Te Uua ra Ainei te Ua o te Tuatua Mou i Roto i te Aronga Taau e Apii Ra?
I TE akakite mai anga te mapu ko Eric e kare aia e inangaro akaou ana kia kiteaia e ko tetai o te Au Kite o Iehova, kua ati ngakau tikai tona nga metua. Kare raua i kite ana i te reira i te aere mai anga. Ei tamaiti ra, kua piri atu a Eric ki roto i te apii Pipiria a te ngutuare tangata, kua aere ki te au uipaanga Kerititiano, e kua piri kapiti atu ki roto i te angaanga tutu anga ma te putuputuanga. Ei akatutu anga, kua akara anga e tei roto aia i te tuatua mou. Inara i teianei kua aere ke atu aia, kua kite mai tona nga metua e kare te tuatua mou Pipiria i mou ana ki roto iaia. Kua riro taua kiteanga ei poitirere e te mareka kore katoa kia raua roa ai.
Kua kite mai tetai papaki i te au manako ngakau ngere anga aiteite me tapu poitirere ua tetai tangata apiipii Pipiria i te apii. I taua taime ra, e putuputu ana te tangata i te ui kia ratou uaorai, ‘Eaa ra au i kore ei i kite ana i teia i te aere mai anga?’ I na, ka rauka ainei i te kite atu i mua ake ka tupu mai ei te tumatetenga i te pae vaerua e me te uua ra te ua o te tuatua mou i roto i te aronga ta tatou e apii ra? No taua tumu ra, akapeea e papu ei ia tatou e me te angaanga ra te tuatua mou i roto ia tatou e pera katoa i roto i te aronga ta tatou e apii ra? I roto i tana parapore kiteaia no te tangata ruru ra, kua oronga mai a Iesu i tetai akakiteanga ki te pauanga ki teia au uianga.
Kia Itae te Tuatua Mou i te Ngakau
“Te ua nei, koia te tuatua a te Atua,” i karanga ai a Iesu. “Kareka to [tei tatanuia i] te ngai one meitaki, koia te aronga e akarongo i te tuatua, tāpu piri tikai ki roto i te ngakau pikikaa kore e te tau, e e tika i te uua anga i te ua.” (Luka 8:11, 15) No reira i mua ake ka rauka te tuatua mou Patireia i te akatupu mai i tetai ua atu au tupuanga i roto i ta tatou aronga apiipii, kia aka ia te reira ki roto i to ratou ngakau akatutuanga. Kua akapapu mai a Iesu kia tatou e mei te ua meitaki rai i roto i te one meitaki ra, te taime tikai e tukia ai te tuatua mou tu-Atua i tetai ngakau meitaki, kua viviki te reira i te angaanga mai e kua uua mai i te ua. Eaa ta tatou ka akara?
Kia akara tatou i te au tu o te ngakau, kare e ko te akaraanga ua o vao. Ko te tamou ua anga i tetai oraanga matauia no te akamori kare te reira e akakite ua mai ana e eaa tikai te tupu ra i roto i te ngakau o tetai. (Ieremia 17:9, 10; Mataio 15:7-9) Ka umuumuia tatou kia akara oonu atu. Ka kiteaia tetai tauianga papu tikai i roto i te au inangaro, au akakeuanga, e te au mea mua o te tangata ra. Ka rave te tangata tataki tai i te akatupu i te tangata ou, te akatau ra ki to te Atua anoano. (Ephesia 4:20-24) Kia akatutu: I te rongo anga te au Tesalonia i te tuatua meitaki, kua karanga a Paulo e kua ariki vave ua ratou i te reira e ko te tuatua a te Atua. Inara ko to ratou akakoromaki anga, tu tiratiratu, e te aroa tei aru mai tei akapapu kiaia e i te tuatua mou kua “angaanga maroiroi i roto ia [ratou] ra.”—1 Tesalonia 2:13, 14; 3:6.
