Kua Tavini Ratou i te Taeakeanga Kerititiano i te Au Pa Enua
KUA akarongo ainei koe i te au tuatua “te au tavini i te pa enua” e te “aronga tauturu i te pa enua”? Ko te Au Kite o Iehova tei kapiti atu ki teia au pupu o te aronga tauturu kua oronga atu i to ratou taime e te au tu karape kia tauturu i te au ngai patuanga te taangaangaia ra no te nenei e te tua anga i te tuatua akakite Patireia a te Pipiria. Te tauturu katoa ra taua aronga tauturu i te patuanga i te au Are Akaputuputuanga e te au Are Uipaanga Patireia, tei riro mai ei au ngai ikuikuanga Pipiria. I teianei, te tauturu ra teia aronga tauturu i te au angaanga patuanga i te au enua tukeke e 34, ko te maata anga i roto i te au enua ma te au apinga tei kotingaia. Eaa te au akaaoanga e te au rekarekaanga ta teia au tangata orometua e kite ra ia ratou e tavini ra i te taeakeanga Kerititiano i te au pa enua? Eaa to ratou manako no runga i te “angaanga tapu” ta ratou e rave ra? (Apokalupo 7:9, 15) E kitea ai, e aravei tatou i etai o te aronga tauturu tei tavini ana i Meiko.
Kua tae mua mai te aronga tauturu mei te ngai ke ki Meiko ia Me 1992. Kare i roa ana i muri mai, kua rave ratou i te arataki anga i te akamaataanga i te manga, te akono ra i te au angaanga a te Au Kite o Iehova i Meiko. Kua o mai i roto i te akamaataanga e 14 are akatu ouia, kapiti mai te ngai noo anga no te aronga tauturu te tavini ra i te opati manga, tetai ngai nenei anga, e tetai are opati.
E tauturu ei i teia angaanga patuanga, kua tere atu e 730 aronga tauturu mei Kanata, Peritane Maata, Marike, e tetai ua atu au enua te tavini taokotai ra ma te anere ua atu aronga tauturu mei te au tuanga katoatoa o Meiko. Kapiti atu, kua tere atu e 28,000 Au Kite tei piri mai ma etai au putuputuanga e 1,600 tei te au ngai vaitata atu ki te opati manga te tauturu ra i te au angaanga patuanga i te openga o te au epetoma. Kua tavini pouroa ma te ngakau puareinga e kare e tutakiia i te oronga anga i to ratou au tu karape. Kua manako ratou i te reira ei akameitakianga kia tavini ia Iehova na teia mataara. I roto i te angaanga akatu anga, kua tamou manako ratou i te au tuatua akauruia tei kiteaia ia Salamo 127:1 e: “Kia kore a Iehova e patu i te are ra, e angaanga puapinga kore ta te aronga i patu ra.”
Te Au Akaaoanga ta Ratou ka Aro Atu
Eaa te au akaaoanga ta te aronga tauturu pa enua ka aro atu ia ratou e tavini ra i tetai tukuanga angaanga i te enua ke? Ko teia etai o ta ratou au akaraanga. Ko Curtis raua ko Sally, e nga tokorua no Marike, kua tauturu ana i te au angaanga patuanga i Initia, Meiko, Parakuai, Romania, Rutia, Tamapia, Tenekara, e Tiamani. Te akakite ra a Curtis: “Ko te akaaoanga mua ko te akaruke anga i ta maua tamaine, te tavini ra ei painia [e orometua tamou], e to maua putuputuanga i te kainga i Minnesota. Kua piri atu ana maua ko taku vaine ki taua putuputuanga ra no te 24 mataiti, e nooanga pumaana tikai to maua i reira.”
Te akakite ra a Sally: “I te noo anga i raro ake i te au turanga matau koreia e akaaoanga ia, penei ki tetai vaine kare ra ki te tane, inara kua kite au e ka rauka te reira i te akatikatikaia. Kua kite rai au i te akakoromaki i te au manumanu, e maata oki ratou!” Kua tuatua katoa aia e: “I tetai enua, e tai ngauru ia matou aronga tauturu tei akono e tai apatimani kare e ngai tunu anga i te kai e e rua ua rai ngai pai anga. I reira kua kite au i te akakoromaki anga maata.”
Ko te apii anga i tetai reo ou ko tetai akaaoanga ke ia te umuumuia ra te tautaanga e te tu akaaka. Ko Sharon, tei tavini ana ma tana tane i runga i te angaanga patuanga i tetai au enua ke, te karanga ra e: “Te kore anga e kite i te reo o te enua taau e tavini ra e akaaoanga ia. I te akamata anga, e ngata te reira kia piri vaitata atu ki toou au taeake e te au tuaine i te pae vaerua me kare oki e rauka ei ia koe i te akakite atu i toou au manako. E tamanamanata te reira. Inara ko te au taeake ta maua i aravei i roto i ta maua tukuanga angaanga ke te akakoromaki marie ra ia maua e te manako oonu maira i to maua tu. Kare i roa ana, kua akamata maua i te komunikeiti.”
