Te Au Mapu Ou, E Akamanako i tei Anga ia Koe i Teianei

“E akamanako i Tei anga ia koe i to ou anga ra.”​—KOHE. 12:1.

1. Akapeea a Iehova i te akakite anga i tona irinakianga i roto i te au mapu e akamori ra iaia?

TE MANAKO maira a Iehova i te au mapu Kerititiano ei mea akaperepereia e te oraora mei te au o te popongi ra. No reira, kua totou aia e i te ra o te “mana” o tana Tamaiti, ka oronga “puareinga” ua te au mapu tane e te au mapu vaine ia ratou uaorai, i roto i te angaanga a Karaiti. (Sala. 110:3) Ka akatupuia taua totou ra i te tuatau kare te maataanga o te tangata e inangaro ana i te Atua, kua varenga ua i te manako ia ratou uaorai e te anoano maata i te moni, e te akarongo kore. Inara kua kite a Iehova e e tuke rai te au mapu ou e akamori ra iaia. E irinakianga tikai tona i roto ia kotou e te au taeake mapu ou e te au tuaine mapu ou!

2. Eaa te o maira ki te akamanako anga ia Iehova?

² E akamanako ua ana i to te Atua rekareka me kite aia e te akamanako maira te au mapu ou iaia ko Tei Anga ia ratou. (Kohe. 12:1) E tika rai e i te akamanako anga ia Iehova e maata atu te o maira ki te akamaara ua anga no runga iaia. Te aiteanga kia angaanga​—te rave anga i te mea e mareka maira aia, te tuku anga i tana au ture e te au kaveinga ei arataki ia tatou i te au ra o te oraanga. Tetai aiteanga katoa koia oki kia irinaki kia Iehova, ma te kite e te manako ua maira aia i to tatou turanga. (Sala. 37:3; Isa. 48:17, 18) Te manako akapera ra ainei koe i Tei Anga ia koe?

“E Irinaki kia Iehova ma To Ngakau Katoa”

3, 4. Akapeea a Iesu i te akaari anga i tona irinakianga i roto ia Iehova, e eaa ra i puapinga ai kia irinaki kia Iehova i teia tuatau?

³ Te akaraanga meitaki rava atu no tetai tei irinaki tikai ki te Atua, koia oki, ko Iesu Karaiti. Kua tarotai tikai aia i tona oraanga ki te au tuatua a te Maseli 3:5, 6: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” I muri poto ua ake i tona papetitoanga, kua aere maira a Satani kia Iesu, e kua titau atura i te timata iaia kia ariki i te mana e te kaka o teianei ao. (Luka 4:3-13) Kare roa a Iesu i vare ana. Kua kite aia e ko te ‘apinga nui mou tikai e te ngateitei e te ora’ ko te ‘tutaki ia o te akaaka e te mataku ia Iehova.’​—Mase. 22:4.

⁴ Te akaaereia nei te ao o teia tuatau e te tu noinoi e e te tu karapii. I roto i taua turanga ra, e mea tau kia aru tatou i te akaraanga a Iesu. E akamaara katoa, e ka rave a Satani i tetai ua atu rai ravenga ei akavare i te au tavini o Iehova kia akaruke i te ara piri e tae atu ei ki te ora. Te inangaro ua ra aia kia kite i te au tangata ravarai e aere ra na runga i te ara pararauare e tae atu ei ki te mate. Auraka rava e vare iaia! Mari ra, e akapapu meitaki tikai e kia akamanako koe i Tei Anga ia koe. E irinaki pu tikai kiaia, e kia rave mou i “te ora mutu kore,” tei papu tikai e, te vaitata rava mai nei.​—1 Timo. 6:19.

E te Au Mapu Ou, kia Pakari!

5. Mei teaa ra toou manako no runga i te tuatau ki mua no teia ao?

⁵ E pakari maata to te au mapu ou tei akamanako i Tei Anga ia ratou, i to etai atu i to ratou uaorai uki. (E tatau ia Salamo 119:99, 100.) No te mea kua rauka ia ratou to te Atua aerenga manako, kua kite meitaki ratou e mei teaa tikai te tu o te turanga kino o teia ao. E i roto katoa i to kotou oraanga poto ua, kare e ekoko e kua kite ana kotou e te au mapu ou i te mataku e te manako apiapi e tupu ua atura ki te maata. Me tei te apii rai koe, kare e kore kua akarongo ana koe no runga i te turanga taero, te vaito kake o te reva maana i te ao katoa nei, te takore takiri angaia te au vaorakau, e te au manamanata mei te reira te tu. Te maata ua atu nei te manamanata o te tangata no runga i teia au angaanga e tupu nei, inara ko te Au Kite ua rai o Iehova tei marama tikai e e tuanga te reira no te akairo e tou atura ki te openga o to Satani ao.​—Apo. 11:18.

