“Kua Riro Tona Aroa Takinga Meitaki ei Mana Maroiroi”

AKAKITEIA E JOSÉ VERGARA OROZCO

Te manako ainei koe e ka akakiia toou oraanga ma tetai ririnui ou i te 70 mataiti? Kua pera toku. E kua tupu te reira e 35 mataiti i topa akenei.

No to Iehova aroa takinga meitaki, mei te 1962 mai, kua tavini ana au ei painia tamou, e mei te 1972 mai, kua akamata au ei akaaere i roto i te Putuputuanga El Carrizal a te Au Kite o Iehova i te teite o Jalisco, Metiko. Ka akakite atu ana au i tetai manga i te ngai i aere mai ei au.

KUA anauia au i roto i te teite o Michoacán, i Metiko, ia Aukute 18, 1886. Toku papa e tangata Freemason aia, no reira kare toku ngutuare tangata i aere ana ki te Ekaretia Katorika, kare katoa i piri ana ki tetai ua atu oroa akonoanga Katorika me kare te rave i tetai ua atu au itoro akonoanga akatikitikiia i to matou kainga.

I toku 16 mataiti anga, kua akaruke toku papa no te aere ki Unaite Teite, inara kua akanoo aia i tetai tangata kia apii mai iaku i tetai rave anga angaanga. Inara, e rua mataiti i muri mai, kua apai teia tangata iaku ki Mexico City no tetai akamatauanga i tetai ngai tereni anga vaeau. I muri mai kua rave au i tetai ngai angaanga i roto i te vaeau Metiko.

I Roto i te Vaeau e i Muri Mai

Kua tamaki au i roto i te Orureau Anga Metiko tei akamata i te 1910. Kua turu matou te au mapu tane katoatoa i roto i te ngai tereni anga i Francisco I. Madero, koia oki te tangata orureau tei patoi i te akatere anga a Porfirio Díaz. Kua turu matou ia Madero e tae ua atu ki tona matenga i te 1913, e i muri mai i te reira, kua turu matou ia Venustiano Carranza, tei tavini ei peretiteni no te Repapuriki mei te 1915 mai ki te 1920. Kua kapikiia matou e ko te Carranzistas.

E a au atianga, toku tauta anga, ma te kore e manuia, kia tukuia ki vao i te vaeau. I te openga kua oro au e kua riro mai ei tangata oro ke. Tei tupu, kua apainaia toku papa tei oki mai ki Metiko ki te are auri. I tetai ra, te akapikikaaanga e e nepeu au nana, kua atoro au iaia i roto i te are auri. Kua akakitekite manako maua na roto i te tataanga ki runga i tetai au aenga pepa rikiriki kia kore te au tangata tiaki e rongo mai ia maua. No te paruru i tetai ua atu tangata mei te kiteanga e koai au, kua kaingaia e au te pepa.

I muri ake i te tuku angaia toku papa ki vao i te are auri, kua atoro mai aia iaku e kua pati mai kia oronga au iaku ki te aronga mana akaaere. Kua pera atu au, e i toku poitirere kare te rangatira i apai ana iaku ki te are auri. Mari ra, kua manako mai aia e kia neke au ki te Unaite Teite. Kua aru au i tona manako e kua noo ki reira mei te 1916 mai ki te 1926.

I te 1923, kua akaipoipo au i tetai vaine Metiko te noo katoa ra i Unaite Teite. Kua apii au ki tetai ngai angaanga i roto i te ngai akatu anga, e kua angai i tetai manga tamaine na maua. I tona 17 marama anga, kua oki matou ki Metiko e kua noo ki Jalpa, Tabasco. I reira kua akamata ‘te patoi anga Cristero’ mei te 1926 tae roa ki te 1929.

Kua inangaro te au Cristeros kia piri atu au kia ratou. Inara kua inangaro au e toku ngutuare tangata i te oro ki Aguascalientes State. I muri ake i te nooanga i te au ngai tukeke i roto i te repapuriki o Metiko, kua akaangaroi e kua noo i Matamoros, Tamaulipas i te 1956, te ngai i akamata ei au i te akaaereanga i te au angaanga akatu anga.

