1 Korinetia

6 TEI roto aina tetai ia kotou, e tapepe anga tana i tetai ke, kare e mataku kia akavaia ki mua i te aroaro o te aronga tuatua-tika kore ra, e auraka ki mua i te aroaro o e aronga tapu?

2 Kare kotou i kite e, na te aronga tapu e akava i to teianei ao? e e akavaia to teianei ao e kotou, kare aina e tau ia kotou kia akava i te tuatua mea riki poepoe rava nei?

3 Kare kotou i kite e na tatou e akava i te au angela? ka tangaʼi oki i te au mea no teianei ora anga?

4 E teianei, e taumāro anga ta kotou i te au mea no teianei ora anga, te tuku atura kotou i te akava anga ki te aronga kare rava i akonoia i te ekalesia nei?

5 Kia akama kotou i karanga atu ei au kia kotou na. Koia ïa, kare rava e tangata kite i roto ia kotou e okotai iti ake, e tika iaia kia akataka i te tuatua a tona taeake?

6 Te akava na oki tetai taeake ki tetai, e ki mua katoa oki i te aroaro o te aronga akarongo kore ra.

7 E teianei, e ara tikai tei roto ia kotou na, i te mea te akava na kotou ia kotou uaorai. Eaa kotou i kore ei i akakoromaki i te kino? eaa kotou i kore ei i akakoromaki kia akangereia?

8 Kua takinga-kino ra kotou, e kua akangere, i to kotou uaorai au taeake.

9 Kare ainei kotou i kite e, kare te aronga tuatua-tika kore e noo i te basileia o te Atua? Auraka e vavare: kare te kanga, e te akamori idolo, e te akaturi, e te akavaine, e te aronga sodoma,

10 E te keia, e te noinoi apinga, e te konā kava, e te akakino, e te āru, kare anake ïa e noo i te basileia o te Atua.

11 Mei te reira oki tetai papaki o kotou na: kua oreiia ra kotou, kua akatapuia ra kotou, kua akatikaia ra kotou, i te ingoa o te Atu ra o Iesu, e te Vaerua o to tatou Atua.

12 E tika iaku te au mea ravarai nei, kare ra te au mea katoa e tau; e tika iaku te au mea katoatoa nei, kare ra au e vi i tetai.

13 No te kopu te kai e no te kai oki te kopu: e akakore ra te Atua i te kopu e te kai katoa. Kare ra te kopapa no te kanga, no te Atu ra; e no te kopapa oki te Atu.

14 Kua akatu oki te Atua i te Atu, e e akatu katoa aia ia tatou i tona uaorai mana.

15 Kare kotou i kite e e au melo no te Mesia to kotou au kopapa? e rave aina au i te au melo o te Mesia ra, ka akariro atu ei no te akaturi? Auraka rava ïa.

16 Eaa? kare kotou i kite e ko tei tapiri atu ki te akaturi, okotai ra ïa kopapa? kua karanga oki aia e, “e riro raua ei kopapa okotai.”

17 Ko te tangata ra i tapiri atu ki te Atu ra, okotai rai ïa vaerua.

18 E rere ke atu i te akaturi. Te au ara ravarai e raveia e te tangata nei, i taka ke i te kopapa; ko te tangata ra i akaturi ra, kua takinga-kino ïa i tona uaorai kopapa.

19 Eaa? kare kotou i kite e, e nao to kotou kopapa no te Vaerua Tapu i roto ia kotou na, tei rauka ia kotou i te Atua ra, kare oki kotou i to kotou uaorai?

20 Kua okoia kotou i te oko: e teianei, e akameitaki i te Atua i to kotou kopapa, e to kotou vaerua, no te Atua ïa.