Genese

2 OTI roa akera te rangi, e te enua e to reira katoa ranuku.

2 Akaoti iora oki te Atua i tana angaanga i te rā itu ra, i tana i anga ra; e noo ua iora aia i te rā itu i tana katoa ra angaanga, i tana i anga ra.

3 E kua akameitaki iora te Atua i te rā itu, e akatapu atura i te reira; no te mea i reira tona noo ua anga i tana katoa ra angaanga, i ta te Atua i anga e i rave. 4 Ko te tuatua teia o te rangi e te enua i to ratou anga angaia ra, i te rā i anga ai te Atua ra ko Iehova i te enua e te rangi ra.

5 Kare oki te au rakau katoa o te enua nei i rungao i te enua i reira, kare oki te au rakau rikiriki katoa o te enua nei i tupu; kare oki te Atua ra ko Iehova i akatopa mai i te ua ki rungao i te enua i reira, e kare oki e tangata ei tatanu i te one.

6 I pupu mai ana ra te kou no roto i te enua, e akamauu katoatoaia iora te enua.

7 E kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei tangata ora. 8 Kua tanu oki te Atua ra ko Iehova i te kainga i te pae i te itinga o te rā i Edene ra; e kua tuku iora aia i te tangata i tana i anga ra ki reira.

9 Kua akatupu oki te Atua ra ko Iehova i te au rakau taurekareka katoa kia akara, e tei meitaki ei kai, i taua one ra; e te rakau o te ora i rotopu i taua kainga ra, e te rakau e kite ei i te meitaki e te kino.

10 E kua taʼe maira tetai vai mei roto mai i Edene, e akamauu i taua kainga ra; ei reira atura te manga anga, e a atura manga.

11 Ko Pisona te ingoa o tetai; ko tei akapini i te enua katoa ra o Havila, e auro to reira;

12 E auro meitaki to te reira enua: e poe oki to reira, e te toka sema.

13 E te ingoa o te rua o te vai, ko Gihona ïa; ko tei akapini i te enua katoa o Kusa ra.

14 E te ingoa o te toru o te vai, ko Tigerisi ïa; ko tei taʼe tika ki te pae i te itinga o te rā i Asura ra. E te a o te vai ko Eupharati ïa.

15 E kua rave iora te Atua ra ko Iehova i te tangata; tuku iora iaia ki roto i taua kainga i Edene ra, ei tatanu, e ei tiaki.

16 E kua tuatua maira te Atua ra ko Iehova ki te tangata, na ko maira, E kai ua koe i to te au rakau katoa o te kainga nei:

17 Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.

18 E kua tuatua iora te Atua ra ko Iehova, Kare ïa e meitaki kia noo ua te tangata koia anake ra; e anga au i tetai tauturu tau nona ra.

19 Kua anga oki te Atua ra ko Iehova i te au puaka katoa ra o te enua nei i te one, e te au manu katoa o te reva; e kua taki mai ia ratou kia Adamu ra kia kitea tana ingoa e tapa; e ta Adamu ingoa e tapa i taua au mea ora katoa ra, ko tona ingoa rai ia.

20 I tapa ua rā Adamu i te ingoa no te au puaka katoa, e to te au manu katoa o te reva, e to te au manu vaevae ā katoa o te enua nei; kare roa ra o Adamu tauturu tau i kitea.

21 E kua akatopa iora te Atua ra ko Iehova i te moe tinainai ki runga ia Adamu, moe iora aia: kua rave iora aia i tetai kaokao nona, tuakapi iora i taua ngai ra ki te kiko;

22 E taua kaokao o te tangata, ta te Atua ra ta Iehova i rave ra, anga iora ei vaine, e kua arataki maira aia iaia kia Adamu ra. 23 E kua karanga iorā Adamu, I teianei e ivi teia no toku nei ivi, e kiko oki no toku nei kiko: ka tuatuaia aia e, E vaine, no te mea no roto aia i te tane i te rauka anga mai.

24 E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai.

25 Te vai taaka ua rā Adamu, raua katoa ko te vaine, kare ra raua i akama.