Pene 24

Te Autu Kaka Anga o ta Iehova ra Akakoroanga

1, 2. (a) Eaa ta Iehova akakoroanga no tana au mea ora kite ra? (e) Koai ma te kapitiia ra ki roto i ta te Atua anau akamori taokotaiia ra? (ng) No runga i teia, eaa te uianga tau na te aronga tatakitai kia akamanakonako?

KIA taokotaiia te au mea kite ravarai tei angaia ra i te akamori anga mou ma te rekarekaanga ratou katoatoa i te rangatira meitaki o te tamariki a te Atua ra​—ko te akakoroanga pakari e te aroa o Iehova te reira. Ko te reira katoa oki ta te aronga katoatoa te inangaro ra i te tuatua tika ka anoano pakari.

² Kua akamata a Iehova i te akatupuanga i teia akakoroanga meitaki i tana akamata anga i tana au angaanga i te au mea i angaia. Ko tana mea mua i anga e Tamaiti, koia tei akapapu e “ko te kakā oki aia o tona tapunui, e ko te tutu tikai nona uaorai.” (Ebera 1:​1-3) E tuke rai aia, no te mea na te Atua anake ua i anga mai iaia. Na roto iaia i akamata mai ei etai atu tamariki i te ora mai​—te aronga mua, ko te au angera o te rangi, i muri mai ko te tangata ki te enua nei. (Iobu 38:7; Luka 3:38) Kua riro teia au tamariki pouroa ei au anau okotai no te ao katoa e pini ua ake. Kia ratou ravarai ko Iehova te Atua, koia anake tei tau kia akamoriia. Koia te Ngateitei o te Ao Katoa e Pini Ua Ake. Koia katoa oki to ratou Metua aroa. Koia ainei toou Metua, e ko koe ainei tetai o tana tamariki? Mei teaa ra te puapinga maata o te reira piri anga!

3. (a) Eaa i kore ei tatou i te tamariki na te Atua i to tatou anauia mai anga? (e) Inara eaa te akakoroanga aroa ta Iehova i akono no te au uanga o Adamu?

³ Tera ra, e mea tau kia aro atu tatou i te tika e i te akaapa angaia to tatou nga metua mua no te mate ei nga tangata rave ara akakoroia, kua tuaruia raua ki vao i Edene e kua akarukeia e te Atua. Kua akamutu atu raua i reira ei tuanga no te anau a Iehova i te ao katoa e pini ua ake. (Ge. 3:​22-24; akaaiteia atu kia Deuteronomi 32:4, 5) Pouroa tatou, i te mea e uanga tatou no te tangata ara ko Adamu, kua anauia mai ma te au tu ki i te ara. I te mea e uanga tatou no nga metua tei akaateaia mei roto mai i ta te Atua anau, kare e tau kia karanga tatou e e tamariki tatou na te Atua no runga ua i te tumuanga e i anauia mai ei tangata. Inara kua kite a Iehova e ka inangaro tetai papaki no roto mai i to Adamu uanga i te tuatua tika, e kua rave aroa ua Aia i te akapapaanga e raukaʼi i teia aronga te rangatira meitaki o te tamariki a te Atua ra.​—Roma 8:​20, 21.

Te Turanga Akaperepereia o to Iseraela

4. (a) Na runga i teea tumuanga to Iseraela i riro ei ei “tamariki” na te Atua? (e) Eaa te aite anga kare e tau no te reira?

⁴ I etai 2,500 mataiti i muri ake i te angaia anga a Adamu, kua oronga akaouia e Iehova te tika ki tetai papaki tangata no tetai piri anga kiaia ei tamariki nana. Kia rotai ki tana koreromotu kia Aberahama, kua ikiia e Iehova to Iseraela ei iti tangata nona. No reira, kua tuatua atu aia kia Pharao o Aiphiti e “E tamaiti naku” a Iseraela. (Exodo 4:​22, 23; Ge. 12:1, 2) I muri akera kua oronga atu aia i tana Ture i te Maunga Sinai kia Iseraela, e kua akanooia e ia te reira aronga ei iti tangata e kua akonoia ratou no tana akakoroanga. Mei te akaraanga ei iti tangata, i te mea e “apinga takake” ratou na Iehova, kua tapaia ratou e “e tamariki” na te Atua. (Deu. 14:1, 2, NW; Isaia 43:⁠1) Pera katoa oki, no te mea e au ravenga takake tana i rave ma etai tatakitai i roto i te reira iti tangata, kua taiku a Iehova ia ratou e e tamariki. (1 Para. 22:9, 10) Kua akanooia te reira turanga ki runga i te piri anga koreromotu ma te Atua. Inara, kare te aite anga e, kua rekareka ratou i te rangatira meitaki mei ia Adamu rai iaia ei tamaiti na te Atua ra. Te vaira oki ratou i roto i te tapeka anga o te ara e te mate.