Piri Anga ki Roto i te Angaanga Orometua te Anoanoia ra te Mataku Kore
Noatu e te oronga maata ra taua aronga tauturu akaatinga uaorai kia tere ki mua te angaanga patuanga, kua kite ratou e ko ratou, ko te mea mua e te mea maata roa atu, e aronga tutu aere i te tuatua meitaki o te Patireia o te Atua. No reira, te turu maata ra ratou i te angaanga tutu anga tei raveia i roto i te au putuputuanga e piri atura ratou. Ko Åke raua ko Ing-Mari, e nga tokorua tei tauturu i te au angaanga patuanga i Kuaterupe, Maraui, Meiko, e Naiteria, te akatika ra e ko te taangaanga anga i tetai reo ke i te piri anga ki roto i te angaanga orometua koro i tetai enua ke te anoanoia ra te mataku kore.
Te akakite ra a Ing-Mari: “I te akamata anga kua rimitiia to maua piri anga, i te mea e e aru ua ana maua i te Au Kite i reira e, no te tu akama, e putuputu te taime ka akaruke maua e na ratou e rave i te tuatua anga. Inara, i tetai popongi kua iki maua i te aere ki te angaanga koro ko maua anake ua. Kua aere atu maua ma te ruketekete o nga vaevae e te panapana anga te pukuatu. Kua aravei maua i tetai vaine mapu tei akarongo mai ki taku akakite anga tei akapapaia. Kua tatau au i tetai irava e kua oronga atu i etai au puka. Kua tuatua mai i reira te vaine: ‘E pau mai i teia uianga naku. E kopu tangata toku te apii ra i te Pipiria ma te Au Kite o Iehova. Akapeea e rauka ai tetai apii naku?’ Kare au i kite e eaa te ka tuatua atu. Kua akamaru i reira au iaku uaorai e kua oronga atu i tetai apii Pipiria kiaia.”
Kua tuatua katoa a Ing-Mari: “E akamanako ana i toku rekareka e toku mareka anga kia Iehova no te akameitaki anga i to maua rave mua anga e to maua anoano kia akakite i te tuatua mou.” Kua tere meitaki teia vaine ki mua e kua papetitoia ei Kite i tetai uruoaanga tapere i Mexico City. Kua akakite tapoto mai a Åke raua ko Ing-Mari i ta raua angaanga orometua na teia mataara: “Te akaperepere maata nei maua i ta maua tukuanga angaanga o te au angaanga patuanga tukeke, inara kare e apinga i tere maata atu te rekareka anga e te merengoanga no te tauturu anga i tetai tangata kia mou i te tuatua mou.”
Tetai Vaerua Atinga Uaorai
E tika, ko te aronga tauturu tei akaruke i te pamiri e te au oa te rave ra i te au atinga kia tavini i to ratou au taeake i te au enua ke, inara kua kite katoa ratou i te rekarekaanga tei tere maata atu. Eaa ra te reira?
Kua akataka mai a Howard, tei tavini ana ma tana vaine, ko Pamela, i Angakora, Ekuatoa, Ere Taravatoa, Kaiana, Koromopia, Meiko, e i Pueto Riko e: “E akameitaki anga te reira i te aravei anga i te au taeake e te au tuaine i te au enua tukeke e te kite mua anga i te tatua no te aroa e vaira i roto i to tatou taeakeanga pa enua. I tatau putuputu ana maua no runga i te reira, inara me kua noo ana e kua tavini ana koe ma tetai ke mei tetai au peu e te au turanga tuke ra, ka akaperepere maata atu koe i to tatou taeakeanga okomaata.
Ko Gary, tei tauturu ana i te au angaanga patuanga i Ekuatoa, Koromopia, Kota Rika, Meiko, e Tamapia, kua manako katoa e ko teia porokaramu nei kua akapuapinga maata iaia. Te akakite ra aia e: “Ko te tereni anga tei rauka iaku e tere ua atu te au mataiti na te taokotaianga ma te au taeake pakari te tavini ra i te au manga i te au enua tei tukunaia au kua tauturu iaku kia tau meitaki no te au akaaoanga i roto i taku tukuanga angaanga. E akaketaketa anga te reira i te akarongo no te mea te oronga ra te reira i tetai tuatau kia kite i te taokotaianga te akataka ra i ta Iehova akaaerenga i te ao katoa—e taokotaianga te autu ra i te au tuke anga i roto i te reo, te iti tangata, me kare i te peu.”
I taua taime rai, kua oti te angaanga patuanga i Meiko, e ko te au ngai manga tei akamaataia kua akatapuia i teia mataiti. Kua akakeuia e to ratou aroa no te Atua ra, kua oronga maata te au tavini pa enua e te aronga tauturu pa enua ki te akamaataanga i te akamori anga mou i Meiko e i tetai ua atu ngai ke. To ratou ngakau puareinga e te atinga uaorai kia tavini i to ratou au taeake Kerititiano i te au pa enua kua ariki maataia e te Au Kite o Iehova takapini i te ao.
[Tutu i te kapi 25]
Ekuatoa
[Tutu i te kapi 25]
Koromopia
[Tutu i te kapi 25]
Angakora
[Tutu i te kapi 26]
Akamataanga i te angaanga i runga i te au ngai ou i te manga i Meiko
[Tutu i te kapi 26]
Te aua tiare i te manga
[Tutu i te kapi 26]
I raro ake nei: Ko etai au mema no te Tipatimani Patuanga i mua i tetai tuanga o te au ngai ou
[Tutu i te kapi 27]
Kua rekareka te aronga tauturu patuanga i te turu anga i te angaanga tutu anga ma te au putuputuanga o reira