Tito

2 E AKO atura koe i te tuatua e tau i te tuatua ora ra:

2 Ko te au tangata pakari ra kia maroiroi ïa, e te maru, e te akono meitaki, ei akarongo tikai te akarongo, e te aroa, e te akakoromaki.

3 Koia katoa te au vaine pakari, kia tau ta ratou tuatua i te aronga tapu, auraka ei tapepe pikikaa, auraka ei inu maata i te wina, ei aronga apii atura i te tuatua memeitaki;

4 Kia ako marie ratou i te au vaine ou ra kia aroa i ta ratou au tane, kia aroa oki i ta ratou au tamariki,

5 Kia maru ua, kia meitaki, kia noo i te ngutuare, kia takinga-meitaki, kia kauraro marie i ta ratou uaorai au tane, kia kore e akakinoia te tuatua a te Atua.

6 E ako katoa atu i te au tangata ou, ei ngakau auouo kore to ratou.

7 Kia riro oki koe ei akaraanga i te au angaanga memeitaki katoa ra: kia apii ra ei tuatua iro kore rai, ei maru e te pikikaa kore,

8 Ei tuatua mou, kare e tika kia akaapa; kia akama tei patoi mai, no te akakino anga kore ia kotou na.

9 E ako atu i te au tavini e e akarongo i to ratou au pu, e akamareka atu i te au mea katoa ra: auraka e taitoito;

10 Auraka e rave poiri ua i te apinga, ei akono meitaki rava ra; kia manea te tuatua a te Atua a to tatou Ora ra ia ratou i te au mea katoa ra.

11 Ko te aroa ua o te Atua e oraʼi te tangata, kua kitea mai nei ïa i te tangata ravarai,

12 I te apii anga mai ia tatou e, e kopae tatou i te akono kore i te Atua, e te anoano o teianei ao, kia noo tatou ma te tau meitaki, te tuatua-tika, e te akono i te Atua, i teianei ao;

13 I te akara anga atu i taua meitaki e tiakiia nei, koia te mama anga kakā mai o te Atua maata ra, ko to tatou Ora ko Iesu Mesia;

14 Ko tei oronga iaia uaorai no tatou, kia ora tatou iaia i te au tuatua kikino ravarai, e kia tamā aia ia tatou ei tangata tikai nona uaorai, e te maroiroi i te au angaanga memeitaki ra.

15 Ka tuatua koe i taua au tuata nei, e ako ua atu, e akakite ua atu, ei tuatua tumu ïa. Eiaa to te tangata ravarai ei akavaavaa anga ia koe.