Akapaatu Anga i to Iehovah Ingoa

“Apai [tatou] i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.”​—EBERA 13:15.

1. Eaa ta te peroveta ko Hosea i raurau ki tona au taeake Iseraela kia rave?

E TUATUA puapinga maata ta te peroveta a Iehova ko Hosea no tona au oa Iseraela ra. I te varu anere mataiti i mua ake i te Tuatau Noa Nei, kua ako atura aia i tona au taeake rave tau kore ua ra kia tataraara. Kua raurau atura aia: “Ka rave kotou i te tuatua, ka ariu ei kia Iehova: ka tuatuaʼi kiaia, Ka akakore mai koe i te au kino katoa, ka āriki mai ei ia matou ma te aroa: ka oronga atu ei matou i te atinga ra o to matou vaa.” (Hosea 14:2) I te raurauanga i te au tangata ra kia ‘oronga i te atinga ra o to ratou vaa’ kia Iehova, te akamaroiroi atura te totou a Hosea i to Iseraela kia tataraara e kia oronga i te au atinga akapaapaa i te Atua ma te ngakau tae.

2. Eaa te tu atinga ta te apotetoro ko Paulo i akamaroiroi atu i te au Kerititiano kia oronga?

² Te oronga nei te Au Kite o Iehova i ‘te atinga o to ratou vaa’ i teia tuatau. Te rave katoa ra ratou i te ako anga a te apotetoro ko Paulo, tei taiku ra i taua au tuatua i te totou a Hosea ra i tana tata anga: “E teianei e na ko tatou [ia Iesu Karaiti] ra i te apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.” (Ebera 13:15) E no reira, te akapaapaa rekareka ra te au tavini o te Atua ia Iehova, i roto i ta ratou angaanga tutuanga Patireia.​—Mataio 24:14.

3. Akapeea e raukaʼi ia tatou i te oronga kia Iehova i “te atinga ra, i te akameitaki,” e ko taai au angaanga ta tatou ka akara matatio i teianei?

³ Ko te akapaatu anga i te ingoa o Iehova ko tetai angaanga aroa ua ia no te au tangata apa ua nei. Mei teaa ra to tatou mataora kia tuatua atu kia etai ke ra no to tatou Atua, na te reira tu te orongaanga kia Iehova i “te atinga ra, i te akameitaki,” i “te atinga ra o to [tatou] vaa”! Ei akamaroiroi anga ia tatou i te tutuanga ki te au tangata i te tuatua meitaki o te Patireia i teia tuatau, e akara matatio tatou i ta te Puka Tapu e akakite maira kia tatou no te au peroveta a te Atua e etai atu au tavini oki o Iehova ra. Mei to ratou tu akono i te oraanga, e maata ta tatou ka kite te ka tauturu ia tatou kia rekareka i ta tatou angaanga tutuanga.​—Roma 15:4.

Te Tuanga a te Au Peroveta

4, 5. (a) I roto i te au reo muatangana o te Puka Tapu, eaa te aiteanga tumu anga o te au tuatua tei uriia ra e “peroveta”? (e) Eaa te akakite maira e e tuanga tuke roa to te au peroveta ra i roto i ta te Atua ra akanoonoo anga?

⁴ E angaanga meitaki tikai ta te au peroveta a Iehova i te akakitekite i tana tuatua ki te au tangata ra. Ko te tuatua Epera no te “peroveta” (na·viʼʹ) e akamata anga papu kore tona, inara ko tona taiku angaia i roto i te Puka Tapu te akakite maira e ko te au peroveta mou ra e au vaa tuatua no Iehova, e au tangata no te Atua ma te au tuatua akauruia ra. Ko te tuatua Ereni tei uriia ra e “peroveta” (pro·pheʹtes) tona aite anga tika tikai “tetai tei tuatua atura,” kia tuatua i tetai apinga “ki mua o” me kare “ki mua i tetai ra.” Ko te peroveta ko tetai ia tei akakitekite i te au tuatua no tetai tumu tu-atua. E putuputu, inara kare i te au taime ravarai, kua totou mai te au peroveta mou a te Atua i te au mea te ka tupu a te tuatau ki mua.

