Tua Oraanga

Tapapa Atu Anga i Tetai Patireia ‘Kare i to Teianei Ao’

Akakiteia e Nikolai Gutsulyak

E 41 ra e te po toku piritia anga i rotopu i tetai manamanata i roto i te are auri. Kua akaara poitirereia mai au i roto i te moe e te aruru pupui maatamaata. Kua tiati mai te au tangika e te au vaeau ki roto i te puakapa o te are auri, i te tamaki mai i te au mouauri. Ka rokoia au e te kino.

I AKAPEEA ra oki au i o ei ki roto i teia turanga? I na kia akamarama atu au. Kua tupu teia i te 1954. I taua taime ra, e 30 oku mataiti. Mei te manganui rai o te Au Kite o Iehova e noo ra i raro i te akatereanga a te Toviete, kua akamouauriia au no tei vai neutara ua i roto i te au maroanga poritiki e no te akakite aere i te Patireia o te Atua ki etai ke. E 46 tane e 34 vaine i roto i to matou pupu tei akamouauriia. Kua tukuia matou ki roto i tetai puakapa akatuikaa vaitata atu ki te oire o Kengir te tuanga maata o Katakatani. E noo ana matou i reira ma te au tauatini au mouauri ke atu.

I te mataiti i muao kua mate a Joseph Stalin, te arataki o te Toviete Unioni. Manganui te au mouauri tei manako e penei ka akarongo mai te kavamani ou i Moscow i ta ratou au akaapaanga no runga i te au turanga ngata i roto i te are auri. Kua riro te tu mareka kore o te au mouauri ei akatupu pu ua i te meameaau i roto i te are auri. I te tupu anga teia manamanata, kua akataka meitaki matou te Au Kite, i to matou turanga ki te aronga meameaau akatupu pekapeka e kua akamarama katoa atu i ta matou ikianga ki te au kati o te vaeau. No matou kia mou i taua turanga neutara ra, ka anoanoia te akarongo i roto i te Atua.

Orureau!

I roto ia Me16 kua akamata te meameaau i roto i te puakapa o te are auri. E rua ra i muri mai, tere atu i te 3,200 mouauri kare i inangaro i te aere ki te angaanga, i te titau anga kia rauka tetai au turanga e te au tikaanga meitaki, no te au mouauri poritiki. E mea viviki rava te au mea tei tupu mai. Te mea mua, kua arumakiia te au kati e te aronga meameaau ki vao i te puakapa. I reira kua koputaputa ratou i tetai au ngai va i roto i te aua. Aru mai, kua vavai ratou i te au paruru e akatakake ra i te au pia o te tane mei to te vaine, i te maani anga i tei karangaia e e ngai nooanga no te pamiri. I taua au ra umere ra tei aru mai, kua akaipoipo katoa tetai au mouauri, na te au orometua e mouauri rai ratou, i rave i te akaipoipoanga. I roto i te au pia e toru o te au puakapa te ngai i tupu mai ei te manamanata, kua piri te maataanga o te 14,000 mouauri ki roto i te meameaauanga.

Kua akanoo te aronga meameaau i tetai kumiti puakapa ei uriuri tuatua ki te vaeau. Inara, kare i roa ana, kua tupu te karo i rotopu i te au mema o te kumiti, e kua taopenga mai te akatereanga i te puakapa ki roto i te rima o te aronga kino roa atu. Kua kino takiri roa atu i reira te turanga. Kua akanoo te au arataki i tetai tipatimani no te paruru, tetai tipatimani no te vaeau, e te tipatimani no te akakitekite anga tuatua kia rauka i te “akaaere ma te tu mako.” Ka tuatua te au arataki na roto i te au pu tei tamoumouia ki runga i te au poupou takapini i te puakapa, ei akakitekite i ta ratou au karere akakaitamaki, i te takino roa atu anga i te turanga o te meameaau. Kua tapu te aronga meameaau i etai ke atu kia kore e oro, kua akautunga i te aronga tei patoi ia ratou, e kua akakite e kua papa ua ratou i te tamate i tetai ua atu kare i tau ia ratou. Te tuatua aereia ra e kua tamate takereia tetai au mouauri.