5. Akapeea i kore ei te turanga meitaki o to Iseraela ma te Atua ra?

⁵ Tera ra, i te mea e tamariki e turanga akaperepereia to ratou ki te Atua. Ia ratou katoa oki te apainga kia akangateitei i to ratou Metua e kia akono kia rotai ki tana akakoroanga. Kua raurau a Iesu i te puapinga no ratou kia akatupu i te reira apainga​—kare ko te tuatua anake anga i te Atua e e Metua no ratou, mari ra te ‘akapapuanga ia ratou uaorai’ ei tamariki nana. (Mata. 5:​43-48; Malaki 1:6) Inara, kua topa te ngati Iuda i te rave anga i teia ei iti tangata. No reira, i te mataiti openga o ta Iesu angaanga i te enua nei, i te tuatua anga a te ngati Iuda tei kimi ra e ta ia Iesu e, “okotai rai o matou metua, ko te Atua,” kua akakite papu atura a Iesu e ko ta ratou ravenga e te vaerua ta ratou i akaari maira te tarevake ra i ta ratou tuatua. (Ioane 8:​41, 44, 47) I te 33 T.N. kua akaopeia e te Atua te Ture koreromotu, e te tumuanga no te piri anga takake tei rekarekaia ra e to Iseraela kua akamutu katoaia i reira. Inara, kare a Iehova i akamutu i te ariki anga i tetai papaki o te au tangata ei tamariki nana.

Taokotaiia e Iehova Tona Iti Tangata

6. Eaa te “akaaerenga” ta Paulo i akataka maira ia Ephesia 1:9, 10, e eaa tona akakoroanga?

⁶ Kua tata te apotetoro ko Paulo ki te au Kerititiano i Ephesia no runga i ta Iehova porokarama no te taokotaianga i tona iti tangata​—ta te Atua ra akapapaanga e raukaʼi kia riro te aronga akono i te akarongo ei au mema akaperepereia no Tona ngutuare, i te na ko anga: “E kua akakite mai [te Atua] ia tatou i te tuatua ngaro o tona anoano, i tona uaorai inangaro takinga-meitaki i akakoroia e ia i roto iaia uaorai: E kia tae ki te akaaerenga [akatere anga ngutuare] i te openga tikai o te au tuatau ra, kia tavaitai aia i te au mea katoatoa i te Mesia ra, to te rangi, e to te ao katoa nei.” (Ephe. 1:9, 10) Tei runga ia Iesu Karaiti te apainga maata no teia “akaaerenga.” Na roto iaia, te apai anga mai i te au tangata ki roto i te turanga marekaia ki mua i te aroaro o te Atua​—ko tetai papaki no te manakonakoanga no te rangi; ko etai, no runga i te enua nei⁠—​kia tavini taokotai ma te tamariki angera a te Atua tei akapapu ra i te tiratiratu kia Iehova.

7. Eaa ra te au mea o “to te rangi” ra, e eaa te aite anga o te akaputu angaia no ratou?

⁷ Te mea mua, i te akamataanga ia Penetekote o te 33 T.N., kua tukuia te manako ki runga i “to te rangi,” koia oki, te aronga te ka kapitiia ei aronga tuanga kia Karaiti i te Patireia o te rangi. Na runga i te tumuanga o to ratou akarongo i te puapinga o te atinga o Iesu, kua akatikaia ratou e te Atua. (Roma 5:1, 2) I muri akera kua “anau akaouia” ratou, me kare kua anauia ei tamariki na te Atua ma te manakonakoanga no te oraanga ki te rangi. (Ioane 3:3, NW; Ioane 1:​12, 13) I te riro anga teia aronga ei iti tangata vaerua kua papau te Atua i te koreromotu ou. Kia tae te tuatau, ka kapitiia te au ngati Iuda e te au Kenitara, e ka tae to ratou tare anga ki te 144,000.​—Gala. 3:​26-29; Apokalupo 14:⁠1.