⁵ No runga i te tuanga tuke roa o te au peroveta i roto i ta te Atua akanoonoo anga, te akakite maira te M’Clintock and Strong Cyclopædia: “I etai tuatau kua patiia mai ta ratou akoanga . . . Inara e putuputu to ratou uaorai akakeu angaia mei roto mai kia tuatua atu ki te au tangata e kare ta ratou ako anga i patiia mai, e kare ratou i mataku i te tu atu e te tuatua atu i te au ngai penei ka akatupu to ratou mamaanga mai i te riri e te mataku.” (Voriumu VIII, kapi 640) E akamanako ana i etai au akaraanga tei akariro ra i te au peroveta kia rave i taua tu mataku kore ra.

Au Manako Ngakau e te Akakeu Anga

6, 7. Eaa ta Iehova i akaue ra i tana peroveta ia Ezekiela kia kai, e eaa te tupu anga mei te reira ra?

⁶ I mua ake i te akapou angaia a Ierusalema i te mataiti 607 M.T.N., kua tuatua atu a Iehova ki te aronga i tuikaaia ra ki Babulonia na roto i tana peroveta ko Ezekiela. Kua tuatua atu a Iehova kiaia: “E te tamaiti a te tangata na, ka kai i tei kitea e koe ra, ka kai i teianei pokaikai, ka aere ei ka tuatuaʼi ki te ngutuare o Iseraela.” Kua rave a Ezekiela i te reira. Kua na ko maira aia: “Kua akaamama atura au i toku vaa, e kua akaangai maira aia iaku i taua pokaikai ra. Kua tuatua maira oki aia kiaku, E te tamaiti a te tangata na, kia keingaia e to kopu, e ka akaki i to ngakau ki teianei pokaikai, taku e o atu kia koe ra. Kua kai iora au; e mei te meli te tu i toku nei vaa i te venereka.”​—Ezekiela 3:1-3.

⁷ Te rave maira to tatou au kopapa i te au meitaki no te manga ta tatou e kai ra, e i tetai tu ka riro teia ei tuanga no tatou. Mei te reira katoa oki, te “pokaikai” ta Ezekiela i kai ra​—te tuatua a Iehova ta te peroveta i akakitekite ra—​kua riro ei tuanga nona ra, tei akatere ra i tona au manako ngakau. Kua akakeu te au tuatua a te Atua ra i te au manako ngakau o roto rava ia Ezekiela e kua riro te akakitekiteanga i taua au tuatua ra ki te au tangata ei rekareka anga nona. Me ko koe tetai e Kite no Iehova, te mareka ra ainei koe i te akapaatu anga i te tuatua a te Atua ra?

8, 9. Na teaa i akakeu ia Amosa kia rave i te totou anga?

⁸ E akamanako, katoa oki, i te peroveta ko Amosa. I ora ana aia i te iva anere mataiti M.T.N. ra, i roto aia i te au peroveta Epera mua tei tata ra i tetai puka no te Puka Tapu i tapaia ra i tona uaorai ingoa. Mei ia Ezekiela rai, ko Amosa tetai tei akakitekite tika tikaʼi i te tuatua a Iehova. Eaa oki, kua taikuia te tuatua “te na ko mairā Iehova” e 11 au taime i roto katoa i te puka tei tapaia ra i tona ingoa! (Amosa 1:3, 6, 9, 11, 13; 2:1, 4, 6; 3:12; 5:4; 7:17) Kua manako tikai a Amosa i tei anoanoia kia akakitekite i te au tuatua a te Atua ra ki te au tangata.

⁹ Ei peroveta na te Atua, kua akatika a Amosa i te au akakitekite anga tu-Atua na te rave viviki anga i te reira. Na roto ia Amosa, kua na ko maira te Atua: “Kua ngunguru te liona, koai te ka kore e mataku? kua tuatua te Atu ra ko Iehova, koai te ka kore e totou?” (Amosa 3:8) Kua akakeu tapupu koreia te peroveta ra kia akakitekite i te tuatua a Iehova.

