1 Timoteo

3 E TUATUA-MOU teia, kia inangaro tetai tangata i te taoonga episekopo ra, kua inangaro aia i te angaanga meitaki.

2 Ei tangata apa kore ra te episekopo e tikaʼi, ei tangata vaine okotai, e te maroiroi, e te akono meitaki, e te noo marie, e te kite i te tangata ke ke, e te tau kia apii;

3 Eiaa e tangata inu ua i te wina, eiaa ei tangata momoto, eiaa e morimori apinga; ei tangata maru ra, eiaa ei tangata tauetono, eiaa ei noinoi moni;

4 Ei arataki meitaki i tona uaorai ngutuare ra, e tana au tamariki i te kauraro marie anga iaia:

5 (Ko te tangata oki kare i kite i te arataki i tona uaorai ngutuare, eaa e tikaʼi iaia kia tiaki i te ekalesia a te Atua?)

6 Auraka ei tangata akarongo ou ua mai, ko te akateiteiia aea aia e te nengonengo, e rokoia iora aia i te akaapa i akaapaiaʼi te diabolo ra.

7 Ei rongo meitaki oki tona i te aronga ki vao ra e tikaʼi; ko te rokoia aea aia i te akakino, e te ereere a te diabolo.

8 Koia katoa oki te au diakono, kia mamaru katoa ïa, eiaa ei vaa rua, eiaa ei inu ua i te wina, eiaa ei morimori apinga;

9 Ei tangata tāpu marie i te tuatua ngaro i akarongoia nei ma te akava-ngakau viivii kore.

10 Kia na mua rai oki i te timata marie ia ratou, e kare e tapepeanga, ka rave ei ratou i te taoonga diakono ra.

11 Mei te reira katoa te au vaine i te maru e tikaʼi, eiaa ei tapepe ua, ei maroiroi ra, e te pikikaa kore, i te au mea katoa ra.

12 Ei tangata vaine okotai anake te au diakono, i te arataki meitaki anga oki i ta ratou tamariki e to ratou uaorai ngutuare.

13 Ko te aronga oki i rave meitaki ana i te taoonga diakono ra, e ngai meitaki tei rauka ia ratou, e te maroiroi maata i te akarongo i te Mesia ra ia Iesu.

14 Te tata nei au i teianei au tuatua ia koe, te manako nei ra, kua vaitata au i te tae atu i ko na ia koe na:

15 Kia roa ra au, kia kite koe i taau akono anga tika i roto i te are o te Atua ra, ko te ekalesia o te Atua ora ra, ko te pou e te rangorango o te tuatua-mou ra.

16 Kua tika tikai oki e, e tuatua ngaro maata to te akarongo, I kitea mai te Atua i roto i te tangata nei, i akatikaia mai e te Vaerua, i akaraia e te au angela, i tuatua aereia ki o te etene, i akarongoia i te ao nei, e raveia atura ki runga i te ao ra.