E Kerititiano “Pakari” Ainei Koe?

“I TAKU tamariki anga ra, mei ta te tamariki katoa taku tuatua, mei to te tamariki toku kite, mei to te tamariki toku manako.” I tata ei te apotetoro ko Paulo. E tikai, i tetai atianga i riro ana tatou pouroa ei au tamariki. Inara, kare tatou i vai ua mei te reira rai. I akakite ei a Paulo: “Kia riro ra au ei tangata pakari, tuku ke atura au i te peu a te tamariki.”​—1 Korinetia 13:11.

Na tetai tu aiteite, te akamata ra te au Kerititiano katoatoa ei au tamariki i te pae vaerua. Inara kare i roaia, kua riro te katoatoa ei “tangata pakari, i te akarongo okotai, e te kite i te Tamaiti a te Atua ra, kia taea te aite ra i te ki o te Mesia i te maata.” (Ephesia 4:13) Ia 1 Korinetia 14:20, kua raurauia tatou: “E te au taeake, auraka kotou ei tamariki i te kite . . . i te kite ra, ei tangata pakari ïa kotou.”

Te vai anga o te au Kerititiano pakari e akameitaki anga ki te au iti tangata o te Atua i teia tuatau, no te mea e manganui te aronga ou. Te akatinamou ra te au Kerititiano pakari i te putuputuanga. E akakeu anga papu to ratou ki runga i te tu me kare te manako maata, noatu e ko teea putuputuanga ta ratou ka aere.

Koi tupu ua mai ei te tupu anga kopapa, te tupu maira te tupu anga i te pae vaerua na roto ua i te tuatau e te aruaru pakari. Kare i te mea poitirere, i to Paulo tuatau, kua poka etai au Kerititiano i te ‘aere rai ki mua i te pakari mou,’ noatu e kua tavini ana i te Atua no etai au mataiti e manganui. (Ebera 5:12; 6:1) Akapeea koe? Me kua tavini ana koe i te Atua no etai au mataiti e manganui me kare no tetai tuatau poto ua, e mea meitaki i reira noou kia akara makitoro ma te tika ia koe uaorai. (2 Korinetia 13:5) Ko koe ainei tetai ka rauka kia kapiki e kua tau tikai, me kare pakari ei au Kerititiano? Me kare ia, akapeea e raukai ia koe kia akapera?

“Te Kite ra, ei Tangata Pakari”

Ka ngoie ua te tamariki i te pae vaerua i te “tauriuriia, e akapeke aereia e te matangi ra, i tera tuatua i tera tuatua, mei te tamariki ra, i te ravenga a te tangata nei, e te pakari i te ravenga tini o te pikikaa ra.” No reira kua raurau mai a Paulo: “Ma te aroa, kia tupu te tau iaia, i te upoko, i te Mesia, i te au mea katoa nei.” (Ephesia 4:​14, 15) Akapeea tetai i te akapera anga? Te na ko ra a Ebera 5:14 e: “Te kai pakari ra, na te tangata pakari ïa, na te aronga no te mātau i kite ei to ratou ngakau i te meitaki e te kino.”

Ka akara ana e kua tereniia te au manako kite karape o te au tangata pakari na roto i te taangaanga anga, me kare kite tikai i te taangaanga i te au kaveinga Pipiria. Papu i reira, kare tetai e pakari viviki i te po; ka anoanoia te tuatau e pakari ei i te pae vaerua. Noatu rai, e maata taau ka rave kia akangoie i toou tupu anga i te pae vaerua na roto i te apii naau uaorai​—koia tikai i te au mea oonu o te Tuatua a te Atua. I te au tuatau i ou akenei kua uriuri Te Punanga Tiaki i te au tumu manako oonu e manganui. Kare te aronga pakari e kopae i taua au atikara ra no te mea “e mea kimingata oki tai papaki.” (2 Petero 3:16) Kareka ra, te inangaro rekareka ra ratou i taua au kai pakari!

Aronga Tutu Aere e te Au Puapii Maroiroi

Kua akaue a Iesu i tana au pipi: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:​19, 20) Ka akakeu katoa te kapiti maroiroi anga ki roto i te angaanga tutuanga i toou tupu anga i te pae vaerua. Eaa i kore ei e tauta i te rave maata i te reira i tei tau ra ki toou au turanga?​—Mataio 13:23.

I tetai taime, ka akariro te au maro anga o te oraanga no te akanooanga i tetai tuatau kia tutu aere ei akaaoanga. Inara, na te “uapou ua atu na” ei tangata tutu aere, te akatutu ra koe i te puapinga i toou kapiti atu anga ki te “evangelia.” (Luka 13:24; Roma 1:16) Penei ka manakoia koe ei ‘akaraanga ra na tei akarongo ra.’​—1 Timoteo 4:12.

