Aaere ma te Atua i Roto i Teia Au Tuatau Kikino

“Kua aaere oki a Enoka raua ko te Atua; e kare ra aia; kua apai keia oki aia e te Atua ra.”​—GENESE 5:24.

1. Eaa etai au tu te akariro ra i to tatou au tuatau ei mea tumatetenga?

E AU tuatau kikino! Te akataka meitaki maira taua au tuatua i te au mataiti manamanata e te kino ta te au tangata ravarai i kite i te akanooia anga te Patireia o te Mesia i te 1914. Mei taua au tuatau katoa ra, tei roto te au tangata i te “tuatau openga.” Kua akakino taua au tumatetenga mei te onge, te au maki, te au ngaruerue enua, e te au tamaki ia ratou na roto i tetai tupuanga maata. (2 Timoteo 3:1; Apokalupo 6:1-8) Kare te aronga te akamori ra ia Iehova i akaatea keia mai. I tetai tuanga maata e te meangiti, ka akakoromaki pouroa tatou i te au turanga ngata e te au tu papu kore o te au tuatau. Ko te au mea te akariro ra i te oraanga kia ngata tikai ko te au taomianga i te pae puapinga, te manamanata i te pae poritiki, te kino, e te au maki.

2. Eaa te au akaaoanga ta te au tavini o Iehova e aro atu nei?

² Kapiti atu, e manganui te au tavini a Iehova tei akakoromaki i te takinga kino maata ta Satani e tuku maira ki runga i te aronga “tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Apokalupo 12:17) E noatu e kare tatou pouroa i mamae ake i te takinga kinoanga tikai, te putoto katoatoa ra te au Kerititiano mou i te patoi atu ia Satani te Tiaporo e te vaerua tana e akamaroiroi ra i roto i te au tangata ravarai. (Ephesia 2:2; 6:12) Te umuumuia ra te tu matakite kia kore e akakeuia e taua vaerua, i te mea e te aro ra tatou i te reira i te ngai angaanga, i te apii, e i tetai au ngai ke atu te aravei ra tatou i te aronga kare e akaari mai ana i te inangaro i roto i te akamorianga ma.

Aaere ma te Atua, Kare ma te Pa Enua Katoa

3, 4. I roto i teea tu i tuke ei te au Kerititiano mei teianei ao?

³ I te anere mataiti mua, kua tamaki katoa te au Kerititiano i te patoi pakari i te vaerua o teianei ao, e kua akariro te reira kia tuke tikai ratou mei te aronga i vao ake i te putuputuanga Kerititiano. Kua akataka mai a Paulo i te tuke anga i te tata anga aia: “E no reira, ko teia taku tuatua e te akakite atu anga i ta te Atu ra, kia akamutu kotou i te aaereanga mei to te aere anga o to te pa enua katoa ra i te tu puapinga kore o to ratou manako, ia ratou i roto i te poiri te manako, e te taka ke anga i te ora anga mei ko mai i te Atua ra, no te kite kore i roto ia ratou ra, no te marokiakia o to ratou ngakau. I te mamao ke anga i te au tu manako tika, kua tuku ia ratou uaorai i te peu kanga kia rave i te au tu viivii ravarai ma te noinoi.”​—Ephesia 4:17-19, NW.

⁴ Mei teaa te ririnui taua au tuatua i te akataka anga mai i te oonu e te poiri tikai o teianei ao i te pae vaerua e te tu akono​—i to Paulo tuatau e to tatou tuatau nei! Mei te anere mataiti mua, kare te au Kerititiano i teia tuatau e ‘aaere mei to te pa enua katoa ra.’ Kareka ra, kua rauka ia ratou te akangateitei anga umere no te aaere anga ma te Atua. E tika tikai, penei ka ui mai etai au tangata me te tau ra kia karangaia e te aaere ra te au tangata apa akaaka ra ma Iehova. Inara, te akaari maira te Pipiria e ka rauka ia ratou. Tei runga ravao, te tapapa maira a Iehova e kia rave ratou i te reira. I te varu anere mataiti i mua ake i to tatou Tuatau Noa, kua tata mai te peroveta ko Mika i te au tuatua akauruia e aru mai nei: “Eaa ta Iehova inangaro ia koe ra, mari ra ko te rave i te tuatua-tau, e kia inangaro i te aroa, e te aerenga akamako tikai i to Atua ra?”​—Mika 6:8.

