E Rave i te Au Peroveta a te Atua ei Akaraanga

E rave, e aku au taeake, i te au peroveta ko tei tuatua mai ma te ingoa o [“Iehova,” NW] ra, ei akaraanga i te akaruru anga i te kino e te akakoromaki.”​—IAKOBO 5:10.

1. Eaa te tauturu ra i te au tavini o Iehova kia rekareka noatu rai e te takinga kinoia ra ratou?

TE AKAKAKA maira te au tavini o Iehova i te rekareka noatu rai te tupu maata ra te tu poiri i te ao katoa i teia tuatau nei. Ko teia tu no te mea te kite nei ratou e te akamareka ra ratou i te Atua. Te akakoromaki katoa ra te Au Kite o Iehova i raro ake i te takinga kinoanga e te patoi anga i ta ratou angaanga orometua i te ngai tangata no te mea te kite ra ratou e te mamae ra ratou no te tuatua tika. Kua na ko atura Iesu Karaiti ki tana au pipi: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao ra: i pera oki ratou i te takinga-kino i te aronga peroveta, ko mua ïa ia kotou.” (Mataio 5:10-12) E tika, me aro atu te au tavini o te Atua ra i te au timata anga no te akarongo, te akamanako ra ratou e rekareka te reira.​—Iakobo 1:2, 3.

2. Kia tau ki ta Iakobo 5:10, eaa te ka tauturu mai ia tatou kia akono i te akakoromaki marie?

² Kua tata te pipi ko Iakobo: “E rave, e aku au taeake, i te au peroveta ko tei tuatua mai ma te ingoa o [“Iehova,” NW] ra, ei akaraanga i te akaruru anga i te kino e te akakoromaki.” (Iakobo 5:10) Kua akataka mai a W. F. Arndt raua ko F. W. Gingrich i te tuatua Ereni tei uriia i konei “ei akaraanga” (hy·poʹdeig·ma) ei “akatauanga, ei tutu, ei akaraanga, i te tu meitaki ei tetai apinga te ka rave me kare ka tau kia akakeu i tetai kia aru i te reira.” Mei tei akaariia maira ia Ioane 13:15, “e maata atu teia i tetai akaraanga ua. Ko te akaraanga mua tika tikaʼi ia.” (Theological Dictionary of the New Testament) E no reira, ka rauka i te au tavini o Iehova i teia tuatau nei i te rave i tona au peroveta tiratiratu ei akaraanga no te tu ‘akaruru anga kino’ e te ‘akakoromaki.’ Eaa atu ta tatou ka kite me ka apii tatou i to ratou oraanga? E akapeea e raukaʼi i teia i te tauturu mai ia tatou i ta tatou angaanga tutuanga?

Kua Mamae Ratou i te Kino

3, 4. I akapeea to te peroveta ko Amosa tu manako ki te patoi anga a Amazia ra?

³ E putuputu te au peroveta o Iehova i te mamae i te kino me kare i te takinga kino anga. Ei akatauanga, i te iva anere mataiti M.T.N., kua patoi kino te taunga akamori punua puakatoro ko Amazia i te peroveta ko Amosa. Kua tapepe pikikaa a Amazia e i akatika a Amosa i te patoi ia Ieroboama II na te totouanga e ka mate te ariki ra i te koke e ka riro to Iseraela ei tuikaa. Ma te tu akangateitei kore, kua tuatua atura Amazia kia Amosa: “E tera ra Akara e, ka aere, ka rere ke atu koe ki te enua ra o Iuda, ka kaikai ei ki reira, e ei reira ka totou ei. Auraka ra koe e totou akaou i Betela nei, no te mea ko te ngai tapu teia no te ariki, e ko te kainga teia no te au.” Kare i manamanata i teia tuatua anga patoi, kua pau atura Amosa: “Kare au i te peroveta; kare katoa oki au i te tamaiti a te peroveta; e tiaki puakatoro ra au, e e akaputuputu sukamino oki: Kua rave mairā Iehova iaku, ka aru aere ei au i te anana ra, e kua tuatua mairā Iehova kiaku, Ka aere, ka totou ki toku au tangata kia Iseraela.”​—Amosa 7:10-15.