8. Akapeea te piri anga o te aronga tuanga no te Patireia ma te Metua ra me akaaiteia atu ki to te ngati Iuda i raro ake i te Ture a Mose ra?

⁸ Noatu rai e te vai apa ua ra i te kopapa, te rekareka ra te toenga o te reira aronga tuanga no te Patireia o te rangi i te piri anga vaitata e te meitaki maata ma te Metua ra. No runga i teia, kua tata a Paulo: “E no te mea e tamariki kotou na, i tuku mai ei te Atua i te Vaerua o tana Tamaiti ki roto i to kotou ngakau, i te kapiki anga e, E Aba, e taku Metua. E teianei kare oki koe i te tuikaa, e tamaiti ra: e e tamaiti ra, e tangata kainga ïa na te Atua i te Mesia nei.” (Gala. 4:6, 7) Ko te aite anga o te tuatua Aramaic “Aba” e “metua,” inara e tu akaperepere to te reira tuatua​—ko te tu ia te taikuia ra e te tamaiti ou no tona metua. No te teitei maata o to Iesu atinga e to te Atua uaorai takinga meitaki aroa ua, kua rekareka teia au Kerititiano akatainuia i te vaerua i te piri anga vaitata roa atu ki te Atua i tetai ua atu tei rauka i te au tangata i raro ake i te Ture ra. Inara, te apinga e vai maira ki mua ia ratou e maata roa atu te meitaki.

9. Eaa te aite anga no te tupu anga papu o to ratou aka­tama­riki angaia?

⁹ Me ka vai tiratiratu ratou e tae roa atu ki te matenga, ka rauka ia ratou te kite anga tikai i to ratou aka­tama­riki anga na roto i te akatuakaou angaia ki te ora mate kore ki te au rangi ra. I reira ka rekareka ratou i te tavini anga taokotaiia i mua tikai i te aroaro o te Atua ko Iehova. E tokoiti ua o teia au tamariki a te Atua te vai nei i runga i te enua.​—Roma 8:​14, 23; 1 Ioane 3:1, 2.

Akaputuanga i “to te ao Katoa Nei”

10. (a) Eaa ra “to te ao katoa nei” e mei naea mai i aka­putuiaʼi ratou ki roto i te taokotai anga no te akamori anga? (e) Eaa to ratou piri anga ma Iehova?

¹⁰ Na te reira “akaaerenga” tei akariro ra kia rauka te akaputu angaia te au tangata ki roto i te ngutuare o te Atua ma te manakonakoanga no te oraanga ki te rangi, e arataki i te manako ki “to te ao katoa nei.” E maata atu oki mei te 1935 T.N. mai o te akaputu angaia te aronga akarongo i te atinga o Karaiti ma te manakonakoanga no te ora mutu kore ki te enua nei. E pakuivi ki te pakuivi ma te aronga toenga o te pupu tei akatainuia ra, te akateitei ra ratou i te ingoa o Iehova e te akangateitei ra i te akamori anga iaia. (Zepha. 3:9; Isaia 2:2, 3) Ma te akangateitei oonu, te karanga katoa ra teia aronga ia Iehova ei “Metua,” ma te kiteanga iaia e ko te Tumu o te ora, e te tauta pakari ra ratou i te akaata mai i tona au tu mei tana ra e umuumu maira kia rave tana tamariki. Te rekareka ra ratou i te turanga marekaia ki mua iaia na runga i te tumuanga o to ratou akarongo ki roto i te toto o Iesu tei akamaringiia ra. (Mata. 6:9; Apokalupo 7:9, 14) Inara te kite ra ratou e ko te rekareka i te ariki anga tika tikai a te Atua ei tamariki nana te vai maira no ratou i te tuatau ki mua ra.