Taui Toku Oraanga

I konei toku oraanga i te akamata anga te taui. I teianei kua akaipoipo taku tamaine e kua noo i tetai tua i te pota i Brownsville, Texas, U.T.M., e kua atoro putuputu ua mai ia maua. I tetai ra kua karanga aia: “E papa, e maata te au ngutuare tangata ka aravei ki roto i te are uipaanga o te katoatoa i teianei. Ka aere ana tatou ka akara e no runga te reira i teaa.” E akaputuputu anga te reira na te Au Kite o Iehova. Kua aere atu taku tamaine, te unonga tane, utaro, e taku vaine, e au ki te a ra o te akaputuputu anga.

Mei te reira mataiti mai e aere ua atu, kua aere matou ki te au uipaanga Kerititiano a te Au Kite o Iehova. I Metiko kua tere au ki mua i te pae vaerua, koi pera katoa ei taku tamaine i te Unaite Teite. Kare i roa ana kua akakitekite au i taku e apii ra mei te au tuatua mou Puka Tapu ki toku au oa i te ngai angaanga. Kua rauka mai iaku e tai ngauru au makatini takitai itiu o Te Punanga Tiaki e te Awake!, taku i tua ki toku au oa angaanga. E rima i roto i te opati, e toru au tangata enitinia pera katoa e etai o te aronga angaanga tei riro mai ei Au Kite.

A, e anu tikai i te reira ra 19 o Titema 1959, i toku papetito angaia ki roto i te kauvai! Kua maki pouroaia te aronga tei papetitoia i te reira ra no te anu roa i te vai. Kua papetitoia taku tamaine i mua ake iaku, e taku vaine, noatu e kare aia i papetitoia, kua kite ra aia i te tuatua Puka Tapu, e kua taokotai mai tikai.

Te Angaanga Orometua Tamou

Kua manako au e kua kaiou au i te Atua no tona aroa takinga meitaki katoatoa, no reira ia Peperuare 1962, i toku 75 anga, kua akamata au i te angaanga orometua ei painia tamou. I tetai au mataiti i muri mai, i te 1968, kua mate taku vaine. Kua inangaro au i reira i te tavini i tetai atu enua, inara no toku mataiti, kare te au taeake i manako ana e e mea tau. Inara, i te 1970, kua tukuia au ei painia ki Colotán i roto i te teite o Jalisco, te ngai e putuputuanga meangiti tetai.

Ia Tepetema 1972, kua manako te akaaere kotinga e kia neke au ki tetai taoni meangiti ko El Carrizal, i te pae ia Colotlán. I roto ia Noema i te reira mataiti, kua akatumuia tetai putuputuanga ki reira, e kua akataoongaia au ei tangata pakari. Noatu e e taoni mamao, e tae ana e 31 ki te au uipaanga a te putuputuanga.

Noatu toku mataiti, te maroiroi nei rai au i roto i te angaanga orometua, te tauta maata anga i te tauturu i te au tangata kia uriuri manako no runga i ta ratou au irinaki anga. Ei akaraanga, i roto i te pure Rotario e taokioki ua ana te au Katorika ngakau tae i te Akapaapaa ia Maria: ‘Akapaapaa, ia Maria, tei ki i te ngateitei ra; tei ia koe te Atu ra.’ Kua aere ua atu te pure: ‘E Maria Tapu ra, te Metua Vaine o te Atua.’ Kua ui atu au kia ratou: ‘Akapeea te reira i te na reira anga? Naringa ko te Atua tei akaora ia Maria ra, akapeea Aia i taua taime rai i te riro anga mai ei tamaiti nana?’

E 105 oku mataiti i teianei e kua tavini ana ei tangata pakari e ei painia tamou i El Carrizal, Jalisco, e vaitata atu i te 20 mataiti. Kua kite au i to te Atua anoano te ora nei rai au i teia au mataiti e manganui, i te mea e na teia tu ka rauka iaku i te tutaki atu i te taime tei pou i te tuatau kare au i tavini ana Iaia.

Tetai mea taku i apii mai e e tau tatou kia tuku ua rai i to tatou akapapu anga ki to tatou Akava Teitei te akara ua maira ia tatou mei tona terono tuatua tika e te oronga maira kia tatou i ta tatou i anoano. Mei ta Salamo 117:2 (NW) e akakite ra: “Kia tatou kua riro tona aroa takinga meitaki ei mana maroiroi.”