“E Aere mai Kotou Kiaku Nei, . . . Naku e Akaanga i To Kotou Roi”
‘Akakiteanga i te Tuatua’ Te Apai Maira i te Akaangaroi Anga
E TANGATA kino kore oki aia ma tetai angaanga puapinga rava. Kua meitaki roa tana au ravenga ikuiku anga e “kua va ua te tangata i tana tuatua.” (Mataio 7:28) E tangata akakite roiroi kore katoa aia. Kua akapouia te maata anga o tona taime, te maroiroi, e te au apinga ki runga i te akakiteanga i te Patireia o te Atua. Ae, kua teretere atu a Iesu Karaiti ki roto i tona enua katoa ei tangata akakite aite koreia e ei puapii katoa.—Mataio 9:35.
Ko ta Iesu angaanga rapurapu koia oki kia akakite i “te evangelia o te basileia” ki tona au taeake i taua tuatau e kia akapapa i tana au pipi no taua angaanga ra i te koropu katoa. (Mataio 4:23; 24:14; 28:19, 20) Ka taomi ainei te maata o ta ratou angaanga akakiteanga e te rapurapu oki i te reira e pera katoa te maata tikai o taua angaanga i tana au pipi apa ua e tei kotinga uaia?
Kare rava! I muri mai i te ikuikuanga i tana au pipi kia pure ki “te Atu o te mou,” ko te Atua ko Iehova, kia unga mai i te aronga angaanga, kua tono atu a Iesu ia ratou kia apiipii i te au tangata. (Mataio 9:38; 10:1) Kua akapapu atu aia e ka apai mai te apainga i te riro anga mai ei pipi nana—kapiti mai te akauenga kia tutu aere—i te akamaru anga tikai e te pumaana. I na Iesu ei: “E aere mai kotou kiaku nei, . . . naku e akaanga i to kotou roi.”—Mataio 11:28.
E Tumu Anga Rekareka
Mei teaa atura te tangi aroa, te inangaro ua, e te takinga meitaki i taua pati anga ra! Te akakite maira te reira i to Iesu manako ngakau no tana au pipi. Te kite ra tana au pipi i te akaangaroi anga i roto i te akatupuanga i ta ratou apainga kia akakite i “te evangelia” o te Patireia o te Atua. Te apai mai nei teia i te rekareka tikai e te merengo anga kia ratou.—Ioane 4:36.
I mua roa ake ia Iesu i te enua nei, kua akakite maata te au Tuatua Tapu e kia riro te rekareka e ko tetai tu o te angaanga tapu ki te Atua. Kua akataka meitakiia teia i te imene anga te tata taramo e: “Kia rekareka te enua katoa ia Iehova. E akamori ia Iehova ma te pereperekavana; e aere mai ki mua i tona aroaro ma te imene.” (Salamo 100:1, 2) I teia tuatau, te akapaapaa nei te au tangata o te pa enua ravarai ia Iehova, e te riro ra ta ratou au akakite akapaapaa anga mei te rekareka maata i te autu anga i tetai tamaki. Te aronga tei akono tikai i te Atua te aere maira ki mua i tona aroaro “ma te imene.” E te tau tikai ra te reira kia Iehova, “te Atua mataora,” tei inangaro i tona au tavini kia rekareka i roto i te raveanga i ta ratou akatapu anga kiaia.—1 Timoteo 1:11, NW.
Akaangaroiia te Au Orometua
Akapeea e raukai te au angaanga pakari i roto i te angaanga orometua kia kore e akaparuparu ia tatou inara te akaangaroi ra ia tatou? Te raveanga i ta Iehova angaanga kua aite ki te kai akamatutuanga kia Iesu. Kua tuatua aia: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.”—Ioane 4:34.
Ma te aiteite, te kite ra te au Kerititiano akakite maroiroi i te rekareka ia ratou e ‘akakite ua ra i te tuatua.’ (2 Timoteo 4:2) Ko Connie, e vaine Kerititiano i roto i tona mataiti rotopu te akapou ra e tere atu i te 70 ora i te marama i roto i te angaanga akakiteanga, te tuatua maira: “I muri ake i te raveanga i te angaanga orometua, kua rauka iaku te tu merengo ua e te manako meitaki, noatu te roiroi ra au i te openga o te ra.”
