Akamaroiroi Ana te Apiianga Pipiria i te Akarongo
“MEI teaa tikai te arikianga akaperepere kia akapou i te rima marama i topa i te akamanakoanga i te au manako o Tei Anga mai ia tatou e te apiianga i te kite mai i te au apinga mei iaia rai!” i karanga ai tetai mema o te pupu 122 o te Apii Pipiria Punanga Tiaki o Gileada i te ra karatuati anga. Ka maara uaia rai te ra Mati 10, 2007, e te 56 mema o te pupu, te aere ra ka akamata i ta ratou tavinianga mitinari i roto i te 26 enua i tukunaia atu ei ratou.
I muri ake i te turou pumaana anga i te 6,205 aronga tei tae mai, kua karanga a Theodore Jaracz, tetai mema o te Pupu Akaaere e: “Te irinaki nei matou e ka akaketaketaia kotou i te pae vaerua e ka akamaroiroiia i roto i to kotou akarongo ei tupuanga no te aere anga mai ki teia porokaramu karatuati.” Kua akakite takitai mai aia i te vaa tuatua e a, te ka oronga mai ki te aronga apiipii i te akamaroiroi e te akoanga tau tei akatumuia ki runga i te Pipiria, ei tauturu ia ratou kia puapinga i roto i ta ratou au tukuanga angaanga mitinari.
Au Tuatua Akamaroiroi kia Patu i te Akarongo i Roto i Tetai Ke
Kua tuatua a Leon Weaver, tetai mema no te Kumiti Manga o Marike, no runga i te tumu tuatua “E Rave ua Atu Rai i te Meitaki.” Kua akamaara aia i te aronga apiipii e kua akapou ratou tataki tai e 13 mataiti te avereti i roto i te angaanga orometua tamou, akamaroiroianga i te apiianga Pipiria e patu ra i te akarongo. Kua karanga aia e: “E angaanga meitaki te reira no te mea te o maira te akaoraanga i te oraanga o te au tangata, e tei puapinga rava atu, e angaanga meitaki te reira no te mea te akateitei ra i to tatou Metua i te rangi, ko Iehova.” Kua akamaroiroi atu i reira te Taeake ko Weaver i te aronga apiipii kia ‘ruru ua atu rai i ta te vaerua’ e auraka e ‘tuku i te au i te rave i te meitaki.’—Galatia 6:8, 9, NW.
Kua oronga mai a David Splane, tetai mema o te Pupu Akaaere, i te au akamaaraanga tau iaia e akatupu ra i te tumu tuatua “E Aruaru kia Akamata Meitaki.” Kua akamaroiroi te Taeake ko Splane i te au mitinari ou kia akamata meitaki i roto i ta ratou au tukuanga angaanga na te raveanga i tei aru mai: “Akono tamou i te manako papu. Auraka e rapurapu i te taopenga. E katakata. Auraka e akaapa. Kia akaaka, e kia akangateitei i te au taeake i te reira ngai.” Kua karanga katoa aia e: “Me eke mai kotou mei te pairere, e takai meitaki, e kia akameitaki a Iehova i to kotou au vaevae manea, e apai maira i te ‘tuatua meitaki o tetai mea meitaki atu’ ki te au tangata.”—Isaia 52:7, NW.
Ko “Tetai Akameitakianga Papu Tikai” te tumu tuatuaia tei akamanakoia e te puapii Gileada ko Lawrence Bowen. Kua akamaara te Taeake ko Bowen i te aronga apiipii e kua akatumuia te akamataanga o te Apii Gileada i te tuatau o te Tamaki II o te Ao ki runga i te irinakianga papu tikai i roto i te akatupuanga o ta Iehova Tuatua totou. (Ebera 11:1; Apokalupo 17:8) Mei reira mai, kua oronga te Gileada i te atianga ki te aronga apiipiii kia akamaroiroi i to ratou akarongo. E akakeu ana te akarongo ketaketa i te au karatuati kia aere atu, kia akakite maroiroi i te tuatua mou.
Kua tuatua a Mark Noumair, tetai akaou mai puapii Gileada, i runga i te tumu tuatua umere “Maara Mai Iaku ia Koe i Tetai Tangata.” Kua arataki atu aia i te akamanakoanga ki te akaraanga o te peroveta ko Elisaia, tei akaari i te akarongo e te mataku kore i roto i tana tukuanga angaanga. I te akatumuanga i tana au tuatua ki runga ia 1 Ariki 19:21, kua karanga te Taeake ko Noumair e: “Kua puareinga ua a Elisaia i te akono i te au tauianga i roto i te oraanga, i te akapae ke anga i tona uaorai au inangaro, e kia akakitekite i ta Iehova akakoroanga.” Kua akameitaki aia i te au karatuati i te akaarianga i taua tu vaerua ra e kua akamaroiroi ia ratou kia akapera ua atu rai i roto i ta ratou au tukuanga angaanga ou.
