“Ka Tau Rai Koe ei Painia Meitaki!”

1. Eaa te manako o tetai tuaine i tana angaanga orometua painia?

¹ “Kare rava e kitea e au tetai ua atu angaanga ke, te ka apai mai i te tu mareka tikai kiaku me kore te tu meitaki i te pae vaerua.” I akakite ei a Kathe B. Palm. Kua pou iaia te au raungauru mataiti i te tavini akaatinga anga ei painia, i te akakitekite anga mei tetai ope ia Tire ki tetai, i Marike Tonga. I te akamanako anga i te tu meitaki o te pae vaerua o taua aronga i roto i te tavinianga tamou, penei ka karanga atu tetai tangata kia koe e: “Ka tau rai koe ei painia meitaki!”

2. Akamarama mai i te tumu ka rauka ai te merengoanga oonu mei te au angaanga pae vaerua.

² Oraanga Merengo Tikai: Kua kite to tatou Akaraanga ko Iesu, i te akamaroiroianga tika tikai i te rave anga i te anoano o tona Metua. (Ioa. 4:34) No reira rai a Iesu i apii ei i tana au pipi ma te irinaki tikai e ka rauka te merengo tika tikai i te rave anga i te au angaanga e piri atura ki te akamori ia Iehova. E mareka ana tatou me akapou i to tatou oraanga i te rave i te au angaanga e akamareka ra ia Iehova. Pera katoa, ia tatou e akapou ra i te taime, te maroiroi, e te au apinga i te tauturu i etai ke, ka mataora maata atu tatou.​—Anga. 20:31, 35.

3. Eaa te mataora ta tatou ka kite mai me akapou maata i te taime i roto i te angaanga orometua?

³ Te maata atu i te taime ka pou ia tatou i roto i te angaanga orometua, te maata atu ia i te au atianga ta tatou ka kite i te mataora i te akamata e te rave i te au apii Pipiria. Noatu te tu manako kore o te au tangata ngutuare, ka kite mai tatou e, e uua atu ta tatou ngai tutu anga i ta tatou i manako ana i mua ana, ia tatou e rauka maira te kite e te tukatau i roto i te angaanga orometua. E taangaanga ana te au painia i te au kite puapinga tei rauka ia ratou mei te Apii Tavini Anga Painia, i muri ake ia ratou i te painia anga e tai mataiti. (2 Timo. 2:15) Ia tatou e tauta ua atura, penei te tatanu katoa ra tatou i te au ua o te tuatua mou te ka uua mai i te au taime a muri mai.​—Kohe. 11:6.

4. Eaa ta te au mapu vaitata i te akaruke i te apii ka akamanako?

⁴ Au Mapu: Ia koe e akaoti ra i taau apii, kua akamanako meitaki ainei koe i toou tuatau ki mua? Tae mai ki teia taime, na taau angaanga apii e akanoo maata ana i taau papaanga. Akapeea koe me taangaanga i te taime taau i akapou ki taau angaanga apii me akaruke koe i te apii? Kore ei koe e pure ma te akamanako i te akakoroanga kia painia tamou, kare e kia aruaru i tetai angaanga moni? Te au tareni taau ka apii​—te akakitekite anga ki te au tangata tukeke te oraanga, te takore i te au arairai anga naau uaorai, te akatupu i te tu akakoromaki, e te kite i te apii—​ka akapuapinga ia koe i roto i te oraanga.

5. Akapeea te au metua e te putuputuanga i te akamaroiroi anga i te angaanga painia?

⁵ Te au metua, te rave ra ainei kotou i ta kotou tuanga i te tauturu i ta kotou tamariki kia iki i te angaanga orometua tamou? Ka riro ta kotou au tuatua e to kotou akaraanga papu i te tauturu ia ratou kia tuku ua rai i te au anoano o te Patireia na mua. (Mata. 6:33) Kua maara ia Ray, tei akamata i te painia i tona akaruke anga i te apii tua rua e: “E manako ua ana toku mama e ka akatupu te painia anga i tetai oraanga merengo tikai.” Ka rauka i te katoatoa i roto i te putuputuanga i te akamaroiroi i te angaanga painia na roto i ta ratou au tuatua e te turuturuanga. Kua akakite a Jose, o Paniora e: “E akara ua ana rai taku putuputuanga i te angaanga painia e ko te angaanga meitaki roa atu ia na te au mapu ou. Kua riro ta ratou au tuatua e te ariki rekareka i te angaanga painia, pera katoa te tauturu ei mea ngoie kiaku i te akamata i te painia.”