Aronga Akono i te Tu Tika

Te o katoa maira i te tupu anga e kia pakari te tauta anga i te akono i te tu tika. Mei tei rekotiia ia Salamo 26:1, kua akakite a Davida: “Tei ia koe te tuatua iaku, e Iehova; i aere ua ana oki au ma te apa kore.” Te tu tika e mako, e te ki anga katoa. Inara, kare te aite anga e tu apa kore. Kua rave a Davida uaorai i te au ara tuke tuke. Inara no te mea kua ariki aia i te ako anga e kua akatikatika i tona aerenga, kua akaari aia e te akamou ra tona ngakau i te inangaro ngakau tae i te Atua ko Iehova. (Salamo 26:​2, 3, 6, 8, 11) Te o maira ki roto i te tu tika te katoa anga, me kare ki anga, o te ngakau akono. Kua akakite a Davida ki tana tamaiti ko Solomona: “Kia kite pu koe i te Atua o to metua nei, ka akamori ei iaia ma te ngakau tiratiratu.”​—1 Paraleipomeno 28:9.

Te o maira ki roto i te akono anga i te tu tika ‘kare i to teianei ao,’ te kore e piri atu ki roto i te au poritiki o te au pa enua e ta ratou au tamaki. (Ioane 17:16) Kia kore katoa koe e rave i te au rave anga pikikaa, mei te poneia, te akaturi, e te takino anga apinga akakona. (Galatia 5:​19-21) E maata atu te aite anga no te akono anga i te tu tika i te kopae ua anga i taua au mea. Kua akamatakite a Solomona: “No te rango mate i kino ei e i pirau ei te manongi a te tangata iro-manongi ra; koia katoa te manga tuatua neneva okotai ra i te tangata rongonui i te pakari e te ngateitei.” (Koheleta 10:1) Ae, noatu “te manga tuatua neneva,” mei te au tuatua kanga tau kore me kare te akainangaro i te tane e te vaine, ka akakino i te ingoa o tei “rongonui i te pakari.” (Iobu 31:1) No reira, e akaari i toou tu pakari na te tauta anga e kia riro ei akaraanga i toou tu, te kopaeanga “i te au tu kino.”​—1 Tesalonia 5:22, King James Version.

Aronga Tapu Mou

Te tiratiratu katoa ra tetai Kerititiano pakari. Ia tatou e tatau ra ia Ephesia 4:24, te raurau ra te apotetoro ko Paulo i te au Kerititiano: “Kia akatangata ou oki ko tei angaia kia tau i te Atua ra, i te tuatua-tika e te tapu mou.” I roto i te au Tuatua Tapu Ereni, te tuatua mua no te “tapu mou” te apai ra i te manako tapu roa, tuatua tika, e te ngateitei. E tangata akono, ngateitei, tetai tangata tiratiratu; te akara marie ra aia i tana au angaanga pouroa ki te Atua.

Eaa etai au tu ka tatanu koe i te tu tiratiratu? Tetai oki koia na te taokotaianga ma te aronga pakari o te putuputuanga i reira. (Ebera 13:17) Te kiteanga e ko Karaiti te Upoko akataoongaia o te putuputuanga Kerititiano, te tiratiratu ra te au Kerititiano ki te aronga akataoongaia e “kia akaangai oki kotou i te ekalesia a te Atua.” (Angaanga 20:28) Mei teaa ra te tau kore kia akaaoa me kare akakino i te mana o te aronga pakari akataoongaia! Kia manako tiratiratu rai koe i te “tavini akono meitaki e te pakari” e te au rima rave te taangaangaia ra kia oronga i te kai pae vaerua “i te ora mou ra.” (Mataio 24:45) Kia viviki i te tatau e te taangaanga i te akakite anga kiteia i roto i Te Punanga Tiaki e tona tokorua.

Akaarianga i te Aroa na Roto i Taau Angaanga

Kua tata a Paulo ki te au Kerititiano i Tesalonia: “E to kotou aroa ia kotou uaorai e pini ua ake, kua maata rava ïa.” (2 Tesalonia 1:3) E turanga puapinga te tupuanga i roto i te aroa o te tupuanga pae vaerua. Kua tuatua a Iesu, mei tei rekotiia ia Ioane 13:35: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” Kare taua tu inangaro taeake e akatukeia e te manako ngakau me kare manako. Kua akakite te Vine’s Expository Dictionary of Old and New Testament Words: “Ka kite uaia te aroa mei te au angaanga tei akakeu ra i te reira.” Ae, ka pakari ua atu koe na roto i teia tu na te taangaanga anga i te aroa!