Akapeea e no Teaa ra ka Aaere ei ma te Atua?

5. Akapeea e rauka ai i tetai tangata apa i te aaere ma te Atua?

⁵ Akapeea e rauka ai ia tatou i te aaere ma te Atua mana ririnui katoatoa, e te kitea koreia? Te taka meitaki ra, kare ma te tu te aaere ra tatou ma te au taeake tangata. I roto i te Pipiria te aite anga o te tuatua kia “aaere” “kia aru i tetai aerenga tikai o te angaanga.”a Te akamanako anga i teia, te marama ra tatou e ko te tangata te aaere ra ma te Atua te aru ra i tetai aerenga oraanga tei akatakaia mai e te Atua e te akamareka ra iaia. Te aruaru anga i taua aerenga te akatuke ra ia tatou mei te maata anga o te au tangata takapini ia tatou. Inara, ko te iki anga tau ua te reira na tetai Kerititiano. No teaa ra? E maata te au tumu.

6, 7. Eaa ra te aaere anga ma te Atua ko te aerenga meitaki roa atu?

⁶ Te mea mua, ko Iehova Tei Anga ia tatou, te Tumu o to tatou ora, e Tei Oronga mai i te au mea katoa ta tatou e anoano ra kia akono i te ora anga. (Apokalupo 4:11) Tei tupu mai, tei iaia anake ra te tika anga i te akakite mai kia tatou e akapeea te aaere anga. Kapiti mai, te aaere anga ma te Atua ko te aerenga puapinga maata roa atu e ka rauka. No te aronga te aaere ra ma ia, kua rave a Iehova i te akanoonoo anga no te akakore anga i te ara, e kua oronga mai aia i te manakonakoanga papu no te ora mutu kore. Kua oronga katoa mai to tatou Metua aroa katoa i te rangi ra i te akoanga pakari te tauturu ra i te aronga te aaere ra ma ia kia akapuapinga i tetai oraanga i teianei, noatu to ratou tu apa e te nooanga i roto i tetai ao tei raro ake i te mana o Satani. (Ioane 3:16; 2 Timoteo 3:15, 16; 1 Ioane 1:8; 2:25; 5:19) Ko tetai atu tumu no te aaere anga ma te Atua koia oki to tatou tu rave puareinga ua anga i te reira te oronga maira i te au e te taokotai anga i roto i te putuputuanga.​—Kolosa 3:15, 16.

⁷ I te openga iora, e te puapinga maata roa atu, me aaere tatou ma te Atua, te akaari ra tatou e ko teea tua ta tatou e turu ra no runga i te itiu maata tei tupu mai i roto i te kainga i Edene​—te itiu no te tu ngateitei. (Genese 3:1-6) Te akaari ra tatou i roto i to tatou aerenga oraanga e te turu ra tatou i to Iehova tua, e te akakite mataku kore ra tatou e koia anake te Ngateitei tika tikai. (Salamo 83:18) No reira te angaanga rotai ra tatou ki ta tatou pure e kia akatapuia to te Atua ingoa e kia raveia tona anoano. (Mataio 6:9, 10) Mei teaa atura te pakari no taua aronga tei aaere ma te Atua! Kua papu ia ratou e te aere ra ratou i roto i te mataara tika, i te mea e ko Iehova oki te “pakari anake.” Kare oki aia e rave ana i te tarevake.​—Roma 16:27.

8. Akapeea i aite ei te au tuatau o Enoka raua ko Noa ki to tatou tuatau nei?

⁸ I na, akapeea i reira, i te noo anga ei au Kerititiano me e kikino te au tuatau e kare te maata anga o te au tangata e inangaro mai ana i te tavini ia Iehova? Ka kite tatou i te pau anga me akamanako tatou i te au tangata akarongo mou mei ito mai tei akono i to ratou tu tau i te au tuatau ngata tikai. Ko Enoka raua ko Noa tetai o teia au tangata nei. Kua noo raua roa ai i tetai tuatau kua aite tikai ki to tatou uaorai. E maata te kino. I to Noa tuatau kua ki te enua i te kino e te tu tau kore. Inara, i to raua tuatau ra kua patoi a Enoka raua ko Noa i te tu o teia nei ao e kua aaere ma Iehova. Akapeea raua i te rave anga i reira? E pau ei i taua uianga, ka uriuri tatou i roto i teia atikara i te akaraanga o Enoka. I roto i te atikara te aru maira, ka akamanako tatou ia Noa.

