Akakeuia e“te Peu Taka ke a te Atua”

“I te akarongo anga atu tatou ia ratou i te tuatua anga mai i te peu taka ke a te Atua i to tatou uaorai nei au reo tikai.”​—ANGAANGA 2:11.

1, 2. Eaa te mea umere i tupu i Ierusalema ia Penetekote 33 T.N.?

I TETAI popongi i te tuatau tupu anga rau i te mataiti 33 T.N., kua tupu mai tetai apinga umere ki tetai pupu tane e te au vaine, te au pipi a Iesu Karaiti tei akaputu atura ki tetai ngutuare i Ierusalema. ‘E kare akera i mamia, ko te aruru maira no runga mai i te rangi, mei te matangi viviki maata ra; kua ki rava akera te are i nooia e ratou ra. E kua mama maira te arero manga kia ratou, mei te ai ra te tu . . . , e ki akera ratou ravarai i te vaerua tapu, kua tuatua iora i te tuatua ke.’​—Angaanga 2:2-4, 15.

² Kua akaputu atura tetai urupu maata ki mua i te are. I roto ia ratou e au ngati Iuda tei anauia mai i te au ngai ke, “e au tangata tapu” tei aere maira ki Ierusalema kia akono i te oroa no Penetekote. Kua poitirere ratou no te mea kua rongo atu ratou tataki tai i te au pipi ra i te tuatua anga i to ratou reo tupuna “i te peu taka ke a te Atua.” Akapeea te reira i raukai i te mea e ko te aronga katoatoa i tuatua ra no Galilea maira?​—Angaanga 2:5-8, 11.

3. Eaa te tuatua ta te apotetoro ko Petero i oronga ki te urupu ia Penetekote?

³ Tetai o taua aronga Galilea ra ko te apotetoro ko Petero. Kua akataka mai aia e i etai epetoma tokoiti i mua akera, kua tamateia a Iesu Karaiti e te au tangata tuatua tika kore. Inara, kua akatuakaouia mai e te Atua tana Tamaiti mei te mate maira. I muri akera, kua mama atura a Iesu ki te aronga e manganui o tana au pipi, kapiti katoa ia Petero e etai atura tei reira i teianei. E tai ngauru ra i mua akera, kua kake atu a Iesu ki te rangi. Nana oki i riringi mai i te vaerua tapu ki rungao i tana au pipi. E aite anga ainei to teia no te aronga tei akono ra i te Penetekote? Ae, e tikai. Na to Iesu ra matenga i akanoo i te akapapaanga no ratou kia rauka te akakoreanga i ta ratou ara e kia orongaia ‘mai ïa i te vaerua tapu’ me ka akono ratou i te akarongo kiaia. (Angaanga 2:22-24, 32, 33, 38) No reira i akapeea te aronga akarakara i te ariu anga i “te peu taka ke a te Atua” ta ratou i akarongo atura? E akapeea teia tataanga i te tauturu anga ia tatou kia akataka i ta tatou uaorai tavini anga kia Iehova?

Akakeuia kia Rave Angaanga!

4. Ko teea totou a Ioela tei akatupuia i te ra o Penetekote 33 T.N.?

⁴ I te rauka anga te vaerua tapu, kare te au pipi i Ierusalema ra i taroaroa i te tuaanga i te evangeria o te ora ma etai ke ra, i te akamataanga ma te urupu tei akaputu maira i taua popongi ra. Kua akatupu ta ratou tutuanga i tetai totou meitaki, tei tataia ra e varu anere mataiti i mua akera e Ioela, te tamaiti a Petuela: ‘E riringi atu au i toku vaerua ki rungao i te tangata ravarai; e na ta kotou au tamariki tamaroa e ta kotou au tamaine e totou mai; e moemoeaia mai to kotou au tangata pakari: e kite oki to kotou au tangata ou ra i te orama. E riringi atu au i taku vaerua ki rungao i te au tavini tane e te au tavini vaine i te reira au rā ra . . . e tae ei i taua rā maata e te rikarika o Iehova ra.’​—Ioela 1:1; 2:28, 29, 31; Angaanga 2:17, 18, 20.