6. I akapeea ra tetai au mapu ou i te akavareia anga?

⁶ Te mea mii, kare tetai au tavini mapu o te Atua e matakite ana e kua akatika ua ia ratou uaorai kia akangaropoina e e taime poto ua rai to teia ao e vai nei. (2 Pete. 3:3, 4) Tetai papaki kua akavareia kia rave i te au ara viivii na roto i te au kapitianga kino e te au ravenga viivii o te ainga. (Mase. 13:20) E mea mii tikai kia ngere i te akaperepereanga a te Atua i teianei, i na te vaitata roa atu nei tatou ki te openga! Inara, kia tamou mai tatou i te apiianga mei tei tupu ki te au ngati Iseraela i te mataiti 1473 M.T.N. i to ratou puakapa anga i te au Ngai Mataataa o Moabi, i te vaitata roa anga ki te Enua Taputouia. Eaa ra tei tupu i reira?

Kua Inga Ratou i te Vaitata Anga Atu ki te Openga

7, 8. (a) Eaa ra te ravenga ta Satani i taangaanga ana i runga i te au Ngai Mataataa o Moabi? (e) Eaa ra te ravenga ta Satani e taangaanga nei i teia tuatau?

⁷ I taua taime ra, te taka ua ra e te inangaro ra a Satani i te arai i te au ngati Iseraela kia kore e rauka ta ratou tuanga i taputouia mai. I muri ake i te puapinga kore anga te taumaaanga ia ratou na roto i te peroveta ko Balaama, kua taangaanga a Satani i tetai ravenga kikite atu; kua titau aia i te arai ia ratou kia kore e akameitakiia e Iehova. Kua taangaangaia te au vaine purotu o Moabi ei akavare ia ratou, e i teia taime kua puapingaia te Tiaporo. Kua timata iora te au tangata kia akaturi ki te au vaine o Moabi e kua tupou atura ki raro ia Baala-Peora! Noatu kua vaitata roa mai ta ratou tuanga akaperepere maataia, ko te Enua Taputouia, e 24,000 ngati Iseraela i mate. E aka tumatetenga maata tikai!​—Nume. 25:1-3, 9.

⁸ Teia tuatau, te vaitata viviki ua atu nei tatou ki tetai enua taputou meitaki atu​—te akatereanga ou o te au mea nei. Tika rava ki tona tu, te taangaanga akaou nei a Satani i te ainga tau kore ei akavare i te iti tangata o te Atua. Kua kino takiri te au turanga o te tu akono tau, te arikiia nei te moeaana ei mea matauia, e te pirianga tane e te tane te manakoia nei e tei runga ua te reira i ta te tangata uaorai ikianga. Kua tuatua tetai tuaine Kerititiano e, “I te kainga ua rai e i ko i te Are Uipaanga Patireia i apiiia ai taku tamariki e i mua i te mata o te Atua e mea viivii tikai te pirianga tane e te tane e te ainga i vao ake i te akaipoipoanga.”

9. Eaa ra penei te ka tupu i te taime kua “pakari,” e ka akapeea e rauka ai te au mapu ou i te akono atu i teia?

⁹ Kua kite te au mapu ou e akamanako ra i Tei Anga ia ratou e ko te pirianga ainga e apinga aroa tapu te reira tei piri atu ki te oraanga e te anau tamariki. No reira, te ariki ra ratou e kia rave uaia te au pirianga ainga na roto i te mataara ta te Atua i akakite mai​—ki roto ua i te akanoonooanga o te oraanga akaipoipo. (Ebe. 13:4) Inara, i te taime kua “pakari”​—koia oki te tuatau e pakari maira te au manako no te ainga e ka riro ei tarurike i to tetai manako​—ka ngata roa atu te tautaanga kia vai viivii kore ua. (1 Kori. 7:36) Eaa ra taau ka rave me o mai te au manako tau kore ki roto i toou manako? E pure akatenga kia Iehova kia tauturu mai ia koe i te akamou ki runga i te au mea ma. E akarongo ua mai ana a Iehova i te aronga tei tae tikai te ngakau i te aere atu kiaia. (E tatau ia Luka 11:9-13.) Ka riro katoa te pukapukaanga akamaroiroi ei tauturu i te akamou akaou i te manako.