⁴ Kua akamaroiroi atu te vaerua o Iehova ia Amosa kia totou ma te mataku kore. E tamanako ana i te ngakau riri o Amazia i ta Amosa ra tuatua anga: “E akarongo [“taokioki,” NW] mai koe i te tuatua a Iehova: Te tuatua ra koe, Auraka e totou ia Iseraela; e auraka taau tuatua e topa i te ngutuare o Isaaka: E teianei, te na ko mairā Iehova; E riro to vaine ei akaturi i teianei oire, e to au tamaroa ma te au tamaine, e inga ïa i te koke, e kokotiia to enua ki te tataura, e mate oki koe i te enua viivii: e riro oki Iseraela ei tuikaa mei roto atu i tona enua.” Kua tupu taua totou katoa ra. (Amosa 7:16, 17) Mei teaa ra te poitirere kino tei tupu kia Amazia patoi ra ia Iehova!

5. Eaa te tu aiteite te ka rauka te akatau anga i rotopu i te turanga o to Iehova au tavini i teia tuatau nei e to te peroveta ko Amosa ra?

⁵ Te aiteite ra teia ki te turanga o te au tangata o Iehova i teia tuatau nei. Te mamae ra tatou i te kino ei aronga te akakitekite ra i te tuatua a te Atua, e e manganui te au tangata te tuatua tapepe pikikaa maira i ta tatou angaanga tutuanga. E tika, kare to tatou mana no te tutu aere no ko mai i te ngai apiianga orometua ra. Mari ra, ko te vaerua tapu o Iehova te akakeu ra ia tatou kia akakitekite i te tuatua meitaki o te Patireia ra. Kare tatou e taui ke e kare katoa oki e tavai i te tuatua a te Atua ra. Kareka ra, mei ia Amosa rai, te akakitekite tika ra tatou i te reira noatu rai eaa te manako anga o te aronga te akarongorongo maira ia tatou.​—2 Korinetia 2:15-17.

Kua Akono Ratou i te Akakoromaki

6, 7. (a) Eaa te tu tei akatakaia maira i ta Isaia totouanga? (e) Akapeea te au tavini o Iehova i teia tuatau nei i te rave anga mei ta Isaia rai?

⁶ Kua akono te au peroveta a te Atua i te akakoromaki. Ei akatauanga, kua akaari a Isaia i te akakoromaki, i tana tavini anga ei peroveta na Iehova i te tuatau o te varu anere mataiti M.T.N. Kua tuatua atu te Atua kiaia: “Ka aere, ka karanga atu ki teianei aronga: E akarongo rai kotou, kare ra e kite; e akara rai oki kotou, kare ra e utoa. E akamatorutoru i te ngakau o teianei aronga; e akateimaa i o ratou taringa, e e topiri i o ratou mata; ko te akara aea o ratou mata, e ko te rongo aea o ratou taringa, ko te kite aea o ratou ngakau, e ko te akaariuia mai, e ko te akaoraia aea oki ratou.” (Isaia 6:9, 10) Kua aru tikai te manako anga o taua aronga tangata ra i te reira mataara. Inara i akariro ainei teia ia Isaia kia akamutu? Kare. Kareka ra, kua akakoromaki e kua akakitekite totomapu aia i te au tuatua akamatakiteanga a Iehova ra. Te turu ra te akapapa anga Epera o te au tuatua a te Atua koi taikuia akenei i te manako no tetai “tamou anga roa” i te au akakitekite anga a te peroveta ra, i akarongorongo “taokioki,” e taua aronga tangata ra.”​—Gesenius’ Hebrew Grammar.

⁷ I teia tuatau nei e manganui te manako ra i te tuatua meitaki mei ta te au tangata i manako ra i te au tuatua a Iehova tei tuatuaia atura e Isaia. Inara, mei ta taua peroveta tiratiratu rai, ka tuatua “taokioki” tatou i te tuatua no te Patireia ra. Ka rave tatou i te reira ma te tu totomapu e te akakoromaki marie anga no te mea ko te anoano teia o Iehova.

“Ko ta Raua ïa i Rave”

8, 9. Na roto i teea au tu to te peroveta a Iehova ko Mose ra akanoo anga i tetai akaraanga meitaki?