I te mea te tapapa ra te aronga meameaau e ka tamaki mai te vaeau, kua akateateamamao meitaki ratou i te paruru ia ratou uaorai. Ei akapapu e ka rauka i te maataanga o te au mouauri i te paruru i te puakapa, kua akaue te au arataki i te au mouauri katoatoa kia akapapa ia ratou. I te rave anga i te reira, kua taratara te au mouauri i te au potopotonga auri i runga i te au maramarama e kua maani i te au matipi e te au apinga tamaki ke atu ki te auri. Kua rauka katoa mai ia ratou tetai au pupui e te au paura akaaruru.

Maroia kia Piri Atu

I taua taime ra, kua aravei mai e rua nga tangata meameaau iaku. Kua akaari mai tetai i te matipi akakoi ou uaia. “Apainaia teia!” i akaue mai ei aia. “Ka inangaroia ei paruru ia koe.” Inara kua pati muteki ua au kia Iehova kia tauturu mai iaku kia noo marie ua. Kua pau atu au: “E Kerititiano au, ko tetai o te Au Kite o Iehova. Te mouauri nei matou e etai Au Kite ke atu i konei no te mea kare matou e tamaki ana i te tangata mari ra, i te au mana ririnui kitea koreia. Ta matou au apinga tamaki ia ratou, koia oki ko to matou akarongo e to matou manakonakoanga i roto i te Patireia o te Atua.”​—Ephesia 6:12.

Toku poitirere, kua tungou mai taua tangata ra e kua marama ua aia. Inara kua moto puia mai au e tetai ao mai tangata. E oti i reira kua aere raua. Kua aere te aronga meameaau mei tetai are ki tetai are, i te titau anga kia maro i te Au Kite kia piri ki roto i te manamanata. Inara kua patoi te katoatoa i to tatou au taeake e te au tuaine Kerititiano.

Kua uriuriia te turanga neutara o te Au Kite o Iehova i ko i te uipaanga a te kumiti meameaau. “Te au mema o te au irinakianga katoatoa​—te Penetekote, te Ra Itu, te Papetito, e te katoatoa​—te piri ra ki te manamanata. Ko te Au Kite ua o Iehova tei patoi,” i akakite ei ratou. “Ka akapeea ra tatou ia ratou?” Kua karanga tetai e kia pei i tetai Kite ki roto i te umu a te are auri ei tamataku ia matou. Inara kua tu mai tetai opita vaeau i mua ana, e mouauri akangateiteiia e etai mai, e kua akakite aia: “Kare te reira i te mea meitaki. Ka tuku tatou ia ratou pouroa ki roto i tetai pia i te ope roa o te puakapa, i te pae i te ngutupa. Me tamaki mai te nuku vaeau ia tatou ki te au tangika, ko te Au Kite te aronga mua ka mate. Kare tatou i reira e apa i te ta ia ratou.” Kua ariki ratou i tona manako.

Tukuia ki Roto i te Turanga Kino

Kare i roa i muri mai, kua aere te au mouauri takapini i te puakapa ma te avaava mai, “E te Au Kite o Iehova, aere mai ki vao!” I reira kua akaputuputu ratou e 80 ia matou katoatoa ki ko i te au pia i te ope roa o te puakapa. Kua kika mai ratou i te au roi paata ki vao ake i te au pia kia maata atu te ngai i roto, e kua akaue mai ia matou kia tomo ki roto. Kua riro taua au pia ra ei areauri no matou i roto ake i te areauri.

Kia rauka tetai tu ngateitei, kua tui te au tuaine Kerititiano i roto i to matou pupu i te au ariki roi i te kapitipiti anga i te reira, e kua akariro matou i te reira ei akatakake i te au pia ki roto i e rua nga tuanga​—e tai no te au tane e tetai no te au vaine. (Muri mai, kua toro tetai Kite i Rutia i te tutu o teia nga pia, tei akaariia i raro akenei.) Ia matou e noo ra i roto i taua au ngai piripiri ua ra, e pure kapiti putuputu ua ana matou, te pati akatenga anga kia Iehova kia oronga mai i te pakari kia matou e te “mana maata meitaki” koia oki te mana maata atu i tei matauia.​—2 Korinetia 4:7.

Pouroa taua au taime ra, kua akanooia matou ki roto i tetai turanga kino i rotopu i te aronga meameaau e te nuku vaeau o te Toviete. Kare okotai ia matou i kite e eaa ta te nga tua e rua ka rave. “Eiaa e akamanako ua atu,” i raurau maira tetai taeake Kerititiano pakarikari, e te tiratiratu. “Kare a Iehova e akaruke ia tatou.”