E Iki i Toou Au Akakoroanga ma te Pakari Tikai!

10. Eaa te au tu manako puapinga kore ua ta tatou ka inangaro i te kopae atu, e eaa te au uianga ta tatou ka ui kia tatou uaorai?

¹⁰ E tai tumu no te tu akatere koreia o te au mapu e manganui i teia ao, e i noo ua ai i te oraanga no te au mea navenave ua o te kopapa koia oki​—kare o ratou aratakianga mei te Atua me kore kare e manakonakoanga papu no te tuatau ki mua. (Mase. 29:18) Kua aite rai ratou mei te au ngati Iseraela atua kore i te tuatau o Isaia tei noo ua i te oraanga no ‘te rekareka e te pereperekavana, e te kai anga puaka, e te inu manga wina.’ (Isa. 22:13) I to te vareae atu i taua au tu tangata ra, eaa ka kore ei e akamanako i te manakonakoanga akaperepereia ta Iehova e tuku maira ki mua i tona aronga tiratiratu? Me e tavini mapu ou koe no te Atua, te akara rekareka atura ainei koe ki te ao ou? Te tauta maroiroi ra ainei koe ‘kia noo ma te tau meitaki, i te akara anga atu koe i taua meitaki e tiakiia nei’ ta Iehova i tuku mai ki mua ia koe? (Tito 2:12, 13) Ka riro taau pauanga ei akakeu i te au akakoroanga e te au mea puapinga taau i akanoo noou uaorai.

11. Eaa ka anoanoia ai te au Kerititiano mapu ou tei te apii rai kia angaanga pakari?

¹¹ Te inangaro maira teia ao i te au mapu ou kia akapou i to ratou maroiroi ki runga i te au akakoroanga o teianei ao. Te taka ua ra, e e mea tau rai no te aronga tei te apii rai kia angaanga pakari kia rauka tetai apiianga no te kite noa ua nei. E akamaara katoa, e kare toou akakoroanga e kia kitea uaia tetai ngai angaanga tau naau mari katoa ra kia riro ei tauturu puapinga i roto i te putuputuanga e ei tangata uua i te akakite aere i te Patireia. E rauka ai te reira, ka anoanoia kia rauka ia koe i te komunikeiti meitaki, te manako ma te tau, e te uriuri manako maru ua ki etai ke ma te akangateitei. Noatu ra, ko te au mapu ou e apii ra i te Pipiria e e tauta ra i te akono i ta te reira au kaveinga i roto i to ratou oraanga, te rauka nei ia ratou te apiianga meitaki roa atu e vai nei e i te akanoo i tetai tango meitaki no tetai tuatau puapingaia ki mua e mutu kore ua atu.​—E tatau ia Salamo 1:1-3.a

12. Eaa ra te akaraanga ka tau meitaki te au pamiri Kerititiano kia aru?

¹² I roto ia Iseraela, e mea puapinga maata rava kia apii te au metua i ta ratou tamariki. Ko taua apiianga ra ka o mai vaitata rai te au tuanga ravarai o te oraanga, i te au mea pae vaerua tikai. (Deu. 6:6, 7) No reira, ko te au mapu ngati Iseraela tei akarongo ki to ratou au metua e te aronga pakarikari tei mataku i te Atua kua rauka ia ratou kare anake ua te kite mari katoa ra te pakari, te kite karape, e te akono meitaki​—e au tu matau koreia i te kite tei rauka mai mei te apiianga no runga i te Atua. (Mase. 1:2-4; 2:1-5, 11-15) E mea tau i te au pamiri Kerititiano i teia tuatau kia akamanako meitaki katoa no runga i teia mea e apiianga.