⁸ E akatauanga meitaki te peroveta ko Mose i te akakoromaki e te akarongo. Kua iki aia kia akamou i tona turanga ma to Iseraela tei tuikaaia ra, inara kua tatari akakoromaki ua aia no te tuatau o to ratou akaora angaia. E kua noo aia ki Midiana no te 40 mataiti tae roa ki te tuatau i taangaangaiaʼi aia e te Atua ra ei arataki i te iti tangata o Iseraela ki vao i te tuikaa anga. Ia Mose raua ko tona tuakana ko Aarona i mua i te tutara o Aiphiti ra, kua tuatua ua raua e kua rave ua i ta te Atua i akaue atu. Ko te tika ra, “ko ta raua ïa i rave.”​—Exodo 7:1-6; Ebera 11:24-29.

⁹ Kua akakoromaki marie a Mose i to Iseraela 40 au mataiti ngata i te metepara ra. Kua aru akarongo katoa aia i te arataki anga tu-Atua i te akatu anga i te puakapa o to Iseraela ra e te maanianga i etai atu au apinga tei taangaangaia i te akamori anga ia Iehova ra. No te piri vaitata o ta te peroveta ra aru anga i ta te Atua au ikuiku anga e ka tatau tatou: “Akapera atura oki a Mose: te au mea ravarai ta Iehova i akaue mai kiaia ra, ko tana ïa i rave.” (Exodo 40:16) I te raveanga i ta tatou angaanga orometua ma te kapiti anga ki ta Iehova ra akaaerenga, kia maara tatou i to Mose tu akarongo e ka akono ei i te ako a te apotetoro ko Paulo ‘kia akarongo i to tatou au arataki.’​—Ebera 13:17.

E Tu Akono Papu Tikai to Ratou

10, 11. (a) Eaa te akakite maira e e manako anga papu tikaʼi to te peroveta ko Hosea? (e) Akapeea e raukaʼi ia tatou i te tamou marie i tetai tu akono papu tikaʼi ia tatou e aravei ra i te au tangata i to tatou au ngai?

¹⁰ I anoanoia te tu akono papu tikai no te au peroveta ia ratou e akakitekite ra i te au tuatua akavaanga e pera katoa te au totou tei akaata maira i to te Atua manako aroa no te aronga tiratiratu tei totoa katoa ra i roto i Iseraela. Ko te tika teia no Hosea, koia ra tetai peroveta no te tuatau kare i raro ake i te 59 ra mataiti. Na roto i te tu papu tikai, kua rave tamou aia i te akakitekiteanga i te au tuatua a Iehova e kua taopenga atura i tana puka totou ma te au tuatua e: “Koai tei pakari, ka kite ei i teianei au mea? e te akono meitaki, ka kite ei aia i te reira? kua tika oki te au aerenga o Iehova, e na te aronga tuatua-tika e na reira te aere: kareka te aronga rave ara ra, e inga ïa i reira.” (Hosea 14:9) Te akatika ra a Iehova ia tatou kia rave i te akakitekite, e akono tatou ma te tu papu tikai e ka kimi tamou ei i te aronga te ka ariki pakari i te takinga meitaki aroa ua o te Atua ra.

¹¹ No te ‘kimi i te aronga e tau,’ ka anoanoia tatou kia tamou marie e kia manako papu tikai i te au tumu ra. (Mataio 10:11) Ei akatauanga, me kua akaruke tatou i ta tatou au taviri ki tetai ngai kare i maaraia, penei ka oki akaou tatou i te au ngai ta tatou i aere ana. Penei ka kitea anake e tatou te reira i muri ake i te kimi putuputu anga mei te reira. E rave tamou marie tatou mei te reira i te kimianga i te aronga tu mamoe ra. Mei teaa ra to tatou rekareka me ka akarongo mai ratou ki te tuatua meitaki i te ngai te angaanga putuputuia ra! E mei teaa ra to tatou rekareka anga e te akameitaki maira te Atua i ta tatou angaanga i te au enua tei araiia i mua ana e kua kotingaia ta tatou angaanga orometua ki te ngai tangata!​—Galatia 6:10.