5. I roto i teea tu ta te au Kerititiano o te anere mataiti mua ra totou anga? (Akara i te tataanga i raro ake.)

⁵ Kua riro ainei te aiteanga o teia e ka akatu mai te Atua i tetai uki katoa ei au peroveta, te tane e te vaine, i te tu o Davida, Ioela, e Debora, e ka taangaanga ia ratou kia totou i te au mea ka tupu i mua? Kare. ‘Te au tamaroa e te au tamaine [Kerititiano], te au tavini tane e te au tavini vaine’ ka totou i roto i te tu e ka akakeuia ratou e te vaerua o Iehova kia akakite i “te peu taka ke” ta Iehova i rave e ka rave ua atu. No reira ka tavini ratou ei vaa tuatua no Tei Teitei.a Inara, akapeea te akono anga a te urupu ra?​—Ebera 1:1, 2.

6. I te akarongoanga i ta Petero akoanga, eaa ta te manganui o te urupu ra i akakeuia kia rave?

⁶ I muri ake i te akarongo anga te urupu ra ki ta Petero akataka anga, e manganui o ratou tei akakeuia kia angaanga. “Te aronga katoa i āriki marie i tana tuatua” e kua “bapetizoia iora ïa; e kapiti katoaia maira kia ratou e toru katoa paa tausani i taua rā ra.” (Angaanga 2:41) Ei au ngati Iuda natura e te au poroteraita ngati Iuda ra, kua kite ratou i te au tumu o te au Tuatua Tapu. Ko te reira kapiti katoa ki te akarongo i ta ratou i apii ra mei ia Petero, kua oronga mai i te tumu anga no ratou kia papetitoia ‘i te ingoa o te Metua, e no te Tamaiti, e no te vaerua tapu.’ (Mataio 28:19) I muri ake i to ratou papetito anga “kua mou piri tikai atura ratou i ta te au aposetolo i apii ra.” I taua taime rai, kua akamata ratou i te tua i to ratou akarongo ou ma etai ke ra. Ko te tika, “e noo tamou iora ratou ra ki roto i te iero ra, i te au rā katoa, ma te inangaro okotai, . . . i te akameitaki anga i te Atua, e ma te kiteia mai e te tangata ravarai.” Ei tupu anga no teia angaanga akakitekiteanga, “te aronga i akaoraia ra, kua kapitiia ïa e te Atu i te ekalesia ra, kare e rā i tukua.” (Angaanga 2:42, 46, 47) Kua tupu viviki te au putuputuanga Kerititiano i te au enua e manganui i te au ngai i noo ei teia aronga akarongo ou. Kare e ekoko anga ko teianei tupu anga, i tetai tuanga, no ta ratou au tauta anga totomapu i te tutu anga i te “evangelia” i to ratou oki anga ki te kainga.​—Kolosa 1:23.

Te Tuku Maira te Tuatua a te Atua i te Mana

7. (a) Eaa te akavaitata atura i te au tangata o te pa enua katoa ki te akaaerenga a Iehova i teia tuatau? (e) Eaa taau i kite te ka rauka ei tupu uaanga ki te ao katoa e ki toou ngai oki? (Akara i te tataanga i raro ake.)

