Irinaki ia Iehova—Te Atua Tei Tika Tikai

Kua akara ana ainei koe ki te au rangi i te po kare e tiaorangi e kua kite atu i te au anere au etu? Akapeea koe me akamarama i to ratou vai anga mai?

I TE muteki anga o te po, kua tuatua atu te au etu ki te Ariki ko Davida o Iseraela taito, i te akakeuanga iaia kia tata: “Te tuatua nei te au rangi i te kakā o te Atua; e te akakite nei te reva i te angaanga a tona rima.” (Salamo 19:1) Ae, ko Tei Anga ra kare i te au mea angaia tei tau ‘te kakā, e te akangateitei, e te mana.’​—Apokalupo 4:11; Roma 1:25.

“Ko tei akatu ra i te au mea katoa, ko te Atua ïa,” i na te Pipiria ei. (Ebera 3:4) E tika, ko te Atua mou, ‘ko Iehova tona ingoa, ko koe ia anake Tei Teitei i te enua katoa.’ (Salamo 83:18) E kare aia i te mea manako uaia​—tei akatutu uaia. Kua tuatua oki a Iesu Karaiti no tona Metua i te rangi ra, ko Iehova: “Ko tei tono mai iaku, e tika tikai aia.”​—Ioane 7:28, NW.

Iehova​—Ko Tei Akatupu ra i Tana Au Akakoroanga

Te ingoa takake tikai o te Atua, ko Iehova, te kiteia ra vaitata rai e 7,000 taime i roto anake i te au Tuatua Tapu Epera. Te akataka meitaki maira taua ingoa ra e e tika tikai aia. Te aite anga tikai o te ingoa o te Atua “Ka Akariro Aia kia Tupu.” Mei reira mai te akataka maira te Atua ko Iehova iaia uaorai e ko tei Akatupu i tana au akakoroanga. I te ui anga a Mose ki te Atua no tona ingoa, kua akataka maata atu a Iehova i te aiteanga tikai na teia mataara: “Te vai nei au, ko au rai e vai nei.” (Exodo 3:14) Te akakite tika ra ta Rotherham uri anga: “Ka Riro Mai au i taku uaorai i mareka ra.” Te akapapu maira a Iehova, me kore te iki ra kia riro mai, i tei anoanoia kia akatupu e kia tika tikai tana au akakoroanga tuatua tika e te au taputou. No reira, te akono ra aia i te au taoonga tuketuke e manganui, mei Tei Anga, te Metua, te Atu Ngateitei, te Tiaki, Iehova sabaota, Tei Akarongo i te pure, te Akava, te Puapii Maata, e te Akaora.​—Akava 11:27; Salamo 23:1; 65:2; 73:28; 89:26; Isaia 8:13; 30:20; 40:28; 41:14.

Ka rauka anake i te Atua mou ra i te akono i te ingoa Iehova, no te mea kare rava e papu i te au tangata me ka manuia ta ratou au parani. (Iakobo 4:​13, 14) Ka rauka anake ia Iehova te tuatua: “Mei te ua e topa nei, e mei te kiona, no runga mai te rangi ra, e kare i oki akaou ki reira, kua tamauu ra i te enua, e kua akatupu ra, e kua akauua mai oki i tana, i raukaʼi oki te ua i te aronga e ruru, e te kai i te aronga e kai ra: Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isaia 55:​10, 11.

Te rave ra a Iehova i tana akakoroanga ma te papu tikai e noatu ko tei akaraanga tika kore ki te au tangata ra e tika tikai ia mei tana akaraanga. I muri roa ake i te mate anga a Aberahama, Isaaka, e Iakoba, kua taiku a Iesu no runga ia ratou e kua karanga e: “Kare oki aia [a Iehova] i te Atua no tei mate, no tei ora ra; te ora katoatoa ra iaia.” (Luka 20:​37, 38) Kua mate ke ana nga pateriareka tiratiratu e toru, inara ko ta te Atua akakoroanga no te akatu akaou mai ia ratou kua papu tikai i te akatupuia e kiaia te ora ua ra ratou. Te akaora akaou anga mai i teia au tavini tiratiratu kare e ngata ia Iehova mei tana anga mai anga i te tangata mua mei te one pueu.​—Genese 2:7.

Te oronga maira te apotetoro ko Paulo i tetai akaraanga ke o te tika e te akatupu ra te Atua i tana i akakoro kia raveia. I roto i te au Tuatua Tapu, kua tapaia a Aberahama “ei metua no te pa enua e manganui.” (Roma 4:​16, 17) Koi vai ei a Aberama ma te kore e tamariki, kua taui a Iehova i tona ingoa kia Aberahama, te aite anga “Metua o te Urupu (Manganui).” Kua akariro a Iehova i te aite anga o taua ingoa kia tika tikai na te akatupu anga na roto i te temeio i te au mana uanga o Aberahama pakari e tana vaine ruaine, ko Sarai.​—Ebera 11:​11, 12.

Kua tikaia ma te mana maata e te akaaerenga, kua tuatua a Iesu Karaiti no runga i te au mea tika tikai mei tetai manako teitei atu i to te au tangata ra. Noatu kua mate tona oa vaitata ko Lazaro, kua akakite a Iesu ki tana au pipi: “Kua moe to tatou oa ko Lazaro; e te aere nei au e akaara iaia.” (Ioane 11:11) Eaa ra a Iesu i tuatuai no tetai tangata mate e te moe ua ra?

