Apokalupo

3 E TATA koe i te tuatua ki te angela a te ekalesia i Saradi ra; Te na ko maira aia tei iaia nga Vaerua o te Atua toko itu ra, e nga etu e itu ra: Kua kite au i taau angaanga, e e ingoa toou e te ora ra koe, kua mate ra.

2 E matakite, e akapakari i te au mea i toe, i vaitata i te mate ra: kare oki i kitea iaku taau angaanga i te meitaki rava anga i mua i te aroaro o te Atua.

3 E tenana, ka akamanako na i te tu o toou āriki anga ra, e te akarongo anga, e e tāpu tikai i taua tuatua ra, e e tataraara. Kia kore koe e matakite ra, e rokoia atu koe e au mei tei rokoia e te keia ra, e kare rava koe e kite i te ora e rokoiaʼi koe e au ra.

4 Te vai na ra tetai aronga tangata ki oou i Saradi na, ko tei kore akenei i akaviivii i to ratou kakau, e aaere ïa ratou e ko au katoa ma te kakau teatea; e tau oki ratou.

5 Ko te riro iaia te re ra, e akakakauia i te kakau pu teatea ra; e kare rava au e tapara i tona ingoa i roto i te buka ora, e aaki ua ra au i tona ingoa ki mua i te aroaro o taku Metua, e ki mua oki i tana au angela.

6 E taringa tona ra, ka akarongo aia i ta te Vaerua e tuatua ki te au ekalesia ra.

7 E tata koe i te tuatua ki te angela a te ekalesia i Philadelaphia ra; Ko te au mea teia e tuatuaia mai e tei tapu ra, nana te tuatua-mou ra, ko tei mou i te taviri a Davida ra, ko tei kiriti, e kare rava e tangata i papani; ko tei papani oki, e kare rava e tangata i kiriti;

8 Kua kite au i taau angaanga: i na, kua tuku atu na au i te ngutupa matea ki mua ia koe na, e kare rava e tangata e tikaʼi kia papani; no te mea e manga maroiroi mea ngiti toou, e kua tāpu tamou rai koe i taku tuatua, e kare akenei i uuna i toku nei ingoa.

9 I na, e riro to te sunago o Satani, ko tei karanga e e ngati Iuda ratou, e kare, kua pikikaa ra; i na, e riro ratou i te aere mai e taakaaka ki raro i to vaevae, e e kite ratou e kua inangaro au ia koe.

10 No te mea kua mou marie koe i te tuatua akakoromaki naku ra, e mou katoa au ia koe kia ora i taua tuatau timataanga ra, te ka tupu i rungao i te tangata ravarai, ei timata anga i te aronga katoa e noo i te enua nei.

11 I na, te aere vave atu nei au; e mou tikai i tei rauka ia koe na, auraka taau korona e riro ia etai ke.

12 Ko te riro iaia te re ra, e akariro au iaia ei pou i roto i te nao o taku Atua, e kare aia e aere akaou atu ki vao: e e tata au i te ingoa o taku Atua ki rungao iaia, e te ingoa o te oire o taku Atua, o Ierusalema ou, ko te tae mai ki raro, no runga mai i te rangi, no ko mai i taku Atua ra, e toku uaorai oki ingoa ou.

13 E taringa tona ra, ka akarongo aia i ta te Vaerua e tuatua ki te au ekalesia ra.

14 E tata koe i te tuatua ki te angela a te ekalesia Laodikea ra; Ko te au mea teia e tuatuaia mai e te Amene, te kite mou e te tuatua-mou, te tumu o te au mea ravarai a te Atua i angaia ra;

15 Kua kite au i taau angaanga e kare koe i anu, kare oki i maana: naringa koe i anu, e kare ïa, kia maana, ko taku ïa e tika.

16 E tenana no te mea te pumaana ua na koe, kare i anu, kare oki i maana, e akapuaki atu au ia koe ki vao i taku vaa.

17 No te mea te karanga na koe, E apinga maata taku, e kua akamaata au i taku taonga, e kare ua e mea toe iaku, e kare koe i kite e, e mate maata toou, e mei te mea e aroaia ra, e te puapinga kore, e te matapo, e te putaua:

18 Te ako atu nei au ia koe e, e oko mai iaku nei i te auro tamāia ki te ai ra, kia apingaia taau; e te kakau teatea, kia akakakauia koe, kia kore te akama o to putaua kia kitea; e e amo oki i oou mata i te vairakau mata, kia kite koe.

19 Ko taku katoa e akaperepere ra, ko taku ïa e ako e e pāpā oki: e tenana e akamaroiroi, e e tataraara.

20 I na, te tu ua nei au ki te ngutupa, e te topāpā atu nei: kia akarongo mai tetai tangata i toku reo, e kua kiriti i te pa ra, e aere atu au ki roto iaia ra, e kai atu i te manga ki ona ra, e e kai katoa aia ki ku nei iaku nei.

21 Ko te riro iaia te re ra, e akanoo au iaia iaku nei ki runga i toku terono, mei tei riro katoa mai te re iaku ra, e te noo nei au e taku Metua katoa ki rungao i tona terono.

22 E taringa tona, e akarongo aia i ta te Vaerua e tuatua ki te au ekalesia ra.