Ko Enoka Kua Aaere Raua ko te Atua i Roto i Tetai Ao Akono Tau Kore i te Atua

TE MARO ra te Tiaporo e ka rauka iaia i te tarurike i te au tangata ravarai mei te Atua ra, e i etai tuatau kua akara anga mei te mea rai e kua autu aia. Kua tere atu i te rima anere mataiti i muri ake i te matenga a Abela, kare tetai okotai i akataka iaia uaorai ei tavini tiratiratu no Iehova. Ei tukeanga ra, kua riro te tu ara ua e te akono tau kore i te Atua ra ei mea matauia.

I taua tuatau topa anga te tu pae vaerua i mama mai ei a Enoka ki runga i te enua nei. Kua akanoo mai te akapapaanga Pipiria i tona anauanga i te 3404 M.T.N. Kare mei te aronga o tona tuatau rai, kua akapapu a Enoka iaia ei tangata arikiia e te Atua. Kua kapiti atu te apotetoro ko Paulo iaia ki roto i te au tavini o Iehova tei mou maira to ratou akarongo ei akatauanga no te au Kerititiano. Koai a Enoka? Eaa te au akaaoanga tana ka aro atu? Akapeea aia i te autu anga ia ratou ra? E eaa te tauturu anga kia tatou no tona tiratiratu anga?

I to Enosa tuatau, e vaitata i te a anere mataiti i mua ake i to Enoka tuatau ra, i reira “to te tangata tapa angaia i te ingoa no Iehova.” (Genese 4:26) Kua taikuia te ingoa tu-Atua ra mei te akamataanga mairai te tuatua enua o te tangata nei. No reira, ko tei akamataia i to Enosa tuatau e ora ra kare i te kapikianga ia Iehova i te akarongo e te akamori anga ma. Kua mou etai aronga Epera apiiia ra ia Genese 4:26 e ka tau kia tatauia “i akamatai te tuatua taviivii” me kare “i reira te tuatua anga taviivii i akamatai.” Penei kua tapa te au tangata i te ingoa o Iehova kia ratou uaorai me kare ki etai atu au tangata ta ratou i akameamea ua ra e na roto atu ia ratou te akavaitata anga ki te Atua i te akamorianga. Me kare penei kua tapa ratou i tona ingoa ki te au itoro ra.

‘Kua Aaere Iorā Enoka Raua ko te Atua Mou’

Noatu rai e kua koropiniia a Enoka e te au tu akono tau kore i te Atua ra, ‘kua aaere ua atura aia ma te Atua mou,’ ko Iehova. Kare i tuatuaia e ko tona ai tupuna​—ko Seta, ko Enosa, ko Kainana, ko Maalaleela, ko Iareda​—i aaere ma te Atua. Kare ra ratou i rave kia aite atu kia Enoka, tei akatakakeia e tona tu oraanga mei to ratou ra.​—Genese 5:​3-27, NW.

Te aaereanga ma Iehova te akakite maira i te matau anga e tetai pirianga ma te Atua ra tei rauka anake no to Enoka ra noo anga i te tu rotai ma te anoano tu-Atua ra. Kua mareka a Iehova i to Enoka tu akono. Ko te tika, te tuatua ra te Septuagint Ereni “e mareka anga meitaki a Enoka” ki te Atua, ko tetai manako tei akakite katoaia e te apotetoro ko Paulo ra.​—Genese 5:22; Ebera 11:5.

Tetai tumu maata katoa oki ki to Enoka ra pirianga meitaki ma Iehova ko tona akarongo. E mea tika kua akono aia i te akarongo i te “uanga” taputouia no te “vaine” a te Atua ra. Naringa i matau piri tikai aia ia Adamu, penei ka rauka ia Enoka i etai tuatua akakite no runga i ta te Atua ra akonoanga i nga tangata tokorua mua i Edene ra. Na te kite tei rauka iaia no te Atua ra i akariro ia Enoka ei tu tangata tei “kimi tikai iaia.”​—Genese 3:15; Ebera 11:​6, 13.

I to Enoka turanga e to tatou katoa oki, ko te pirianga meitaki ma Iehova te umuumuia ra kia tere atu i te kite ua i te Atua ra. Me te manako maata ra tatou i te pirianga vaitata ma tetai peretana, kare ainei i te mea tika e ka mana tona au manako ki runga i to tatou au manako e ta tatou au angaanga oki? Ka kopae ke tatou i te au tuatua e te au angaanga te ka akakino i taua oaanga ra. E me ka manako tatou i te raveanga i etai taui anga i to tatou uaorai au turanga, kare ainei tatou e akamanako katoa e ka akapeea te akatupu anga o teia ki taua pirianga ra?

Mei te reira katoa oki ko te anoano kia tamou marie i te pirianga vaitata ma te Atua ra e mana to te reira ki runga i ta tatou ka rave. Tetai umuumuanga ko te kite tika e eaa tana ka mareka e ka mareka kore oki. Ei reira ka tau tatou kia aratakiia e te kite, ma te tauta anga kia akamareka iaia i te manako e te angaanga.