Au Tumu no te Akamaroiroi Anga

12. Eaa te totou a Ioela te akatupuia nei i teia 20 anere mataiti, e akapeea ra?

¹² Ka rauka kia riro te au tuatua a te au peroveta a Iehova ra ei akamaroiroi anga maata ia tatou i ta tatou angaanga orometua. Ei akatauanga, e akamanako ana i te totou a Ioela. I roto i te reira etai au tuatua akavaanga tei tuatuaia atu ki te au Iseraela akaruke i te akarongo e ki etai ke atu oki i te iva anere mataiti M.T.N. Inara, kua akauru katoaia a Ioela kia totou: “E riro oki i muri ake i te reira, e riringi atu au [a Iehova] i toku Vaerua ki rungao i te tangata ravarai; e na ta kotou au tamariki tamaroa e ta kotou au tamaine e totou mai; e moemoeaia mai to kotou au tangata pakari: e kite oki to kotou au tangata ou ra i te orama. E riringi atu au i taku Vaerua ki rungao i te au tavini tane e te au tavini vaine i te reira au rā ra.” (Ioela 2:28, 29) Kua tupu teia ki te au pipi a Iesu mei te Penetekote 33 T.N. mairai. E mei teaa ra te tupu anga meitaki no teia totou ta tatou e kite nei i teia 20 anere mataiti nei! I teia tuatau e au mirioni ua atu to tatou te “totou” nei, me kare te akakitekite nei i te tuatua a Iehova​—i roto ia ratou e tere atu i te 600,000 e tavini ra ei painia tamou.

13, 14. Eaa te ka tauturu i te au Kerititiano ou kia kite i te rekareka i te angaanga tutu aere ei orometua?

¹³ E manganui te aronga akakitekite Patireia e au tangata ou. Kare e ngoie ua no ratou kia tuatua ki te aronga kua pakari no runga i te Puka Tapu. I etai tuatau te tuatuaia atura ki te au tavini mapu o Iehova e: ‘Te kaimoumou ra kotou i to kotou taime i te tutuanga,’ e ‘ka tau kotou kia rave i tetai atu apinga.’ Ma te tu mako penei ka pau atu te Au Kite o Iehova e mapu ua ra e te mii ra ratou e manako ngakau pera to taua tangata ra. Kua kite tetai mapu tutu aere i te tuatua meitaki e mea meitaki kia tuatua kapiti atu e: “Te manako nei au e puapinga tikai toku mei te tuatuaanga ki te aronga pakari mei ia koe rai, e e rekareka toku i te reira.” Inara, kare te tutuanga i te tuatua meitaki i te kaimoumou taime. Te vaira te au oraanga i roto i te turanga kino. Na roto ia Ioela, kua akakitekite katoa te Atua: “E riro oki e, ko tei kapiki i te ingoa o Iehova, e ora ïa.”​—Ioela 2:32.

¹⁴ Te au tamariki te aere kapiti ra ma to ratou au metua i te angaanga tutu aere i te Patireia te ariki ra i te tauturu a to ratou au metua i te akapapa anga i te au akakoroanga na ratou uaorai. Mei tetai takainga ki tetai takainga kua tupu aere atu te rave anga a taua aronga ou ra mei te tatauanga i tetai irava tuatua tapu ki te akatakaanga i to ratou manakonako akatumuia ki runga i te Puka Tapu e te orongaanga i te au puka tau ki te aronga tei inangaro ra. Ia ratou e kite ra i to ratou uaorai aerenga ki mua e ta Iehova akameitakianga, ka kite te au papuritia Patireia i te rekareka maata i te tutuanga i te tuatua meitaki.​—Salamo 110:3; 148:12, 13.

Totomapu e Tetai Tu Akono Tapapaanga

15. Akapeea e raukaʼi i ta Ezekiela akaraanga i te tauturu ia tatou kia akamaroiroi akaou i to tatou tu totomapu no te angaanga tutuanga i te Patireia?