Kua Aaere a Enoka ma te Atua i Roto i te Au Tuatau Kikino

9. Eaa te akakiteanga tei rauka mai ia tatou no runga ia Enoka?

⁹ Ko Enoka te tangata mua tei akatakaia mai i roto i te au Tuatua Tapu tei aaere ma te Atua. Te karanga ra te papaanga Pipiria e: “Kua aaere iorā Enoka raua ko te Atua i muri ake i tana anau anga ia Metusela ra.” (Genese 5:22) Ei reira, i muri ake i te ripoti mai anga te roa o to Enoka ora anga​—e, e roa atu me akaaiteia ki to tatou oraanga, e poto ua no taua au tuatau​—te karanga ra te papaanga e: “Kua aaere oki a Enoka raua ko te Atua; e kare ra aia; kua apai keia oki aia e te Atua ra.” (Genese 5:24) I te akara anga, kua akaumuia e Iehova a Enoka mei te ora kia takake atu ki roto i te mate i mua ake ka opuia ai aia e te aronga patoi. (Ebera 11:5, 13) I te pae mai i taua au irava poto ua, e tokoiti ua te au taiku anga no Enoka i roto i te Pipiria. Noatu rai, mei te akakiteanga tei rauka ia tatou e tetai atu au akakite anga ke, e tumu anga meitaki ta tatou i te karanga e e kikino to Enoka tuatau.

10, 11. (a) Akapeea te kino i te akatotoa angaia i muri ake te meameaau anga a Adamu raua ko Eva? (e) Eaa te karere tei totouia ta Enoka i tutu aere, e eaa te pau anga tana tikai i aravei atu?

¹⁰ E akamanako ana, ei akaraanga, mei teaa te viviki te akatotoa angaia te kino i roto i te iti tangata i muri ake te ara anga a Adamu. Te akakite maira te Pipiria kia tatou e kua riro mai ta Adamu tama mua, ko Kaina, e ko te tangata mua tei ta i te tangata i tona ta anga i tona teina ia Abela. (Genese 4:8-10) I muri ake i to Abela mate kino pakari anga, kua anau akaou mai a Adamu raua ko Eva i tetai tamaiti, e kua tapa raua i tona ingoa ko Seta. No runga iaia ra, ka tatau tatou: “E anau akera oki ta Seta, e tamaiti; e tapa iora aia i tona ingoa ko Enosa. I reira to te tangata tapa angaia i te ingoa no Iehova.” (Genese 4:25, 26) Ma te mii, ko taua “tapa angaia i te ingoa no Iehova” e tu apoteiti ia.b E manganui te au mataiti i muri ake te anau anga o Enosa, kua atu tetai uanga a Kaina ko Lameka te ingoa i tetai imene no tana nga vaine i te akakite anga e kua tamate aia i tetai tangata mapu tei koputa mai iaia. Kua akamatakite katoa aia: “Kia taki itu i te tutaki ia Kaina ra, riro i te tataki itu ngauru e kia itu ara ia Lameka.”​—Genese 4:10, 19, 23, 24.

¹¹ Ko taua au tika anga poto ua ta te tuatua i akakite mai e kua arataki viviki atu te kino tei akamataia mai e Satani i roto i te kainga i Edene te akatotoa angaia te tu kino i roto i ta Adamu uanga. I roto i taua ao, e peroveta a Enoka no Iehova e te tangi maata nei rai tana au tuatua akauruia ma te ririnui i teia tuatau. Kua tata a Iuda e kua totou mai a Enoka e: “I na, te aere maira te Atu ma te ngauru katoa o te tausani o tana aronga tapu ra, E akautunga mai i te tangata katoa, e e akakite oki i te au akono kore i te Atua katoa i roto ia ratou i ta ratou au tuatua akono kore i te Atua katoa i raveia e ratou ra, e te au tuatua māro katoa a te aronga ara akono kore i te Atua i karanga iaia ra.” (Iuda 14, 15) Ko taua au tuatua ra ka kiteaia tona akatupu angaia i Aramakito. (Apokalupo 16:14, 16) Noatu rai, kua papu ia tatou e i roto katoa i to Enoka tuatau, e manganui te “aronga ara akono kore i te Atua” tei akarongo riririri i ta Enoka totou. Mei teaa atura te aroa e kua akaumuia e Iehova te peroveta kia kore aia e takinokinoia e ratou!