⁷ Ka akapeea te aronga te inangaro ra kia riro ei au tavini no te Atua i teia tuatau? Ka tau katoa ratou kia apii matakite i te Tuatua a te Atua ra. Ia ratou e rave ra i te reira, ka kite ratou ia Iehova ei Atua tei “takinga-meitaki, e te aroa ua, e te akakoromaki maata, e te meitaki maata, e te tuatua-mou.” (Exodo 34:6; Angaanga 13:48) Ka kite ratou i ta Iehova oronga anga takinga meitaki i te oko na roto ia Iesu Karaiti, ka rauka i tona toto akamaringiia kia tama i ta ratou au ara katoa. (1 Ioane 1:7) Ka ariki katoa ratou i ta te Atua akakoro anga ‘kia akatuakaou mai i te aronga tuatua-tika e te aronga tuatua-tika kore.’ (Angaanga 24:15) Te aroa no te Tumu o teianei “au peu taka ke” ka ki i roto ia ratou, e ka akakeu ia ratou kia tutu aere i teia au tuatua mou okomaata. Ka riro ratou i reira kia akatapuia, ei au tavini papetitoia no te Atua e “kia maata oki to ratou kite i te Atua.”b​—Kolosa 1:10e; 2 Korinetia 5:14.

8-10. (a) Akapeea te tupuanga ki tetai vaine Kerititiano i te akapapu anga e e “mana ririnui” to te Tuatua a te Atua? (e) Eaa ta teia tupuanga i apii ia koe no Iehova e tana akonoanga i tona au tavini? (Exodo 4:12)

⁸ Te kite ta te au tavini o te Atua e rauka ra mei ta ratou apiianga Pipiria kare no vao ua. Ko taua kite ra te akakeu ra i to ratou ngakau, te taui ra i to ratou tu manakoanga, e kua riro ei tuanga no ratou. (Ebera 4:12) Ei akatauanga, tetai vaine ko Camille te ingoa kua rave i te angaanga ei akono i te aronga ruaine. Tetai o tana aronga e tiaki ra ko Martha, ko tetai o te Au Kite o Iehova. I te mea kua makiia a Martha e te dementia, te anoanoia ra kia akono putuputu ia aia. Kua akamaara ua ia aia kia kaikai​—e kia apuku i tana kai. Inara, okotai apinga tei tinamou ra ki roto i te manako o Martha, mei ta tatou ka kite.

⁹ I tetai ra, kua kite atura a Martha ia Camille e aue ra no te taitaia o etai au manamanata nona uaorai. Kua takave atura Martha iaia e kua pati atu kia apii raua i te Pipiria. Inara ka rauka ainei i tetai peretana i to Martha ra turanga kia apii atu i te Pipiria? Ae, ka rauka iaia! Noatu rai kua ngaro te maata anga o tona manako, kare i ngaropoinaia ia Martha tona Atua maata ra; kare katoa i ngaropoina iaia te au tuatua mou okomaata tana i apii ra mei te Pipiria maira. I te tuatau e apii ra raua, kua apii atu a Martha kia tatau a Camille i te au parakarapu takitai ra, kia akara i te au Tuatua Tapu i taikuia maira, kia tatau i te uianga i raro o te kapi ra, e ka pau ei i te reira ra. Kua rave raua i teia no tetai tuatau, e noatu to Martha au kotinga, kua tere a Camille ki mua i te kite i te Pipiria. Kua kite a Martha e ka tau a Camille kia taokotai katoa atu ki etai ke tei inangaro ra i te tavinianga i te Atua. Ma te reira i roto i tona manako kua oronga atu aia i tetai pona e te nga tamaka, kia raukai ia Camille etai apinga tau kia aao me aere atu aia ki tana uipaanga mua i te Are Uipaanga Patireia ra.

¹⁰ Kua akakeuia a Camille e to Martha inangaro aroa ra, tana akatauanga, e te irinaki anga oki. Kua manako aia e ko ta Martha e tauta ra kia apii iaia mei te Pipiria maira e mea puapinga maata ia, no te mea vaitata rai e kua ngaropoina ia Martha te au mea ravarai mari ra kare i ngaropoinaia te au mea tana i apii mei te au Tuatua Tapu maira. I muri iora, i to Camille neke angaia ki tetai atu ngai angaanga, kua kite aia e kua tae te tuatau nona kia rave i te angaanga. I te atianga mua, kua aere atu aia ki roto i tetai Are Uipaanga Patireia, i te aaoanga i te pona e te nga tamaka ta Martha i oronga atura nona, e kua pati atu i tetai apii Pipiria. Kua tere meitaki a Camille ki mua e kua papetitoia.

