Aruaru Anga i te “Poe Meitaki Maata Roa” i Teia Tuatau
“E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai.”—MATAIO 24:14.
1, 2. (a) Akapeea te ngati Iuda i to Iesu tuatau te manako anga no runga i te Patireia o te Atua? (e) Eaa ta Iesu i rave kia oronga atu i te marama anga tau no te Patireia, e eaa tei tupu mai?
E TUMU manako inangaro pakari ia te Patireia o te Atua i rotopu i te ngati Iuda i to Iesu aere anga mai ki te enua nei. (Mataio 3:1, 2; 4:23-25; Ioane 1:49) Inara, i te akamata anga, kare te maata anga io ratou i marama tikai ana i te maata e te mana o te reira; kare rai ratou i marama ana e e kavamani te reira i te rangi ra. (Ioane 3:1-5) Pera katoa etai tei riro mai ei pipi na Iesu kare i marama tikai ana e eaa te Patireia o te Atua me kore eaa ta ratou ka rave kia rauka te akameitakianga te riro anga mai ei au tutara taokotaiia ma Karaiti.—Mataio 20:20-22; Luka 19:11; Angaanga 1:6.
2 I te au tuatau e topa atura, kua apii marie a Iesu i tana au pipi i te au apiianga e manganui, kapiti mai te parapore o te poe meitaki maata roa tei tamanakoia i roto i te atikara i mua akenei, te tou anga kia ratou te puapinga maata no te tamou marie anga ia ratou uaorai i te aruaru anga i te Patireia i te rangi ra. (Mataio 6:33; 13:45, 46; Luka 13:23, 24) Penei na teia i akakeu oonu i to ratou ngakau no te mea kare i roa ana kua riro mai ratou ei aronga akakitekite roiroi kore e te mataku kore i te tuatua meitaki o te Patireia ki te ope o te enua, e tika anga te akapapu tikai ia maira i roto i te puka a Angaanga.—Angaanga 1:8; Kolosa 1:23.
3. No runga i to tatou tuatau, eaa ta Iesu i karanga ana no runga i te Patireia?
3 Akapeea ra, i teia tuatau? Kua akanooia ki mua i te au mirioni ua atu te au akameitakianga no tetai parataito i te enua nei i raro ake i te Patireia. I roto i tana totou no runga i “te openga o teianei ao,” kua akakite tikai mai a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:3, 14; Mareko 13:10) Kua akamarama katoa mai aia e ka raveia teia angaanga maata noatu te au arairai anga e te au akaaoanga pakari, e pera katoa te takinga kinoanga. Noatu rai, kua oronga mai aia i te akapapu anga: “Kareka te tāpu tikai e tae ua atu ki te openga ra, ka ora ïa.” (Mataio 24:9-13) Te umuumu katoatoa maira teia i te tu o te akaatinga uaorai e te akatapu anga tei akaariia mai e te tangata oko i roto i ta Iesu parapore. E au tangata tataki tai ainei tetai i teia tuatau te akaari ra i taua akarongo e te maroiroi i te aruaru anga i te Patireia?
Te Rekareka no te Kitea Anga te Tuatua Mou
4. Eaa te akatupu anga ta te tuatua mou Patireia e rave ra ki runga i te au tangata i teia tuatau?
4 Kua rekareka te tangata oko i roto i ta Iesu parapore i te kite mai anga aia i tana i manako maira e e “poe meitaki maata roa.” Kua akakeu taua rekareka ra kia rave aia i te au mea ravarai kia rauka mai iaia te poe. (Ebera 12:1) I teia tuatau, te akavaitata maira e te akakeu katoa ra te tuatua mou no runga i te Atua e tona Patireia i te au tangata. Te akamaara maira teia i te au tuatua a te Taeake ko A. H. Macmillan, tei tata no runga i tana kimi anga uaorai no te Atua e Tona akakoro anga no te au tangata ravarai, i roto i te puka Faith on the March. Te karanga ra aia: “Ko tei kiteaia mai e au e tauatini ua atu te au tangata te kimi ua ra rai i te reira i te au mataiti ravarai. E au tangata ratou mei ia tatou rai, no te mea no roto mai ratou i te pa enua ravarai, te iti tangata, e te au oraanga tukeke e te au mataiti tukeke katoa. Kare te tuatua mou e papaki tai i te au tangata. Te akavaitata maira te reira i te au tu tangata ravarai.”
