Te Taokotaianga Papu na Roto i te Mesia
Te au Akataka Anga a Ephesia
I TE akamataanga o 52 T.N., kua tutu aere te apotetoro ko Paulo i Ephesia. E ngai katoa rai teia oire apinganui e te angaanga ko Asia Minora no te akonoanga pikikaa. Inara kua tupu meitaki te akonoanga Kerititiano ki reira i muri ake i to Paulo oki akaou anga atu ki reira, tei tamanakoia i te tuatau paroro o te 52/53 T.N. Kua oronga aia te au tuatua i te au ra katoatoa i roto i tetai ngai apii e kua akakitekite aere mei tera are i tera are i tona nooanga no etai toru mataiti.—Angaanga 19:8-10; 20:20, 21, 31.
Iaia i roto i te are auri i Roma i te 60-61 T.N., kua tata a Paulo ki te au Kerititiano o Ephesia. Tana tumu tuatua ko te taokotaianga kiaia e na roto ra ia Iesu Mesia. Te tika, te vaira e 13 au tuatua tei maata atu i tetai atu reta ta Paulo i tata e kia ‘taokotaiia ki te Mesia.’ Mei te au Ephesia, ka puapinga tatou mei te au tuatua a Paulo no runga i te angaanga a te Mesia, te kopaeanga i te tu tau kore e te patoianga i te au mana ririnui e te kino.
Te Akakoroanga a te Atua ko te Taokotaianga
Te mea mua, kua akamarama a Paulo e akapeea te Atua i te apai anga mai i te taokotaianga na roto i te Mesia. (1:1-23) Kua akakoro a Iehova kia akaputu mai i te au mea ravara i te rangi e te enua nei i te ngai okotai na roto i “tetai akanoo anga akaaerenga” (NW) (tetai mataara o te akaaereanga i te au mea). Na roto i te Mesia, ka taokotai te Atua kiaia te aronga tei ikiia no te oraanga i te rangi pera katoa te aronga te ka noo i te enua nei. I teia tuatau, kua taokotai te Atua i te aronga tei akatainuia e “aronga maata rava,” e ka aere ua atu te ‘akaputuanga i te au mea ravarai i te enua nei’ e tae ua atu kia akarongo roa te aronga i roto i te vaarua tanumanga i te reo o Iesu e ka aere mai ki vao. (Apokalupo 7:9; Ioane 5:28, 29) Kia rekareka tatou i teia, mei ta Paulo i pure e kia ariki te au Ephesia i te au apinga tei orongaia mai e te Atua na ratou.
I muri mai kua uri atu ki te au Kerititiano Etene, tei mate ana i roto i te ara. (2:1–3:21) Na roto i te Mesia, kua takoreia te Ture e ei tumu tei tukuia no te au ngati Iuda e te au Etene kia taokotaiia e kia riro ei tetai iero no te Atua ei noo na te vaerua. Ta Paulo tuati anga ko te akakitekite i te mea muna e te tapu kia rauka i te au Etene i te taokotai mai ki te Mesia, kia rauka ia ratou i te na roto e tae atu ei ki te Atua ma te va ua i te tuatua. Kua pure akaou a Paulo no te au Ephesia, i teianei te patianga e kia akariro a Iehova ia ratou kia tu ketaketa i roto i te akarongo e te aroa.
Te au Tika Akamaataanga i te Taokotaianga
Kua akaari a Paulo e kua oronga mai te Atua i te au tika no te taokotaianga. (4:1-16) I rotopu i teia ko te kopapa vaerua koia oki ko te putuputuanga. Te angaanga ra teia kopapa ma te taokotai i raro ake i te upoko anga a te Mesia. E te oronga maira aia i te au mea aroa i roto i te tangata no te tauturu i te katoatoa kia okotai i roto te akarongo.
Te rauka ra rai ia Iehova i te akaari i te au tu o te Kerititiano te ka akamaata i te taokotaianga. (4:17–6:9) Te akakakau anga i te “akatangata ou,” ka kopae te au Kerititiano i te au tu atua kore mei te tuatua tau kore. Te aaere ra ratou ma te pakari, te akaari ra i te tu akangateitei no te Mesia, e te akaari i te tu kauraro tau.
Tei kapiti atu, te tauturu ra te Atua i te au Kerititiano kia patoi i te au mana vaerua kikino te kimi ra i te takino i to tatou tu taokotai. (6:10-24) Te oronga maira te paruru umauma i te pae vaerua no ko mai i te Atua teia paruru anga. No reira e taangaanga tatou i te reira e te pure akatenga, te kapitianga i te au taeake tei irinaki i roto i ta tatou au patianga.
Mei teaa teia ako memeitaki ta Paulo i oronga ki te au Ephesia! Kia aru tatou i te reira na te kopaeanga i te ravenga tau kore e te patoianga i te au mana ririnui kikino. E kia ariki oonu tikai tatou i te tu taokotai ta tatou e mataora ra na roto ia Iesu Mesia.
[Pia/Tutu i te kapi 24]
Au Tao Ai: Te kapiti ra te paruru umauma i te pae vaerua “te paruru ra i te akarongo” kia opu i te reira, me kare kia kore te “au tao ai” a Satani e riro ei tamamae. (Ephesia 6:16) Etai au tao tei taangaangaia e te au Roma ko te au raupo e puta tona ma tetai ngai auri tei raro ake i te ngai keokeo tei akakiia ki te ta vera. Kua anaia mei tetai ana paru rai kia kore te ai e mate, e te taruku i te reira ki roto i te vai ka akamaata atu te reira i te vera o te ai. Inara kua paruru te au paruru mamaata i te au vaeau mei teia au raupo, mei te akarongo kia Iehova e rauka ra i tona au tavini i te apuku i “te au tao ai ravarai a te vaerua kino ra.” Ae, na te akarongo e tauturu ra ia tatou kia patoi i teia au mea, mei te au akata anga a te au vaerua kikino pera katoa te au timata anga no te rave i te tarevake, te aruaru i tetai oraanga tei anoano i te apinganui, e te tuku ua atu kia mataku e kia ekoko.