10. Eaa te tu akono o te au tavini o Iehova i teia tuatau me ka patoiia mai ta ratou angaanga tutuanga?

¹⁰ Mei te tu riona rai te ngunguru maira Iehova i te au tuatua no te akavaanga ki runga i te akatereanga kino o te ao i teia tuatau nei. Mei ia Amosa rai, te manako akakeuia ra te au tavini o Iehova i teia tuatau nei kia akakitekite i ta te Atua au tuatua ki te au tangata. Noatu rai me ka akamatakuia mai e te aronga patoi, ka aru ratou i te akaraanga o nga apotetoro ko Petero raua ko Ioane, tei akakite maroiroi maira: “Kare oki matou e tika kia kore e tuatua i ta matou i akara akenei, e ta matou i akarongo akenei.” Kua akapapu katoa maira te au apotetoro e: “Ko te Atua ta matou e akarongo e tikaʼi auraka te tangata.” (Angaanga 4:20; 5:29) Ka akapeea tatou, i reira? E mea meitaki kia akara matatio i to tatou au manako ngakau no runga i te akapaatu anga i to Iehova ingoa.

“No te Ki Oki o te Ngakau”

11. Eaa te tau ra kia akakeu ia tatou kia tamou marie i te akapaatu anga i to Iehova ingoa?

¹¹ Kare e ekoko anga e kua akameitaki te au peroveta a Iehova i ta ratou au angaanga. Ka tau katoa oki te reira akameitaki anga kia Iehova kia akakeu ia tatou kia akapaatu anga i tona ingoa. Te tuatua ra a Salamo 145:1, 2 e: “E akateitei au ia koe, e taku Atua, e te ariki; ka akameitaki rai au i toou ra ingoa e tuatau e tuatau ua atu. Ka akameitaki rai au ia koe i te au rā katoa nei; ka akapaapaa au i to ingoa e tuatau e tuatau ua atu.” Te akaata maira ainei taua au tuatua ra i toou tu manako? Ka tauturu te apii putuputu i te Puka Tapu ia tatou kia akaoonu i to tatou ariki anga i ta Iehova i rave, e rave nei, e ka rave oki no tatou. E me apii kapiti tatou i te Puka Tapu ei ngutuare tangata, kare ainei tatou e kite ana e e ririnui te Tuatua a te Atua ra, i te akariroanga kia anoano tatou i te tuatua nona e tana au akakoro anga? (Ebera 4:12) E raukaʼi kia meitaki te akapaatu anga i to Iehova ingoa, ka tau tatou kia taangaanga katoa i te au puka Kerititiano te orongaia maira e te Atua ko Iehova na roto i te “tavini akono meitaki e te pakari” tei akatainuia ra.​—Mataio 24:45-47.

12. Akapeea e raukaʼi i te au uipaanga Kerititiano e te tamanako anga oonu i te tauturu ia tatou kia akapaatu?

¹² Me ka akapaapaa tatou ia Iehova mei roto mai i te au ngakau akameitaki, ka tau tatou kia aere putuputu ki te au uipaanga Kerititiano ra. Ka tau oki te au tangata katoatoa o Iehova kia akarongo i te akauenga a te apotetoro ko Paulo: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:24, 25) Te putuputu ra ainei koe i te aere ki te au uipaanga Kerititiano? Te tuatua putuputu ra ainei koe no runga i te au tuatua mou o te Tuatua Tapu, te au tupu anga memeitaki, e te nuti mataora no te akatotoa anga teokaratiki taau e akarongorongo ana i te au uipaanga o te au tangata o te Atua ra? Me te rave ngata ra koe uaorai i te tuatua no Iehova e tana au akakoro anga, e akataka i tetai tuatau no te tamanako anga ki runga i tana Tuatua kia tomo oonu ei tona au manako ki roto i toou ngakau. (Salamo 77:12; 143:5) Ae, ka tauturu te au uipaanga Kerititiano e te tamanako anga putuputu i te Tuatua a te Atua ia koe kia ariki i te angaanga meitaki i te akapaatu anga i to Iehova ingoa.