Kua akaari mai to tatou au tuaine Kerititiano akaperepere​—te mapu e te pakari—​i te tu akakoromakianga tau. Ko tetai mei te 80 ona mataiti e ka anoanoia tetai tauturu. Ko etai kua makiia e ka anoano i tetai taote. I taua au taime pouroa ra, ka tuera ua te au ngutupa o te au pia kia rauka i te aronga meameaau i te tutaka ua rai ia matou. I te po, e aere mai ana te au mouauri e ta ratou au apinga tamaki ki roto i te au pia. Tetai au taime e rongoia ana ratou i te karanga anga e, “Kua moe te Patireia o te Atua.” I te avatea, me akatika ratou ia matou kia aere ki ko i te ngai kaikai o te puakapa, e noo kapiti ua ana matou e te pure kia paruru mai a Iehova ia matou mei te au tangata kino.

I roto i te au pia, e tauta ana matou i te turuturu i tetai e tetai i te pae vaerua. Ei akatauanga, maata te taime ka akakite mai tetai taeake i tetai papaanga mei roto i te Pipiria, tei tau ua te maata i te reo kia rongo atu matou. E oti ka akaaite aia i te reira ki to matou au turanga. Tetai taeake pakarikari ua, e reka ana aia i te tuatua mai no runga tikai i te nuku vaeau o Gideona. “I roto i te ingoa o Iehova, kua tamaki atura e 300 tangata ma te au apinga akatangi i to ratou rima, ki e 135,000 vaeau,” i akamaara mai ei aia kia matou. “Kua oki meitaki ua mai e 300 katoatoa.” (Te Au Akava 7:16, 22; 8:10) Kua oronga mai teia e etai atu au akaraanga Pipiria i te maroiroi pae vaerua kia matou. Koi riro ua maira au ei Kite, no reira kua riro te akarongo ngaueue kore o te au taeake e te au tuaine kua maata te kite, i te akamaroiroi maata iaku. Kua irinaki au e tei o matou tikai a Iehova.

Akamata te Tamaki

Maata te au epetoma i pou, e te maata ua atura te manamanata i roto i te puakapa. Te pakari ua atura te uriurianga i rotopu i te aronga meameaau e te aronga mana. Kua manono te au arataki meameaau i te kavamani maata i Moscow kia tono mai i tetai komono kia aravei ia ratou. Kua maro mai te aronga mana i te aronga meameaau kia tuku i te au, kia akaruke i ta ratou apinga tamaki e kia oki ki te angaanga. Kare nga tua e rua i inangaro i te akaau. Taua taime ra, kua koropiniia te puakapa e te au vaeau e kua papa ua i te tamaki me akaueia mai. Kua papa katoa te aronga meameaau i te tamaki, kua patutuia te au arai e te au apinga tamaki kua papa ua i te akaputuia. Te tapapa ua ra te katoatoa i te atianga e tupu ei te akaaoanga openga i rotopu i te nuku vaeau e te au mouauri.

I roto ia Tiunu 26 kua akaaraia matou e te aruru o te au pupui maatamaata. Kua vavaiia te aua e te au tangika e kua tomo mai ki roto i te puakapa. Aru tika mai i te reira ko te au vaeau e pupui maira i ta ratou au pupui matini. Kua orooro mai te au mouauri​—te tane e te vaine​—ki mua i te au tangika ma te avaava e “Aue!” e te pepei i te toka, te au pomu maaniia i reira, e te au apinga ua atu ka rauka ia ratou. E tamakianga kino tikai tei aru mai, e kua piritia matou te Au Kite ki rotopu tikai. Ka akapeea ra a Iehova me pau mai i ta matou au pure no tetai tauturu?

Kua orooro viviki ua mai te au vaeau ki roto i to matou au pia. “Aere mai ki vao e te aronga tapu!” i kapiki mai ei ratou. “Taviviki, akaatea mai ia kotou ki vao i te aua!” Kua akaue atu te opita akaaere i te au vaeau auraka e pupui ia matou, kia noo ra e paruru ia matou. Te taime e raveia ra te tamaki, kua noo ua matou ki runga i te ngai matie ateatea ua i vao mai i te puakapa. E a ora, to matou akarongo ua anga i te aruru ruru, te pakapakakina pupui, te avaava, e te aue no roto mai i te puakapa. E oti i reira, kua muteki ua. Muri mai, i roto i te marama o te popongi, kua kite atu matou i te au vaeau e apai ra i te aronga mate ki vao mai i te puakapa. Kua kitea mai ia matou e e au anere ua atu tei putaputa me kore tei mate.

