Te Maara Ainei ia Koe?

Kua akamanako meitaki ainei koe i te au itiu i ou ake nei o Te Punanga Tiaki? Me koia ia, ka reka koe i te akamaara i te ka aru mai:

◻ Akapeea te au tokorua akaipoipo e manganui o teia tuatau te aru anga i te akaraanga meitaki o Akuila e Peresila?

Kua tavini a Akuila e Peresila i roto i tetai atu au putuputuanga tukeke. Mei ia raua rai, e manganui te au Kerititiano maroiroi i teia tuatau kua oronga ia ratou uaorai kia aere atu ki te ngai te anoano maataia ra te tauturu. Kua kite katoa ratou i te rekareka e te merengo anga te aere maira i te kite anga i te au inangaro Patireia i te tupu anga e te rauka anga i te tatanu i te pirianga oa Kerititiano akaperepere.​—12/15, kapi 24.

◻ Eaa to te Pipiria manako i te kava inuia?

Te tau ra te manako anga a te Pipiria no te kava inuia. I tetai tua, te tuatua ra te Pipiria e e apinga orongaia mai te uaina e te Atua. (Salamo 104:1, 15) I tetai tua, te akaapa ra te reira i te inu maata anga. (Luka 21:34; 1 Timoteo 3:8; Tito 2:3; 1 Petero 4:3)​—12/15, kapi 27.

◻ Eaa tetai mea puapinga o te puka Pipiria o Hagai?

Noatu e 38 ua rai irava i roto i te puka a Hagai, kua taikuia te ingoa o te Atua e 35 taime. Ka tangi oraora kore taua totou anga me ka monokia te ingoa Iehova ma te taoonga “Atu.”​—1/1, kapi 6.

◻ Eaa te apiianga te ka mou mai mei te au ara a Davida raua ko Manase?

Noatu ta Iehova akakoreanga ia Davida e Manase, kua noo teia nga tangata e rua​—e Iseraela ma raua​—i tei tupu i ta raua au rave anga ara. (2 Samuela 12:11, 12; Ieremia 15:3-5) Na roto i tetai mataara aiteite, koi akakore ei a Iehova i te aronga tataraara, penei te vaira te au tupu anga o ta ratou au angaanga kare e rauka i te kopaeia.​—1/1, kapi 27.

◻ Mei teaa ‘te manea o te vaevae o te aronga i apai mai i te evangelia meitaki’ o te Patireia o te Atua? (Isaia 52:7)

Ko te vaevae te ka akakeu ua i tetai tangata kia aere ki vao no te tutu aere ki tetai atu. Te komono ra nga vaevae i te tangata. No reira ki te manganui tei akarongo e tei ariu meitaki mai ki te evangeria meitaki o te Patireia, te riro ra nga vaevae o taua au karere ei akara anga manea tikai.​—1/15, kapi 13.

◻ Eaa nga tuanga angaanga e rua i roto i te ‘tutuanga i te evangelia’? (1 Korinetia 9:16)

Te mea mua, ka tika tatou kia akakitekite i te evangeria o te Patireia. Te tuanga rua o teia angaanga ko te apiianga i te aronga te ka akarongo mareka mai i te akakitekite anga Patireia.​—1/15, kapi 23.

◻ Eaa te au puapinga uaorai te ka tupu mai mei te imeneanga i te au imene Patireia i te au uipaanga putuputuanga?

Te oronga maira te imeneanga kia tatou i te tuatau kia akakite i to tatou manako ngakau no Tei Anga mai ia tatou. (Salamo 149:1, 3) Me tuku tatou i to tatou ngakau ki roto i te imeneanga putuputuanga, ka tuku te reira ia tatou ki roto i te manako anga e te tu ngakau tika no te porokarama te ka aru mai. Ka akakeu te reira ia tatou kia maata atu te akono i te akamorianga ia Iehova.​—2/1, kapi 28.

◻ Akapeea oki e meitaki atu te ra e mate ei i te ra anau anga? (Koheleta 7:1)

E meitaki atu te ra e mate ei i te ra i anauia mai ei tetai me kua patu i reira tetai i tetai ingoa meitaki ma Iehova, tei akatu maira i te aronga tiratiratu tei mate ra. (Ioane 11:25)​—2/15, kapi 12.

◻ Eaa te puka a Koheleta ka tauturu ei ia tatou uaorai?

Ka tauturu te reira ia tatou kia akatikatika i ta tatou akara anga i te oraanga e ta tatou ka akakoro tikai i te akara. (Koheleta 7:2; 2 Timoteo 3:16, 17)​—2/15, kapi 16.

◻ E aronga apiianga arairai ainei te Au Kite o Iehova?

Kare. Koi vai ei ta ratou au irinaki anga akonoanga pakari, kare ratou i te aronga apiianga arairai i te aite anga tikai tei taangaangaia taua tuatua ra. Kare ratou e rave ua atu i te au pupu akaariari anga e te ta ua no te patoi i te aronga tei patoi mai ia ratou. Te aru ra ratou i to ratou Arataki, ko Iesu Karaiti.​—3/1, kapi 6.

◻ Te koreanga e kite i te ora tikai o to Iesu aerenga mai no te rave i ta te Atua akaoko anga eaa ta te reira ka akatupu ki te au Kerititiano?

Ka akariro teia i te au Kerititiano kia vai ara ua e ka oronga i te tuatau kia ratou i te au ra no te akapapu e te tavini ra ratou ia Iehova ma te au akakoro anga manako kore ia ratou uaorai.​—3/1, kapi 13.

◻ Eaa ta tatou ka tau kia akamanako i mua ake ka apai ei i tetai taeake tei rave pikikaa ia tatou ki te akavaanga?

Ka tau tatou kia akamanako i te au mea ka tupu kia tatou, ki tetai atu te ka o mai, ki te putuputuanga, e te aronga o vao. (1 Korinetia 6:7)​—3/15, kapi 20.

◻ Akapeea te mataora tikai e rauka mai ei?

Ko te turanga o te ngakau te mataora tikai, tei akanooia ki runga i te akarongo tae tikai e tetai pirianga meitaki ma Iehova. (Mataio 5:3)​—3/15, kapi 23.

◻ Eaa ta tetai Kerititiano ka tau kia rave me kapikiia mai no te angaanga tiuri?

Ka tau te Kerititiano takitai tei aro atu i te angaanga tiuri kia akataka eaa te kaveinga no te aru, tei akanooia ki runga i tona maramaanga i te Pipiria e tona uaorai akava ngakau. (Galatia 6:5)​—4/1, kapi 29.