Akapeea me kare te tuatua Patireia e ariki meitakiia mai ana? I na Connie ei: “Noatu te ariu anga, kare rava i tupu ana te taime e kua tataraara au i te raveanga i te angaanga orometua. I te pae mai i te kiteanga e te rave nei au i tei akamareka ia Iehova, te manako nei au ei marekaanga no te akakite i te tuatua mou no te mea iaku e rave ra i te reira, te akaketaketaia ra te manakonakoanga meitaki mei te Pipiria i roto i toku ngakau.”
Te kite ra tetai i te tauturuanga i te au tangata kia rauka te kite tikai i te Atua te akapuapinga ra i to ratou uaorai oraanga. Ko Meloney, e vaine mapu te akapou putuputu ra e tere atu i te 50 ora i te marama i roto i te angaanga tutuanga, te karanga ra: “E akaangaroi tikai te angaanga orometua no te mea te oronga maira te reira i te manako tika e te akakoroanga ki toku oraanga. Kua riro mai te au manamanata uaorai e te au taitaia i te au ra ei mea meangiti ua me rave atu au i te angaanga.”
Ko Millicent, e orometua maroiroi o te Au Kite o Iehova, te karanga ra: “Te akapuapinga ra te angaanga orometua i te ra taki tai taku e akapou ra no te tuatua anga ki tetai no runga i ta te Atua akakoroanga no te au tangata ravarai e te akamaramaanga e akapeea me akanoo akaouia te Parataito i te enua nei. Te akariro ra kia tika tikai a Iehova kiaku i te au ra ravarai e te oronga maira i te au kiaku e te tu mataora i roto roa tei kore e rauka na roto i tetai atu au ravenga.”
Akaangaroiia te Aronga Ariu Mai
Papu tikai te akaangaroiia ra te aronga akakite aere i te Patireia e te angaanga orometua Kerititiano, e te aronga tei ariu mai i te au tuatua akaora te akapumaanaia ra e te reira. Noatu e puapii i Portugal e kua tereniia e te au paretenia e te au orometua, kua manako aia e kare i akakiia tona au anoano i te pae vaerua e tana ekaretia. Kare rai tana au uianga Pipiria i pauia ana. Kua riro te apii tamou i te Pipiria tei raveia e tetai o te Au Kite o Iehova ei akataka i te kite Tuatua Tapu mei tetai e tetai kiaia. Kua rekareka tikai te puapii. “Kua tapapa mataora ua au i taku apii i te au Ruitoru pouroa,” i nana ei, “i taku au uianga e pau takitaiia maira e te akapapu anga a te Pipiria.” I teia tuatau, e tavini akatapuia teia vaine no Iehova, e te akaangaroi katoa ra aia i tetai atu ma te au tuatua mou Pipiria.
Te taka meitaki ra, i reira, kare te Au Kite o Iehova i akataitaiaia e te pakari o ta ratou akauenga kia akakite aere me kore te maatamaata o ta ratou ngai angaanga i te koropu. Kare i rauka i te tu tuke e te patoi anga i te akaparuparu i to ratou au tu. Kua taangaanga maroiroi ratou ia ratou uaorai i te akatupu anga i ta ratou akauenga te akakiteanga i te Patireia. Te akakite ra ratou i te tuatua meitaki ma te au tangata i te ngai ka kitea ratou—te ngai tapu anga toroka i Marike (1), te ngai to anga pairere i Korea (2), i te Andes (3), me kare i te makete i London (4). Te rave mataora nei te au tavini o Iesu i ta ratou angaanga puapinga i te ao katoa. E tika tikai ki tana taputou, kua akaangaroi aia ia ratou e kua taangaanga ia ratou kia akaangaroi i tetai atu e manganui.—Apokalupo 22:17.