I muri mai i taua ra rai, kua aere mai tetai opita taku i kite ki konei ia matou. “Ae oki, e Nikolai,” i ui mai ei aia ma te rekareka, “naai koe i akaora? Na matou me na Iehova?” Kua akameitaki atu matou iaia ma te ngakau tae no tei akaora mai ia matou, i te na ko anga atu, “Te irinaki nei matou e na to matou Atua mana katoatoa ko Iehova, i akakeu ia koe kia akaora ia matou, mei tana rai i akakeu i etai ke kia akaora mai i tona au tavini i te au tuatau Pipiria.”​—Ezera 1:1, 2.

Kua akamarama katoa mai taua opita kia matou e i akapeea te au vaeau i kite ei e koai matou e teiea te ngai i noo ei matou. Kua akakite mai aia e i tetai uriurianga i rotopu i te vaeau e te aronga meameaau, kua akaapa te vaeau i te aronga meameaau no tei tamatemate i te au mouauri kare i turuturu ana ia ratou. I te paruru anga ia ratou, kua pau mai te aronga meameaau e kare te Au Kite o Iehova i piri mai ki roto i te manamanata inara kare ratou i tamateia. Mari ra, kua akautungaia te Au Kite katoatoa e kua tukuia ki roto i tetai pia. Kua akamaara rai te aronga mana o te vaeau i taua tuatua ra.

Kua Vai Ngaueue Kore ua Matou no te Patireia

Kua taiku mai te tangata Rutia, tata puka rongonui ko Aleksandr Solzhenitsyn, i roto i tana puka The Gulag Archipelago, i te meameaau ta matou i kite ana i roto i te are auri. No runga i taua tupuanga ra, kua tata aia e i akamata te meameaau no te mea, mei tana i akakite, “te inangaro ra matou i te tu rangatira, . . . naai ra e oake mai i te reira kia matou?” Ei Au Kite no Iehova i roto i taua puakapa ra, te nakunaku katoa ra rai matou i te tu rangatira. Kare i te tu rangatira ua mei te are auri mai mari ra, te tu rangatira ko te Patireia anake ua o te Atua te ka rauka i te oronga mai. I roto i te are auri, kua kite matou e ka anoano matou i te maroiroi mei ko i te Atua kia vai ngaueue kore ua i te tua o tona Patireia. E kua oronga mai a Iehova i te au mea ravarai ta matou i anoano. Kua oronga mai aia i te autuanga ma te kore e taangaanga i te matipi me kore i te au pomu rikiriki.​—2 Korinetia 10:3.

“Kare to teianei ao taku basileia,” i akakite ei a Iesu Karaiti kia Pilato. “Naringa no teianei ao taku basileia, kua akamaroiroi ïa toku au tavini.” (Ioane 18:36) No reira, ei au pipi na Karaiti, kare matou i piri atu ana ki roto i te au angaanga poritiki. Kua mataora matou e i te taime o te manamanata e i muri katoa ake, kua taka ua to matou tu tiratiratu ki te Patireia o te Atua, ki etai ke. No runga i to matou tu i taua taime ra, kua tata a Solzhenitsyn: “E tu rangatira tikai to te Au Kite o Iehova i te akono mou i ta ratou au ture e i te patoi auraka kia patutu i tetai au arai me kore kia riro ei kati.”

Kua pou e 50 tuma mataiti mei taua au tupuanga taitaia maira. Inara, e manako akameitaki putuputu ua ana au i taua au taime ra no te mea kua rauka iaku tetai au apiianga mou, mei te tu tapapa marie ia Iehova e te irinaki pu tikai i roto i tona mana ririnui. Ae, mei te manganui o te Au Kite akaperepereia i te Toviete Unioni i mua ana, kua kite au e ka oronga tika mai a Iehova i te rangatiraanga mou, te paruruanga, e te ora no te aronga e tapapa marie atu i te Patireia ‘kare i to teianei ao.’

[Au Tutu i te kapi 8, 9]

Te puakapa akatuikaa i Katakatani te ngai i akamouauriia ai matou

[Tutu i te kapi 10]

Te tutu o te ngai nooanga o te Au Kite, i te tua o te vaine

[Tutu i te kapi 11]

Ma tetai au taeake Kerititiano i te tuku angaia mai matou ki vao