13. Akapeea tatou i te ‘tuku mai anga i te mea meitaki’ no roto mai i to tatou ngakau?

¹³ Ma te au ngakau ki i te akameitaki kia Iehova, ka apai mai tatou i te au mea meitaki. “E tuku mai te tangata meitaki i te mea meitaki no roto i te putunga meitaki i roto i tona ngakau,” ta Iesu i akakite mai, “e tuku mai te tangata kino te mea kino, no roto i te putunga kino i roto i tona ngakau: no te ki oki o te ngakau i tuatuaʼi te vaa.” (Luka 6:45) Eaa tetai atu mataara meitaki no te ‘tuku mai i te meitaki’ i to te akapaatu anga i to Iehova ingoa ra e te tuatua anga i tana au akakoro anga ki to tatou au tangata tupu, te au kopu tangata​—ae, ki te aronga katoatoa ta tatou ka aravei?

Au Tupu Anga no te Akapaatu Anga

14. (a) Eaa ta te tangata akakitekite e te tangata akarongorongo i te tuatua Patireia ka kite? (e) Eaa te akatupuia ra na te angaanga tutuanga i te Patireia?

¹⁴ Kua kite te au peroveta a te Atua ra i te rekareka i ta ratou tavini anga, e kua puapingaia tei akarongo ariki ra i ta ratou i tuatua. Mei te reira katoa oki, te apai maira te akapaatu anga i te tuatua no te Patireia i te rekareka maata ki tona aronga akakitekite aere. (Angaanga 20:35) E akapeea oki ta te reira akapuapinga anga i te aronga akarongo maira ma te ariki anga! Na te arikianga i te tuatua meitaki ka tauturu i te au tangata kia autu i te tu maromaroa me kare kia rauka te akono i te reira. Te aronga tangi no tei mate ra ka rekareka no te manakonako anga i te tuakaou anga. Kua ora te aronga tuikaaia ki te nikotini (nicotine), te eroini (heroin), e etai atu au apinga akakona. E manganui tei taakiia kia tau te tu akono, e ko te katoatoa te ka ariki i te tuatua mou o te Puka Tapu ka rauka ia ratou te tu rangatira i te pae vaerua. (Ioane 5:28, 29; 8:32) Ko te akakitekiteanga i te Patireia ei te manakonako anga anake no te au tangata ka rave katoa ia i te akamatakite i te aronga rave kino, i te akatupuanga oki i te mataora ki roto i te aronga ngakau tiratiratu. E no reira te akatakaia ra te au tangata no te “tipu ke anga mutukore” e me no te “ora mutu kore” i te akono anga i te akavaanga tu-Atua ki runga i teia ao kino nei. (Mataio 24:14; 25:31-46; Ezekiela 33:1-9; 1 Timoteo 2:3, 4) Ko ta tatou angaanga tutuanga ko tetai rave akaora anga aite koreia ia, ko te rave akapaatu anga maata rava e te atea oki tei raveia ki runga i te tua o te enua nei!

15. Eaa te ka rauka kia raveia ei tauturu i te aronga tei tau ra i ta tatou ngai e akakitekite aere ra?

¹⁵ Ei Au Kite o Iehova i teia tuatau nei, te tavini mataora ra e te akarongo meitaki ra tatou i to tatou Metua i te rangi ra. (Roma 12:11) E no reira, te mataora nei tatou i te akataka putuputu i te tuatau kia rave i te angaanga tutuanga i te tuatua meitaki i te ngai tangata e i tera are i tera are. (Angaanga 5:42; 20:20) Te akakite maira te au ripoti takapini te ao katoa nei e te vaira etai atu aronga tau i roto i to tatou au ngai katoatoa. I te taui anga te au turanga i te ao nei, te tupu ra te au kino ki te au tangata na te au mataara tuke tuke. E manganui kua riro poitirere ua ei aronga paruruia i tetai ngai ke ra, ei au tuikaa ki tetai enua ke. Penei te vaira etai o teia aronga tangata i roto i ta tatou ngai akakitekiteanga. Me koia ia, e rave tatou i te ka rauka ia tatou ei tauturu ia ratou i te pae vaerua ia tatou e rave marie ra i “te angaanga tapu o te tuatua meitaki ra.” (Roma 15:16, NW) Kua apii etai au Kerititiano i tetai reo ke kia raukaʼi te akakite i te tuatua meitaki o te Patireia ki taua au tangata ra.

