao no te anoano tika kore ra.

5 E kia tupu te reira, ka akamaroiroi ua i te kapiti katoa to kotou akarongo ki te mataku kore; e te mataku kore oki, ki te kite;

6 Te kite oki, ki te noo marie; te noo marie, ki te akakoromaki; te akakoromaki oki, ki te akono i te Atua;

7 Te akono i te Atua oki, ki te aroa taeake; te aroa taeake oki, ki te aroa i te tangata katoa.

8 E tei ia kotou te reira au mea, e te maata ra, na te reira e akakite e, kare kotou i te akatau e te uua kore i te kite i to tatou Atu ia Iesu Mesia ra.

9 Ko te tangata ra kare iaia teianei au mea, e matapo ïa, kua topiri aia i tona mata, e kua ngaro iaia e, kua tamāia aia i muatangana i tana ara.

10 E teianei, e aku au taeake, ka akamaroiroi, kia kitea tikaia to kotou kapiki angaia e te iki angaia; kia pera oki kotou, kare ua ïa e inga:

11 Ka oronga uaia mai oki te o no kotou ki roto i te basileia mutu kore o to tatou Atu o Iesu Mesia to tatou Ora ra.

12 E teianei kare ua au e vata i te akakite ia kotou i teianei au tuatua, kite ua rai kotou, e tinamou ua rai kotou i taua tuatua-mou nei.

13 Te manako nei oki au e mea tika, i toku noo anga i teianei puakapa, kia akamatutu atu ia kotou, i te akakite akaou anga atu rai;

14 Kua kite oki au e kua vaitata au i te kopae i teianei puakapa, ta to tatou Atu ta Iesu Mesia i akakite mai iaku ra.

15 E akamaroiroi oki au kia vai marie ua mairai teianei au tuatua i roto i to kotou manako kia riro ke au ra.

16 Kare oki ta matou i te tuatua taeke ua i akatupuia e te pakari ra, ka akakite atu ei matou ia kotou i te mana e te aerenga mai o to tatou Atu ra o Iesu Mesia, kua kite tikai ra to matou mata i tona tapunui.

17 I rauka oki iaia i te Atua Metua ra te akangateitei e te kakā, ka tae mai ei iaia taua reo no roto mai i te kakā maata ra e, “Taku tamaiti akaperepere teia, kua mareka rava au iaia.

18 Kua akarongo matou i taua reo no te rangi maira, ia matou ma ia katoa ki runga i te maunga tapu ra.

19 Tei ia tatou katoa te tuatua tika maata rava atura o te au peroveta; ko te mea meitaki ïa ia kotou kia akono i te reira, mei te lamepa e kakā ua i te ngai poiri ra, e kia makirata, e kake ei te etu popongi i roto i to kotou ngakau.

20 Kua kitea ana oki e, te au totou ravarai i roto i te tuatua i tataia ra, kare ïa te mea kimiia e te tangata uaorai.

21 Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te Vaerua Tapu i tuku mai ia ratou ra.