E Arataki Anga Papu Ainei Tetai ki te Oraanga Tinamou?

Mei tei uriuriia i mua akenei, kua kimi ana te tangata i te oraanga meitaki na te irinaki anga i teia au ravenga mei te peu taumaa, te apii teitei, te apinganui, e ei tangata meitaki. Te akono anga ra i teia, kua aite rai ki te aru anga i tetai mapu kua tarevake te ara. Ko te aiteanga ainei i reira e e kare atu e arataki anga papu ki te oraanga tinamou? Kare!

ARATAKI ANGA MEI TE TUMU MEITAKI RAVA

Me iki i tetai ikianga, ka pati tatou i te tauturu a tetai tangata pakari e te kite. Aiteite katoa, ka kitea e tatou te arataki anga tau no te oraanga tinamou mei te Tumu pakari e te kite maata. Te akoanga no ko mai Iaia kua orongaia mai kia tatou ei au puka tataanga tapu tei tataia no tetai 3,500 mataiti i topa akenei. Kapikiia teia au puka tataanga tapu e ko te Pipiria.

Eaa ra koe ka irinaki ei i te Pipiria? No te mea ko Tei Tata i te reira Koia anake Tei pakari maata e te kite i teianei ao katoa. Akatakaia ra Aia ko “te Rā Taito ra” e “mei tupua roa mai e tuatau ua atu.” (Daniela 7:9; Salamo 90:2) Koia “tei anga i te au rangi ra; koia te Atua, ko tei akaaite i te enua e nana i anga.” (Isaia 45:18) Akakite maira aia i tona ingoa, ko Iehova.—Salamo 83:18.

No te mea e no ko mai te Pipiria i Tei Anga i te tangata ravarai, kare te reira e akateitei i tetai enua tangata mei tetai. E meitaki tana akoanga e kua puapingaia te au tangata katoatoa. Ka rauka te reira i roto i te au reo tukeke kua tuʼa maataia i te ao katoa, i tetai ua atu puka.a Tera te aiteanga ka mārama ua te tangata i te reira e ka puapinga katoaia. Te turuturu ra teia au manako i ta te Pipiria i akakite:

“Kare te Atua e akono i te tu o te tangata. Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”—ANGAANGA 10:34, 35.

Mei te au metua akaperepere ka oronga i te arataki anga ki ta raua tamariki, e Metua akaperepere te Atua ko Iehova tei oronga mai i te tauturu kia tatou na roto i tana Tuatua, te Pipiria. (2 Timoteo 3:16) Ka rauka ia koe te irinaki i tana Tuatua; no te mea nana i anga ia tatou e kua kite aia i te oraanga meitaki tikai no tatou.

ARATAKI ANGA TAU KIA IRINAKIIA

Ka irinaki tatou i te Pipiria ei arataki anga tau no te oraanga tinamou a te tuatau ki mua no te mea kua totou ke ana te reira no tetai 2,000 mataiti akenei, i te au tupuanga o teianei ao e te au tu o te tangata i teia tuatau.

AU TUPUANGA

“E tu mai tetai enua e tamaki mai ki tetai enua, e tetai basileia e tamaki mai ki tetai basileia. E te ngaruerue maata i te enua i tera ngai i tera ngai, e te onge, e te maki-mate.”—LUKA 21:10, 11.

AU TU

“Ka tupu te kino maata i taua tuatau openga ra, kia kite mai koe. E riro te tangata nei ei akaperepere ia ratou uaorai, ei noinoi, ei akatietie, ei nengonengo, ei akakino, ei akarongo kore ki te metua, ei mareka kore, ei viivii, ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua.”—2 TIMOTEO 3:1-4.

Eaa taau ka tamanako i toou kite anga e kua akakite ke ana te Pipiria i te tika no te au mea e tupu nei i teia tuatau? Kare e ekoko anga ka āriki koe i ta Leung i tuatua, no Hong Kong, e: “Kua tata takereia te au totou no tetai tuatau roa. Kare e rauka i tetai tangata te totou i te reira ma te tika. Kua akauruia te Pipiria e tetai tei teitei atu ia tatou.”

Tei roto i te Pipiria te au totou e anere ua atu tei akatupuia.b Akapapu maira teia i te Pipiria e e Tuatua na te Atua. “Ko au te Atua, e kare atu e aite iaku nei,” i karanga ai a Iehova. “I te akakite anga i te openga mei te muatangana mairai.” (Isaia 46:9, 10) No reira e tumu meitaki teia no te irinaki i ta te Pipiria e akakite ra no te tuatau ki mua.

ARATAKI ANGA KA PUAPINGAIA KOE I TEIANEI E TUATAU UA ATU

Me aru koe i te arataki anga i roto i te Tuatua Tapu, ka puapingaia koe. Akamanako i teia au akaraanga.

MANAKO TAU NO TE MONI E TE ANGAANGA

“E ngari ake te rima, okotai kia ki i te manga ma te au i nga rima katoa e rua kia ki ma te pekapeka e te kai i te matangi ra.”—KOHELETA 4:6.

ORAANGA NGUTUARE

“E aroa ra te tangata katoa i tana uaorai vaine mei te aroa iaia uaorai; e te vaine oki e kauraro aia i tana tane.”—EPHESIA 5:33.

PIRIANGA TANGATA

“E akaruke i te riri otooto: auraka toou ra kinokino kia tae roa ki te rave i te mea kino.”—SALAMO 37:8.

Na te taangaanga anga i ta te Pipiria e apii ra, ka puapingaia koe i teianei e ka rauka te oraanga meitaki a te tuatau ki mua. I roto i te Pipiria, ka kitea ta te Atua au taputou no te oraanga mataora

‘AU E TE TINAMOU

“Ka rekareka ratou i te maata o te au ra.”—SALAMO 37:11.

ARE E TE KAI NO TE KATOATOA

“E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira.”—ISAIA 65:21.

KARE E MAKI E TE MATE

“E kore rava te mate, e te aue, e te mii; e te mamae oki, e kore katoa ïa.”—APOKALUPO 21:4.

Eaa taau ka rave kia rauka te oraanga tinamou? Akara i te atikara ka aru mai.

a No tetai akakiteanga no te urianga e te tuʼa anga o te Pipiria, i runga i te www.pr2711.com aere ki te APIIANGA PIPIRIA > TUPUANGA TAITO & PIPIRIA.

b No tetai akakiteanga, akara i te pene 9 o te puka The Bible—God’s Word or Man’s? neneiia e te Au Kite o Iehova. Ka rauka i runga i te www.pr2711.com. Aere ki te LIBRARY > BOOKS & BROCHURES.