Akakeuia kia Akaata i to Iehova Au Turanga

11. Kapiti atu ki te maroiroi i te angaanga tutuanga, akapeea tatou i te akakite anga e kua akakeuia tatou e te tuatua Patireia?

¹¹ I teia tuatau, e maata atu i te ono mirioni Au Kite o Iehova tei, aite ra kia Martha e i teianei kia Camille, te tutu aere ra i te “evangelia o te basileia” i te ao katoa. (Mataio 24:14; 28:19, 20) Mei te au Kerititiano o te anere mataiti mua ra, te akakeu oonuia ra ratou e “te peu taka ke a te Atua.” Te ariki ra ratou e te akameitaki anga kia mou i te ingoa o Iehova e kua riringi mai aia i tona vaerua ki runga ia ratou. No reira, kua rave ratou i te tauta anga katoa ‘kia tau to ratou aerenga i te Atu i te au mea katoa e mareka mai ei ra,’ te akonoanga i tana au turanga i te au tu ravarai o to ratou oraanga. I roto i etai atu au mea, te kapiti ra teia i te aruanga i ta te Atua ra au turanga i te kakau e te akamaneaanga.​—Kolosa 1:10a; Tito 2:10.

12. Eaa te akoanga no runga i te kakau e te akamaneaanga ta tatou i kite tei tataia ia 1 Timoteo 2:9, 10?

¹² Ae, kua akanoo mai a Iehova i te au turanga no runga i to tatou akara anga. Kua akakite mai te apotetoro ko Paulo i etai o ta te Atua ra umuumu anga i teianei tu. “E te au vaine ra oki, kia akamanea ia ratou uaorai i te kakau e tau ra, ma te akatietie kore, e te akono meitaki; auraka ma te rauru iri, e te auro, e te poe, e te kakau oko maata ra; Ma te tuatua meitaki ra, ko tei tau i te au vaine i mou i te akono i te Atua ra.”c Eaa ta tatou i kite mei teia au tuatua?​—1 Timoteo 2:9, 10.

13. (a) Eaa te aiteanga o “te kakau e tau ra”? (e) Eaa ka raukai ia tatou kia tuatua e e tau ta Iehova ra au turanga?

¹³ Kua akaari mai ta Paulo au tuatua e ka tau te au Kerititiano “kia akamanea ia ratou uaorai i te kakau e tau ra.” Kare ratou e tau kia mako kore, e kia tau kore, me kare kia kore e tamaia i to ratou akara anga. No reira ko tetai ua atu, noatu ko te aronga e meangiti ua ta ratou, ka rauka taua au turanga tau ra na te akapapuanga e te mako ra to ratou kakau, te ma ra, e te manea ra. Ei akatauanga, i te au mataiti ravarai ka aaere atu te Au Kite i tetai enua i te Apatonga o Marike no etai au kiro mita e manganui na roto i te vaorakau e i muri akera na runga i te vaka no etai ora e manganui kia tae ki ta ratou uruoaanga tapere. Kare i te mea matau koreia no tetai kia topa ki roto i te kauvai me kare kia ngaae tona au kakau i roto i te vaorakau i taua aerenga ra. No reira me tae atu taua aronga ra ki te ngai no te uruoaanga, e putuputu te taime kare to ratou akara anga e manea ana. No reira kua akapou ratou i te taime kia tuitui i te au pitopito, te au tipi, e te pua e te auri i te kakau ta ratou ka aao i te uruoaanga. Te akaperepere ra ratou i ta ratou pati anga ki te kaikai i te kaingakai a Iehova, e te anoano ra ratou kia aao i te kakau tau.