16. Eaa te ka tauturu ia tatou kia tamou marie i te akakitekiteanga i te ingoa o Iehova ra?

¹⁶ E manganui te au peroveta o te Atua ra tei rave i etai au angaanga ngata rava. Kare i te mea ngoie ua no ratou kia akakite i te au tuatua tu-Atua ki te au tangata ariki kore. Mei te reira katoa oki, kare i te mea ngoie ua no te aronga katoa tei akatapuia ra kia Iehova kia akapaatu i Tona ingoa, e maata atu oki i te au ngai kare ra e arikiia mai. Inara, no te irinaki anga e na te au tupu anga mei te apii i te Tuatua a te Atua, ma te pure kapiti katoa i te ririnui ta Iehova e oronga maira, ka rauka ia tatou te rave tamou i te akakiteanga i te tuatua no te Patireia. (Philipi 4:13; Apokalupo 14:6) No teia tu, eaa atu ta tatou ka kite mei te au peroveta a Iehova ra e etai atu o tana au tavini o te au tuatau i taito ra?

Oa Rave Angaanga Orometua i te Tutu Aere

17. Eaa etai akaraanga no te Tuatua Tapu no te puapinga o te angaanga kapiti na te Atua ma tetai oa ra?

¹⁷ I te akonoanga i tana angaanga, i te akamata anga kua tauturuia te peroveta a te Atua koia a Mose e tona tuakana ko Aarona. Kua tuatua atura Iehova kia Mose: “[Na Aarona] e karanga atu ki te tangata i taau ra tuatua: ei vaa tikai oki aia noou.” (Exodo 4:16) E akamanako, katoa, i te tuatau o nga peroveta ko Elia raua ko Elisaia, i te tupu ruperupe anga “te au tamariki peroveta.” I te akara anga ko teia aronga e au pupu no te au tavini o te Atua tei rave angaanga kapipiti ra, kare e ekoko anga e e rekarekaanga mareka to ratou i te pirianga oa tetai ma tetai. (2 Ariki 2:3-5; 4:38; akaaite ia 1 Samuela 10:5, 10.) Inara, kare a Mose raua ko Aarona e “te au tamariki peroveta” i rave ana i te akakiteanga i te tuatua meitaki o te Patireia. Tera ra, e puapinga to ratou kapiti anga kia ratou katoatoa. I te au anere mataiti i muri mai kua tono atura Iesu Karaiti e 70 au pipi ki te rave angaanga orometua e “tataki toko rua,” e kare e ekoko anga e kua puapingaia ratou i te pirianga oa tei orongaia.​—Luka 10:1-16; akaaite ia Angaanga 17:10, 11; 20:20.

18. Akapeea te rave kapiti anga ma tetai oa i te angaanga orometua i tau ei ei akakoro anga puapinga i teia tuatau nei?

¹⁸ I te mataiti 1953, kua akamata te Au Kite o Iehova i tetai porokarama i te angaanga kapiti anga te aronga akakitekite Patireia i te angaanga orometua ra. Inara, kare teia i raveia e no tetai oa ua. Ko teia porokarama terenianga kua akapapaia ei akariro i te au tavini o te Atua kia meitaki atu ei au orometua e ei aronga tutu aere i te tuatua meitaki. Eaa te akakoro anga i roto i te manako, e maata atu te aronga kite ei papuritia no te Patireia tei piri atu ki te angaanga orometua ma te aronga ou ra. Kua puapinga maata teia porokarama terenianga i te tutu aere i tera are i tera are e kua tauturu katoa i te au tangata o Iehova kia meitaki atu i te “akapaatu anga i tona ingoa.” (1 Timoteo 4:16) I teia tuatau nei, ko te kore e takinga kinoia mai ko tetai atu tumu ia te akariro ra ei mea meitaki kia rave te au Kerititiano i te angaanga orometua na te aere “tataki toko rua,” e maata oki i etai au ngai.

