Genese

39 KUA apaiia aturā Iosepha ki Aiphiti; e na tetai tangata Aiphiti, ko Potiphara, e tangata taoonga i o Pharao, e rangatira no te vaeau, i oko mai iaia i te ngati Isemaela, ko tei arataki iaia ki reira.

2 E tei ia Iosepha rā Iehova, i meitaki ei oki aia; e tei te are o tona pu o te tangata Aiphiti ra.

3 Te kite ra oki tona pu e, tei iaiā Iehova; e te au mea katoa tana i rave ra, kua akamanuia ïa mai e Iehova:

4 E i kite aroaia mai a Iosepha e ia, e kua tavini atu aia iaia: e kua akariro aia iaia ei akaaere i tona ra ngutuare, e te apinga ravarai nana ra kua tuku atura ïa aia ki tona rima.

5 E mei tona akariro anga mairai iaia ei akaaere i tona ra ngutuare, e te apinga ravarai nana ra, kua akameitakiia mai te ngutuare o taua tangata Aiphiti ra e Iehova ia Iosepha; e kua akameitakiia e Iehova te apinga ravarai nana, to roto i te are, e to vao katoa.

6 Akaruke ua atura aia i te apinga ravarai nana ra kia Iosepha; kare ua atura aia i akono ua atu i te au mea katoa nana ra, mari ra i te kai tana uaorai i kai ra. E purotu oki a Iosepha i te tu, e te mata meitaki.

7 E i muri ake i te reira, kua akara maira te mata o te vaine a tona pu ia Iosepha; e kua tuatua maira, E moe ana taua.

8 Kare ra aia i akatika atu, e kua karanga atura ki te vaine a taua pu nona ra, I na oki toku pu, kare rava aia e akono mai i te au mea katoa iaku i te are nei, e kua tuku mai aia i te au mea katoa nana ki toku nei rima.

9 E kare roa e tangata i maata i teianei are iaku; e kare roa ana apinga i tāpu iaku, mari ra ko koe, ko te vaine nana uaorai: eaa oki au e tikaʼi kia rave i tenana kino maata, e te ara i te Atua?

10 Tuatua ua mairai aia kia Iosepha i tera rā i tera rā, kare rava aia i akarongo atu iaia e, e moe atu iaia, kare oki i piri atu iaia.

11 E i taua au rā ra, aere aturā Iosepha ki roto i te are e rave i tana angaanga; e kare tetai tangata o taua ngutuare ra i roto.

12 Kua opu maira taua vaine ra iaia i tona kakau, na ko maira, E moe ana taua. Kua akaruke atura aia i tona kakau i tona rima, e oro maira, e tae maira ki vao.

13 E kia akara mai aia ra e, kua akaruke aia i tona kakau i tona rima, e kua oro ki vao,

14 Kua kapiki iora aia ki te au tavini tane nona ra, kua tuatua maira kia ratou, na ko maira, I na, i arataki mai nei aia i taua ngati Ebera ki o tatou nei, ei kanga mai ia tatou! i aere mai oki aia kiaku nei e moe iaku kua kapiki nui atura au:

15 E kia akarongo maira aia e, kua akamaata au i toku reo, e kua kapiki, kua akaruke maira aia i tona kakau kiaku nei, kua oro iora, e riro ke atura.

16 Kua vaoo iora aia i taua kakau nona ra ki tona pae, e kia tae maira tona pu ki te are.

17 Kua karanga atura taua vaine ra kiaia, na ko atura i te tuatua anga atu, Ko te tavini ngati Ebera nei, taau i arataki mai ki o tatou nei, i aere mai aia kiaku e kanga mai iaku:

18 Kia akamaata ra au i toku reo, e kia kapiki, kua akaruke maira aia i tona kakau kiaku nei, kua oro ke atura.

19 E kite akera taua pu nona ra i te tuatua a te vaine, tana i tuatua mai kiaia ra, i te tuatua e, I pera mai to tavini kiaku; kua tupu iora tona riri.

20 Kua rave akera taua pu o Iosepha ra iaia, e kua tuku atura iaia ki roto i te are tapekaanga, ki te ngai i tapekaiaʼi te au tangata i tapekaia e te ariki ra: i reira aia i taua are tapekaanga ra.

21 Te vaitata rā Iehova ia Iosepha, e kua takinga-meitaki maira iaia, e i akaperepereia mai aia e te tiaki i taua are tapekaanga ra.

22 E kua tuku maira taua tiaki i te are tapekaanga ra, i te au tangata katoa i tapekaia i roto i taua are tapekaanga ra, kia Iosepha; e te au mea ravarai ta ratou i rave i reira ra, na Iosepha ïa i rave ei.

23 Kare rava taua tiaki are tapekaanga ra i akara ua atu i te au mea katoa i tona rima ra; tei iaia oki a Iehova, e tana i rave ra, na Iehova ïa i akariro ei mea meitaki.