Ae, noatu eaa tei roto i te ngakau o te tangata apiipii ka kitea vaveia me kore a muri ake tona tu, mei tei akatutuia maira e to Eric akaraanga. (Mareko 7:21, 22; Iakobo 1:14, 15) Ma te tangi ra, tae ki te tuatau e kua kitea pu tikai ia tetai au tu kino tikai i roto i te au angaanga a te tangata ra, penei e kua tureiti roa. Te akaaoanga, i reira, e kia akataka i te au tu paruparu tikai i mua ake ka riro mai ei ratou ei au turori anga i te pae vaerua. Ka umuumu tatou i tetai ravenga i te akara atu ki roto i te ngakau akatutuanga. Akapeea e rauka ai ia tatou i te rave i te reira?
Apii mei ia Iesu
Ae, kua rauka ia Iesu i te tatau tikai i te au ngakau. (Mataio 12:25) Kare e rauka i tetai ia tatou i te rave i te reira. I na, kua akaari mai aia e ka rauka katoa ia tatou i te kite meitaki i te au inangaro, au akakeuanga, e te au mea mua a tetai tangata. Mei tetai taote tau e taangaanga ra i te au ravenga kimikimi kia kite eaa te ngai tarevake i te ngakau tikai o tetai tangata makimaki, kua taangaanga a Iesu i ta te Atua Tuatua kia “akara matariki” e kia akatuera i te “manako e te vananga o te ngakau ra” noatu i te taime i vai uunaia ra rai te reira mei te kiteanga a te katoatoa.—Maseli 20:5; Ebera 4:12.
Ei akaraanga, i tetai atianga kua tauturu a Iesu ia Petero kia matakite i tetai tu paruparu tei riro mai rai i muri ake ei turori anga. Kua kite a Iesu e e aroa to Petero iaia. Ko te tika, kua oake a Iesu kia Petero i “te au taviri o te basileia.” (Mataio 16:13-19) Inara, kua kite katoa a Iesu, te akamou ua ra a Satani i tona mata ki runga i te au apotetoro. I te au ra ki mua, ka aere atu ratou na roto i tetai taomianga pakari tikai kia akaoko. Kua kite papu mai a Iesu i tetai papaki o tana au pipi e te vai ra te au tu paruparu i to ratou akarongo. E no reira kare aia i akama ana i te tou atu kia ratou e eaa ta ratou ka umuumuia kia angaanga. E akamanako ana e akapeea aia i akamata anga i te tuatua i teia manako no te uriurianga.
Te karanga ra a Mataio 16:21 e: ‘I reira to Iesu akamata anga atu i te akakite ki tana au pipi e, e rai tona rave kino angaia, e ka tamate ravaia oki.’ E akara ana e kua akaari a Iesu kia ratou, kare e kua akakite ua kia ratou, eaa te ka tupu kiaia. Te akaraanga kua taangaanga aia i te au irava Pipiria, mei ia Salamo 22:14-18 me kore ia Isaia 53:10-12, te akakite maira e ka rave kinoia te Mesia e ka tamate ravaia. Noatu eaa te tu, na te tatau anga me kore te taiku tika roa mai anga mei te au Tuatua Tapu, kua oronga a Iesu kia Petero e tetai papaki i te atianga kia ariu mai ma to ratou au ngakau. Akapeea ratou i te ariuanga ki te manakonakoanga no te takinga kino?