¹⁵ E akaraanga meitaki katoa oki te au peroveta a te Atua i te akaarianga i te tu totomapu e tetai tu akono tapapaanga​—nga tu anoanoia ra no tatou i ta tatou angaanga orometua i teia tuatau nei. I to tatou kite mua anga i te tuatua mou mei te Tuatua a te Atua ra, penei kua akakeuia tatou ma te tu totomapu tei akakeuia ra tatou kia tuatua ua ma te mataku kore. Inara penei e au mataiti ua atu kua topa mei reira mairai, e penei kua takapini putuputu tatou i ta tatou ngai akakitekite aere anga. Penei e tokoiti ua te aronga i teianei te ariki nei i te tuatua Patireia. Kua akameangiti ainei teia i to tatou tu totomapu? Me koia ia, e akamanako ana i te peroveta ko Ezekiela, te aite anga o tona ingoa “Na te Atua e Akamaroiroi.” Noatu rai i aro atu a Ezekiela i te aronga ngakau ketaketa i Iseraela i taito ra, kua akamaroiroi te Atua iaia e kua akariro akatutuia tona rae kia ketaketa atu i te toka tama ra. E no reira, kua rauka ia Ezekiela i te rave i tana angaanga orometua no etai mataiti e manganui, e manganui ua atu noatu me i akarongo mai te au tangata me kare rava. Te akaari maira tana akaraanga e ka rauka katoa ia tatou i te rave i te reira tu, e ka rauka i te reira i te tauturu ia tatou kia akakeu akaou i to tatou tu totomapu no te angaanga tutuanga.​—Ezekiela 3:8, 9; 2 Timoteo 4:5.

16. Eaa te tu akono o Mika te ka tau tatou kia tatanu?

¹⁶ Ko Mika tetai tei tau ra kia manakoia no tona tu akakoromaki, kua totou aia i te varu o te anere mataiti M.T.N. E kua tata aia: “E akara ra au ia Iehova, e tapapa au i te Atua o toku nei ora; e akarongo mai toku Atua iaku nei.” (Mika 7:7) Kua akaia to Mika irinaki anga ki roto i tona akarongo ketaketa. Mei te peroveta ko Isaia ra, kua kite a Mika e ko ta Iehova i akakoro ko Tana tikai ia ka rave. Kua kite katoa oki tatou i teia. (Isaia 55:11) E no reira e tatanu tatou i te tu akono tapapaanga i te akatupu anga o ta te Atua ra au taputou. E kia tutu aere tatou i te tuatua meitaki ma te totomapu, noatu rai i te au ngai te meangiti ra te akaari anga manako inangaro i te tuatua no te Patireia.​—Tito 2:14; Iakobo 5:7-10.

Akonoanga Akakoromaki Anga i Teia Tuatau

17, 18. Eaa te akaraanga taito e to teia tuatau nei te ka rauka i te tauturu ia tatou kia akono i te akakoromaki marie?

¹⁷ Kua akakoromaki tamou tetai papaki o te au peroveta a Iehova i ta ratou au angaanga no etai au mataiti roa inara kare i kite i te tupu anga ta ratou au totou ra. Inara, ko to ratou akakoromaki tamou marie, e putuputu oki ia ratou e mamae ra i te takinga kino anga, te tauturu ra ia tatou kia kite e ka rauka katoa ia tatou i te akatupu i ta tatou angaanga orometua. Ka rauka katoa oki ia tatou te puapinga mei te akaraanga a te aronga akatainuia tiratiratu ra i te au raungauru mataiti mua o te 20 anere mataiti nei. Noatu rai e kare i tupu vave to ratou manakonako no te rangi mei ta ratou i manako mai, kare ra ratou i tuku i te reka kore i tetai akara anga taroaroa kia akameangiti i to ratou totomapu no te raveanga i te anoano o te Atua i tana akakite anga i te reira kia ratou ra.

¹⁸ No etai mataiti roa, e manganui to teia au Kerititiano tei rave putuputu i te tua anga i Te Punanga Tiaki e tona tianara tokorua, koia te Awake!, (tei tapaia i mua ana ko The Golden Age e i muri mai ko te Consolation). Kua rave totomapu ratou kia rauka ki te au tangata teia au tianara puapinga maata i runga i te au arataa e i to ratou au are ta tatou e karanga nei i teia tuatau ko te au ngai tua anga makatini. Ko tetai tuaine pakari tei oti ua akera tana angaanga i te enua nei kua viviki ua te kore anga i kiteia e te aronga aere na reira e te kiteanga iaia i te akakitekiteanga i te arataa ra. Mei teaa ra te maata tana akakite anga i rave i tona au mataiti e manganui i rave ei i te tavini anga tiratiratu, tei akakiteia maira e te au tuatua ariki anga a te aronga tei akara ra i tana angaanga orometua i te ngai tangata ra! Ei tetai te akakitekite ra i te Patireia, te putuputu ra ainei koe i te tuaanga i Te Punanga Tiaki e te Awake! ki te au rima o te aronga taau e aravei ra i taau angaanga orometua?

