Akamaroiroi Tona Akarongo i Tetai Ke

I te anau mai anga a Silvia i roto ia Titema 1992, i te akaraanga e pepe tamaine meitaki tikai ua aia. Inara i te rua mataiti, kua kiteaia mai e kua tuia a Silvia i te cystic fibrosis, e maki kare ona rapakau te akatupu maata ra i te au manamanata kino pakari no te kopu e no te akaea anga. Kia akono i tona maki, e kai ana a Silvia e 36 ua i te au ra katoatoa, e pamu ana i tona vairakau, e e maoroia ana aia. I te mea e e 25 patene ua o tona ate mama te angaanga ra, e apai ua ana aia i tetai moina pamu kia akaea, noatu me ka aere aia ki vao.

“Inara, e mea umere tikai, i to Silvia akono anga i teia maki,” i karanga ai tona mama, ko Teresa. “Manuia i tona kite i te au Tuatua Tapu, e ketaketa tona akarongo. Kua tauturu teia akarongo iaia i te akono i tona mamae e te turanga mareka kore. E maara ua ana iaia i ta Iehova taputou no tetai ao ou, e ka rapakauia te aronga maki katoatoa.” (Apokalupo 21:4) I tetai au taime me taitaia tona pamiri, kua akamaroiroi te tu mata katakata o Silvia ia ratou. E karanga ana aia ki tona nga metua e tona tungane: “Pouroa to tatou au manamanata i teia tuatau nei ka kore ua i roto i te ao ou.”

E putuputu ana a Silvia i te oronga i te tuatua meitaki no te Tuatua a te Atua ki tetai ke, e kua kite mai te aronga tana e tuatua atu ana e e akaata ana tona mata i te mataora e te rekareka. Te au mema o te putuputuanga Kerititiano i te uipaanga e aere ana aia i Kaneri Airani e rekareka maata katoa ana i te akarongo anga ki tana au pauanga e te kiteanga iaia i te kapiti mai anga. E i muri ake i te uipaanga tataki tai, e reka ana a Silvia i te noo roa mai i te pukapuka ki tona au taeake e te au tuaine Kerititiano. Tona tu maoraora e te katakata kua akakeu i te katoatoa i roto i te putuputuanga i te akaperepere iaia.

“Te apii maira a Silvia i tetai apiianga puapinga tikai kia tatou,” i karanga ai tona papa, ko Antonio. “Noatu me e au manamanata to tatou, e apinga aroa te oraanga mei te Atua, e kia akaperepere tikai tatou i te reira.” Mei ia Silvia rai, pouroa te au tavini o te Atua​—te mapu e te pakari—​te tatari marie atu nei i te tuatau e “kare oki to reira e karanga e, Kua maki au.”​—Isaia 33:24.

[Tutu i te kapi 31]

Te tatau ra a Silvia i tetai irava Pipiria e te mou ra tona mama i te moina pamu