5. Eaa te au tupu anga memeitaki tei kiteaia i roto i te ripoti mataiti tavini anga 2004?
5 Te kiteaia ra te tuatua mou o taua au tuatua mei tetai mataiti ki tetai mataiti te akakeuia anga e te tuatua meitaki o te Patireia a te Atua te au anere e tauatini ua atu o te au tangata tataki tai ngakau tika ra kia akatapu i to ratou oraanga kia Iehova e kia rave i tona anoano. Kare e tuke anga, te mataiti tavini anga 2004, tei akamata mai mei ia Tepetema 2003 kia Aukute 2004. I roto i taua 12 marama, e 262,416 tangata tei akatutu mai i to ratou akatapu anga kia Iehova i te ngai tangata ra na roto i te papetito anga ki roto i te vai. Kua raveia teia i roto i te 235 enua, e te rave ra te Au Kite o Iehova e 6,085,387 apii Pipiria i te kainga i te au epetoma e tauturu ei i te tangata mei roto i te au oraanga tukeke katoa e mei roto i te pa enua, te iti tangata, e te au reo kia akono i te tuatua mou te oronga maira i te ora mei te Tuatua a te Atua.—Apokalupo 7:9.
6. Eaa te au tumu i tupu meitaki mai ei i te au mataiti i aereia mai?
6 Na teaa i akatupu pouroa i teia kia rauka? Kare ekoko anga e na Iehova e akavaitata maira i teia aronga akonoia kiaia. (Ioane 6:65; Angaanga 13:48) Inara, auraka e akameangiti i te tu kare i akara iaia uaorai e te au tauta anga roiroi kore i te tuanga o te aronga tei oronga ia ratou uaorai i te aruaru anga i te Patireia. I te 79 mataiti, kua tata te Taeake Macmillan e: “Mei toku kite mua anga mai i te au taputou te orongaia maira ki te au tangata ravarai te maki ra e te mate ra kare ake rai toku manakonako anga ta te karere a te Pipiria e akakite maira i ngaro ke atu. I taua taime rai kua tauta maata au i te kimi e eaa ta te Pipiria e apii maira kia rauka oki iaku i te tauturu i tetai ke mei iaku rai te kimi ra i te kite no runga i te Atua Mana Katoatoa, ko Iehova, e tana au akakoro anga meitaki ki te au tangata ravarai.”
7. Eaa te tupuanga te akatutu maira i te rekareka e te inangaro maata o te aronga tei kiteaia mai te tuatua mou o te Pipiria?
7 Te kite katoaia ra taua tu maroiroi i rotopu i te au tavini o Iehova i teia tuatau. Ka akamanako ana, e tai akaraanga, no Daniela no Vienna mai, i Auteria. Kua karanga aia: “Mei toku tamariki anga, kua riro mai te Atua ko toku oa meitaki roa atu. E inangaro ua ana au i te kite i tona ingoa no te mea kiaku nei e tu manako kore ua to te ‘Atua.’ Inara kua tiaki au kia tae au ki te 17 mataiti, i te aere mai anga te Au Kite o Iehova ki toku ngutupa. Kua akamarama mai ratou i te au mea pouroa taku e inangaro ra i te kite no runga i te Atua. I te openga kua kiteaia mai e au te tuatua mou, e e mea umere te reira! Rekareka tikai au e kua akamata atu au i te tutu aere ki te katoatoa.” Kare i roa ana no tona tu maoraora kua tupu mai te aviri anga mei tona au oa apii. “Inara, kiaku nei mei te kite anga rai i te totou Pipiria i te akatupuia anga,” i na Daniela ei, “no te mea kua kite au e kua akakite a Iesu e ka ririia tana au pipi e ka takinga kinoia no tona ingoa. Kua mataora e kua umere au.” Kare i roa ana, kua akatapu a Daniela i tona oraanga kia Iehova, kua papetitoia, e kua akamata i te aruaru i te akakoroanga no te angaanga mitinari. I muri ake i tona akaipoipo anga, kua rave a Daniela raua ko tana tane, ko Helmut, i te angaanga tutu anga i roto i te au tangata reo Aperika, Tinito, Piripino e te Initia i Vienna. Te tavini ra a Daniela raua ko Helmut i teianei ei nga mitinari i te apatonga opunga i Aperika.
