2 Korinetia

5 KUA kite oki tatou e kia tukuia to tatou are one puakapa nei ki raro; e are to tatou i te Atua ra, e are anga koreia e te rima, e te vai ranga mutu kore i te rangi ra.

2 Te ngunguru nei oki tatou i teia, ma te anoano maata kia akakakauia tatou i to tatou are rangi ra.

3 E kia akakakauia ra, kare tatou e putaua i te rokoia anga mai.

4 Tatou ra e noo i roto i teianei puakapa, te ngunguru nei ïa i te teiaa, kare ra no te mea te anoano nei tatou kia noo taaka ua, kia akakakauia ra, kia apuku uaia te mea mate ua nei e te ora.

5 Ko tei akatau ia tatou i taua mea nei, ko te Atua ïa, ko tei oronga katoa mai ia tatou nei i te akairo ra ko te Vaerua.

6 Maroiroi ei matou nei kare i tukumoe, kua kite oki matou e, te noo nei matou i roto i te kopapa, te taka ke nei ïa matou i te Atu. (

7 E aerenga akarongo oki to matou, kare i te aerenga kite mata.)

8 Te maroiroi nei matou, e kua tika ia matou kia taka ke atu i te kopapa nei, e kia noo i vaitatao i te Atu.

9 E teianei te umuumu marie nei matou, e ei ko nei ra, ei reira ïa, e kia taka ke atu, ei reira ïa, kia kiteia mairai matou e ia.

10 E mama katoatoa atu oki tatou ki mua i te akavaanga a te Mesia e tikaʼi; kia rave te tangata ravarai i tei tau i te au mea i raveia e ia i roto i te kopapa nei, te meitaki e te kino.

11 E no te mea kua kite matou i te mea mataku ra i te Atu, i ako atu ei matou nei i te tangata; kua kiteia ra matou e te Atua; e te manako nei au kua kitea katoaia e to kotou uaorai akava-ngakau.

12 Kare ra matou e akameitaki akaou ia matou uaorai ia kotou na, kia rauka ra to kotou rekareka anga ia matou nei, ei tuatua anga atu na kotou i te aronga akaparau i te tu i vao ake kare i te ngakau ra.

13 Te tu ke nei matou, no te Atua ïa; e te akono mei matou, no kotou ïa.

14 Te riro nei oki matou i te aroa o te Mesia ra, no te mea te karanga nei matou e, i mate te tangata okotai no te tangata ravarai, e mate to te tangata katoa nei i reira;

15 E i mate oki aia no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.

16 E teianei kare atura matou e akono ua atu i te tangata i te akonoanga o te kopapa nei: e kua akono matou i te Mesia i te akonoanga o te kopapa ra, teianei ra kare matou e akono akaou iaia i reira.

17 Tei roto anake te tangata i te Mesia ra, kua riro ïa ei tangata ou: kua kore te au mea taito ra; i na, kua riro te au mea ravarai ei mea ou.

18 Na te Atua ra taua au mea katoa, ra, ko tei akaongi ia tatou iaia uaorai ia Iesu Mesia nei, e kua tuku mai oki ia matou i te taoonga akaongi nei.

19 Teia oki taua tuatua nei, ei roto te Atua i te Mesia i te akaongi anga i to teianei ao iaia uaorai, i te uri kore anga atu i ta ratou ara ia ratou; e kua tuku mai oki te tuatua akaongi ra ia matou nei.

20 E teianei e karere matou na te Mesia, mei te mea e te ako nei te Atua i te tangata e, e akaongi kotou i te Atua.

21 Kua akariro oki aia i tei kore i kite i te ara ra, ei tarangaara na tatou: kia akariroia tatou ei aronga tuatua-tika i te Atua iaia ra.