6. Eaa ta tatou ka rave me kare tatou e inangaro i te painia i teia taime?

⁶ Autu Anga i te Au Arairai: Akapeea ra me karanga koe e, ‘Kare au e inangaro i te painia.’ Me ko te reira toou manako i te akamataanga, pure kia Iehova no runga i taau e manako ra e e akakite kiaia e, ‘Kare au e manako e ka tau au kia painia, inara ka inangaro au i te rave i te au mea e mareka ra koe.’ (Sala. 62:8; Mase. 23:26) E oti, akara i tana aratakianga i roto i tana Tuatua e te akaaerenga. Manganui te au painia tamou kua “tongi” i te angaanga painia na mua ei au painia tauturu, e na te mataora ta ratou i kite mai i akakeu ia ratou kia aruaru i te angaanga i roto i te tavini anga tamou.​—Sala. 34:8.

7. Akapeea tatou i te takore anga i te manako ekoko e kare e taea te 70 ora i te marama e umuumuia ra?

⁷ Akapeea me te ekoko ra koe e kare e taea te 70 ora e umuumuia ra i te marama? Eaa koe kore ei e tuatua atu ki te au painia, aiteite to ratou turanga ki toou? (Mase. 15:22) E oti i reira, tata i tetai au papaanga tau. Penei ka kite koe e, na te taporoporo anga i te taime no te angaanga orometua mei te au angaanga kare e anoanoia, e ngoie ake i taau i manako i mua ana.​—Ephe. 5:15, 16.

8. Eaa tatou ka tau ei kia akara meitaki akaou i to tatou au turanga i tetai au taime?

⁸ Akara Akaou i Toou Turanga: E taui putuputu ana toou uaorai au turanga. E meitaki i te akara akaou i toou turanga i tetai au taime. Ei akaraanga, te vaitata ra ainei koe i te ritaea mei taau ngai angaanga? Ko Randy, tei ritaea vave, kua karanga e: “Kua riro teia ikianga kia akamata au i te painia tamou e taku vaine, e kua oronga mai te reira i te atianga no maua kia aere atu e tavini i te ngai e anoano maataia ra te tauturu. E maata ua atu taku au akameitakianga i rauka no taku ikianga, inara te mea meitaki maata roa atu koia oki, ko te akava ngakau meitaki.”

9. Eaa ta te au tokorua akaipoipo ka tau kia akamanako?

⁹ Tetai au tokorua, i muri ake i tetai akara mari anga, kua kite mai e kare raua roa ai e inangaroia kia angaanga moni. Tika rai, ka umuumuia te ngutuare tangata kia akamama mai i to ratou oraanga, inara, ka pauna meitakiia te akaatinga anga. Ko John, koi akaruke ua akenei tana vaine i te angaanga moni, kia akamaata atu i tana angaanga orometua, kua karanga e: “Kare atu e manako meitaki atu i te kite e te o atura taku vaine ki te tavini anga ia Iehova i te au ra.”

10. Eaa te ka akakeu i te au Kerititiano kia akamanako atu i te painia?

¹⁰ Akaari Anga i te Aroa e te Akarongo: Kua akariro a Iehova i te tutu anga e ko te angaanga puapinga roa atu ia kia rave tatou. Kare e roa atu ana ka takoreia teia akatereanga taito, e ko te aronga ua e kapiki ra i te ingoa o Iehova te ka ora. (Roma 10:13) Ko te ngakau ki i te aroa nona, e te akameitaki i te au mea tana i rave no tatou, te ka akakeu ia tatou kia akono i te akauenga a tana Tamaiti, kia tutu aere ma te maroiroi. (Mata. 28:19, 20; 1 Ioa. 5:3) Pera katoa, no te akarongo e te noo nei tatou i te au ra openga, e akakeu ia tatou kia rave maroiroi i te ka rauka ia tatou i roto i te angaanga orometua, koi vai ei te tuatau, eiaa kia rave pu tikai i te anoano o teianei ao.​—1 Kori. 7:29-31.

11. Eaa to tatou manako me akakite mai tetai tangata e ka tau rai tatou ei painia meitaki?

¹¹ Ko te painia tamou e maata atu te o maira i to te akapou ua anga i te ora akatakaia no te tutu aere; e akakite anga te reira i to tatou inangaro maata no te Atua. No reira, me karanga atu tetai tangata e ka tau rai koe ei painia meitaki, e ariki i te reira ei tuatua akamaroiroi. E e pure ma te akamanako i te kapiti atu ki te aronga e rave ra i teia tavini anga merengo tikai ki te Atua.

[Tataanga i te kapi 4]

Te au metua, te rave ra ainei kotou i ta kotou tuanga i te tauturu i ta kotou tamariki kia iki i te angaanga orometua tamou?

[Tataanga i te kapi 5]

Kua akariro a Iehova i te tutu anga e ko te angaanga puapinga roa atu ia kia rave tatou.