Eaa ra tei Akaketaketa ia Enoka kia Aaere ma te Atua?

12. Eaa ra a Enoka i tuke ei mei tona uki i tona tuatau?

¹² I roto i te kainga Edene, kua akarongo atu a Adamu raua ko Eva kia Satani, e kua meameaau iora a Adamu ia Iehova. (Genese 3:1-6) Kua aru ta raua tamaiti ko Abela i tetai aerenga ke, e kua akara mareka atu a Iehova ki runga iaia. (Genese 4:3, 4) Ma te mataora kore, te maataanga o ta Adamu uanga kare i riro mai ana mei ia Abela rai. Inara, ko Enoka ra, tei anauia e anere mataiti i muri mai, kua riro mei ia Abela rai. Eaa te tuke i rotopu ia Enoka e tetai au uanga e manganui a Adamu? Kua pau mai te apotetoro ko Paulo i taua uianga te tata anga aia e: “No te akarongo i akaumuiaʼi a Enoka kia kore aia e kite i te mate; e kare atura aia i kitea, no te mea kua akaumuia aia e te Atua: ou oki aia i akaumuiaʼi i kite ei aia e, kua pereperekavana te Atua iaia.” (Ebera 11:5) E tuanga a Enoka no tetai “urupu maata [i mua ake i te Kerititiano] i kite nei,” ei au akaraanga meitaki no te akarongo. (Ebera 12:1) Na te akarongo i tauturu ia Enoka kia akakoromaki i roto i te tu tau i roto i tetai oraanga e tere atu i te 300 mataiti​—tere atu e toru taime te roa te oraanga no te maata anga o tatou i teia tuatau!

13. Eaa te tu o to Enoka akarongo?

¹³ Kua akataka mai a Paulo i te akarongo o Enoka e to tetai au kite i te tata anga aia e: “E teianei, ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei.” (Ebera 11:1) Ae, ko te mea e tatariia nei ko te akarongo, tei akatumuia ki runga i te au tumu tikai, e ka tupu tikai mai te au mea ta tatou e manakonako ra. Te kapiti maira te reira i tetai tatari anga pakari roa atu e te akakeu ra te reira i ta tatou e akara ko te mea puapinga maata roa atu i roto i to tatou oraanga. Kua tauturu taua tu no te akarongo ia Enoka kia aaere ma te Atua noatu rai e kare te ao tei takapini iaia ra i rave ana i te reira.

14. I runga i teea kite tika tikai i akatumuia ai to Enoka akarongo?

¹⁴ Kua akanooia te akarongo mou ki runga i te kite tika tikai. Eaa te kite tei rauka ia Enoka? (Roma 10:14, 17; 1 Timoteo 2:4) Kare ekokoanga, kua kite aia i te au mea i tupu i Edene. Penei ua ake, kua akarongo katoa ana aia e mei teaa ra te oraanga i roto i te kainga Edene​—penei ua ake te vai ua ra rai, noatu e kare i akatikaia ki te au tangata. (Genese 3:23, 24) E kua kite aia i ta te Atua akakoroanga e kia akaki ta Adamu uanga i te enua e kia akariro i te paraneta katoa nei mei taua Parataito mua rai. (Genese 1:28) Kapiti atu, papu tikai kua akaperepere a Enoka i ta Iehova taputou i te tuku anga mai i tetai Uanga te ka akaparuparu i to Satani mimiti e ka akakore atu i te au tupuanga kino no ta Satani pikikaa. (Genese 3:15) E tikai, kua akakiteia mai ta Enoka uaorai totou tei akauruia, tei akonoia i roto i te puka a Iuda, te takoreia anga te uanga a Satani. I te mea e e akarongo to Enoka, kua kite tatou e kua akamori aia ia Iehova ko tei “tutaki mai i te aronga i kimi tikai iaia.” (Ebera 11:6) No reira, noatu e kare i rauka pouroa mai ia Enoka te kite tei rauka ia tatou ra, kua rava ua iaia i te akanoo i te tango no tetai akarongo ngaueue kore. Ma taua akarongo ra, kua akono aia i tona tu tau i te au tuatau kikino.

E Aru i te Akaraanga o Enoka

15, 16. Akapeea e rauka ai ia tatou i te aru i te aerenga o Enoka ra?

