Au Tupuanga Puapinga te Urianga i te Au Pipiria Reo Aperika

KUA roa akenei te aronga inangaro i te tatau Pipiria mei Europa e Marike Apatokerau i te kite anga e, ka anoanoia kia rauka i te au tangata Aperika i te tatau i te Tuatua a te Atua i roto i to ratou uaorai au reo. Ei akatupu i teia akakoroanga meitaki, e manganui te au tangata tei aere atu ki Aperika i te apii i te au reo Aperika. Kua rauka i tetai papaki i te tata i teia au reo e i te maani i tetai au tikitinari. I muri ake i te reira, kua akamata ratou i te uri i te Pipiria ki roto i te au reo Aperika tuke tuke e manganui. Kare teia i te angaanga ngoie ua. “Penei e maata te au mataiti ka pou i tetai tangata uri i te kimikimi anga, i mua ake ka kitea mai ei iaia te tuatua tano tikai penei no te au irinakianga Kerititiano ngoie roa atu e te puapinga,” e akamarama maira The Cambridge History of the Bible.

I te 1857 ko te iti tangata Teuana te mea mua tei rauka mai tetai urianga o te Pipiria katoa i roto i tetai o te au reo mua o Aperika, kare i tataia ana.a Kua neneiia e kua ruruia te reira ki roto i te au tuanga ke ke, kare ei puka okotai. I tetai tuatau i muri mai, kua rauka mai te au urianga o te Pipiria i roto i tetai au reo Aperika. E maata teia au urianga Aperika mua tei roto te ingoa o te Atua, ko Iehova, i roto i te au Tuatua Tapu Ebera, me kore i te “Koreromotu Taito,” e te au Tuatua Tapu Ereni Kerititiano, me kore i te “Koreromotu Ou.” Inara, ko te au mea tei uri akaouia, pera te au urianga ou, na te aronga kare e akangateitei ana i te ingoa tapu o Iehova ko Tei Tata i te Pipiria, i uri. Kua aru ratou i te au peu tika kore a te ngati Iuda i te mono anga i te ingoa o te Atua ki te au taoonga, mei te Atua me kore mei te Atu. No reira i anoanoia ai kia rauka tetai urianga Pipiria tei akaoki akaou mai i te ingoa o te Atua, no te au tangata Aperika tei inangaro i te Atua.

Mei te au mataiti o te 1980, kua tauta pakari te Pupu Akaaere o te Au Kite o Iehova kia uriia te New World Translation of the Holy Scriptures ki roto i tetai au reo tumu o Aperika. Tei tupu mai, i teia tuatau nei e anere ua atu au tauatini tangata i Aperika tei inangaro i te Pipiria, tei rauka kia tatau i te New World Translation i roto i to ratou reo enua. No reira i teianei, ka rauka te katoaanga me kore tetai tuanga ua o te New World Translation, i roto i e 17 reo ke ke i Aperika.

Rekareka tikai te aronga tatau o teia au Pipiria i roto i te au reo Aperika e kua rauka mai tetai urianga tei taangaanga i te ingoa kaka o te Atua, ko Iehova. Ei akaraanga, i te tu anga a Iesu i roto i te tunako i Nazareta, kua akakite aia i tana angaanga na te tatau anga i tetai tuanga o te pokaikai a Isaia, i reira ka kiteaia te ingoa o tona Metua. (Isaia 61:1, 2) Kia tau ki te Evangeria a Luka i roto i te New World Translation, kua tatau a Iesu: “Tei rungao iaku te vaerua o Iehova, no te mea kua akatainu aia iaku kia akakite i te tuatua meitaki ki te putaua, kua tono mai aia iaku kia tutu aere i te ora ki tei tapekaia e kia kite akaou te mata o te matapo, kia akaora i tei taitaia te ngakau, kia tutu aere i te mataiti inangaro a Iehova.”​—Luka 4:18, 19.

Tetai tupuanga puapinga ke mai i roto i te urianga o te au Pipiria i te reo Aperika kua tupu te reira i roto ia Aukute 2005. I taua marama ra, tere atu i te 76,000 kopi o te New World Translation i roto i te au reo e tuatuaia ra i Aperika, tei neneiia ki ko i te opati manga o te Au Kite o Iehova i Aperika Apatonga. Kapitiia mai ki roto i taua numero ra e 30,000 Pipiria i roto i te reo Tona. Kua tukuia mai teia urianga nei i ko i te Uruoaanga “Te Akarongo Tu Atua” a te Au Kite o Iehova i Timipapue.

I taua marama mataora ra, kua rekareka tikai te au manuiri tei turoto mai i te opati manga i Aperika Apatonga i te kite anga i te au urianga o te Pipiria i roto i te reo Aperika. “Kua mataora tikai au e te rekareka no te tikaanga takake kia piri atu ki te urianga o te New World Translation i roto i te reo Tona e tetai atu au reo Aperika,” i tuatua ai a Nhlanhla, tetai mema o te pamiri Betela e angaanga ra i te ngai ruru anga puka. Ae kua akataka mai tikai aia i te manako o te pamiri katoa o te Betela i Aperika Apatonga.

Teianei ka tae viviki ua atu te au Pipiria ou ki te au tangata i Aperika e te mama atu i to te taime i maaniia ai i te au enua i vao mai e i tukuia mai ei mei reira. Tei puapinga roa atu, i teianei ka rauka vave ua i te au tangata Aperika tetai urianga tano meitaki e taangaanga ra i te ingoa tapu o Tei Tata i te Pipiria, koia oki ko te Atua ko Iehova.

[Tataanga Rikiriki i Raro]

[Tutu i te kapi 12]

Te ingoa o te Atua i roto i te Pipiria Tuana tei neneiia i te 1840

[Akameitakianga]

Harold Strange Library of African Studies

[Tutu i te kapi 13]

Au manuiri mei Tuatirani te akara ra i te au Pipiria ou e maaniia ra i ko i te manga i Aperika Apatonga