Ma te poitirere, noatu te tu mataku kore e te maroiroi i akaari mai ei a Petero iaia uaorai, tona ariuanga viviki ua i teia atianga tikai kua akaari mai i tetai tu tarevake kino tikai i roto i tona tu manakoanga. “Auraka takiri ïa, e te Atu” i karanga ai aia, “eiaa koe e peraia mai.” To Petero akamanakoanga kua kite meitakiia e e tarevake, no te mea mei ta Iesu rai i tou atu ei, te manako ra a Petero kare, “ta te Atua ra, ko ta te tangata ra”—e tu tarevake kino tikai te ka taki atu ki te au tupuanga tumatetenga. Eaa ra, i reira, ta Iesu i rave? I muri ake i te ako atu anga ia Petero, kua akakite atu a Iesu kiaia e ki te katoatoa o te au pipi: “Ko tei inangaro i te aru mai iaku, e akaruke aia iaia uaorai, e rave i tana [“rakau tamamae,” NW], ka aru mai ei iaku.” Taangaanga anga i te au manako tei kiteaia ia Salamo 49:8 e te 62:12, kua akamaara aroa aia ia ratou e te vai ra to ratou au manakonakoanga mutu kore, kare ki te tangata nei, tei kore e rauka i te oronga mai i te ora, mari ra ki te Atua.—Mataio 16:22-28.
Noatu e kua tuku ua atu a Petero ki te mataku e tuatau poto ua i muri mai e kua uuna ia Iesu e toru taime, kare e ekokoanga e kua tauturu teia uriurianga e tetai atu kia teateamamao iaia no tetai akaoraanga viviki i te pae vaerua. (Ioane 21:15-19) E 50 ua rai ra i muri mai, kua tu mataku kore a Petero i mua i tetai urupu tangata i Ierusalema i te akakite i to Iesu tuakaou anga. I te au epetoma, te au marama, e te au mataiti tei aru mai, kua aro mataku kore atu aia i te au tapekaanga putuputu, te au papaanga, e te au are tapekaanga, i te akanooanga i tetai akaraanga meitaki tikai no te tu tiratiratu mataku kore.—Angaanga 2:14-36; 4:18-21; 5:29-32, 40-42; 12:3-5.
Eaa ta tatou i kite mai mei te reira? Kua kite maira ainei koe eaa ta Iesu i rave kia kiriti mai e kia akakiteaia mai e eaa to roto i to Petero ngakau? Te mea mua, kua iki aia i te au Tuatua Tapu tau kia akamou i to Petero manako ki runga i te ngai tikai no te akamanakoanga. Aru mai, kua oronga aia kia Petero i te atianga kia ariu mai mei te ngakau. I te openga ra, kua oronga akaou atu aia i te ako Tuatua Tapu i te tauturu ia Petero kia akatano i tona manakoanga e te au manako ngakau. Penei ka manako mai koe e e mamao roa atu teia turanga no te apiianga i toou tu kite, inara e tuku ana kia akamanako tatou i nga tupuanga e rua te akatutu maira e akapeea te akateateamamao anga e te irinakianga ki runga ia Iehova i te tauturu anga i tetai ua atu ia tatou kia aru i to Iesu akaraanga.
Kiriti Mai Anga Eaa to Roto i to Ratou Ngakau
I te kite mai anga tetai metua tane Kerititiano i tana nga tamaroa e rua i roto i te pupu tai e te rua, e kua rave i te kai venevene mei roto mai i te kaingakai o te puapii, kua akanoo aia ia raua ki raro e kua uriuri atu aia kia raua. Kare i akaruke ua ei kanga anga tamariki, kare e kino ana, kua akakite mai te metua tane e, “Kua tauta au i te kiriti mai ki vao mei to raua au ngakau eaa tikai tei akakeu ia raua kia rave i teia apinga kino.”
Kua ui atu te metua tane ki nga tamaroa kia akamaara eaa tei tupu kia Akana, tei akakiteia i roto ia Iosua pene 7. Kua viviki nga tamaroa i te opu i te manako maata e kua aaki mai. Kua akamata takere to raua akava ngakau i te tamanamanata ia raua. E no reira kua tuku te metua tane ia raua kia tatau mai ia Ephesia 4:28, te karanga ra: “Kia kore te keia e keia akaou, inara kia tuku iaia kia angaanga pakari . . . kia rauka iaia tetai mea no te oronga atu ki tetai tei anoano.” I te tuku anga i te tamariki kia akono i te tutaki na te oko mai anga i tetai kai venevene e te oronga anga i te reira ki te puapii kua akaketaketaia te ako anga Tuatua Tapu.