Kare Ratou i Roiroi
8. Eaa tetai mataara puapinga ta te manganui i akaari mai i to ratou inangaro no te Atua e te tu tiratiratu ki tona Patireia?
8 E tikai, te tavini anga mitinari ko tetai au mataara ia te akaari ra te au tangata o Iehova i to ratou inangaro no te Atua e te tu tiratiratu ki tona Patireia. Mei te tangata oko i roto i ta Iesu parapore, te aronga tei rave i teia angaanga te ariki ra i te aere atu ki te au ngai mamao no te Patireia nei. Ae, kare teia au mitinari e aere nei i te kimi i te tuatua meitaki o te Patireia; te apai ra ratou i te reira ki te au tangata i te au kotinga mamao o te enua, i te apii anga e te tauturu anga ia ratou kia riro mai ei au pipi na Iesu Karaiti. (Mataio 28:19, 20) I te au enua e manganui, te tapu marie ra ratou i te tu ngata tuke ua ake rai. Inara kua tutaki maataia mai ta ratou tamou marie anga.
9, 10. Eaa te au tupuanga mataora te rekareka ra te au mitinari mei te au ngai mamao mei ia Aperika Rotopu Repapuriki ra?
9 Okotai akaraanga koia oki, no Aperika Rotopu Repapuriki mai, e i te mataiti i topa te aronga tei tae mai ki te Akamaara Anga o to Karaiti matenga e 16,184, vaitata e itu taime i te numero o te au papuritia Patireia i taua enua ra. No te mea e manganui te au tuanga o taua enua ra kare e uira, e rave ua ana te au tangata i ta ratou au angaanga i te au ra ravarai i vao mai i raro ake i te marumaru o tetai tumu rakau. No reira e mea matauia no te au mitinari i te rave i ta ratou angaanga mei te reira rai—te rave anga i te au apii Pipiria i vao mai i raro ake i te tumu rakau marumaru. Kare anake e ko te marama ua e te anuanu i vao mai kareka ra e tumu ke oki tetai. E tu inangaro tikai to te au tangata i te Pipiria, e mea matauia te uriuri anga i te au tumu manako akonoanga mei te tuatua rai no runga i te au tarekareka me kore i te reva i roto i tetai ua atu au peu enua. E maata te taime, ka akara mai te aronga e pati maira e eaa te tupu nei e kua piri mai ki roto i te apiianga.
10 No reira, te rave anga tetai mitinari i tetai apii Pipiria ki vao mai, kua aere mai tetai tangata mapu no tetai tua mai o te mataara e kua karanga mai e no te mea e kare aia i atoroia mai ana, kia aere mai te mitinari e kia apii mai i te Pipiria kiaia katoa. Ae, kua mataora te mitinari i te ariki atu, e te tere viviki ra te tangata mapu ki mua. I taua enua ra, e tapu putuputu ana te akava i te Au Kite i runga i te mataara, kare e kia oronga atu i tetai au kapiki anga akava me kore i tetai pira kia ratou, mari ra i te pati atu i te au itiu ou no te au makatini o te Punanga Tiaki e te Awake! me kare i te akameitaki atu ia ratou no tetai atikara kua reka tikai ratou.
