Ka Takoreia te Tu Makitakita e Tuatau ua Atu!
Noatu me ka takore takiri tatou i te tu makitakita mei to tatou ngakau, kare e rauka ia tatou i te akatere i tetai ke. Ka makitakitaia rai te au tangata tu meitaki. No reira, akapeea te tu makitakita me takore takiriia?
Na Iehova anake e takore takiri i te tu makitakita e tupu nei i te ao katoa. Kua taputou te Pipiria e ka rave aia i te reira.—Maseli 20:22.
KA TAKORE TE ATUA I TE MEA TEI AKATUPU I TE TU MAKITAKITA
1. SATANI TE TIAPORO. Ko te angera kino ko Satani te tumu maata i tupu ei te tu makitakita i te ao nei. Ka takore te Atua ia Satani e te aronga tei aru iaia.—Salamo 37:38; Roma 16:20.
2. TE AO MAKITAKITA O SATANI. Ka takore te Atua i te au apinga te akatupu ra i te tu makitakita i te ao nei, mei te au kavamani kino e te au arataki akonoanga pikikaa. Ka takore katoa te Atua i te au pitiniti noinoi tei akavare e tei keia i te moni a te tangata.—2 Petero 3:13.
3. TE TU APA UA O TE TANGATA. Akakite te Pipiria e e tu apa ua to te tangata katoatoa—ka manako e ka rave ua ratou i te tarevake. (Roma 5:12) No teia tu apa, ka akamoupuku katoa ratou e ka akaari i te tu makitakita ki tetai ke. Ka tauturu te Atua i te tangata kia autu i te tu apa ua kia rauka ia ratou i te takore takiri i te tu makitakita e tuatau ua atu.—Isaia 54:13.
TAPUTOU TE PIPIRIA I TETAI AO KARE RAVA E MAKITAKITA
1. KARE E TU TIKA KORE. Ka tutara te Patireia o te Atua ki rungao i te enua nei, e ka akatupu i te tu tika e tuatau ua atu. (Daniela 2:44) Ka takoreia te tu papakitai e te iriiri tangata. Ka akatikatika te Atua i te au tu tika kore e tupu nei i teia tuatau.—Luka 18:7.
2. KA TUPU TE ’AU KI TE KATOATOA. Ka takoreia te au tu kino e te tamaki i te enua nei. (Salamo 46:9) Ka riro mai te reira ei ngai meitaki te ka nooia e te aronga tei inangaro i te ’au.—Salamo 72:7.
3. KA RAUKA TE ORAANGA MATAORA E TUATAU UA ATU. Ka akaari te tangata katoatoa i te aroa no tetai e tetai. (Mataio 22:39) Kare e tupu akaou te tu taitaia, e kare e akamaara akaouia te au mea kino. (Isaia 65:17) Me tae ki tera tuatau, “ka rekareka ratou i te maata o te au.”—Salamo 37:11.
Ka inangaro ainei koe kia noo ki roto i tetai ao mei te reira rai? E maata te tauta nei i te takore i te tu makitakita na te aru anga i te au kaveinga Pipiria. (Salamo 37:8) E mirioni ua atu Au Kite o Iehova takapini i te ao tei rave i te reira. Noatu te tuke o ta ratou peu e to ratou oraanga, te akaari nei ratou i te aroa e te tu taokotai.—Isaia 2:2-4.
Ka mataora te Au Kite o Iehova i te akakite atu i ta ratou i apii mai akapeea me akakoromaki i te tu tika kore e te papakitai. Ka tauturu te reira ia koe kia taui i tetai ua atu tu makitakita ki te aroa. Ka kite katoa mai koe akapeea me akono i te au tu tangata ravarai—kapiti mai te aronga makitakita. Te ka tupu, ka maata atu toou mataora e ka meitaki atu toou pirianga ki tetai ke. Tei maata atu, ka kite mai koe i taau ka rave kia ora koe i roto i te ao ou, me takore te Patireia o te Atua i te tu makitakita e tuatau ua atu.—Salamo 37:29.