Malaki

4 I NA oki, te tae maira te ra, te ka tu a umu i te ka anga; e te aronga ngakau parau ravarai, e te aronga katoa i rave i te kino ra, e riro ïa ei teita; e ka oki ratou i taua rā ra kia tae maira, te tuatua mairā Iehova Sabaota ra, kare rava e akatoeia te tumu ma te rara katoa ra.

2 Ia kotou ra, tei mataku mai i toku nei ingoa, e iti mai ïa te Rā tuatua-tika ma te ora i raro ake i tona peau; ka aere oki kotou ki vao ka rererere aere ei mei te au punua puakatoro akaangai ra. 3 E na kotou e takatakai i te aronga kino ki raro; e riro oki ratou mei te reu i raro ake i to kotou vaevae, i te rā i akatakaia e au ra, te tuatua mairā Iehova Sabaota ra.

4 Akamaara kotou i te ture a taku tavini ra a Mose, taku i ikuiku kiaia i Horeba ra, na Iseraela katoatoa ra, te au akonoanga, ma te au tuatua-tau.

5 I na, e tono ana au i te peroveta ra ia Elia kia kotou na, ka tae atu ei i taua rā maata e te mataku o Iehova ra:

6 E nana e akaariu i te ngakau o te au metua ki te au tamariki, e te ngakau o te au tamariki ki to ratou au metua ra, ko te aere mai aea au e ko te taia aea e au te enua nei ki te taumaa.