11. Noatu te au timata anga, eaa te manako o te au mitinari tei roa te tavini anga no runga i ta ratou tavini anga?
11 Te tavini tiratiratu nei rai te manganui i roto i te koro tei o atu ki roto i te tavini anga mitinari e 40 me kore e 50 mataiti i topa akenei. Mei teaa ra te akaraanga o te akarongo e te akakoromaki anga no tatou katoatoa nei! Tere atu i te 42 mataiti i topa, okotai nga tokorua tei tavini taokotai ana ei nga mitinari i roto i e toru enua ke. Te karanga ra te tane: “Kua tupu mai te au tu ngata. Ei akaraanga, 35 mataiti to maua akakoromaki anga i te maki mariri. Inara, kare roa maua i tataraara ana i ta maua ikianga kia riro mai ei nga mitinari.” Kua tuatua mai tana vaine: “E maata ua atu te vai ra kia akameitakiia. E rekareka anga tikai te angaanga orometua, e e mama ua i te akamata i te au apii Pipiria. Me kite koe i te aronga apiipii te aere mai anga ki te au uipaanga e kia kite i tetai e tetai, mei te taokotai anga rai te reira a tetai pamiri.”
“E Mea Puapinga Kore te Au Mea Ravarai” kia Ratou
12. Akapeea ra me akakiteia mai te ariki rekareka tikai anga i te puapinga o te Patireia?
12 Te kite anga te tangata oko i tetai poe meitaki maata roa, kua “aere atura aia, oko atura i te au apinga katoa nana ra, oko atura i taua poe ra.” (Mataio 13:46) Te akaruke puareinga anga i teia, penei te manakoia ra ei apinga puapinga ra ko te tu ia o te aronga tei ariki rekareka tikai i te puapinga o te Patireia. Ko tetai tei piri atu ma Karaiti i roto i te kaka o te Patireia, kua tuatua te apotetoro ko Paulo e: “Koia tikai, e mea puapinga kore te au mea ravarai nei iaku i te meitaki maata ra i to kite i taku Atu ra ia Iesu Mesia: i akaruke ei au i te au mea katoa ra, e kua riro ïa ei teita iaku, kia rauka iaku te Mesia.”—Philipi 3:8.
13. Akapeea tetai tangata i Tieki Repapuriki i te akaari anga i tona inangaro no te Patireia?
13 Na roto i taua tu rai, e manganui i teia tuatau te ariki puareinga ra i te rave i te au taui anga maata i roto i to ratou oraanga kia rauka mai te au akameitakianga o te Patireia. Ei akaraanga, ia Okotopa 2003, kua kitenaia mai e te puapii maata e 60 mataiti no tetai apii i Tieki Repapuriki i te puka apii Pipiria Te Kite te ka Arataki ki te Ora Mutu Kore. I muri ake i te tatau anga i te reira, kua aravei viviki atu aia i te Au Kite o Iehova i roto i tona ngai ra kia raveia tetai apii Pipiria. Kua rauka iaia te tere anga meitaki ki mua e kare i roa ana kua akamata i te aere atu ki te au uipaanga katoatoa. Akapeea ra tana au parani, kia ikiia ei pu no te oire e kia tomo atu ki roto i tetai oro anga no te iki anga kia riro mai ko tetai tangata maata? Kua iki aia i te tomo atu ki roto i tetai oro anga ke—te oro anga no te ora, ei tangata akakitekite i te Patireia. Kua karanga aia, “kua rauka iaku i te oronga maata atu i te puka Pipiria ki taku aronga apiipii.” Kua akatutu aia i tona akatapuanga kia Iehova na te taruku anga i roto i te vai i ko i tetai uruoaanga i roto ia Tiurai 2004.
14. (a) Eaa ta te tuatua meitaki o te Patireia i akakeu i te au mirioni ua atu kia rave? (e) Eaa te au uianga tau ka ui tatou kia tatou uaorai?
