Luka

16 KUA karanga katoa atura aia ki tana au pipi, E akaaere to tetai tangata apinga nui; i tapepeia mai aia e, kua kaimoumou aia i tona apinga.

2 Kua tiki atura aia iaia, e kua na ko atura, Eaa teia taku i akarongo ia koe nei? ka akakite mai i te tuatua i taau na taoonga; oti ra ua koe i te akaaere.

3 Kua tuatua ua iora taua akaaere ra i roto iaia uaorai. Akapeea ra au? te apai ke nei taku pu i te taoonga akaaere iaku nei: kare e tika iaku kia tatanu; e akama oki au i te pati aere,

4 E ka akapera au, kia oo mai ratou iaku ki roto i to ratou are, kia akangereia au i te taoonga akaaere nei.

5 Kua tiki atura aia i te au kai ou ravarai a taua pu nona ra, kua ui atura aia ki tetai, Eia o toku rangatira apinga ia koe kare i tutaki na?

6 Kua tuatua maira aia, Okotai anere bato mori. Kua karanga atura aia kiaia, Ka rave i te pepa naau, ka noo ki raro i tenana, ka tataʼi e, e rima ake ngauru.

7 Kua karanga atura oki aia ki tetai, Eia aau apinga kare i tutaki na; Kua tuatua maira aia, Okotai anere kora sitona. Kua karanga atura aia kiaia, Ka rave i te pepa naau, ka tataʼi e, e varu ake ngauru.

8 Akameitaki atura te rangatira i te ravenga pakari a taua akaaere tuatua-tika kore ra: e pakari maata oki to te tamariki o teianei ao, i ta ratou au peu, i to te tamariki o te mārama.

9 E teianei e karanga atu au kia kotou. E akataunga atu kotou i te taunga no kotou i te apinga pikikaa nei: e kia tuku keia kotou, kia ooia mai kotou e ratou ki roto i te are piro kore.

10 Ko te akono meitaki i te mea ngiti ra, kua akono meitaki katoa i te mea maata; e ko te pikikaa i te mea ngiti ra, kare katoa ïa i akono i te mea maata.

11 E teianei kare kotou i akono i te apinga pikikaa, naai e tuku atu kia kotou te mea mou tikai?

12 E kare kotou i akono tikai i ta tetai ke ra apinga, naai e tuku atu i ta kotou uaorai?

13 Kare e tika i te tavini kia akono atu i nga pu e toko rua: ka riro aia i te riri atu i tetai, e te inangaro atu i tetai; e kare ra, e riro ïa i te tau atu i tetai, e te akaviivii atu i tetai. Ko kotou nei oki, kare e tika kia akono, i te Atua e te Mamona.

14 E kite akera te au Pharisea noinoi apinga ra i taua au tuatua katoa ra, kua aviri maira ratou iaia.

15 Kua karanga atura aia kia ratou, Ko kotou na te aronga e akatika ia kotou uaorai i mua i te aroaro o te tangata nei; kua kite ra te Atua i to kotou ngakau: ko taua mea i akameitaki uaia e te tangata ra, e mea viivii ïa i te Atua.

16 I vai ana te ture e te au peroveta, e tae roa akenei ia Ioane nei: mei reira mai i tutu aereia te basileia o te Atua, e te aronga i o ra, i o ïa i te maroiroi.

17 E kore ake te rangi e te enua, kare rava ra tetai ngai iti poepoe o te ture nei e kore.

18 Ko tei kopae atu i tana vaine ka akaipoipo ei i tetai, kua akaturi ïa; e te akaipoipo i taua vaine i kopaeia e te tane ra, kua akaturi katoa ïa.

19 I noo ana tetai tangata apinga nui, e kakau muramura tona kia akamanea; e kaingakai meitaki maata tana i te au rā katoa.

20 E tetai tangata apinga kore oki, ko Lazaro te ingoa, i vaioia i tona ngutupa ra, kua pini rava i te pueu maki:

21 Kua pati atura i te ungaungā kai i topa mei runga i te kaingakai a taua tangata apinga ra: e kua aere maira te au puaka-aoa, kua mitimiti iora i tona au pueu maki ra.

22 E mate iora taua tangata apinga kore ra, apaiia atura aia e te au angela ki runga ravao i te umauma o Aberahama ra: e mate katoa atura taua tangata apinga nui ra, e tanumia iora;

23 E mate atura i te mamae maata i ade, kua nānā akera tona mata ki runga, kite atura ia Aberahama i te ngai mamao, e ia Lazaro ki rungao i tona umauma.

24 Kua kapiki atura aia, na ko atura, E taku metua, e Aberahama, e aroa mai iaku, e tono mai ana koe ia Lazaro, e tutou aia i tona kauru rima ki te vai, ei akaanu i toku nei arero; kua mamae maata oki au i teianei ai mura.

25 Kua tuatua mairā Aberahama, E tama, ka akamaara ana, e meitaki oki toou i to ora anga ra, e e kino oki to Lazaro nei: e teianei ra, kua akarekarekaia ra aia, e kua akamamaeia ra koe.

26 E e mareva maata oki tei tukuia i rotopu ia tatou: kare to ko nei e tae atu ki ko na i to kotou na ngai kia aere; kare katoa to ko na e tae mai ki ku nei i to matou nei ngai.

27 Kua karanga atura aia, Teia mari taku tuatua kia koe, e taku metua, e tono koe iaia ki te ngutuare o taku metua:

28 Toko rima oki oku taeake; e ako atu aia ia ratou, ko te tae katoa mai aea ratou ki roto i teianei ngai mamae maata.

29 Kua tuatua mairā Aberahama kiaia, Tei ia ratou a Mose e te au peroveta ra; ka akarongo atu ratou i te reira.

30 Kua karanga atura aia, Eiaa, e taku metua, e Aberahama: kia aere atura tetai mei te mate atu, e tataraara ïa ratou i reira.

31 Kua tuatua maira aia kiaia, Kia kore ratou e akarongo ia Mose e te au peroveta ra, tu ua atu rai tetai tangata mei te mate atu, kare rai ratou e akarongo i te ako.