Ripoti a te Aronga Tutu Patireia
Kua Ariki te Aronga Kimi Tuatua Mou na te Akakitekite Aere Ua
KUA akakite maira te Puka Tapu e ka ariki te au peretana tu mamoe i te reo o te Tiaki Mamoe Memeitaki. (Ioane 10:27) Ko teia te tupu anga i tetai au enua e manganui, e te kapitianga katoa mai ia Peritane.
◻ No te akatauanga, i te 1988, i mua poto ua ake i te Keritimeti, kua tuatua tetai Kite o Iehova, ko Pamela, ki runga i te tereponi i te opati te ngai tana e angaanga ana e kua tuatua aia ki tetai tangata okooko i roto i taua kamupani rai i tetai tua o Engarani. I te openga o ta raua tuatua, kua ui mai te tangata e: “Kua papa ainei koe no te Keritimeti?” Kua tuatua a Pamela e: “Kare!” Kua ui akaou mai tei tuatua ra e: “Kare ainei koe i te manga reiti?” Kua pau mai a Pamela e: “Kare au e akamaara ana i te Keritimeti.” Kua karanga te tangata e, e mea tuke ake rai te reira e kua ui mai aia no teaa ra. Kua akakite atu a Pamela kiaia e koia tetai o te Au Kite o Iehova e kua aere ua atu aia i te akamarama e kare te Puka Tapu i akaue mai ana kia akamaara i te ra anau anga o Iesu, e pera katoa, kare a Iesu i anauia ana ia Titema 25. E tetai katoa, ko te Keritimeti e akamaaraanga peikani te reira mei mua mai. Kua karanga ra tei tuatua e e au mea reka katoa tana i akarongo ra.
E toru marama i muri mai, kua pau a Pamela i te tereponi, e kua karanga mai tei tuatua e: “Te maara ra ainei ia koe i te tuatuaanga kiaku i mua ake i te Keritimeti e te akakiteanga mai kiaku e kare koe e akamaara ana i te Keritimeti? I na, kua kitea ia e au te tuatua mou!” Koia tikai te reira tangata, e kua akamarama mai aia, i nga epetoma e rua i muri ake i te Keritimeti, kua aere mai e rua nga Kite ki tona kainga. Nana i pati ia raua ki roto, e kua akamata tetai apii Puka Tapu. Kua tuatua aia e kua tere ki mua tana au apii anga. Kua akakite atu aia ki tona oa vaine tei noo ki roto i tona kainga, kare a Iehova e mareka i to raua tu oraanga, no reira kua takake raua, i teia nei te aere kapiti nei raua ki te au uipaanga i te Are Uipaanga Patireia.
Kua arikiia raua ei nga tangata tutu aere papetito koreia i te openga o te mataiti, e pera katoa i te akamata anga o te 1990 kua akaipoipo raua. I reira kua papetito kapitiia raua. E openga mekameka tikai te reira no tetai akakitekite anga poto aere ua i runga i te tereponi.
◻ Kua akameitaki a Iehova i tetai tuaine tei akakitekite aere ua i Engarani. I te tae mai anga tetai tangata initurini ki tona ngutupa, kua ui te tuaine kiaia me ka inangaro aia kia taputouia te oraanga matutu, te mataora, e te oraanga mutu kore kiaia. Ae i nanaʼi, e kua ui mai aia eaa te reira akapapa anga initurini tana e tuatua maira. Na te akaari anga kiaia no ko mai i te Puka Tapu ta te Atua au taputou anga no te oraanga mutu kore i te parataito i te enua nei, kua ariki aia i tetai kopi o te puka Ka Rauka ia Koe te Ora Mutukore i Paradaiso i te Enua Nei e kua oti iaia i te tatau te puka i te okotai po. I tona atoro akaou anga i te tuaine, kua akakite atu aia kiaia e e reka tikai te akakite anga—naringa e akarongo tona no te irinaki anga. Kua akamarama te tuaine kiaia e ka anoanoia aia kia apii i te Puka Tapu e kia aere putuputu ki te au uipaanga i te Are Uipaanga Patireia. Kua akapapaia tetai apii Puka Tapu e kua akamata aia i te akaputuputu ki te au uipaanga. Kua papetitoia aia i te tuatau topa anga rau rakau o te reira mataiti. Okotai ua mataiti i muri mai, kua akaipoipo aia i te tamaine a te tuaine tei akakitekite mua mai ki aia. “No reira,” ta te tuaine e karanga ra, “i roto i taku akakitekite aere ua kua rauka kapiti mai iaku e taeake e, e unonga!”
E tika tikai e te ariki ra te aronga kimi i te tuatua mou me orongaia te tuatua mou Puka Tapu na roto i te akakitekite aere ua anga. Mei ta Iesu i karanga, ka akarongo tana au mamoe ki tona reo.