AKAPEEA ME TAKORE I TE TU MAKITAKITA

4 | Autu i te Tu Makitakita ma te Tauturu a te Atua

Karanga te Pipiria:

“Ta te vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki.”—GALATIA 5:22, 23.

Te Aiteanga:

Ma te tauturu a Iehova, ka rauka ia tatou i te takore i te tu makitakita. Ka tauturu tona vaerua tapu ia tatou i te akatupu i te au tu meitaki. No reira, eiaa e tauta i te takore i te tu makitakita ma toou uaorai maroiroi, e pati ra i te tauturu a te Atua. Me pera tatou, ka aite tatou ki te apotetoro ko Paulo tei tuatua: “E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) Ka rauka ia tatou i te karanga: “No ko ia Iehova ra te tauturu iaku.”—Salamo 121:2.

Taau ka Rave:

“Kua taui a Iehova iaku mei te tangata makitakita e te tā ua ki te tangata marū e te ’au.”—WALDO

Pure akatenga kia Iehova no tona vaerua tapu. (Luka 11:13) E pati i tana tauturu kia rauka ia koe i te akaari i te au tu meitaki. E apii i te Pipiria no runga i te au tu te ka takore i te tu makitakita, mei te aroa, te ’au, te akakoromaki, e te akono meitaki. Tauta i te akaari i teia au tu e te kapiti atu ki te au oa te akaari ra i te reira. Ka rauka ia ratou i te “akamaroiroi atu [ia koe] kia maata te aroa, e i te angaanga memeitaki.”—Ebera 10:24.

Tua Oraanga—WALDO

Autu i te Makitakita e te Tā Ua

Kua maata mai a Waldo i roto i tetai oraanga makitakita. Karanga aia: “E piri putuputu ana au ki roto i te tā anga ki te aronga oko apinga akakona . . . I tetai atianga, kua tutakiia tetai tangata kia tamate iaku. Kua patia aia iaku ki te matipi, inara kua ora mai au.”

Kare a Waldo i mareka ana te apii anga tana vaine i te Pipiria ki te Au Kite o Iehova. Karanga aia: “E riri ana au i te Au Kite, e ka tuatua akakino ua rai au ia ratou. Inara, ka pau marū ua mai ratou.”

Aere ua rai, kua akamata katoa a Waldo i te apii i te Pipiria. Karanga aia: “Kare i te mea māmā i te taangaanga i taku e apii ra. Kua manako tikai au e kare e rauka iaku i te akatere i toku tu makitakita.” Inara, kua kite mai aia i tetai apinga i roto i te Pipiria tei taui i tona manako.

Karanga a Waldo: “I tetai rā, kua pati mai toku puapii apii Pipiria ko Alejandro kia tatau au ia Galatia 5:22, 23. . . . Akamārama mai a Alejandro e kare e rauka iaku i te akatupu i teia au tu i toku uaorai maroiroi, mari ra ma te tauturu a te vaerua tapu o te Atua. Kua taui teia apiianga i toku manako!”

Ma te tauturu a te Atua, kua rauka ia Waldo i te takore i tona tu makitakita. Karanga aia: “Kua poitirere tikai toku kopu tangata e te au oa i te kite anga e kua taui toku oraanga.” Karanga katoa aia: “Kua taui a Iehova iaku mei te tangata makitakita e te tā ua ki te tangata marū e te ’au.”