11. (a) Eaa te taputou ta Roma 8:​19-21 e oronga maira no te au tangata katoa? (e) Eaa “te akakite angaia mai i te tamariki a te Atua” ta ratou e tatari nei?

¹¹ Mei tei akaariia maira ia Roma 8:​19-21, te tatari nei ia ratou i “te akakite angaia mai i te tamariki a te Atua,” no te mea ei reira e tae mai ei te tuatau no teia au tangata angaia nei kia “akaora katoaia . . . i te tapeka o te mate.” Ko te reira “akakite angaia” ka tupu a te tuatau e kite ei te au tangata i runga i te enua nei i te akapapu anga e ko te au tamariki a te Atua tei akatainuia ra ki te vaerua, e kua rauka to ratou tutaki i te rangi kua akamata i te angaanga ei oa no te Atu akakakaia ra, koia a Iesu Karaiti. Ka kiteaia te reira i te akapou anga o te akatereanga o te au mea kikino katoatoa, te ka aruia mai e te au akameitakianga o te Tutara Okotai Tauatini Mataiti o Karaiti e ko teia au “tamariki a te Atua” ka kapiti katoa ia kiaia ei au ariki e ei kau taunga.​—Apokalupo 2:​26, 27; 20:⁠6.

12. I muri ake i te mate maata, eaa te imene akapaapaa te ka imeneia e te tamariki autu a te Atua tei akatainuia ra i te vaerua, e eaa tona aite anga?

¹² Mei teaa ra te mataora i reira i muri ake i te mate maata i te taokotai angaia te reira aronga tamariki na te Atua ma Karaiti i te kapiti anga i to ratou au reo i te akapaapaa i te Atua, ma te rekareka i te na ko anga e: “Te maata e te umere i taau au angaanga, e te Atua Mana Katoatoa, e Iehova. E tuatua tika e te tika rai toou au mataara, e te Ariki mutu kore. Koai te kare e mataku ia koe, e Iehova, ma te akakaka i toou ingoa, no te mea ko koe anake tei tiratiratu? Pouroa te au pa enua ravarai e aere mai e akamori i mua ia koe, no te mea kua kiteaia taau tutaki anga tika”! (Apokalupo 15:3, 4, NW) Ae, ko te au tangata ravarai, no roto mai i to te pa enua katoatoa i mua ana, ka taokotaiia i te akamori anga i te Atua mou ra. Pera katoa te aronga i roto i te au menema ka akatuia mai e ka orongaia te tuatau no ratou kia kapiti atu i to ratou reo i te akapaapaa anga ia Iehova.

13. Eaa te tu rangatira meitaki roa te ka rekarekaia i reira tikai e te aronga te ka ora atu i te mate maata ra?

¹³ Kare a Satani te Tiaporo e riro akaou e ko te “atua o teianei ao.” Kare katoa te aronga akamori ia Iehova i runga i te enua nei e akono i te akakoromaki i tona mana riri. (2 Kori. 4:4; Apokalupo 20:​1-3) Kare katoa te au akonoanga pikikaa e akakino i to tatou Atua aroa e e akono ei mana akatataka ke i te totaiete o te tangata nei. Kare e tupu akaou te au ravenga tika kore ki runga i te au tavini o te Atua mou ra e te au ravenga noinoi mei te rima o te au tangata mana taoonga o te au kavamani ra. Mei teaa ra te tu rangatira ta te reira ka akatupu no te aronga te ka ora i te mate maata!

