TUA 7
E Tangata Mataku Kore
I TE au tangata e maata maira i runga i te enua, kua rave te maata anga ia ratou i te au angaanga kino mei ia Kaina rai. Okotai rai tangata tuke. Teia tangata, ko Enoka tona ingoa. E tangata mataku kore a Enoka. Pouroa te au tangata takapini iaia te rave ra i te au mea kino tikai, ko Enoka ra kua tavini ua atu aia i te Atua.
Kua kite koe e eaa te au tangata i te reira tuatau i rave ei i te au apinga kino? Akamanako ana ra e, Naai i maani ia Adamu raua ko Eva kia akarongo kore i te Atua, e kia kai i te ua rakau ta te Atua i karanga e auraka raua e kai? Ae, na tetai angera kino. Kapiki te Pipiria iaia e ko Satani. E te tauta nei aia kia kino te au tangata ravarai.
Tetai ra, kua akaue te Atua ko Iehova ia Enoka kia akakite ki te tangata i tetai apinga kare ratou e inangaro i te akarongo. Teia ia: ‘A tetai ra ka takore te Atua i te aronga kino pouroa.’ Kare e kore kua riri tikai te tangata i te akarongo anga i teia. Penei e kua timata katoa ratou i te tamate ia Enoka. No reira i anoanoia ai kia mataku kore tikai a Enoka i te akakite ki te tangata i ta te Atua ka rave.
Kare te Atua i tuku ana ia Enoka kia roa tona oraanga i rotopu i taua au tangata kino ra. E 365 ua rai mataiti o Enoka i te ora anga. Eaa tatou i karanga ai e e “365 ua rai mataiti”? No te mea e ririnui atu te tangata i taua tuatau ra i to teianei, e e roa atu to ratou oraanga. Tera a Metusela te tamaiti a Enoka e 969 ona mataiti!
Muri ake i te matenga o Enoka, kua kino roa atu te tangata. Karanga te Pipiria e ‘e kino ua rai to ratou manako i te au taime ravarai,’ e ‘kua ki te enua i te takinga kino.’
Kua kite koe e eaa tetai tumu i maata ai te kino i runga i te enua i taua tuatau ra? No te mea e ravenga ou ta Satani i te maani i te tangata kia rave i te au mea kino. Teia ta tatou apii ka aru mai.
Genese 5:21-24, 27; 6:5; Ebera 11:5; Iuda 14, 15.