Isaia

61 TEI runga iaku te Vaerua o te Atu ra o Iehova; no te mea na Iehova au i akatainu, ei akakite i te tuatua rekareka ki tei tairoia ra; kua tono mai aia iaku ei vaî i te aronga ngakau paruparu, ei tutu aere i te ora ki te tuikaa, e ei eeu i te are tapeka anga i tei tapekaia ra;

2 Ei tutu aere i te mataiti inangaroia e Iehova, e te rā akaoko anga na to tatou Atua; ei akapumaana i te aronga ravarai i mii ra;

3 Ei akarekareka i te aronga i aue i Ziona, ei oronga atu no ratou te manea ei pau i te reu ai, te manongi ra o te rekareka no te aue; te kakau pu ra i te akameitaki no te vaerua akaroeroe; ka tapaia ratou, Ko te au rakau tuatua-tika, ei paū rakau na Iehova, kia akakakāia aia.

4 E na ratou e patu i te au ngai ngaoro taito ra, e patu akaou oki i te au ngai tanea takere ra; e akamanea oki i te au oire i tanea ra, tei pou i tera uki i tera uki.

5 E na te tangata ke ke e tu mai e angai i ta kotou au anana; e te au tamariki a te tangata ke ra te riro ei tanu-kai, e ei tope vine, na kotou.

6 E tapaia kotou, I te kau taunga na Iehova: e tapaia kotou, I te au tavini o to tatou Atua: e kai kotou i te meitaki o te au enua nei, e akatietie kotou i to ratou ra kakā.

7 E pokirua mai ta kotou ei pau i to kotou akama; e rekareka ratou i ta ratou tuanga ei pau i te tumatetenga: e pokiruia mai to ratou meitaki i to ratou ra enua; e riro te rekareka mutu kore ia ratou.

8 Ko au ko Iehova tei inangaro i te tuatua-tau, e mea makitakita naku te mea āru e te takinga-kino: e naku e oronga atu i ta ratou tutaki ma te tuatua-mou, e ei koreromotu mutu kore taku e papau atu kia ratou:

9 E vavariaia to ratou au uanga i rotopu i te pa enua ra, e ta ratou e anau ra i rotopu i te au tangata ra: e tuatua mai te aronga katoa e akara ia ratou e, ko ratou te au tamariki i akameitakiia e Iehova.

10 E rekareka maata au ia Iehova; e rere ua taku vaerua i te rekareka i taku Atua; kua akakakau mai oki aia iaku i te kakau ra i te ora; kua tapoki aia iaku i te kakau pu ra i te tuatua-tika; mei te tane akaipoipo ou e akamanea iaia uaorai ki te mea manea, e mei te vaine akaipoipo ou e akamanea iaia uaorai ki te au poe ra.

11 Mei te enua nei oki e akakao mai i tana au mea tupu ou ra, e mei te kainga nei e akatupu i te au mea i ruruia i roto iaia; ka pera katoa ta te Atu ra ta Iehova akatupu anga mai i te tuatua-tika, e te akameitaki, ki mua i te pa enua katoa ra.