19. Eaa te akamaroiroi anga ta Ebera 6:10-12 e oronga maira kia tatou?

¹⁹ E akamanako katoa oki, i te angaanga akakoromaki e te tiratiratu o te au taeake te tavini ra ei au mema no te Pupu Akaaere no te Au Kite o Iehova. E maata to ratou i teianei tei roto i te iva me kare tai ngauru raungauru mataiti o to ratou oraanga, inara te vaira ratou ei aronga akakitekite i te Patireia e te akono totomapu ra i ta ratou au angaanga akatakaia ra. (Ebera 13:7) E akapeea oki etai atu aronga kua pakari ma te manakonako anga no te rangi e pera katoa etai no roto i te “mamoe ke atu” kua pakari katoa ra to ratou au mataiti? (Ioane 10:16) Ka papu ra ia ratou e kare te Atua i te Atua tuatua tika kore ka akangaro atu ei aia i ta ratou angaanga i rave e to ratou inangaro i tona ingoa i akakite puia ra e ratou. Kapiti katoa ma te aronga akarongo ou maira, e rave tamou marie te Au Kite pakari o Iehova i te ka rauka ia ratou, i te akonoanga akarongo e te akaarianga i te tu akakoromaki i te angaanga na te Atua. (Ebera 6:10-12) E no reira, me na te tuakaou anga, mei to te au peroveta i taito ra, me kare na te ora atu na roto i te “mate maata” te aere mai nei, ka kokoti ratou i te tutaki apinganui no te ora mutu kore.​—Mataio 24:21.

20. (a) Eaa taau i kite no te “akaraanga” a te au peroveta ra? (e) Akapeea e raukaʼi i te akakoromaki marie mei to te au peroveta rai i te tauturu mai ia tatou?

²⁰ Mei teaa ra tetai akaraanga meitaki ta te au peroveta a te Atua ra i akaruke mai no tatou nei! No to ratou akakoromaki i te mamaeanga, e te akono anga i te akakoromaki marie, e te akakite anga i etai atu au tu akono i te Atua ra, kua akameitakiia ratou kia tuatua i te ingoa o Iehova. Ei Au Kite nona i teia tuatau nei, kia aite atu tatou mei ia ratou ra e kia ngaueue kore mei te peroveta ia Habakuka ra, tei tuatua ra: “E tu au ki runga i toku are tiaki anga, e e noo marie ua ki runga i te punanga, e ka tapapa uaorai au kia kite i [ta te Atua] ka tuatua mai kiaku nei.” (Habakuka 2:1) Kia manako papu aiteite katoa tatou ia tatou e akono ra i te akakoromaki anga e ka rave tamou rekarekaʼi i te akakitekite ki te au tangata i te ingoa kaka o to tatou Anga Mekameka, koia a Iehova!​—Nehemia 8:10; Roma 10:10.

I Mou Ainei ia Koe Teia Au Tumu?

◻ Eaa te akaraanga mataku kore ta te peroveta ko Amosa i akanoo mai?

◻ Na teea au tu i tau ei te peroveta ko Mose ra ei akaraanga?

◻ Akapeea e raukaʼi i te Au Kite o Iehova o teia tuatau nei i te rave kia aite kia Amosa raua ko Isaia ra?

◻ Eaa ta te au orometua Kerititiano ka kite mei te tu akono o Hosea raua ko Ioela ra?

◻ Akapeea tatou e puapingaiaʼi mei te au akaraanga a Ezekiela raua ko Mika ra?

[Tutu i te kapi 16]

Noatu rai ta Amazia patoi anga kino maira, kua akamaroiroi mai te vaerua o Iehova ia Amosa kia totou ma te mataku kore

[Tutu i te kapi 18]

Kua akanoo mai te aronga akatainuia tiratiratu ra i tetai akaraanga meitaki na te akonoanga i te akakoromaki marie i te angaanga a Iehova ra