“Kua tauta maua i te kiriti tumu i tetai ua atu au akakeuanga kino i te taime tikai e kitea mai ia,” i karanga ai te metua tane, “e kua tupau atu i te reira ma te au akakeuanga meitaki e te tiama na te uriurianga ma te tamariki.” Na te aruanga ia Iesu i te apiianga i ta raua tamariki, kua rauka tikai i teia nga metua i te au tupuanga meitaki i te au tuatau tei aere ki mua. I te openga ra kua patiia nga tamaroa roa ai kia riro mai ei nga mema no te aronga angaanga i te opati maata i te Betela i Brooklyn, e te tavini ra rai tetai e 25 mataiti i muri mai.
E akamanako ana e akapeea tetai Kerititiano ke mai i te tauturu anga i tana tangata apiipii Pipiria. Te aere ra te tangata apiipii ki te au uipaanga e te piri ra ki roto i te angaanga orometua e kua akakite takere mai i tetai inangaro kia papetitoia. Inara, te akaraanga e te irinaki maata roa ra aia ki runga iaia uaorai e kare kia Iehova. “Ei vaine takaua, kua maata roa tona tu takake i tana i kite ra,” i karanga ai te Kite. “Kua manamanata mai au e te aere atura aia ki tetai tu apikepike i te pae kopapa me kore i tetai inga anga i te pae vaerua.”
No reira kua akono te Kite i te akamataanga i te tuatua atu ki te tangata apiipii no runga ia Mataio 6:33, akamaroiroianga iaia kia taui i te au mea tana e tuku mua ana, kia tuku i te Patireia na mua, e kia irinaki ki roto ia Iehova kia rave mai i te au mea no te meitaki. Kua ui tika atu aia kiaia: “Te tupu ra ainei kia koe i tetai taime i toou nooanga ko koe anake ua e e aka angaanga i te irinaki ki runga i tetai ke, kapiti katoa mai ia Iehova?” Kua akakite mai te tangata apiipii e te vaitata ra aia i te akamutu takiri i te pure. Kua akamaroiroi atu i reira te papuritia iaia kia aru i te akoanga tei kiteaia ia Salamo 55:22 e kia titiri i tana apainga ki runga ia Iehova no te mea, mei ta 1 Petero 5:7 rai e akapapu maira kia tatou, ‘koia oki te tiaki mai ia tatou.’ Kua akakeu taua au tuatua ra i tona ngakau. Te karanga ra te Kite e, “Ko nga taime tokoiti ua i kite ei au iaia i te aue anga.”
Kia Taangaanga ua Atu i te Tuatua Mou ki Roto ia Koe Ra
Te kiteanga i te aronga ta tatou e apii ra i te ariu mai anga ki te tuatua mou Pipiria kua apai mai i te rekareka maata kia tatou. Inara, me ka puapingaia ta tatou au tautaanga, ka inangaroia tatou kia akanoo rai tatou i te akaraanga meitaki. (Iuda 22, 23) Ka inangaroia tatou katoatoa kia “rave akaoti ua i to [tatou] uaorai ora ma te mataku e te rutetetete.” (Philipi 2:12) Te kapiti maira te reira kia putuputu i te tukuanga i te marama o te Tuatua Tapu kia turama ki roto i to tatou uaorai au ngakau, kimianga i te au tu, au inangaro, e te au akainangaro penei ka umuumuia kia akatanoia.—2 Petero 1:19.