I te tae anga a Iesu ki to Lazaro kainga i Betania, kua aere atu aia ki te vaarua e kua akaue atu e kia akaateaia te toka te arai ra i te ngai tomo anga. I muri mai i te pure maata anga, kua akaue atura aia: “E Lazaro, ka aere mai ki vao!” E ma nga mata o te aronga akara e mou ra ki runga i te vaarua, “kua aere maira taua tangata i mate ra ki vao, kua tākaiia nga rima e nga vaevae; i vaîia oki te mata i te kakau.” Kua karanga atu a Iesu: “Ka tatara, e tuku atu iaia kia aere ana.” (Ioane 11:​43, 44) Kua akatu atu a Iesu ia Lazaro​—te akaoki akaou anga i te ora ki taua tangata tei mate e a ra! Kare a Karaiti i akakite pikikaa ana no runga i te tuatua mou i tona tuatua anga e te moe ra tona oa. Mei te akaraanga a Iehova raua ko Iesu, mei te mea atura e te moe ua ra a Lazaro tei mate ra. Ae, kua akono a Iesu raua ko tona Metua i te rangi ra i te au mea tika tikai.

Ka Rauka ia Iehova i te Akariro e kia Tika Tikai to Tatou Au Manakonakoanga

Mei teaa te tuke anga e vaira i rotopu i te au itoro akavare ua e te Atua tika tikai! Kua oronga tarevake ua te aronga akamori itoro i te mana ririnui ki ta ratou au mea akamori anga. Inara, kare e rauka i teia raveanga akangateitei i te oronga atu i te au mea temeio ki teia au itoro. I tetai tua, ka tau ua ia Iehova i te tuatua no tona au tavini tei mate ke ana e te ora ra ratou, ka rauka oki iaia i te oronga akaou i te ora kia ratou. “Ko Iehova ra te Atua mou,” e kare rava aia e akavare ana i tona iti tangata.​—Ieremia 10:10.

Mei teaa te pumaana i te kite e i roto i to Iehova tuatau tau, te aronga tei mate e tei roto i tona manako ka akatu akaouia​—ki te ora! (Angaanga 24:15) Ae, te o maira ki roto i te akatuakaouanga te akaoki akaou anga mai i te ora o tetai tangata ra. Te maaraanga i te tu oraanga o te aronga mate ra e te akatuakaouanga mai ia ratou kare ia i te mea manamanata ki Tei Anga ra, tei mutu kore i te pakari e te mana. (Iobu 12:13; Isaia 40:26) I te mea te maata ra to Iehova aroa, ka taangaanga aia i tona manako apa kore no te akaora akaou mai i tei mate ra ki runga i tetai parataito i te enua nei ma to ratou tu peretana i mua ake ka mate ei ratou.​—1 Ioane 4:8.

I te openga o te ao o Satani e vaitata maira, papu tikai te kaka ra te tuatau ki mua no te aronga e irinaki ra i roto i te Atua mou. (Maseli 2:​21, 22; Daniela 2:44; 1 Ioane 5:19) Te akapapu maira te tata taramo ia tatou: “E roa poto ake, e kare ua te tangata kino ra, koia tikai rai, . . . Kareka te aronga maru ra, ka noo ïa i te enua, e ka rekareka ratou i te maata o te au ra.” (Salamo 37:​10, 11) Ka riro te raveanga kino e te ta ua ei mea taito. Ka autu te tu tika, e ka ngaro ke te au tu ngata i te pae moni. (Salamo 37:6; 72:​12, 13; Isaia 65:​21-23) Ka akakoreia te katoa anga o te tu iriiri i te pae oraanga, te kara tangata, te kopu, e te eteniki. (Angaanga 10:​34, 35) Ka kore te au tamaki e te au apinga tamaki. (Salamo 46:9) I taua tuatau “kare oki to reira e karanga e, Kua maki au.” (Isaia 33:24) Ka rekareka te katoatoa i te oraanga apa kore e te maroiroi. (Apokalupo 21:​3, 4) Kare e roa atu ka riro mai te parataito i te enua ei mea tika tikai. Kua akakoro a Iehova i te reira!

Ae, kare e roa atu ka akatupuia te au manakonakoanga katoatoa tei akanooia ki runga i te Pipiria. Eaa ra tatou ka tuku ei ia tatou uaorai kia akavareia i tei akamoriia i roto i teia ao i te mea e ka rauka ia tatou i te tuku i to tatou irinaki tikai ki roto ia Iehova? E anoano ia nona no “te tangata katoatoa kia ora, e kia rauka te kite i te tuatua-mou.” (1 Timoteo 2:​3, 4) Koi kore ei e akapou i to tatou taime e te au apinga ki te au mea manako uaia, me kore akatutu uaia, o teia akatereanga o te au mea e tona au atua, kia tupu ua atu tatou i roto i te kite o te Atua tei tika tikai e kia irinaki i roto iaia ma to tatou ngakau katoa.​—Maseli 3:​1-6; Ioane 17:3.

[Tutu i te kapi 6]

Mei te akaraanga a Iehova raua ko Iesu, te moe ua ra a Lazaro

[Au Tutu i te kapi 7]

Kare e roa atu ka riro mai te parataito i te enua ei mea tika tikai