E Autu i te au Araianga e Tere ei Koe ki Mua!

KUA tau te kia o toou motoka, e te taka ra te enitini, inara te patoi ra te reira no te neke ki mua. E manamanata ainei i te pae matini? Kare, te vaira tetai toka maatamaata i mua i tetai o te au uira. Na te akaateaanga i te reira tei umuumuia e tere ei te motoka ki mua.

Na teia tu rai, e au araianga to etai te apii ra i te Pipiria ma te Au Kite o Iehova te tamanata ra i to ratou tere anga ki mua i te pae vaerua. Ei akaraanga, kua akamatakite a Iesu e ko te au mea mei te “anoano maata i to teianei ao, e te pikikaa o te apinga” ka “pokia atura te tuatua” o te tuatua mou e ka tamanata i te tupu anga.​—Mataio 13:22.

No tetai atu, ka arai te au tu matau i roto roa me kare te au tu paruparu ia ratou kia tere ki mua. Kua reka tetai tangata Tiapani ko Yutaka tona ingoa i te tuatua a te Pipiria, inara e manamanata kino tona ma te pereanga moni. Kua tauta putuputu ana aia i te autu i teia tu kino inara kare i manuia ana. Kua ngere iaia i roto i tana raveanga kaki anga te moni maata, e toru au kainga, te tu ngateitei o tona pamiri, e tona uaorai tu ngateitei. Ka rauka ainei iaia i te akaatea i teia araianga kia riro mai ei Kerititiano?

Me kare ka akamanako ana i tetai vaine ko Keiko tona ingoa. Ma te tauturu a te Pipiria, kua rauka iaia i te akaruke i te au tu kino mei te akamori itoro, te tu akono tau kore, e te akakiteanga kia manuia. Inara, kua akakite a Keiko: “Ko te araianga maata kiaku koia oki ko te kai avaava. Kua tauta au i te akaruke i te reira e manganui te taime inara kua puapinga kore.”

Penei kua rauka ia koe tetai apinga kua akaraanga ei araianga kare e rauka i te akaateaia e te tapupu ra ia koe kia kore e tere ki mua. Noatu eaa te reira, kia papu e ma te tauturu a te Atua, ka rauka te reira i te autuia.

Ka akamaara ana i ta Iesu ako anga ki tana au pipi i muri mai i te autu kore anga ratou no te tuaru i te temoni mei tetai tangata maki uti. I te manuia anga a Iesu i te ngai i poka ei ratou, kua akakite atu aia ki tana au pipi: “Angairi e akarongo to kotou mei tetai ua sinapi nei, ka tika ia kotou kia karanga atu ki teianei maunga, Ka aere i ko atu; e nana e aere ua; e kare rava e mea e kore e tika ia kotou.” (Mataio 17:​14-20; Mareko 9:​17-29) Ae, ko tetai manamanata penei kua akaraanga e mei te maunga rai te tu kia tatou e mea iti ua e te puapinga kore ki Tei Anga ma te ririnui ia tatou.​—Genese 18:14; Mareko 10:27.

Akatakaanga i te Au Arairai Anga e Tere ei ki Mua

I mua ake ka raukai ia koe te autu i taau au araianga, ka tau koe i te akataka e eaa ra taua au araianga. Akapeea koe me rave i te reira? I tetai taime ka tuatua atu tetai mema o te putuputuanga, mei tetai tangata pakari me kare te tangata e apii ra i te Pipiria kia koe, no runga i tetai apinga ka tau koe kia akara atu. Koi kore ei e kopae atu i taua ako anga aroa ua, ka tau koe kia ‘akarongo ma te akaaka i te ako, kia pakari.’ (Maseli 8:33) I tetai au taime, ka kite ua koe i toou au tu paruparu na roto i taau apiianga i te Pipiria. Ae, ‘e mea ora oki e te ririnui’ te tuatua a te Atua. (Ebera 4:12) Na te tatauanga i te Pipiria e te au puka akanooia ki runga i te Pipiria ka rauka i te akamaeu i toou au manako i roto roa atu, te au manako ngakau, e te au akakoroanga. Ka tauturu te reira ia koe kia vaito meitaki ia koe uaorai e kia tau ki ta Iehova au turanga teitei. Te akaari maira e te akataka maira i te au mea te arai ra i toou tere anga ki mua i te pae vaerua.​—Iakobo 1:​23-25.

Ei akaraanga, ka manako ana e e reka ana tetai tangata apiipii Pipiria i te manakonako no runga i te au mea tau kore. Penei kare aia e kite ana i te kino i roto i te raveanga i te reira, te manakoanga e kare aia e rave ana i te kino. I roto i tana apiianga, kua kite mai aia i te au tuatua a Iakobo 1:​14, 15: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.” I teianei kua kite mai aia e mei teaa te kino no te rave tamou ua atu i teia aerenga ki tona tere anga ki mua! Akapeea e raukai iaia te akakore i teia arairai anga?​—Mareko 7:​21-23.

Autuanga i te Au Araianga

Penei ma te tauturu a tetai Kerititiano pakari, ka rave atu tetai tangata apiipii i te kimikimi anga i roto i te Tuatua a te Atua, te taangaangaanga i te Watch Tower Publications Index.a Ei akaraanga, te tumu tuatua “Au Manako,” te arataki ra i tetai tangata tatau ki tetai au atikara e manganui tei neneiia te akono ra no te autuanga i te au inangaro tau kore. Te akakite ra teia au atikara i te au irava Pipiria tauturu ua, mei ia Philipi 4:8, te na ko ra: “Ko te au mea mou ra, te au mea tau meitaki ra, te au mea tika ra, te au mea viivii kore ra, te au mea rekarekaia ra, te au mea rongo meitaki ra, te vai ra tetai meitaki, te vai ra tetai mea paapaaia ra, e akamaara i taua au mea ra.” Ae, kia tupauia te au manako tau kore ma te au manako ma e te akamaroiroi!