14. (a) Eaa te aiteanga e kia aao i te kakau “ma te akatietie kore, e te akono meitaki”? (e) Eaa te o atura no tatou kia akakakau ‘ei au tangata tei mou ki te akatapuanga i te Atua ra’?

¹⁴ Kua akakite katoa mai a Paulo e ka tau tatou kia aao i te kakau “ma te akatietie kore, e te akono meitaki.” Te aiteanga o teia auraka to tatou akara anga ei mea akaariari tuke roa, akameamea ua, akaariari i te au tuanga o te kopapa, me kare te au tu ou. Kapiti katoa, ka tau tatou kia kakau i te tu te akaata ra i te ‘akatapuanga i te Atua.’ Na te reira e oronga mai i te kai no te manako, kare ainei? Kare ia i te tumu ua no te kakauanga tau i te aereanga ki te au uipaanga putuputuanga e i muri akera ka titiri atu ei ki te matangi i etai atu taime. Ka tau to tatou uaorai akaraanga kia akaata tamou i te tu tapu, te tu akono teitei no te mea e au Kerititiano tatou e te au orometua e 24 ora i te ra. Te kitea ua ia ra e ko to tatou au kakau angaanga e te au kakau no te apii ka tau rai no te tu angaanga ta tatou ka rave. Inara, ka tau tatou kia kakau mako ua e te tapunui. Me ka akaata mai to tatou kakauanga i to tatou irinakianga i te Atua, kare roa tatou e manako ngakau kia unui ki muri mei te akakitekite anga i te au ngai ravarai no te akama anga i to tatou akara anga.​—1 Petero 3:15.

“Auraka e Anoano i Teianei Ao”

15, 16. (a) Eaa ra i puapingai e kia kopae ke tatou i te aruanga i teianei ao i te au tu kakau e te akamaneaanga? (1 Ioane 5:19) (e) No teea tumu i tau ei tatou kia kopae ke i te peu no te kakau e te akamaneaanga?

¹⁵ Te akoanga tei tataia ra ia 1 Ioane 2:15, 16 te oronga katoa maira i te arataki anga i ta tatou ikianga i te kakau e te akamaneaanga. Ka tatau tatou: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra. Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa.”

¹⁶ Mei teaa ra te tau o taua akoanga ra! I te tuatau te maata atura te taomianga i to mua ana, ka tika tatou kia kore e tuku i teianei ao kia akakite mai e akapeea tatou i te kakau anga. Kua kino te au tu o te kakau e te akamaneaanga i te au mataiti i ou akenei. Kare katoa rai te tu kakau te pitiniti e te au tangata angaanga ra e oronga maira i tetai turanga tau e ko teaa te mea tau no te au Kerititiano. Ko teia tetai ua atu au tumu anga i tau ei tatou kia akamanako no te inangaro anga e “eiaa e akatau atu i teianei ao” me te akono ra tatou kia tau ki te au turanga a te Atua e i reira “kia manea te tuatua a te Atua a to tatou Ora ra ia ratou i te au mea katoa ra.”​—Roma 12:2; Tito 2:10.

17. (a) Eaa te au uianga ka rauka ia tatou kia akamanako i te okoanga kakau me kare i te ikianga i te tu? (e) Eaa ra i tau ei te au upoko pamiri kia manako i te akara anga o te au mema uaorai o tona pamiri?