Akatupu te Akarongo i te Tu Ngoie ua i te Tuatua
E te akamaroiroi ra te au mitinari i to ratou akarongo i te tuatau i raveia ai te apii, kua akono meitaki ratou i te au openga epetoma i te akakitekite anga i te tuatua meitaki ki tetai ke. Kua taki atu teia ki te au tupuanga meitaki tei akakitekiteia e tei akatutu akaouia i runga i te tuanga porokaramu tei akonoia e Wallace Liverance, tetai akaou mai puapii Gileada. Te tumu tuatua o tana tuanga, “Kua Akarongo Katoa Matou, i Tuatuaʼi Matou Nei,” te taiku ra i te au tuatua a te apotetoro ko Paulo tei kiteaia ia 2 Korinetia 4:13.
Aru mai i teia tuanga, kua akono a Daniel Barnes raua ko Charles Woody, au mema o te pamiri Betela, i te au uiuianga ma te au mitinari i tavini ana i teianei e i mua ana. Kua akakitekite ratou i to Iehova takinga meitaki e tana akameitakianga i runga i te aronga e tavini tiratiratu ra iaia. (Maseli 10:22; 1 Petero 5:7) Kua karanga mai tetai mitinari e: “Kua kite meitaki tikai maua ko taku vaine i to Iehova takinga meitaki i roto i ta maua apiianga i rauka mai i Gileada. Kua akamaroiroi tikai te reira i to maua akarongo. E puapinga te akarongo no te mea ka kite mai te au tavini pouroa o te Atua, kapiti mai te au mitinari, i te au timataanga, au manamanata, e te au apiapi.”
E Akamaroiroi ua Rai i te Apiianga Pipiria te Patu ra i te Akarongo
Ei taopenga anga tau ki te porokaramu karatuati, kua tuatua mai a Samuel Herd, tetai mema o te Pupu Akaaere, ki te katoatoa i runga i te tumu manako “E Akamaroiroi ua Rai i Toou Au Taeake.” Eaa te akakoroanga o te apiianga ta te aronga apiipii i rauka mai? “Te akakoroanga koia oki kia apii ia kotou e akapeea i te taangaanga anga i to kotou arero kia akapaapaa ia Iehova, kia apii atu i tana au tuatua mou ki tetai ke i roto i ta kotou ngai tutu anga ou, e kia akamaroiroi i tetai e tetai i roto i te akarongo,” i karanga ai te Taeake ko Herd. Inara, kua akamaara aia i te aronga apiipii e e akakite katoa ana te arero i te mea akamaroiroi kore. (Maseli 18:21; Iakobo 3:8-10) Kua akamaroiroi aia i te aronga apiipii kia aru i to Iesu akaraanga i te taangaanga anga i to ratou arero. I tetai atianga, i muri ake i te akarongo anga kia Iesu, kua pau atu tana au pipi e: “Kare aina i maana rava to taua ngakau . . . ka akataka mai ei aia i te tuatua i tataia ra?” (Luka 24:32) Kua karanga katoa te Taeake ko Herd e: “Me akamaroiroi ana taau au tuatua, ka akakeu te reira i te au ngakau o toou au taeake e toou au tuaine i roto i taau tukuanga angaanga.”
Aru mai, kua rauka i te au karatuati i ta ratou au tiporoma. E oti kua tatauia tetai reta akameitakianga mei te pupu apii. Te karanga ra te reira: “Te kite nei matou i tetai apainga oonu kia taangaanga i ta matou i apii mai kia rave tiratiratu i ta matou au tukuanga angaanga ei au mitinari. Ia matou e papa nei i te aere ki te au ope o te enua, te pure nei matou e ka taki atu ta matou au tautaanga ki te akapaapaanga maata o to tatou Ikuiku Maata Rava Atu, ko te Atua ko Iehova.” Kua ariu te katoatoa ma te pokarakaraanga ngakau tae. E tikai, kua akamaroiroi te porokaramu karatuati i te akarongo o te aronga katoatoa tei tae atu.
[Tataanga i te kapi 17]
“Me akamaroiroi ana taau au tuatua, ka akakeu te reira i te au ngakau o toou au taeake e toou au tuaine i roto i taau tukuanga angaanga”
[Pia i te kapi 15]
TE AU TU O TE PUPU
Numero o te au enua tei komonoia: 9
Numero o te au enua tei tukuia: 26
Numero katoa o te aronga apiipii: 56
Mataiti avereti: 33.4
Au mataiti averiti i roto i te tuatua mou: 16.8
Au mataiti averiti i roto i te angaanga orometua tamou: 13
[Tutu i te kapi 16]
Te Pupu 122 Karatuatianga o te Apii Pipiria Punanga Tiaki o Gileada
I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.
(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.