Akarongo ki te Aronga Tei Inangaro ia Koe

13. Eaa ra te tu akoanga e rauka mai ana i tetai au mapu ou, e eaa ratou ka anoanoia ai kia matakite?

¹³ E rauka ana te akoanga a te au mapu ou mei te au tu tangata ravarai​—kapiti mai te aratakianga a te aronga ako i te apii, tei akatumu ua i ta ratou akoanga ki runga i te au mea e puapingaia ai i roto i teia ao. E akamanako meitaki i taua au akoanga pouroa ra na roto i te pure e te tauturu a te Tuatua a te Atua e te kai pae vaerua e orongaia maira e te pupu tavini akono meitaki e te pakari ine. Mei taau apiianga o te Pipiria, kua kite koe e ko te aronga ou ua e te kamakura ta Satani takete maata roa atu. Ei akaraanga, i roto i te kainga i Edene, no to Eva kite kore kua akarongo aia kia Satani, e mea ora ke takiri kare ua e inangaro mai ana iaia. Kare e aiteia te aka tuke ka tupu naringa aia i akarongo kia Iehova, tei akaari papu ua mai i tona aroa nona na roto i te au mataara e manganui!​—Gene. 3:1-6.

14. Eaa tatou ka akarongo ei kia Iehova e ki to tatou nga metua i roto i te akarongo?

¹⁴ Te aroa katoa maira Tei Anga ia koe, e te rave ra aia i teia na roto i te tu ma tikai. Te inangaro nei aia kia mataora koe e mutu kore ua atu, kare i teianei ua! No reira, ma te tu maru ua o tetai metua akaperepere, te karanga atu nei aia kia koe e te katoatoa rava e akamori nei iaia e: “Teia te ara, e na reira te aere.” (Isa. 30:21) Me tei roto toou nga metua i te akarongo e e aroa mou tikai to raua ia Iehova, e maata atu taau akameitakianga i reira. E akarongo ma te akangateitei i ta raua ako i te akanoo anga i te au mea puapinga maata e te au akakoroanga. (Mase. 1:8, 9) E akamaara katoa, e te inangaro nei raua kia rauka ia koe te ora, te apinga puapinga maata roa atu i te apinganui me kore i te turanga teitei i roto i teia ao.​—Mata. 16:26.

15, 16. (a) Eaa ra te irinakianga ka rauka ia tatou i roto ia Iehova? (e) Eaa te apiianga puapinga tei mou mai ia tatou mei tei tupu kia Baruka?

¹⁵ Te aronga e akamanako ra i Tei Anga ia ratou e akamama ua ana i to ratou oraanga, ma te irinaki e “kare rava” a Iehova e akaruke ia ratou e “kare oki” e takake ia ratou. (E tatau ia Ebera 13:5.) No te mea e tuke takiri teia tu tau mei te aerenga manako o teia ao, kia matakite tatou auraka e akatika i to teianei ao tu kia akakeu ia tatou. (Ephe. 2:2) No runga i teia, e akamanako ana i te akaraanga o Baruka, te tata tuatua o Ieremia, tei noo ana i te au taime ngata i te tuatau openga o Ierusalema e tae ua atu ki te akapouangaia te oire i te mataiti 607 M.T.N.

¹⁶ Kare e kore penei kua inangaro a Baruka kia rauka tetai oraanga meitaki atu nona i te pae materia. Te kite maira a Iehova i teia e kua akamatakite maira ia Baruka eiaa e kimi ua atu i te “meitaki maata” nona uaorai. Kua kitea to Baruka tu akaaka e te pakari, no te mea kua akarongo aia kia Iehova e kua ora mai i te akapouangaia a Ierusalema. (Iere. 45:2-5) I tetai tua, ko te au taeake o Baruka tei aruaru i te “meitaki maata” i te pae materia, i te tuku anga ia Iehova ki te openga, kare i roa ana kua pou katoatoa te reira i to Kaledea (Babulonia). E manganui ua atu tei pou i te mate. (2 Para. 36:15-18) Ko tei tupu kia Baruka te tauturu maira te reira ia tatou kia kite e e puapinga maata roa atu tetai pirianga meitaki ma te Atua i te apinganui e te turanga teitei i roto i teia ao.