14 E au mirioni ua atu o tetai pae tei takapini i te ao katoa kua ariu mai ki te tuatua meitaki o te Patireia na roto i teia tu rai. Kua aere mai ratou mei roto mai i te ao kino, kua akaruke i to ratou tu tangata taito, kua akaruke i to ratou au oa taito, e kua akaruke i ta ratou au aruaru anga o teianei ao. (Ioane 15:19; Ephesia 4:22-24; Iakobo 4:4; 1 Ioane 2:15-17) Eaa ratou i rave pouroa ai i teia? No te mea te akangateitei ra ratou i te au akameitakianga i te Patireia o te Atua i runga ravao i tetai ua atu apinga ta teia akatereanga o te au mea nei ka oronga mai. Te manako ra ainei koe i taua tu rai no runga i te tuatua meitaki o te Patireia? Te akakeuia ra ainei koe e te reira kia rave i te au taui anga tau kia apai mai i toou tu oraanga, te au puapinga, e te au akakoroanga kia rotai ki ta Iehova e umuumu maira? Na te rave anga i te reira ka akatupu mai i te au akameitakianga puapinga maata kia koe, i teianei e i te tuatau ki mua.
Te Aere ua Atura te Mou ki Tona Take
15. Eaa tei totouia mai e ka raveia e te au tangata o te Atua i te au ra openga?
15 Kua tata te tata taramo e: “E puareinga roa to toou ra au tangata, i te rā o toou ra mana.” Te aronga tei oronga ia ratou uaorai te kapiti maira i te “uanga, mei te au ïa o te kopu o te popongi” e te “nuku maata” o te “au vaine te akakitekite ra i te tua meitaki.” (Salamo 68:11, NW; 110:3) Eaa te tupu anga no te maroiroi e te akaatinga uaorai i te tuanga o te au tangata o Iehova—te au tane e te au vaine, te au mapu e te ruaine—i roto i teia au ra openga nei?
16. E oronga mai i tetai akaraanga e i akapeea te au tavini o te Atua i te itae anga i te tauturu i tetai ke kia apiiia no runga i te Patireia.
16 Kua manamanata tetai painia, me kare e vaine akakitekite Patireia tamou, i Initia e ka akapeea e tauturuia ai te au tangata turi tei tere atu i te rua mirioni i roto i taua enua ra kia apiiia no runga i te Patireia. (Isaia 35:5) Kua iki aia i te akamata i roto i tetai taokotai anga apii i Bangalore kia apii i te reo akairo. I taua ngai ra kua rauka iaia i te oronga atu i te manakonako anga o te Patireia ki te aronga turi e manganui, e kua akanooia te pupu no te apii Pipiria. I roto i nga mea epetoma ua, kua tere atu e tatini te au tangata tei akamata i te aere mai ki te au uipaanga i ko i te Are Uipaanga Patireia. I muri mai, i te ngai kaikai anga akaipoipo, kua aravei atu te painia i tetai tangata mapu turi te taringa no Calcutta mai e e manganui tana au uianga e te akaari maira i tetai inangaro pakari kia maata atu te kite no runga ia Iehova. Inara, kua tupu mai tetai manamanata. Ka oki te tangata mapu ki Calcutta, e 1,600 kiro mita te mamao, i te akamata i te apii kaoreti, e kare tetai o te Au Kite o reira i kite i te reo akairo. Na te tauta anga maata, kua akakeu atu aia i tona metua tane kia akatika mai kia aere aia ki te apii i Bangalore kia rauka oki iaia i te rave ua atu i tana apii Pipiria. Kua rauka iaia te tere anga memeitaki ki mua i te pae vaerua, e e tai rai mataiti i muri mai, kua akatapu aia i tona oraanga kia Iehova. Oti akera, kua apii atu aia i te Pipiria ki te au tangata turi tataki tai e manganui, kapiti mai tona oa mei te tamariki anga. Te akanoonoo ra te opati manga o Initia i teianei i te au painia kia apiiia te reo akairo kia tauturu atu i taua ngai ra.