Ei akatauanga, kua akameangiti mai ainei toou maroiroi akenei no te au angaanga Kerititiano? Me ko te reira ia, no teaa ra? Penei ake ko tetai tumu e te irinaki maata roa ra koe ki runga ia koe uaorai. Akapeea koe i te kite mai anga e me ko te reira rai te tu? E tatau ia Hagai 1:2-11, e e akamanako tika tikai i reira i runga i ta Iehova aereanga no te uriurianga ma te au ngati Iuda akaoki akaouia. I reira e ui kia koe uaorai: ‘E maata roa ainei au i te manamanata ma te tu tinamou i te pae moni e te au inangaro i te pae materia? ‘Te irinaki tikai ra ainei au ia Iehova kia akono mai i toku ngutuare tangata me tuku au i te au apinga pae vaerua ko te mea mua ia? Me te manako maira rai au e kia akono rai au iaku uaorai na mua?’ Me te umuumuia ra te au akatanotanoanga ki toou manakoanga me kore ki te au manako ngakau, auraka e taroaroa i te rave i te reira. Te ako anga Tuatua Tapu, mei tei kiteaia ra ia Mataio 6:25-33, Luka 12:13-21, e 1 Timoteo 6:6-12, te oronga maira i te tumu no tetai akarakaraanga kia tau te paunu no te au umuumuanga i te pae materia e te au apinga, ko tetai ra te akapapu tamou ra i ta Iehova akameitakianga.—Malaki 3:10.
Teia tu no te akara matatio tika ua anga ia koe uaorai ka riro rai ei mea pakari tikai. Te akatikaanga ki te au tu paruparu tikai me akakiteia mai kia tatou ka riro ei mea ngata i te pae o te manako ngakau. I na, me rave takinga meitaki koe i te tauturu i taau tamaiti, taau tangata apiipii Pipiria, me kore ia koe uaorai—noatu eaa te tu mamae o tetai apinga me kore penei te tukia ra kia koe uaorai—penei te rave meitaki ra koe i te takainga mua ki te akaoraanga i tona oraanga me kore i toou uaorai.—Galatia 6:1.
Eaa, ra, me kare taau au tautaanga e uua maira i te au tupuanga meitaki? Auraka e viviki i te tuku i te au. Te akatanoanga i tetai ngakau apa ua ka riro ia ei mea aka angaanga, kaimoumou taime, e tetai taime e tautaanga manamanata tikai. Inara ka riro katoa te reira ei tutaki anga ia.
Te mapu ko Eric, tei taikuia i te akamataanga, i te openga ra kua mako mai tona akamanakoanga e kua akamata akaou i te “aaereanga i roto i te tuatua mou.” (2 Ioane 4, NW) “I te kite anga roa mai au i taku i ruti ei i oki mai ei au kia Iehova,” i karanga ai aia. Ma te tauturu a tona nga metua, te tavini tiratiratu nei a Eric i te Atua. Noatu e kua kopae ana aia i tetai taime ra i te au tautaanga taokioki a tona nga metua kia maani iaia kia kimi i tona ngakau, i teianei kua ariki oonu aia i ta raua i rave ei. “E meitaki tikai toku nga metua,” i karanga ai aia. “Kare roa raua i kore ana i te inangaro mai iaku.”
Te turama anga i te marama no ta te Atua Tuatua ki runga i te ngakau o te aronga ta tatou e apii ra e akakiteanga ia no te aroa takinga meitaki. (Salamo 141:5) E tamou ua atu i te kimikimi i te ngakau o taau tamariki e taau aronga apiipii Pipiria no tetai akakiteanga e te akamouia ra tikai te tu Kerititiano ki roto ia ratou. E taangaanga ua i te tuatua mou ki roto i tetai ke e i roto ia koe uaorai na te “akono meitaki anga i te tuatua mou ra.”—2 Timoteo 2:15, NW.
[Tutu i te kapi 29]
Kua akaari mai ta Iesu au tuatua i tetai tu paruparu i roto ia Petero
[Tutu i te kapi 31]
Taangaanga i te Pipiria kia uuti mai ki vao eaa tikai tei roto i te ngakau