Au Uianga a te Aronga Tatau
Ā’ea te angaanga tutu aere e ope ei?
Akakite a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mata. 24:14) Ko te tuatua Ereni “openga” i roto i teia irava, te irava 6 e te 13, ko teʹlos. Te akataka ra teia i te openga tikai o to Satani ao, ia Aramagido. (Apo. 16:14, 16) No reira, ka tutu aere ua atu rai tatou i te nuti meitaki i mua ake ia Aramagido. E akamāramaanga ou teia ki ta tatou i apii i mua ana.
I mua atu ana, kua irinaki tatou e ka ope te angaanga tutu aere me takoreia a Babulonia Maata, te akamata anga o te mate maata. (Apo. 17:3, 5, 15, 16) Ko teia tupuanga, irinaki tatou e ka akaope te reira i “te mataiti inangaroia e Iehova.” (Isa. 61:2) Kua irinaki katoa tatou e ko te aronga tiratiratu kia Iehova, ko ratou, te ka ora i mua ake i te mate maata. Kua akaaite tatou ia ratou ki te au ngati Iuda tei ora mai i te takoreia anga a Ierusalema i te 607 M.T.N. Kua akairoia teia aronga no te ora no te mea te akamori ra ratou ia Iehova e kua rikarika i te kino. (Eze. 5:11; 9:4) Inara, kare te reira akaaiteanga i rotai ki ta Iesu i tuatua i roto ia Mataio 24:14, tei akataka mai e ka orongaia te tuatau ki te tangata kia āriki i te nuti meitaki i mua ake i te openga tikai o Aramagido.
No to tatou mārama anga ou ia Mataio 24:14, ka anoano katoaia tatou kia akatanotano i ta tatou i mārama no te karere o te ua toka mamaata ia Apokalupo 16:21. Mei tetai kimikimi anga te akapapu ra te reira e te turu ra teia nga irava i tetai e tetai. Akapeea ra? Na roto i ta te tangata ikianga kia āriki i te karere Patireia. Tata te apotetoro ko Paulo, “e aunga ora” te nuti meitaki ki “te aronga akaoraia.” Kareka ra, teia nuti “e aunga mate” ki te au enemi o te Atua. (2 Kori. 2:15, 16) Makitakita ratou i teia karere Patireia no te mea te akaari ra teianei ao i te au tu kino o tei tutara ko Satani e kare e roa atu ka takoreia.—Ioa. 7:7; 1 Ioa. 2:17; 5:19.
Ko te ua toka i roto ia Apokalupo 16:21 e mea “maata rava oki te reira.” Penei ko te aiteanga i te tuatau o te mate maata, ka akakiteia te karere akavaanga, no runga i te ingoa o Iehova te ka akariri i te tangata. (Eze. 39:7) I muri ake i te takoreanga o Babulonia Maata, ka ariu mai ainei tetai pae ki teia karere? Penei paa. Penei ka maara ia ratou kua akakite ana te Au Kite o Iehova e ka takoreia a Babulonia Maata e te akatupuia ra te reira.
Akamanako ana i tei tupu i te tuatau o te Mate Ngauru i Aiphiti. I muri ake, te takoreanga a Iehova “i te au atua katoa o Aiphiti,” kua piri mai te au “tangata ke ke katoa e manganui” ki tona iti tangata. (Exo. 12:12, 37, 38) Kua iki ratou i te aru i to Iehova iti tangata, no te mea kua kite ana ratou i te tupuanga o ta Mose tuatua no te Mate Ngauru.
Ko te aronga tei ariu mai kia Iehova i muri ake i te takoreanga o Babulonia Maata e akameitakianga ta ratou i te turuturu i te au taeake o Karaiti i te enua nei. (Mata. 25:34-36, 40) E atianga teia no ratou kia akavaia ei mamoe i mua ake ka ope ei a Aramagido e me aere te toenga o te aronga akatainuia ki te rangi.
Akaari mai teia akamāramaanga ou i to Iehova inangaro akaperepere ia tatou. Ae, “kare rava [aia] i anoano e kia mate atu tetai, kia rauka katoatoa ra te tataraara.”—2 Pete. 3:9.