14. Na teaa e tatara ia ratou mei te ara e tona au tupu anga katoatoa?

¹⁴ Ei te “Punua-mamoe a te Atua, ko tei apai ke atu i te ara a to te ao,” ka akonoia e Iesu Karaiti te puapinga o tona atinga ei akakore atu i te au ara i topa a te au tangata katoa. (Ioane 1:29) Ia Iesu i te enua nei, i tana karanga atu anga e kua akakoreia te au ara a tetai tangata, kua rapakau katoa aia i te reira tangata i akakoreia ra tana ara ei akapapu anga i te reira. (Mata. 9:​1-7) Pera katoa oki te tu, mei te rangi mai ka rapakau semeio mai aia i te matapo, te taringa turi, te murare, te aronga pirikoki, te aronga maki te manako e te aronga katoa e maki ke atu to ratou. Ka tupu marie, na roto i te akatikatikaanga tiratiratu ia ratou uaorai kia tau ki to te Atua mataara no te tuatua tika, pouroa te aronga inangaro e te akarongo ka takore takiriia ‘te ture kino o te ara’ i roto ia ratou e i reira ta ratou angaanga katoa, to ratou manako e te anoano o to ratou ngakau ka akamareka anakeia ia ratou uaorai e i te Atua. (Roma 7:​21-23; akaaiteia atu kia Isaia 25:7, 8 e Apokalupo 21:3, 4.) I mua ake i te openga o te Tauatini Mataiti, ka oti ratou i te tauturuia kia riro ei au tangata apa kore ua. Ka tatara takiriia ratou mei te ara e tona au tupu anga kikino ravarai. Ka rauka ia ratou i te akaata tika mai i to ‘te Atua tu e kia aite kiaia’ i roto i te enua Parataito te ka takapini i te ao katoa.​—Ge. 1:⁠26.

15. I te openga o te Tauatini Mataiti ra, eaa ta Karaiti ka rave, e eaa te akakoroanga?

¹⁵ Me oti anake ia Karaiti i te akono i te au tangata kia tu apakore ua, ei reira aia e akaoki akaou atu ei ki te Metua i te mana tei orongaia kiaia no teia angaanga. Mei tei totouia maira ia 1 Korinetia 15:28: “E kia tuku tikaia te au mea ravarai ki raro ake iaia [i te Tamaiti] ra, ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.”

16. Eaa te ka tukuia ki rungao i te au tangata apa kore katoatoa ra, e eaa ra te tumu?

¹⁶ Ei reira kua orongaia te tuatau no te au tangata apa kore katoa ra kia akakite e ko ta ratou iki anga taui koreia ko te tavini ki te Atua ora e te mou anake ua e tuatau ua atu. No reira, i mua ake i te akatamarikianga ia ratou ei tamariki nana na roto ia Iesu Karaiti, ka tukuia e Iehova te reira aronga apa kore ki te timata anga openga papu rava. Ka tukuia a Satani e tana au temoni mei te vaarua. Kare te reira e riro ei kino mutu kore ki te aronga tei inangaro tikai ia Iehova. Mari ra ko te aronga tei tuku tau kore ia ratou uaorai kia takiia atu ki roto i te akarongo kore kia Iehova e akapouia ratou ma tei meameaau mua ra e tana au temoni katoa.​—Apokalupo 20:​7-10.

17. Ei akatupu anga i ta Iehova akakoroanga, eaa te tu te ka vai mai ki rotopu i tana au mea ora kite tei angaia maira?

¹⁷ Ei reira a Iehova e rave ei i te akatamariki na roto ia Karaiti i te au tangata apa kore ko ratou tei autu i te openga, o te timata anga tuku anga tika. Ei reira ratou e o takiri atu ei ki te “rangatira meitaki o te tamariki a te Atua ra.” (Roma 8:21) Ei reira ratou riro ei ei tuanga no ta te Atua anau taokotaiia, no te ao katoa e pini ua ake, ka riro ko Iehova anake ua te Atua no ratou ravarai e tuatau ua atu, koia tei Ngateitei Rava i te Ao Katoa e Pini Ua Ake, e ei Metua aroa oki no ratou. Ei reira te au mea kite katoa tei angaia e Iehova i te rangi e te enua, ka taokotai akaouiaʼi i te akamori anga i te Atua mou anake ua.

Uriuri Akaou Anga

● I mua ake i te meameaau i Edene ra, eaa te piri anga kia Iehova o te aronga katoatoa tei akamori iaia ra?

● Eaa te apainga te vaira ki runga i te aronga e tamariki na te Atua?

● Koai ma i teia tuatau te tamariki a te Atua? Koai ma te vaira te ka riro ei tamariki na te Atua, e eaa te piri anga o te reira ki ta te Atua ra akakoroanga no runga i te taokotai anga i te akamori?