19. Eaa te mea tau kia tamouia ki roto i te manako no runga i te akakoro anga na tetai i te rave angaanga orometua?

¹⁹ Me te angaanga ra koe ma tetai atu oa akarongo i te angaanga orometua e me ko koe anake ua te aere atura ki tetai ngutupa, e tauta kia rauka tetai akakoro anga naau me kare tetai manako anga. Ka tau ei mea tika tikai te reira, ka itaeia. Te anoano ra ainei koe i tetai tauturu i te akamataanga i toou tuatua anga ei akakeu i te manako inangaro o te au tangata i taau ngai? Me koia ia, penei ka rauka ia koe i te aere kapiti atu ma tetai painia, tetai te akakitekite aere ra i te Patireia i te au tuatau ravarai, me kare tetai papuritia tei meitaki ra i te rave i te akamata anga tuatua. Penei ka rauka i toou oa i te tauturu ia koe i te akapapa e te taangaanga i te au akamata anga tuatua tei tataia ki roto i te Our Kingdom Ministry me kare i te puka Reasoning From the Scriptures. I etai atianga me te akakitekite kapiti ra koe ma tetai atu mei tera are ki tera are, e akarongo meitaki ki te au tuatua anga a toou oa. Ei reira koe e tamataʼi i te tuatua anga aiteite naau uaorai kia rauka roa ia koe te reira tu i taau angaanga orometua.

20, 21. Eaa te ka akariro i te rave kapiti anga ma tetai oa i te angaanga tutu ei orometua ei mea tauturu tikai?

²⁰ Akapeea me te anoano ra koe i te tauturu no te oki akaou anga ma te manako kia akamata i tetai apii Puka Tapu i tetai ngutuare? Penei na roto i te taeake akono i taau Apii Puka Putuputuanga, ka rauka te akanoonoo anga kia angaanga kapiti koe ma tetai papuritia Patireia tei meitaki ra tana rave anga i te akamataanga i te au apii Puka Tapu. Auraka e rave ei tokorua muteki ua ia koe e rave ra i te oki akaou anga ma tetai oa. Mari ra, i muri ake i te akakite anga mai toou oa e akapeea tana rave anga i te akono i tetai aravei anga na korua, penei ka kite koe e mea puapinga kia akono i tetai oronga anga kia aite atu ki tana ra i te raveanga i tetai atu aravei akaou anga. Tei reira oki toou oa ia koe ra ei tauturu atu e ei oronga atu i te ako i muri akera.​—Akaaite ia Galatia 6:6.

²¹ Ka rauka i taua tauturu anga aroa mei ko mai i tetai oa rave angaanga tutu aere ra i te tauturu ia koe kia itae atu ki taau i manakonako ra i te angaanga orometua. Na teia tauturu e taau ariki anga oonu i ta Iehova ra aroa takinga meitaki i te akatikaanga ia koe kia rave i teia angaanga meitaki ka akariro ia koe kia meitaki roa atu i taau au angaanga tutuanga Patireia. E kia akaperepere koe i taau angaanga no te akameitakianga ia Iehova na te tuatua akapaapaa anga iaia e na te akapaatu anga putuputu i tona ingoa.​—Salamo 145:1, 2, 9-13.

22. Eaa te au uianga te ka tauturuia mai te pauanga e ta tatou apii te aru mai nei?

²² Ei Au Kite o Iehova, te rave ra tatou i te au oki akaou anga i ta tatou angaanga orometua i tera are i tera are. E manganui te akarongorongo maira i te tuatua meitaki ma te ariki anga oonu. Inara, penei kare etai e reka i te akarongo atu ki te tuatua no te Patireia. Eaa ta tatou ka rave i raro ake i taua au turanga ra? Akapeea e raukaʼi ia tatou i te tamou marie i te angaanga ta Iehova i akaue maira ki tona au tangata? Eaa te au akaraanga Tuatua Tapu te ka tauturu mai me kare ka arataki mai ia tatou? Ka pauia teia au uianga i te atikara te aru mai nei.

I Mou Ainei ia Koe Teia Au Tumu?

◻ Eaa ta Hosea raua ko te apotetoro ko Paulo i tuatua no te au atinga ki te Atua ra?

◻ Na teaa i akakeu ia Ezekiela raua ko Amosa kia rave i te totou anga?

◻ Akapeea te manako tau no tatou i ta tatou angaanga tutuanga Patireia?

◻ Eaa te au puapinga te ka rauka mai mei te angaanga kapiti anga ma tetai oa i te tutu aere anga ei orometua?

[Au Tutu i te kapi 13]

Ka tauturu te oa akakoroia ia tatou kia meitaki atu i ta tatou angaanga orometua