Ei akaraanga, ia Roma 15:7, ka tatau tatou: “Ka āriki kotou ia kotou uaorai.” Tetai mataara no te akaari anga i te aroa koia oki na te turouanga i toou au taeake irinaki e te aronga ou i te au uipaanga putuputuanga​—ma te pumaana e te oraora! E tauta i te kite matau ia ratou uaorai. E “akono katoa” i tetai atu. (Philipi 2:4) Penei ka akaari koe i te tu takinga meitaki na te pati anga i te au tangata tuke tuke ki toou kainga. (Angaanga 16:​14, 15) I tetai taime ka timata te tu apa ua o tetai ke i te oonu o toou inangaro, inara ia koe e apii ra i te ‘tauturu atu i tetai ma te aroa,’ te akaari ra koe e te pakari maira koe.​—Ephesia 4:2.

Taangaangaanga i ta Tatou Au Apinga kia Akamaata i te Akamori Anga Mou

I te au tuatau taito, kare te katoa anga o te iti tangata o Iehova i akatupu ana i ta ratou apainga kia turu i to Iehova iero. No reira kua tono atu te Atua i te au peroveta, mei ia Hagai e Malaki, kia akakeukeu i Tona iti tangata na teia tu. (Hagai 1:​2-6; Malaki 3:10) Te taangaanga rekareka ra te au Kerititiano i teia tuatau i ta ratou au apinga kia turu i te akamori anga a Iehova. E aru i taua aronga na te akonoanga i te kaveinga ia 1 Korinetia 16:​1, 2, ‘vaio ake [ma te putuputu] i tetai papaki moni’ kia tauturu i te putuputuanga e te angaanga i te ao katoa a te Au Kite o Iehova. Te taputou maira te Tuatua a te Atua: “Ko te ruru ma te akaperepere kore ra, e kokoti ïa ma te maata.”​—2 Korinetia 9:6.

Auraka e ngaropoina i etai atu au apinga naau, toou taime e te maroiroi. E tauta i te “taporoporo marie i te tuatau” mei te au angaanga puapinga kore. (Ephesia 5:​15, 16; Philipi 1:10) E apii e kia mako meitaki i te akapou anga i toou tuatau. Te raveanga i te reira penei ka akariro e kia rauka ia koe te kapiti atu ki roto i te au angaanga no te akonoanga i te Are Uipaanga Patireia e tetai atu au angaanga aiteite te akamaata ra i te akamori anga ia Iehova. Te taangaanga anga i taau au apinga na teia tu te oronga ra i te kite anga tau e te pakari maata ra koe ei Kerititiano.

E Tauta e kia Pakari ua Atu!

Te au tane e te au vaine apiipii tikai e te kite, e aronga tutu aere maroiroi, tei tiama i ta ratou akono anga i te tu tau, tei tiratiratu e te inangaro ua, e te puareinga ra i te oronga i te pae kopapa e te apinga te turuanga i te angaanga o te Patireia te akameitaki maataia ra. No reira rai, te apotetoro ko Paulo i ako ei: “E teianei e vaio atu ana i te tuatua mua o te Mesia; e aere rai tatou ki mua i te pakari mou ra”!​—Ebera 6:1.

Te pakari maata ra ainei koe ei Kerititiano? Me kare te vai ra ainei koe i etai au tu ei tamariki i te pae vaerua? (Ebera 5:13) Noatu e eaa te tu, kia aruaru maata i te taangaanga ia koe uaorai i te apii naau uaorai, te tutuanga, e te akaarianga i te inangaro no toou au taeake. E ariki ua i etai atu ako anga e te akatikatika anga tei orongaia kia koe e te aronga pakari. (Maseli 8:33) E akono i taau apainga ei Kerititiano ma te ki katoa. Ma te tuatau e te maroiroi, ka rauka katoa ia koe “kia riro tatou ravarai ei tangata pakari, i te akarongo okotai, e te kite i te Tamaiti a te Atua ra, kia taea te aite ra i te ki o te Mesia i te maata.”​—Ephesia 4:13.

[Tataanga i te kapi 27]

Te akatinamou ra te au Kerititiano pakari i te putuputuanga. E akakeu anga papu to ratou ki runga i to te reira tu, me kare te manako maata

[Au Tutu i te kapi 29]

Te tauturu ra te aronga pakari i te tu o te putuputuanga na te akono anga i tetai ua atu