17. E akakite mai eaa taau i kite mai ei akamaroiroi anga tikai no runga i te ripoti tavini anga mataiti 2004 i te kapi 19 ki te 22.
17 I roto i te kapi 19 ki te 22 o teia makatini, ka kite koe i te ripoti o te ao katoa no te angaanga koro a te Au Kite o Iehova no te mataiti tavini anga 2004. E rave i tetai manga tuatau i te akara matatio i te reira, e ka kite ei koe i te akapapu anga e te akara pakari ra te au tangata o Iehova i te ao katoa ra ki runga i te aruaru anga i te “poe meitaki maata roa” i teia tuatau.
‘Na Mua ra i te Kimi i te Basileia’
18. Eaa te akakiteanga kare a Iesu i kapiti mai ana ki roto i te parapore no te tangata oko, e no teaa ra?
18 E akamanako akaou ana tatou i te parapore a Iesu no te tangata oko, te kite ra tatou e kare a Iesu i akakite mai ana i tetai ua atu apinga e akapeea te tangata oko i te akono anga i tona oraanga i muri ake i te oko pouroa anga atu i tana apinga i rauka ra. Ma te tika tikai, penei ka ui etai e: ‘Akapeea e kiteaia mai ei e te tangata oko ra te kai, te kakau, e te punanga me kare oki ana apinga i akapae mai ana? Eaa te puapinga o taua poe oko maata ra kiaia?’ E au uianga tau te reira i te pae manako kopapa. Inara kare ainei a Iesu i raurau ana i tana au pipi: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou”? (Mataio 6:31-33) Te tumu maata no te parapore koia oki te anoanoia ra kia akaari i te akamori anga ngakau katoa ki te Atua e te maroiroi no te Patireia. E apiianga ainei tetai i roto i teia no tatou?
19. Eaa te apiianga maata ta tatou i kite mai mei ta Iesu parapore no te poe meitaki maata roa ra?
19 Noatu e koi apiiia ua ake nei rai tatou no runga i te tuatua meitaki umere ra me kore e ngauru ua atu tuatau i to tatou aruaru anga i te Patireia e te akakite anga ki tetai ke no runga i to te reira au akameitakianga, kia rave ua atu tatou i te akariro i te Patireia ei akara anga mou no to tatou inangaro e te akarongo. E au tuatau ngata teia, inara e au tumu anga ketaketa to tatou i te irinaki anga e ta tatou e aruaru nei e mea tika tikai e kare e rauka i te akaaiteia—mei te poe ta te tangata oko i kite mai. Te oronga maira te au tupuanga o te ao e te au totou akatupuia a te Pipiria i te akapapu anga tikai e te noo nei tatou i “te openga o teianei ao.” (Mataio 24:3) Kia akaari tatou, mei te tangata oko ra, i te maroiroi ngakau tae no te Patireia o te Atua e te rekareka anga i te akameitaki anga no te akakitekite anga i te tuatua meitaki.—Salamo 9:1, 2.
Maara Ainei ia Koe?
• Tere atu i te au mataiti, eaa tei tauturu i te tupu anga i rotopu i te aronga akamori mou?
• Eaa te tu te kiteaia ra i rotopu i te aronga te tavini ra ei au mitinari?
• Eaa te au taui anga ta te au tangata tataki tai i rave no te tuatua meitaki o te Patireia?
• Eaa te apiianga puapinga maata ta tatou i kite mai mei te parapore a Iesu no te poe meitaki maata roa ra?
[Tutu i te kapi 14]
“Te tuatua mou . . . te akavaitata maira i te au tu tangata ravarai.”—A. H. Macmillan
[Tutu i te kapi 15]
Kua tutu aere a Daniela raua ko Helmut i roto i te ngai e tuke te reo i Vienna
[Au Tutu i te kapi 16, 17]
Mei te tangata oko ra, te akameitaki maataia ra te au mitinari i teia tuatau
[Tutu i te kapi 17]
“E puareinga roa to toou ra au tangata”