E Akara ki te Au Akaraanga Meitaki Rava Atu

17. Eaa ra a Iesu, a Paulo, e Timoteo i riro ei ei au akaraanga memeitaki no to Iehova au tavini i teia tuatau?

¹⁷ Ei tauturu ia tatou kia na runga i te mataara ki te ora, e manganui te au akaraanga meitaki ta te Tuatua a te Atua e oronga maira no tatou. Ko Iesu, ei akaraanga, te tangata kite rava atu tei ora ana, kareka ra kua akapou ua aia i tona maroiroi ki runga i te mea te ka tauturu i te tangata e mutu kore ua atu​—ko “te evangelia o te basileia.” (Luka 4:43) Kia rauka i te oronga pouroa i tana ka rauka kia Iehova, kua akaruke te apotetoro ko Paulo i tetai ngai angaanga meitaki e kua akapou i tona taime e te maroiroi i te tutu aere i te tuatua meitaki. Kua aru a Timoteo, e “tamaiti tikai [i roto] i te akarongo,” i te akaraanga o Paulo. (1 Timo. 1:2) I tataraapa ana ainei a Iesu, a Paulo, e Timoteo i te kaveinga ta ratou i aru i roto i te oraanga? Kare roa! Kareka ra, kua akakite a Paulo e ko te au mea ta teia ao e oronga maira e “teita” ua rai me akaaiteia atu ki te tikaanga ngateitei o te tavini anga i te Atua.​—Phili. 3:8-11.

18. Eaa te au tauianga maata ta tetai taeake mapu i rave, no teaa i kore ei ona manako tataraapa?

¹⁸ E manganui ua atu te au mapu Kerititiano i teia tuatau e aru nei i te akarongo o Iesu, o Paulo, e Timoteo. Ei akaraanga, kua tata mai tetai taeake mapu tei tu ana i te ngai angaanga e meitaki tikai te moni e: “No te mea e akono ana au i te au kaveinga Pipiria, kare i roa ana kua rauka mai tetai au turanga teitei atu noku. Noatu te puapingaia ra i te pae moni, kiaku ra mei te mea rai e te kai ua ra au i te matangi. I te aravei atu anga au i te kumiti akaaere o te kamupani e kua akakite atu i toku inangaro kia aruaru i te angaanga orometua tamou, kare ratou i taroaroa ana i te oronga mai i tetai moni maata atu, i te irinaki anga e ka noo atu au. Inara kua akakoro rai au i roto i toku manako i taku ka rave. E maata te aronga kare e marama ana e eaa au ka akaruke ei i tetai ngai angaanga puapinga kia aruaru i te angaanga orometua tamou. Taku pauanga koia oki kua inangaro tikai au i te akatupu i taku akatapuanga ki te Atua. No te mea kua akamouia toku oraanga i teianei ki runga i te au mea pae vaerua, e maata tikai toku mataora e te marekaanga kare roa e rauka i tetai ua atu moni maata me kore turanga teitei i te oronga mai noku.”

19. Eaa te ikianga pakari e akamaroiroiia nei te au mapu ou kia rave?

¹⁹ I te ao katoa nei, e tauatini ua atu te au mapu ou tei rave i te au ikianga mei te reira rai. No reira e te au mapu ou, i te manakonako anga no runga i to kotou tuatau ki mua, e akamanako meitaki i te ra o Iehova ma te rapurapu. (2 Pete. 3:11, 12) Auraka e vareae atu i ta te aronga e puapingaia ra i roto i teia ao. Mari ra, e akarongo ki te aronga tei inangaro mou tikai ia koe. Ko te akaputuputu anga i ‘te apinga ki runga i te rangi’ te iniveti anga tinamou roa atu ia taau ka rauka e ko te mea anake ua rai te reira e au puapinga mutu kore tona. (Mata. 6:19, 20; e tatau ia 1 Ioane 2:15-17.) Ae, e akamanako i Tei Anga ia koe. Ia koe e akapera ra, ka akameitaki mai a Iehova ia koe.

[Tataanga Rikiriki i Raro]

Maara Ainei ia Koe?

• Akapeea tatou i te akaari anga i te irinakianga i roto i te Atua?

• Eaa ra te apiianga meitaki rava atu?

• Eaa te au apiianga ka mou mai ia tatou mei ia Baruka?

• Koai ma tei tau ei au akaraanga meitaki, e no teaa ra?

[Au Tutu i te kapi 13]

Te oronga maira a Iehova i te apiianga meitaki rava atu

[Tutu i te kapi 15]

Kua akarongo a Baruka kia Iehova e kua ora mai i te akapouanga o Ierusalema. Eaa taau i mou mai mei teia akaraanga?