I roto i tana kimikimi anga, ka kite atu te tangata apii kare e ekoko anga i tetai au kaveinga Pipiria te ka tauturu iaia kia kopae no te akamaataanga i tona manamanata. Ei akaraanga, te akamatakite maira a Maseli 6:27 e Mataio 5:28 no te angai anga i to tetai manako i te au apinga te ka akatupu i te inangaro i te ainga. “E akaariu ke i toku mata kia kore e akara i te mea puapinga kore,” i pure ei te tata taramo. (Salamo 119:37) E tikai, kare e rava ua te tatauanga i teia au irava Pipiria. “Te kimi ra te ngakau o te aronga tuatua-tika ra,” i na te tangata pakari ei. (Maseli 15:28) Na te manakonakoanga kare ua ki runga i tei akaueia e te Atua pera katoa ki runga i te tumu i akaue ei aia, ka rauka i tetai tangata apiipii te maramaanga oonu o te pakari e te manako tau o te au aerenga a Iehova.

I te openga ra, ko tei tauta ra i te autu i teia arairai anga e tere ei aia ki mua ka tau kia kimi ua i ta Iehova tauturu. Mei tera te tu, kua kite te Atua i to tatou tu, e e tu apa ua to tatou, kua maaniia mai mei te one. (Salamo 103:14) Te pure tamou anga ki te Atua no te tauturu, ma te au tauta anga pakari kia kopae no te manakoanga i te au inangaro tau kore, ka akatupu i te openga ra i tetai tupu anga tau​—tetai akava ngakau ma kare e teiaa.​—Ebera 9:14.

Auraka e Tuku i te Au

Noatu e eaa te au tu ngata taau e putoto ra, e kite ua e ka tupu akaou te reira a tetai tuatau ki mua. Me tupu te reira, e mea matau ua no te manako taitaia e te reka kore. Inara, e akamaara i te au tuatua a Galatia 6:9: “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.” Kua kite ana etai au tavini akono o te Atua mei ia Davida raua ko Petero i tetai au poka anga taakama anga. Inara kare raua i tuku ana i te au. Kua ariki akaaka ua raua i te ako anga, kua rave i te au taui anga tei anoanoia, e kua rave tamou ua atu i te akapapu ia raua uaorai ei nga tavini tau no te Atua. (Maseli 24:16) Noatu te au rave anga tarevake a Davida, kua tapa a Iehova iaia “e tangata e tau i toku ngakau, e nana e akatupu i toku au anoano katoa.” (Angaanga 13:22) Kua autu katoa a Petero i tana au tarevake e kua riro mai ei poupou i roto i te putuputuanga Kerititiano.

E manganui i teia tuatau kua rekareka ana e kua manuia i te autu i te au araianga. Ko Yutaka, tei taikuia i te akamata anga, kua ariki i tetai apii Pipiria. Kua akakite mai aia: “Ta Iehova turu anga e te akameitakianga i roto i taku i rave no te tere anga ki mua kua tauturu mai iaku kia autu i toku manamanata no te pere moni. E rekareka maata toku i te kiteanga i te tika anga o te au tuatua a Iesu​—e ma te akarongo, ka rauka te ‘au maunga’ i te akanekeia.” Kare i roa ana, kua riro mai a Yutaka ei tavini orometua i roto i te putuputuanga.

Akapeea a Keiko, e kaki anga tona i te avaava? Te tuaine te apii ra kiaia kua taiku atu e kia tatau aia i te au atikara Awake! tukeke no runga i te kaki avaava. Kua tuku a Keiko i te au tuatua o 2 Korinetia 7:1 i roto i tona motoka ei akamaaraara i te au ra kia vai ma i roto i nga mata o Iehova. Noatu rai, kare i rauka iaia te akaruke. “Kua riri tikai au iaku uaorai,” i na Keiko ei. “No reira kua ui au kiaku uaorai no runga i taku i inangaro​—te inangaro ra ainei au i te tavini ia Iehova me ko Satani?” I te ikianga aia e ko Iehova tana ka tavini, kua pure ngakau tae aia no te tauturu. “Kua poitirere au,” i maara ei aia, “kua rauka iaku te akamutu i te kai avaava ma te kore te mamae. Kua tataraara au e kare au i rave vave ana i te reira.”

Ka manuia katoa koe i te autuanga i te au araianga e tere ei koe ki mua. Te maata atu i taau taui anga i toou manako, au anoano, au tuatua, e te au rave anga angaanga ki te au turanga a te Pipiria, te maata ia te ka rauka ia koe te tu ngateitei uaorai e te irinaki papu. Ka akaoraoraia e ka akamaroiroiia toou au taeake tungane e te tuaine pae vaerua, e pera katoa toou au mema pamiri, me kapiti atu ratou kia koe. Tei maata rava atu, ka akaoonu koe i toou pirianga ma te Atua ko Iehova. Kua taputou mai aia e ‘apai ke i te tukiaanga i te ara o toku ra iti-tangata’ i te oro ke anga mei ta Satani akatereanga. (Isaia 57:14) E ka papu ia koe e me tauta pakari koe no te akaatea e te autu i te au araianga e tere ei koe ki mua i te pae vaerua, ka akameitaki maata a Iehova ia koe.

[Tataanga Rikiriki i Raro]

[Tutu i te kapi 28]

Kua taputou a Iesu e ma te akarongo, ka autuia te au araianga mei te maunga rai te tu

[Tutu i te kapi 30]

Te tatauanga i te Pipiria te akaketaketa ra i ta tatou tauta anga kia autu i te au mea kino pae vaerua