Te Irinaki ra Ainei Koe i Roto i Tetai Atua Tei Tika Tikai?

Te aere ra tetai teretere anga tei akaueia e te American Museum of Natural History kia apii no runga i tetai enua i te Arctic tei ripotiia e kua kitea e tetai tangata kimikimi ko Robert E. Peary no etai itu mataiti i mua ana, i te 1906.

MEI Cape Colgate i te tua mamao roa atu i te tokerau opunga o Marike Tokerau, kua kite atu a Peary i tei akaraanga e e au take teatea o tetai enua mamao. Kua tapa aia i te reira e ko Crocker Land i muri ake i tetai o te aronga tei tauturu iaia i te pae moni. Mei teaa atura te rekareka o te au mema o tetai teretere anga tei aru mai i te kite anga ratou i tetai ngai mamao ma te au puku maunga, te au o, e te au take tei tapokiia e te au kiona! Inara kua kite viviki atu ratou e te akara atura ratou i tetai apinga akatutu ua i te Arctic. Kua akavare teia akaraanga tutu ua ia Peary, e i teianei kua kite mai ratou e kua akapou ratou i to ratou taime, maroiroi, e te au apinga no te kimikimi anga i tetai apinga kare i tika tikai.

I teia tuatau, e manganui te au tangata te oronga ra i to ratou tu akono anga e te taime ki te au atua te irinaki ra ratou te tika tikai ra. I te au tuatau o te apotetoro a Iesu, kua akamoriia te au atua mei ia Ereme raua ko Dia. (Angaanga 14:​11, 12) I teia tuatau, ko te au atua tei akamoriia e te aronga Shinto, te Hindu, e tetai atu au akonoanga i te ao te tere atura te numero ki te au mirioni. E tikai, mei tei akakiteia i roto i te Pipiria, “e manganui oki te atua, e manganui oki te atu.” (1 Korinetia 8:​5, 6) E au atua tika tikai ainei teia pouroa?

Te Au Atua “Kare e Tika kia Akaora Mai”

Ei akaraanga, ka akamanako ana i te taangaanga anga o te au itoro me kare te au tiki i roto i te akamori anga. Ki te aronga e irinaki ra ia ratou me kare te pure ra na roto ia ratou, kua riro mai te au itoro ei au akaora te raukaanga te au mana ririnui te ka tutaki i te au tangata me kare ka akaora mai ia ratou mei te kino. Inara ka rauka ainei ia ratou i te akaora? No runga i taua au apinga, kua imene iora te tata taramo: “Te au idolo no te etene, e ario ïa e te auro, e angaanga na te rima tangata. E vaa to ratou, kare ra e tuatua; e mata to ratou, kare ra e akara; E taringa to ratou, kare ra e akarongo; kare oki e aʼo o roto i to ratou vaa.” Ae, e au atua ratou “kare e tika kia akaora mai.”​—Salamo 135:​15-17; Isaia 45:20.

E tika, ko te aronga te maani ra i te au itoro penei ka akameitaki i tei rauka i to ratou nga rima i te maani ma te ora e te mana. E ko te aronga te akamori ra i te au itoro te tuku ra i to ratou irinaki ki roto ia ratou. “Kua taoka ratou iaia [te itoro] ki runga i te pakuivi,” i na te peroveta ei ko Isaia, “kua apai aere; kua akatu oki ratou iaia ki tona ngai, e kua tu ua maira aia.” Kua tuatua mai aia: “Kare aia e akaruke i tona ra turanga: e kia kapiki ua atu tetai kiaia, kare ra aia e îō mai; kare e tika kia akaora iaia i tona ra tumatetenga.” (Isaia 46:7) Ko te tika ka vai ora kore ua tetai itoro noatu mei teaa te ngakau tae o te akarongo o te aronga e irinaki ra i te reira. E “au idolo tuatua kore ra” taua au tiki e te au itoro akatoia ra.​—Habakuka 2:18.

Te akamorianga itoro, te akangateiteianga, me kore te reka anga i tetai tangata tamataora, te au tangata tarekareka, te au akatereanga poritiki, e tetai atu au arataki akonoanga te matauia ra i teia tuatau. Pera katoa, e atua te moni ki te manganui. I te turanga tataki tai, kua akariroia teia au itoro ei au apinga kare e puapinga i roto ia ratou. Kare e rauka ia ratou i te oronga pouroa mai i tei manakonakoia e te aronga e irinaki ra ia ratou. Ei akatauanga, penei te akaraia ra e te mou ra te apinganui i te pauanga ki te au manamanata e manganui, inara e mea akavare ua te mana o te apinganui. (Mareko 4:19) Kua ui tetai tangata kimikimi: “Akapeea tatou i te manako anga i tetai apinga tei anoano maataia e te au tangata e manganui, e te irinakiia ra e ko te rapakau anga i te au mea ravarai, me rauka mai kua akatupu i te au tupu anga tuketuke mei te maromaroa ki te kino?” Ae, te aruaru anga i te apinganui penei te umuumu ra e kia akaatinga tetai tangata i tei puapinga tikai, mei te oraanga kopapa meitaki, tetai oraanga pamiri merengo ua, te au pirianga oa vaitata, me kare te pirianga apinganui ma Tei Anga ra. Kua riro mai tona atua kare atu mari ra e “mea puapinga kore pikikaa”!​—Iona 2:8.

“Kare e Tuatua Mai”

E mea neneva i te tapa e tika tikai tei kore ra i tika tikai. Kua kite mai te aronga akamori i te atua ko Baala o te tuatau o te peroveta ko Elia i teia na roto i te mataara ngata. Kua irinaki ngaueue kore ratou e tei ia Baala te mana no te tuku mai i te ai mei te rangi ra kia akapou i te atinga animara. Ko te tika, “kua tautopa iora i te ingoa o Baala, mei te popongi mai e avatea atura, i te kapiki ua anga e, E Baala, e akarongo mai ia matou.” E nga taringa ainei to Baala kia akarongo mai, e e vaa kia tuatua mai? Te akakite maira taua tataanga: “Kare e reo, kare e tuatua mai.” E tika oki, “kare ratou i akonoia mai.” (1 Ariki 18:​26, 29) Kare a Baala i tika tikai, kare i ora mai, me kore i maroiroi.

Mei teaa te puapinga kia kite tatou e kia akamori i tetai Atua tei tika tikai! Inara koai aia? E akapeea te irinakianga i roto iaia i te akapuapinga anga ia tatou?

[Au Tutu i te kapi 3]

Akara iora te taeake o Peary ko Egingwah i te ionga no te enua

Ko Robert E. Peary

[Akameitakianga]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Au Tutu i te kapi 4]

E manganui tei akavareia e tei akamoriia i teianei ao