Ae, kia aaere ma te Atua ra, ka tika tatou kia akamareka iaia. Ko ta Enoka te reira i rave no etai anere mataiti. Ko te tika, te tu no te verepa Epera tei akakite maira e i “aaere” a Enoka raua ko te Atua te akakite maira i te angaanga putuputu, e te tamou marieanga. Tetai atu tangata tiratiratu tei ‘aaere ra ma te Atua’ ko Noa ia.​—Genese 6:9.

A Enoka ko tetai tangata tei akono ra i tona pamiri e vaine tana e kua anau akera oki i te “tamariki tamaroa, e te tamariki tamaine.” Tetai o tana au tamaroa ko Metusela. (Genese 5:​21, 22) E mea tika kua rave a Enoka i te akaaere tu meitaki ki rungao i tona ngutuare tangata. Inara, ma te au tu akono tau kore i te Atua ra tei takapini katoa iaia, kare i te mea ngoie ua nona kia tavini i te Atua. Penei ko Lameka anake, koia ra te metua o Noa tei aiteite atu kiaia kua akono i te akarongo kia Iehova. (Genese 5:​28, 29) Inara, kua akono mataku kore a Enoka i te akamori anga mou.

Na teaa i tauturu ia Enoka kia vai tiratiratu ki te Atua ra? Kare e ekoko anga, e kare aia i taokotai atu ki te aronga akakino i te ingoa o Iehova ra me kare ma etai atu tei kore ra i tau ei au oa no tetai tei akamori ra i te Atua. E mea tika na te kimianga i ta Iehova ra tauturu na roto i te pure kua akamaroiroi katoa ia Enoka kia tamanako marie i te kopae ke atu i tetai ua atu apinga te ka akamareka kore i Tei Anga maira iaia.

Totou Akaapa Atu i te Aronga Tu Akono Tau Kore i te Atua

Te tamou marieanga i te au turanga teitei e mea ngata ia me te koropiniia ra tatou e te au tangata akono tau kore i te Atua ra. Inara kua oronga katoa a Enoka i tetai tuatua tika tika atu no te akautunga anga mai i te aronga rave kino ra. I te arataki angaia e te vaerua o te Atua ra, kua totou akakite atura Enoka: “I na, te aere maira te Atu ma te ngauru katoa o te tausani o tana aronga tapu ra, E akautunga mai i te tangata katoa, e e akakite oki i te au akono kore i te Atua katoa i roto ia ratou i ta ratou au tuatua akono kore i te Atua katoa i raveia e ratou ra, e te au tuatua māro katoa a te aronga ara akono kore i te Atua i karanga iaia ra.”​—Iuda 14, 15.

Eaa te tupu anga o taua tuatua ra ki runga i te aronga akarongo kore marokiakia ra? E mea tau kia manakoia e ko taua au tuatua akariri ra kua akariro ia Enoka kia kore e marekaia, penei kua tuatua aviriia, kua akakokoia, e kua tamatakuia. Kua tika e kua anoano tetai papaki kia akamuteki takiri atu iaia ra. Inara, kare a Enoka i mataku. Kua kite aia e eaa tei tupu kia Abela tuatua tika ra, e mei iaia rai, kua tamanako a Enoka kia tavini atu i te Atua ra, noatu eaa te ka tupu mai.

“Kua Apai Keia oki Aia e te Atua Ra”

I te akara anga tei roto a Enoka i tetai turanga kino e “kua apai keia oki aia e te Atua ra.” (Genese 5:24) Kare a Iehova i akatika kia tamamaeia tana peroveta tiratiratu ra i te au rima o te au enemi riri kino ra. Kia tau ki ta te apotetoro ko Paulo, “i akaumuiaʼi a Enoka kia kore aia e kite i te mate.” (Ebera 11:5) E manganui kua karanga e kare a Enoka i mate​—kua apai keia aia e te Atua ki te rangi, te ngai i ora ua atura aia. Inara, kua tuatua taka meitaki a Iesu: “Kare rava e tangata i tae ki runga i te rangi, mari ra ko tei aere mai ki raro mei runga mai i te rangi ra, ko te Tamaiti a te tangata.” Ko Iesu te “momua” o te aronga katoa te ka aere ra ki te rangi ra.​—Ioane 3:13; Ebera 6:​19, 20.

No reira, eaa tei tupu kia Enoka? I tona ‘akaumuiaʼi kia kore aia e kite i te mate’ penei te aiteanga e kua tuku te Atua iaia ki roto i te tu ngaro ra te manako e i reira kua akaopeia atu tona oraanga iaia i roto i taua tu ra. I raro ake i taua au turanga ra, kare a Enoka e kite i te au mamae no te mate. I reira “kare atura aia i kitea,” penei kua takore atura Iehova i tona kopapa, mei tana i takore atura i te kopapa o Mose.​—Deuteronomi 34:​5, 6.