¹⁷ I mua ake ka iki ei me ka oko i tetai kakau, e mea pakari kia ui kia koe uaorai: ‘Eaa ra teia tu i tau ei kiaku? Te akatakaia maira ainei te reira ma tetai tangata teata rongonui​—tetai taku i mareka atura? Kua arikiia ainei e tetai au mema o te pupu noo i te arataa ra me kare na tetai pupu te akakeu ra i te taka keanga, te vaerua meameaau ra?’ Ka tau katoa tatou kia akara vaitata i taua kakau ra. Me e pona ia me kare e pirikoti, eea te roa? Te pakoti anga? E mako ainei te kakau, e tau, e te tapunui, me kare te pipiri rava ra, me kare te akakeu ra i te inangaro, me kare te mako kore ra? E ui kia koe uaorai, ‘Ka akariro ainei toku aaoanga i teia kakau kia akatupu i te turorianga?’ (2 Korinetia 6:3, 4) Eaa ra i tau ei te reira ei akamanakoanga kia tatou? No te mea te tuatua ra te Pipiria e: “Kare katoa oki te Mesia i akarekareka iaia uaorai.” (Roma 15:3) Ka tika te upoko pamiri Kerititiano kia akamanako i te akara anga o te au mema o te pamiri ra. No te akangateitei i te Atua kaka ta ratou e akamori ra, kare te au upoko pamiri e tau kia ekoko i te orongaanga, i te akoanga aroa e te ngaueue kore me te umuumuia ra te reira.​—Iakoba 3:13.

18. Eaa te akakeu ra ia koe kia matakite i toou ra kakau e te akamaneaanga oki?

¹⁸ Te tuatua ta tatou e mou ra no ko mai ia Iehova ra, koia tikai te akatumu anga no te tapunui e te tu tapu oki. (Isaia 6:3) Te raurau ra te Pipiria ia tatou kia aru iaia “mei te tamariki akaperepere ra.” (Ephesia 5:1) To tatou kakau e te akamaneaanga ka rauka kia akaata meitaki me kare kia akakino i to tatou Metua i te rangi ra. E tika tikai ka anoanoia tatou kia akarekareka i tona ra ngakau!​—Maseli 27:11.

19. Eaa te au puapinga te ka rauka mai i te akakite anga “i te au peu taka ke a te Atua” ra kia etai ke atu?

¹⁹ Akapeea toou manako ngakau no “te au peu taka ke a te Atua” taau i apii ana? E tika tikai, mei teaa ra to tatou akameitakianga i te apii anga i te tuatua mou! No te mea kua akono tatou i te akarongo i te toto tei akamaringiia o Iesu Karaiti, kua akakoreia ta tatou au ara. (Angaanga 2:38) Ei tupuanga, e tu ngoie ua to tatou i te tuatua anga ki mua i te Atua ra. Kare tatou e mataku i te mate mei te aronga kare ra o ratou manakonako anga. Kareka ra, tei ia tatou ta Iesu akapapu anga e a tetai ra “e akarongo ei te aronga katoa i roto i te rua i tona reo, E kua aere mai ki vao.” (Ioane 5:28, 29) E aroa ua to Iehova i te akakiteanga i teianei au mea katoatoa kia tatou. Kapiti katoa oki, kua riringi mai aia i tona vaerua ki rungao ia tatou. No reira, te akameitaki anga no teianei au mea meitaki katoa ka tau kia akakeu ia tatou kia akangateitei i tona au turanga teitei e kia akapaapaa iaia ma te totomapu, i te akakite anga i teianei “peu taka ke” kia etai ke atu.

[Au Tataanga Rikiriki i Raro]

Akapeea Koe me Pau?

• Eaa “te au peu taka ke” ta te au tangata i akarongo atu ia Penetekote 33 T.N., e i akapeea ta ratou ariu atu anga?

• Akapeea tetai e riro ei ei pipi na Iesu Karaiti, e eaa te kapitiia atura ki te angaanga ei pipi?

• Eaa ra i puapinga maatai no tatou kia akamanako i to tatou kakau e te akamaneaanga?

• Eaa te au tu ka tau kia akamanakoia me te iki ra e me te tau ra tetai kakau me kare tona tu?

[Tutu i te kapi 15]

Kua akakite a Petero e kua akatuia mai a Iesu mei te mate

[Au Tutu i te kapi 17]

Te akaata meitaki maira ainei toou uaorai akara anga i te Atua taau e akamori ra?

[Au Tutu i te kapi 18]

Ka tika te au metua Kerititiano kia manako atu i te akara anga o te au mema o te pamiri ra