¹⁵ Mei ia Enoka ra, i te mea e te inangaro ra tatou i te akamareka ia Iehova i te au tuatau kikino te vai nei i teia tuatau, e meitaki tikai kia aru tatou i te akaraanga o Enoka. Te umuumuia ra tatou kia rauka e kia akono i te kite tika tikai no runga ia Iehova e tana akakoroanga. Inara e maata atu ta tatou e anoano ra. Te anoanoia ra tatou kia tuku i taua kite tika tikai kia arataki i to tatou aerenga. (Salamo 119:101; 2 Petero 1:19) Te anoanoia ra tatou kia aratakiia e to te Atua manako, te titau ua anga i te akamareka iaia ma to tatou manako katoa e te au angaanga.

¹⁶ Kare a tatou rekoti e koai ma ua atu i to Enoka tuatau te tavini ra ia Iehova, inara te taka meitaki ra e koia anake ua me kore no tetai tuanga tokoiti ua. E tokoiti ua tatou i roto i teianei ao, inara kare te reira e akamaromaroa ia tatou. Na Iehova e turu mai ia tatou noatu e koai ma te ka patoi mai ia tatou. (Roma 8:31) Kua akamatakite mataku kore mai a Enoka no runga i te akapou anga te ka tupu mai no te au tangata akono kore i te Atua. Kia maroiroi katoa tatou ia tatou e tutu aere ra i “te evangelia o te basileia nei” noatu te aviri anga, te patoianga, e te takinga kinoanga. (Mataio 24:14) Kare a Enoka i ora roa ana mei tona uki e manganui i tona tuatau. Noatu rai, kare tona manakonakoanga e no roto i taua ao. Kua akara mou aia i tona nga mata ki runga i tetai mea maata roa atu. (Ebera 11:10, 35) Te akara mou katoa ra tatou i to tatou nga mata ki runga i te akatupu anga i to Iehova akakoroanga. No reira, kare tatou e taangaanga ki katoa i teianei ao. (1 Korinetia 7:31) Kareka ra, ka taangaanga maata tatou i to tatou maroiroi e te au apinga i roto i ta Iehova angaanga.

17. Eaa te kite tei rauka ia tatou e kare i rauka ana ia Enoka, eaa i reira ta tatou ka rave?

¹⁷ E akarongo to Enoka e ka aere mai te Uanga tei taputouia mai e te Atua i te tuatau te tau ra kia Iehova. Kua vaitata e 2,000 mataiti i teianei mei taua Uanga​—ko Iesu Karaiti​—tei aere mai, tei oronga mai i te oko, e tei akatuera mai i te mataara no tatou, e pera katoa no taua au kite akarongo mou taito ra mei ia Enoka, kia rauka oki te ora mutu kore. Kua uriia e taua Uanga ra, tei akataoongaia i teianei ei Ariki no te Patireia o te Atua, a Satani mei te rangi mai ki te enua nei e te kite nei tatou i te mate te tupu nei takapini ia tatou. (Apokalupo 12:12) Ae, e maata atu te kite te rauka ra ia tatou kare i rauka ana ia Enoka. Ei reira, ka rauka ia tatou te akarongo ngaueue kore mei iaia rai. Kia akakeuia to tatou irinaki anga i roto i te akatupuanga i te au taputou a te Atua i roto i te au mea ravarai ta tatou e rave nei. Kia aaere tatou ma te Atua, mei ia Enoka rai, noatu e te noo nei tatou i roto i te au tuatau kikino.

[Au Tataanga Rikiriki i Raro]

Akapeea Koe me Pau?

• Eaa te aite anga kia aaere ma te Atua?

• No teaa ra te aaere anga ma te Atua ko te aerenga meitaki roa atu?

• Eaa tei tauturu ia Enoka kia aaere ma te Atua noatu te au tuatau kikino?

• Akapeea e rauka ai ia tatou i te aru ia Enoka?

[Tutu i te kapi 15]

Na roto i te akarongo, “kua aaere oki a Enoka raua ko te Atua”

[Tutu i te kapi 17]

Te irinaki pakari nei tatou e ka tupu tikai te au taputou a Iehova

[Akameitakianga no te Tutu i te kapi 13]

Woman, far right: FAO photo/B. Imevbore; collapsing building: San Hong R-C Picture Company