Kua ora a Enoka e 365 mataiti​—kare i aite te roa ki to te maata anga o te au tangata i tona tuatau ra. Inara te mea puapinga maata no te aronga inangaro ia Iehova ra koia oki kia tavini tiratiratu ratou iaia e tae roa ki te openga o to ratou tuatau. Kua kite tatou e kua rave a Enoka i te reira no te mea i “ou oki aia i akaumuiaʼi i kite ei aia e, kua pereperekavana te Atua iaia.” Kare te au Tuatua Tapu i akakite mai e akapeea ta Iehova ra komunikeiti anga i teia kia Enoka. Tera ra, i mua ake ka mate ei a Enoka, kua orongaia kiaia te akapapu anga no to te Atua akamareka anga, e ka papu oki ia tatou e ka maara a Iehova iaia i te tuakaouanga.

E Aru i to Enoka ra Akarongo

Ka rauka tikai ia tatou i te aru i te akarongo o te au tangata tau i te Atua ra. (Ebera 13:7) No te akarongo i tavini ei a Enoka ei peroveta tiratiratu mua o te Atua ra. Te ao i to Enoka tuatau ra e aiteite ki to tatou nei​—e ta ua, e akakino, e te akono tau kore i te Atua. Inara, e tuke a Enoka. E akarongo mou tona e ko tetai akatauanga i te akamori anga tau i te Atua ra. Ae, kua oronga a Iehova kiaia i tetai tuatua akavaanga teiaa kia akakite, inara kua akamaroiroi katoa aia iaia kia akakite i te reira. Kua akono mataku kore ua a Enoka i tana angaanga, e kua utuutu atura te Atua iaia i te aro anga i te patoianga a te enemi ra.

Me akono tatou i te akarongo mei ta Enoka i rave ra, ka akamaroiroi mai a Iehova ia tatou kia akakite i tana tuatua i teia tuatau openga nei. Ka tauturu mai aia ia tatou kia aro mataku kore atu i te patoianga, e ka akariro to tatou tu akono tau i te Atua ra kia tuke roa mei te aronga akono tau kore i te Atua ra. Ka tauturu mai te akarongo ia tatou kia aaere ma te Atua e kia akono ia tatou uaorai na roto i tetai tu te ka akarekareka i tona ngakau. (Maseli 27:11) No te akarongo, kua autu a Enoka i te aaereanga ma Iehova ra i roto i tetai ao akono tau kore i te Atua ra, e ka rauka katoa oki ia tatou.

[Pia i te kapi 30]

Te Taiku Maira Ainei te Pipiria Mei te Puka a Enoka?

Te Puka a Enoka ko tetai tataanga ekoko anga e te tataanga akonoanga oki. Kua tuatua pikikaaia kia Enoka. Penei kua tataia i te tuatau o te rua e te anere mataiti mua M.T.N., e akaputu anga ia no te au mea akamaataia e te au peu ngati Iuda kare ei tuatua enua ra, penei e akataka anga akamaataia no te akakite anga poto ua ia Genese no Enoka ra. Kua rava ua teianei no te aronga inangaro i te Tuatua akauruia a te Atua ra kia akaruke atu i te reira.

I roto i te Pipiria, tei roto anake i te puka a Iuda ra ta Enoka au tuatua totou: “I na, te aere maira te Atu ma te ngauru katoa o te tausani o tana aronga tapu ra, E akautunga mai i te tangata katoa, e e akakite oki i te au akono kore i te Atua katoa i roto ia ratou i ta ratou au tuatua akono koe i te Atua katoa i raveia e ratou ra, e te au tuatua māro katoa a te aronga ara akono kore i te Atua i karanga iaia ra.” (Iuda 14, 15) E manganui te aronga apiipii te maro ra e ko te totou a Enoka no te au tangata akono kore i te Atua i tona tuatau ra kua taiku tikaia mai mei te Puka o Enoka ra. Penei ake kua taangaanga ainei a Iuda i tetai puka ekoko kare ra i irinakiia ei tumu nana?

I akapeea to Iuda ra kite anga i te totou a Enoka kare i akakiteia mai e te au Tuatua Tapu ra. Penei kua taiku ua mai aia i tetai tumu matauia, tetai ikuiku anga irinakiia tei orongaia mai mei ito maira. I te akaraanga kua rave a Paulo i tetai apinga aiteite i tana tuatua anga ia Iane raua ko Iamebera ei nga tangata purepure a Pharao tei patoi ra ia Mose. Me i rauka i tei tata ra i te Puka o Enoka kia tatau i tetai tumu taito no teianei tu, eaa tatou ka akakore ei i te reira kia Iuda ra?a​—Exodo 7:11; 2 Timoteo 3:8.

I akapeea te rauka anga ia Iuda te akakite anga no te tuatua a Enoka ra ki te aronga akono tau kore i te Atua ra e e tumu meangiti ua te reira. Te akakiteia maira tona tau kia irinakiia ki te tika anga e kua tata a Iuda i raro ake i te akauru anga tu-Atua. (2 Timoteo 3:16) Na te vaerua tapu o te Atua ra i arataki iaia kia kore e tata i tetai ua atu apinga kare ra i tika.

[Tataanga Rikiriki i Raro]

[Tutu i te kapi 31]

Kua oronga mataku kore ua a Enoka i te tuatua a Iehova ra